Revelation 20 - Chishemanituu Utayimuwin: Kaa Uskaach Testament

Peyakwaau chishemitaahtumitanuu pipun

¹ Ekw kaa waapamak enchil kihchikiishikuhch e uhchi pechi asiit. Uu maak enchil chii tahkunam aapahiikaniyuu chechii apahahk aniyuu nitaamihch aschiihch kaa ishi mista pukuneyaayich. Puuchisiyaapiiyuu kaye chii tahkunam.

² Ekw kaa maakunaat aniyuuh mista manichuusha. Eukw uu chishe chinepukw machimanituu maak Satan kaa ishinihkaasut. Ekw an enchil kaa maahkupitaat aniyuuh mista manichuusha. Peyakwaau chishe mitaahtumitanuu pipun maak chika ishpish maahkupisuyuuh.

³ Iskutak maak kaa maahkupitaat aniyuuh mista manichuusha ekw kaa puuhchewepinaat anite aniyuu kaa mista pukuneyaayich. Kaa aataapishkahwaat anite kaye chii chiishaawaachihtaau anit e ihtaayich ekaa chechii aapahwaakanuyich paatish chii miyaaupayikwaawenh aniyuuh peyakwaau chishemitaahtumitanuu pipun. Eukw uyuu kaa ihtuutawaat ekaa miin chechii wiyeshimaayich misiwe e itiskaanesiyich aweyuu. Iskutak maak peyakwaau chishemitaahtumitanuu pipun utihchipayihche ekw weipishchiish che aapihkunaakanuut.

⁴ Ekw miin kutach chekwaan kaa waapahtiikuyaan. Chisheuchimaau tehtapuwinh nichii waapahten. Chii ihtaauch maak anichii kaa apitwaau aniyuuh chisheuchimaau tehtapuwinh. Chii miiyaakanuuch uchii chechii wiyaaskunichetwaau. Ekw kaa waapamakwaau anichii ahchaahkuch kaa chimikwekuhwaakanuwaakupanenich aniyuu uhchi e chii tipaachimaatwaau Jesus taan kaa ihtiyich kaye maak e chii wawiihtamuwaatwaau Chishemanituuh utayimuwiniyuu. Namui uhchi nuuchiishtuwewaakupanenich wiyawaau aniyuuh machi aweshiisa maak aniyuuh manituuhkaan mwehch an machi awesiis e ishinaakusit kaa ishihaakanuyich. Namui kaye uhchi ayaaweuch aniyuu uchischinuwaachihchikaniyuu uskahtikuwaahch maak unihiiwinitihchiiwaahch. Kaau chii pimaatisiyuuch uchii ekw kaa tehtapitwaau aniyuuh chisheuchimaau tehtapuwinh. Chii wiich chisheuchimaaumeuch maak Jesus peyakwaau chishemitaahtumitanuu pipun ishpish.

⁵ Eukw maak uu niishtam che wanishkaanaakanuutwaau anichii kaa nipitwaau. Anichii maak kutakach kaa nipitwaau namui uhchi wanishkaauch wiyawaau paatish kaa miyaaupayiniyikwaauh aniyuu peyakwaau chishemitaahtumitanuu pipun.

⁶ Shaweyihtaakusuuch kaye nuwach payehchisiyuuch anichii kaa wiichihiiwetwaau anite niishtam kaa wanishkaanaakanuyich kaa nipiitwaauh. Namui machi ishkuteu saakahiikaniyuu chika uhchi tipeyimikuuch wiyawaau. Chika atushkuweuch Chishemanituuh ekw maak Jesus Christ kaye chika wiich tipeyihchikemeuch Jesus Christ peyakwaau chishemitaahtumitanuu pipun ishpish.

Machimanituu kaa tepihaakanuut

⁷ Iskutak maak chii chiishipayiniikwaawenh aniyuuh peyakwaau chishemitaahtumitanuu pipun ekw che aapahwaakanuut machimanituu anite aniyuu kaa chipahwaakanuut.

⁸ Chika nituu wiyeshimeu maak misiwe e itiskaanesiyich aweyuuh utah aschiihch. Eukw uyuuh misiwe e itiskaanesiyich aweyuuh Gog ekw maak Magog kaa ishinihkaataakanuyich. Chika maamuuneu chechii maasihcheyich. Mista mihchetiyuu maasichesuuh. Muyaam yekaau yaayeu anite chihchikamiihch e ishpish weyuuchiminikaayich ekun e ishpish mihchetiyich.

⁹ Misiwe e ispichiskamikaayich aniyuu aschiiyuu chii ati ituhteuch. Chii waaskaaskamuch aniyuuh ihtaawiniyuu anit e ihtaayich kaa taapwehtamiitwaauh, eukw aniyuu ihtaawiniyuu Chishemanituu naashch kaa saachihtaayich. Mikw maak ishkuteyuu kihchikiishikuhch chii uhchi pechi pahchishtiniyuu anite uhchi Chishemanituu e ihtaat. Tekash kaa ishkwaasukutwaau.

¹⁰ Ekw maak machimanituu, an kaa wiyeshimaat uyuuh aweyuu, kaa kaahchitinaakanuut ekw anite machishkuteu saakahiikanihch kaa ishuwepinaakanuut anite e ishkwaateyich chekwaayuu e usaawaapahteyich naashch e wiinimaasteyich. ekute shaash kaa ishuwepinaakanuyich aniyuu machi awesiis ekw maak aniyuu machi uchischiwehiichesuu. Kaachiche maak chika wiisacheyihtamuch e chiishikaayich kaye e tipiskaayich.

Maahchishtai wiyaaskunichewin

¹¹ Ekw kaa waapahtamaan e mishaach chisheuchimaau tehtapuwin. Chii waapaau an tehtapuwin. Nichii waapamaau maak an awen kaa apit anit. Misiwe chiishikw ekw maak aschiiyuu chii ati paasikunaakuniyuuh uhchishkuu e ihtaat. Namui maak miin uhchi ihtakuniyuuh.

¹² Nichii waapamaauch maak misiwe anichii awenichii kaa nipuwaakupanenich. Misiwe kaa chisteyihtaakusitwaau kaye anichii ekaa kaa chisteyihtaakusitwaau nichii waapamaauch. Chii uhchishkuukaapushtamuch aniyuu chisheuchimaau tehtapuwiniyuu. Chii ihtakun maak masinahiikanh e aapahiikanuuhkwaauh. Miin maak kutach masinahiikan chii aapahiikanuu. Uu maak masinahiikan ekut mesinaasutwaau anichii awenichii che ayaatwaau kaachiche pimaatisiiwiniyuu. Anichii maak kaa nipitwaau chii wiyaaskunaakanuuch mikw taan kaa ihtiwaakupanenich. Misiwe taan kaa ihtitwaau chii masinaateyuu anit aniyuuh masinahiikanh.

¹³ Chihchikamiih chii pachishtineu aweyuuh anite kaa ihtaayich. Misiwe aniyuuh aweyuuh nipiihch kaa nistaapaaweyikupanenh chii pachishtineu che nituu wiyaaskunaakanuyich. Nipuwin ekw maak chiipaischii chii pachishtineuch kaa nipiitwaauh. Misiwe anichii kaa nipitwaau chii pachishtinaakanuuch che wiyaaskunaakanuutwaau. Misiwe maak paahpeyakw chii wiyaaskunaakanuuch taan kaa ihtuwaakupanenich.

¹⁴ Nipuwin ekw maak chiipaischii machishkuteu saakahiikanihch chii ishuwepinikanuu. Uu machi ishkuteu saakahiikan eukw uu niishu nipuwin.

¹⁵ An maak awen ekaa kaa masinaateyich utishinihkaasuwin anite masinahiikanihch anit mesinaasuyich aniyuuh aweyuuh che ayaayich kaachiche pimaatisiiwiniyuu machishkuteusaakahiikanihch chii ishuwepinaakanuu.