Revelation 21 - Chishemanituu Utayimuwin: Kaa Uskaach Testament

Kaa uskaach kihchikiishikw ekw maak kaa uskaach aschii

¹ Ekw kaa waapahtamaan e uskaach kihchikiishikw kaye aschii e uskaach. Wesh an weskach kihchikiishikw kaye an weskach aschii shaash chii paasikunaakunh. Chihchikamii kaye namui uhchi ihtakun.

² Nichii waapahten maak an kaa payehchisiimakahch ihtaawin kihchikiishikuhch e uhchi asiimakahch. Chishemanituu e ihtaat chii uhchipayuu. Eukw uu kaa uskaach Jerusalem. Muyaam uschiskwewaan e chii miyunaakuhiisut che unaapemit ekun kaa ishinaakuhch.

³ Ekw kaa pehtawak awen anite chisheuchimaau tehtapuwiniyuu e ihtakuniyich e uhchi ayimit. Chii chisheweu. Mwaau kaa itwet, “Iin aweyuuh e ihtaayihch ekut che ihtaat ekw Chishemanituu. Kata wiichimeu. Eukunh aniyuuh iinuuh che utiiniimit. Wiya kata ihtaau mekwesiinuu e ihtaayich aniyuuh wechishemanituumitutaakut.

⁴ Chika kaasiichaapahweu maak tahtwaau e uhchikuwaapiyich. Namui ekw kata uhchi ihtakuniyuu nipuwiniyuu maak misimeyihtamuwiniyuu. Namui kaye ekw kata uhchi ihtakuniyuu maatuuwiniyuu maak e wiisacheyihtaakanuyich. Wesh misiwe an weskach kaa ispayihch chekwaan namui shaash ihtakun.”

⁵ Ekw an kaa apit anit chisheuchimaau tehtapuwinihch kaa itwet, “Misiwe chekwaan nuuschihtaan.” Ekw kaa iishit, “Masinaha uu. Wesh chika chii taapwehtaakanuuh kaye taapwemakan uu e itweyaan.”

⁶ Ekw maak kaa itwet, “Shaash misiwe chekwaan nichiishihtaan. Eukw niya shaash kaa ihtaayaan eshkw ekaa mitun chekwaan uhchi ihtakuhch kaye eukw niya eshkw che ihtaayaan iskutak misiwe chekwaan chiishipayihche. Eukw niya misiwe chekwaayuu kaa chihchipayihtaat kaye eukw niya che chiishihtaayaan misiwe chekwaan. An awen che nuuhteyaapaakwe sehchei nika minihaau aniyuu nipiiyuu anite aniyuu anit wehchi miyaakanuut awen kaachiche pimaatisiiwiniyuu kaa uhchi muuschichuuniyich.

⁷ Eukw uyuu che ishi aanische miyak an awen che shaakuuchihtaakwe taan che ishi kakwechihiikut machi chekwaayuu. Kaye maak niya nika Uchishemanituumitutaakw ekw maak wiya che utawaashiimitutawak.

⁸ Ekw anichii awenichii ekaa kaa suuhchistehetwaau chechii wiihtahkwaau e taapweyimaatwaau Jesus, anichii kaa chiiwekaapuushtahkwaau taan kaa ishi taapweyimaatwaau Jesus, anichii naashch kaa machaatisiitwaau, anichii kaa nipahaatwaau aweyuu, anichii nanaahkuu kaa ishi wiinisuu pimaatisiitwaau, anichii kaa miteuwaatisiitwaau, anichii kaa nuuchiishtuwaatwaau manituuhkaan ekw maak anichii kaa wiich nanatayitwaau machi ishkuteu saakahiikanihch chika ishuwepinaakanuuch. Eukw uu niishu nipuwin.”

Kaa uskaach Jerusalem

⁹ Ekw peyakw anichii niishwaashch kaa tashitwaau enchilch kaa tahkunahk peyakw aniyuuh kaa muutaayaayikwaauh wiiyaakanh anit kaa saakaschineyich taan che ishi nanehkaateyimuhaakanuyikupanenh aweyuuh kaa pechi naasit. Ekw kaa iishit, “Aashtam maah. Chika waapahtiitan an ushchiskwaawaan, aniyuuh che wiichimaat an Maanishchaanish.”

¹⁰ Ekw Kaa payehchisiit Ahchaahkw kaa pechi piihchishkuut. Ekw an enchil anite naashch e ishpaanaayich wachiyuu kaa pechi ituhtahiit. Nichii waapahtiikw maak aniyuu kaa payehchisiimakaniyich ihtaawiniyuu Jerusalem kaa ishinihkaateyich kihchikiishikuhch e uhchi aasiimakaniyich Chishemanituu e ihtaayich uhchi.

¹¹ E ishi chiihkaayaashtuweyich anit e ihtaat Chishemanituu ekut wehchi chiihkaayaashtech an ihtaawin. Naashch kaa miyuushishit asinii e itaashtuwet ekun kaa itaashtuwech, mwehch an asinii Jasper kaa ishinihkaasut kaa usaawaastawet ekun kaa itaashtuwech an ihtaawin. Chii saapunaakun maak mwehch an shaapuwaapiskw asinii kaa ishinaakusit ekun kaa ishinaakuhch.

¹² Naashch chii aspaanaau an kaa waaskaakaapuuch waaskaa an ihtaawin. Chii niishushaapunh ishkwaahtemah anite wehchi piihtukaanuuhch kaye chii niishushaapuuch enchilich e kanuushkuwaahtawetwaau. Misiwe maak anit aniyuuh e niishushaapuuhkwaauh ishkwaahtemah chii masinaateyuuh utishinihkaasuwinawaauh anichii kaa niishushaap piihtau itiskaanesitwaau Israel iinuuch.

¹³ Anite maak neuwiich e ishi pimitashtech an ihtaawin chii naanishtin aniyuuh ishkwaahtemh. Anite ishi waapanuutaahch chii nishtin. Kaye anite waapanuutaahch chii nishtin. Miin anite shaawinuutaahch ekw maak anite nakaapehanuutaahch chii nishtin.

¹⁴ Chii niishushaapuuch e maamihchaapischisitwaau asiniich anit kaa tehchikaapuuhch an misiwe kaa ishi waaskaakaapuuhch anit ihtaawinihch. Uchii maak asiniich ekut kaa masinaateyikwaau utishinihkaasuwinawaau anichii kaa niishushaapuutwaau apastalach aniyuuh Maanishchaanish kaa wiyaapamaat.

¹⁵ Ekw an enchil kaa pechi ayimihiit chii tahkunam tipaskunikanaahtikuyuu e ushaaushuuliyaawaapiskuuniyich. Chipaa tipaaskunam aniyuu ihtaawiniyuu kaye aniyuuh ishkwaahtemh ekw maak aniyuu kaa waaskaakaapuuniyich waaskaa aniyuu ihtaawiniyuu.

¹⁶ Newiich maak taapituu chii ishi kachiihcheyaau an ihtaawin. Peyakunihch chii iskwaau e ishpish iyakashkaach kaye e ishpish ishpaanaach. Ekw an enchil kaa tipaaskunahk aniyuu ihtaawiniyuu aniyuu utipaaskunikanaahtikw e aapachihtaat, niyaayinushaapwaau mitahtumitanuu aschiiyuu tipahiikanh chii iskwaayuu kaye ekun mwehch kaa ishpish ayaskaskaayich kaye ekun kaa ishpish ishpaanaayich.

¹⁷ Ekw miin aniyuu kaa waaskaakaapuuniyich misiwe waaskaa aniyuu ihtaawiniyuu kaa tipaaskunahk. Niishwaau mitaahtumatanuu miin kutwaashaapw misit ekun kaa ishi ishpaanaayich. Aniyuuh maak taan e ishi tipaaskunamiyich naapeuh chekwaayuu ekun kaa ishi tipaaskunahk an enchil aniyuu.

¹⁸ An maak kaa waaskaakaapuuhch misiwe waaskaa an ihtaawin, asinii jasper kaa ishinihkaasut chii uhchi ushihtaakanuu. Ekw an ihtaawin maauch e payehchisiyit kaye maauch e miyushit ushaaushuuliyaawaapiskw chii uhchi ushihtaakanuu.

¹⁹ Anichii maak kaa maamihchaapischisitwaau asiniich anit kaa tehchikaapuuhch an misiwe kaa ishi waaskaakaapuuhch anit ihtaawinihch. Misiwe chii miyunaakuhaakanuuch nanaahkuu e ishinaakusitwaau e miyushitwaau asiniich e aapatisitwaau. An niishtam asinii kaa aapatisit eukun jasper kaa ishinihkaataakanuut. Miin an niishu e ihtaat asinii kaa aapatisit eukw sapphire kaa ishinihkaataakanuut. Ekw an nishtu e ihtaat asinii kaa aapachihaakanuut eukw agate kaa ishinihkaataakanuut. Miin an wehchi ihtaat eukw emerald kaa ishinihkaataakanuut.

²⁰ Ekw an niyaayinuu kaa ihtaat asinii e aapachihaakanuut eukw onyx kaa ishinihkaataakanuut. An nikutwaashch kaa ihtaat eukw carnelian kaa ishinihkaataakanuut. Ekw an niishwaashch e ihtaat eukw kaa usaausit quartz kaa ishinihkaasut. Miin an wehchi ihtaat eukw beryl kaa ishinihkaataakanuut. An peyakushteu kaa ihtaat topaz ishinihkaataakanuu. Ekw miin an wehchi ihtaat eukw chalcedony kaa ishinihkaataakanuut. Miin an kaa aapatisit peyakushaap kaa ihtaat turquoise ishinihkaataakanuu, ekw an maahchishtai kaa aapatisit amethyst ishinihkaataakanuu.

²¹ Aniyuu maak niishushaap ishkwaahtemah kaa miyuushishit kaye e misichihtit es kaa waapisit chii uhchi ushitaakanuuh. Ekw aniyuuh meskanuuh an ihtaawin tekash chii ushaaushuuliyaawaapiskuunh, chii shaapwaastehtinh muyaam waasenitaakanaapiskw kaa ishinaakuhch.

²² Namui maak wii nuuhchi waapahten chisheayimiheukamikw anit. Wesh Utipeyihchikeu Chishemanituu maauch siyuuhkaatisiit ekw maak an Maanishchaanish muush ihtaauch anit aniyuu ihtaawiniyuu. Namui kata uhchi nitaweyihtaakun chechii ihtakuhch ayimiheukamikw anite chechii nituu maamihchimaakanuutwaau.

²³ Namui nituweyihtaakusuu piisim maak tipischipiisim chechii uhchi waashtuwech an ihtaawin. Wesh e ishpish chiihkaayaashtuweyich ati e ihtaat Chishemanituu ekut wehchi chiihkaayaashtech an ihtaawin. Kaye an Maanishchaanish e ihtaat ekut wehchi chiihkaayaashtech.

²⁴ Misiwe maak awenichii e itiskaanesitwaau utah aschiihch ekut che uhchi waashtenimaatwaau aniyuu waashtewiniyuu anit aniyuu ihtaawinihch kaa uhchipayiyich. ekute e ituhtataatwaau uchisteyihtaakusuwinawaauh neshta uweyuutisiiwinawaau chisheuchimaauch utah aschiihch kaa ihtaatwaau.

²⁵ Muush maak chika aapahiikuteuh aniyuuh ishkwaahtemh ati wehchi piihtukaanuuhch an ihtaawin. Namui wiiskaat kata uhchi chipahiikanuuh wesh namui nihtaa kata uhchi tipiskaau anite.

²⁶ ekute che ituhtataatwaau uweyuutisiiwinawaau kaye e shuuliyaauniyikwaau umiiwewinawaauh anichii utah aschiihch kaa ihtaatwaau.

²⁷ Namui chika uhchi pachishtinikanuu chekwaan e maayaatahch chechii ihtakuhch anit an ihtaawin. Namui kaye chika chii piihcheu an awen nitawiin kaa ihtit maak kaa wiich nanatayit. Mikw anichii kaa masinaateyikwaau utishinihkaasuwinawaau anite aniyuuh Maanishchaanish upimaatisiyuu masinahiikaniihch chika chii piihcheuch aniyuu ihtaawiniyuu.