Revelation 2 - Chishemanituu Utayimuwin: Kaa Uskaach Testament

Taan kaa itasinahamuwaakanuutwaau Ephesus kaa ishinihkaateyich ihtaawiniyuu kaa ihtaatwaau

¹ Eukw uu itasinahamuu an enchil kaa naanaakachihaat umaamuuayimihaauh anite Ephesus kaa ihtaayich, “Eukw uyuu e itwet an kaa tahkunaat niishwaashch achahkusha unihiiwinitihchiihch, an kaa papaamuhtet anite niishwaashch kaa ushaaushuuliyaanaapiskuniyikwaau waashtenamaakanaahtikw e ihtakuniyikwaauh.

² Chichischeyimitinaawaau misiwe taan kaa pechi ihtiyekw. Chichischeyimitinaawaau taan kaa ishpish mista aapatisiyekw. Chichischeyimitinaawaau kaye muush e chii siipiiwesiyekw e nachishkamekw chekwaan. Nichischeyihten ekaa nitaweyimekw awen e machaatisiit chechii ihtaat anit e ihtaawekw. Kaye chichii nituu chischeyimaawaauch anichii kaa itwetwaau apastalach e itaapatisitwaau. Anichii maak kaa miskuwekuch e nanataitwaau namui kuuhchi pachishtinaawaauch chechii ihtaatwaau anit mekwesiin e ihtaayekw.

³ Muush chichii siipiiwesiinaawaau e nachishkamekw chekwaan. Chichii aayimuhunaawaau kaye e nuushuushkuuyekw. Namui maak kuuhchi nuuhtipuuniinaawaau e taapwehtamekw.

⁴ Mikw maak peyakw chekwaan ekaa miyeyihtamaan e ihtiyekw eukw uu ekaa ishpish saachihiyekw taan kaa ishpish saachihiyekw uskach kaa chihchi taapweyimiyekw.

⁵ Chischisikw maa taan kaa ishpish saachihiyekw uskach. Ekun aa maak e ishpish saachihiyekw anuhchiish. Kweskaatisiikw kaye kaau ihtikw taan kaa chii ihtiyekw eshkw naashch e chii saachihiyekw. Wesh ekaa kweskaatisiyekwe nika takushin che utinamaan an chiwaashtenimaakanaahtikuwaau.

⁶ Mikw maak peyakw chekwaan e miywaach e ihtiyekw eukw uu e uhkaatamuwekw taan e ihtitwaau anichii Nicolaitan kaa ishinihkaataakanuutwaau, muyaam niya e ishi uhkaatamuch.”

⁷ “Misiwe chiyawaau kaa nituhtamekw, suuhk wii nisituhtamukw taan e itaat Kaa payehchisiit Ahchaahkw umaamuuayimihaauh. Anichii awenichii che shaakuuchistaatwaau machaatisiiwiniyuu nika miyaauch chechii miichitwaau miinsa anit uhchi pimaatisiyuu mistikuhch. Eukuu mistikw kaa ihtaat anite Chishemanituu unihtaauchihchikan aschiihch.”

Taan kaa itasinahamuwaakanuutwaau Smyrna kaa ishinihkaateyich ihtaawiniyuu kaa ihtaatwaau

⁸ Eukw uu itasinahamuu an enchil kaa naanaakachihaat umaamuuayimihaauh anite Smyrna kaa ihtaayich, “Eukw uyuu e itwet an niishtam kaa ihtaat kaye maahchishtai che ihtaat, an kaa nipit kaye kaau kaa wanishkaat.

⁹ Nichischeyihten taan e ishi nanehkaateyimuhiikuyekw. Nichischeyihten e chistimaatisiyekw mikw maak yaapach chimiisitisiinaawaau. Nichischeyihten taan e ishpish machaayimuumitaakuch anichii Jewa nititiskaanesinaan kaa itwetwaau, ekaa maak Jewa itiskaanesitwaau. Machimanituu e ihtaayich uhchiyuuch anichii.

¹⁰ Ekaawii kushtaachikw taan che ishi nanehkaateyimuyekw. Machimanituu chika kakwechihiikuwaau e ihtuutaataakw pasch chechii chipahukuwekw chipahutuukamikuhch. Mitaahtw chiishikaauh chika ishpish nanehkaateyimunaawaau. Ekaawii maak puuniikw e taapweyimiyekw aat wii nipahiikuyekwe. Ekw maak che kaaniyuwiyekw chisheuchimaau astutin eukuu kaachiche pimaatisiiwin.”

¹¹ “Misiwe chiyawaau kaa nituhtamekw, suuhk wii nisituhtamukw taan e itaat Kaa payehchisiit Ahchaahkw umaamuuayimihaauh. Anichii che shaakuuchihtaawaakwenich kakwechihiiwewiniyuu namui chika uhchi aahkuhiikuuch niishu nipuwiniyuu.”

Taan kaa itasinahamuwaakanuutwaau Pergamum kaa ishinihkaateyich ihtaawiniyuu kaa ihtaatwaau

¹² Maau itasinahamuu an enchil kaa naanaakachihaat umaamuuayimihaauh anite Pergamum kaa ihtaayich, “Eukw uyuu e itwet an kaa ayaat iituu kaa ishi kaasaayich nitupayuuhkumaaniyuu.

¹³ Nichischeyihten anit waachiyekw, machimanituu e uchimaaut anit. Aat maak anit e wiichiyekw yaapach namui chipuuniinaawaau e taapweyimiyekw. Namui kuuhchi chiiwekaapuushtunaawaau aat anit mekwaach kaa nipahaakanuut aniyaa kaa nuushuushkuut Anitipas, an kuiskw kaa chii ishi tipaachimit. Anit waachiyekw ekut kaa nipahaakanuut, anite machimanituu waachit.

¹⁴ Chiwii aayimuutamaatinaawaau chekwaayuuh ekaa meyeyihtamihiikuyaan. Ihtaauch awenichii anit e ihtaayekw e nituhtahkwaau taan e ishi Chiskutamaacheyich Balaam. Uu Balaam chii chiskutamuweu Balak taan chechii ihtuutawaayich Israel iinuuh chechii machituutamiyich e miichiyich chekwaayuu e chii machishtawehamuwaakanuyich maanituuhkan kaye maak chechii wiinisuu pimaatisiyich.

¹⁵ Ihtaauch kaye pasch anit e ihtaayekw aniyuu e ihtitwaau, e nituhtuwaatwaau kaye e ihtuutamuwaatwaau taan e ishi Chiskutamaacheyich aniyuu Nicolaitan kaa ishinihkaatisuyich.

¹⁶ Puuniikw e machituutamekw, kweskaatisiikw. Ekaa uu che uhchi ihtuwekwe wiipach nika takushin anite e ihtaayekw. Ekw che maasihiikwaau anichii ekaa kaa wii nakatahkwaau umachihtwaawinawaauh ninitupayuuhkumaan e aapachihtaayaan nituunihch kaa uhchipayihch.”

¹⁷ “Misiwe chiyawaau kaa nituhtamekw, suuhk wii nisituhtamukw taan e itaat Kaa payehchisiit Ahchaahkw umaamuuayimihaauh. Anichii che shaakuuchihtaawaakwenich taan che ishi kakwechihiikutwaau machi chekwaayuu nika ashamaauch aniyuu kihchikiishikw aaihkunaauh kaa kaayaakanuyich. Nika miyaauch asinii e waapaapischisiyich anit mesinaateyich e uskaayich ishinihkaasuwiniyuu. Namui maak awen chischeyihtam uyuu ishinihkaasuwiniyuu mikw an awen che miyaakanuukwe eukun che chischeyihtahk.”

Taan kaa itasinahamuwaakanuutwaau Thyatira kaa ishinihkaateyich ihtaawiniyuu kaa ihtaatwaau

¹⁸ Ekw miin kaa itikuyaan, eukw uyuu itasinahamuu an enchil kaa naanaakachihaat umaamuuayimihaauh anite Thyatira kaa ihtaayich. “Eukw uyuu e itweyich Chishemanituu Ukusisa, uschiishikuh muyaam ishkuteu kaa ishinaakuniyikwaauh, kaye usith muyaam kaa wiipaapischisit shuuliyaawaapiskw e waashteyaapischisit kaa ishinaakuniyikwaauh,

¹⁹ Nichischeyihten misiwe taan e ihtiyekw. Chichischeyimitinaawaau taan e ishpish saachihiituyekw kaye muush kuiskw e ihtiyekw. Chichischeyimitinaawaau e waawiichihekuch kutakach awenichii kaye e siipiiwesiyekw e nenehkaateyimuyekw. Chichischeyimitinaawaau etituu anuhchiish mistahii e ihtuutamekw taan kaa ihtiyekw uskach.

²⁰ Mikw maak chiwii wiihtamaatinaawaau chekwaan ekaa miyeyihtamihiikuyaan. Chinituhtawaawaau an iskweu Jezebel kaa ishinihkaasut mwehch uchischiwehiichesuu kaa itahiisut. Wiyeshiheu nitaapachihaakanh e chiskutamuwaat wiinisuwinihch chechii ishi pimaatisiyich kaye e ihtuutawaat chechii miichiyich chekwaayuu manituuhkaan e chii machishtawehamuwaakanuyich.

²¹ Nichii ashuwaapamaau maak chechii kweskaatisiit namui maak uhchi wii nakatam uwiinishuwaatisiiwin.

²² Nika ihtuutawaau chechii nanehkaateyimut unipewinihch. Kaye anichii kaa wiich pisikwaatisiimaatwaau aniyuu iskweu nika ihtuutawaauch naashch chechii nanehkaateyimutwaau ekaa che uhchi nakatamuwaakwenich aniyuu e ishi machaatisiitwaau.

²³ Nika nipahaayuuh aniyuu kaa nuushuushkaakut. Ekw maak misiwe anichii umaamuuayimihaauch che chischeyimitwaau niya e aawiyaan an kaa chischeyimaat aweyuuh taan nihaau e iteyihtamiyich kaye taan nihaau e ishi teheyich. Misiwe e tashiyekw chika waweshihiitinaawaau taan mikw kaa ishi machituutamuwekwe.

²⁴ Misiwe maak chiyawaau Thyatira kaa ihtaayekw ekaa kaa aapatahtamekw uu kaa ishi machi chiskutamaakaanuuhch, chiyawaau ekaa kaa chischeyihtamuwekw machimanituu uchiimuuch ihtuwinh, namui chinitaweyihtamaatinaawaau kutach chekwaan chechii ihtuutamekw,

²⁵ mikw suuhk che wii mamechiminamekw taan e ishi ayaayekw paatish utihchipayihche an e chiishikaach miin che takushiniyaan.

²⁶ Anichii che shaakuuchihtaawaakwenich taan che ishi kakwechihiikutwaau machi chekwaayuu kaye ekaa wiiskaat che puuniiwaakwenich e ihtuutahkwaau niya e ishi nituweyimakwaau chechii ihtitwaau che ishpish ekaa takushinuuch, nika miyaauch chechii uchimaaututawaatwaau nanaahkuu e itiskaanesiyich aweyuuh.

²⁷ Aniyuu tipeyihchewiniyuu kaa pechi miyich Nuuhtaawiih eukw aniyuu che miikwaau kaye wiyawaau. Anite maak Chishemanituu utayimuwinihch kaa itashteyich, tekash chika uchimaahkahtuweu. Aniyuuh ekaa che nituhtaakuukwe chika piikuhweu mwehch wiyaakan tekash e piikuhiikanuuhkwaau ekun che ihtuutawaat.

²⁸ Nika miyaauch kaye waapan achahkusha.”

²⁹ “Misiwe chiyawaau kaa nituhtamekw, suuhk wii nisituhtamukw taan e itaat Kaa payehchisiit Ahchaahkw umaamuuayimihaauh.”