Revelation 19 - Chishemanituu Utayimuwin: Kaa Uskaach Testament

Kaa miywaataakanuuhch kihchikiishikuhch

¹ Miin kaa ishi waapahtiikuyaan chekwaan. Nichii pehten mwehch naashch e mihchetuwetahkwaau awenichii anite kihchikiishikuhch e uhtahtewetahkwaau e itihtaakuhch. Naashch chii chisheweuch e itwetwaau, “Maamihchimaahkw Chishemanituu. Wiya eukw kaa pimaachihiitahkw. Naashch taapwe chisteyihtaakusuu kaye naashch suuhcheyihtaakusuu.

² Wesh misiwe taapituu ishi wiyaaskuneu aweyuuh kaye nihaau e iteyihtaakuniyich chechii ishi wiyaaskunaakanuyich ekun e ishi wiyaaskunaat. Chii wiyaaskuneu maak aniyuuh kaa miyu chischeyimaakanuyich pisikwaatisiiskweuh. Mihchetu aweyuu utah aschiihch chii wiyeshiheu uu iskweu taan kaa itaatisiit. Chishemanituu chii waweshiheu aniyuu pisikwaatisiiskweuh e chii nipahaayich aniyuuh Chishemanituuh kaa atushkuwaayich.”

³ Ekw miin kaa itwetwaau e chishewetwaau, “Maamihchimaahkw Chishemanituu. E akwaapahtech an kaa chisteyihtaakuhch ihtaawin kaa ishkwaatech kaachiche kata itaapahtepayuu ishpimihch.”

⁴ Anichii maak niistanuu neu kaa chisteyihtaakusitwaau chisheinuuch ekw maak anichii kaa neutwaau kaa pimaatisiitwaau awenich chii uchihchiihkunapayistuweuch kaye chii ati nuuchiishtuweuch Chishemanituu, aniyuu kaa apiyich anit chisheuchimaau tehtapuwinihch. Chii iteuch, “Maamihchimaataau Chishemanituu. Amen.”

An Maanishchaanish uniipuu makushewin

⁵ Ekw anite chisheuchimaau tehtapuwinihch kaa uhchi pehtaakusit awen e itwet, “Maamihchimaataau Chichishemanituuminuu, misiwe chiyawaau kaa atushkuwekw, chiyawaau kaa nanihchiishtuwekw, misiwe kaa chisteyihtaakusiyekw kaye chiyawaau ekaa kaa chisteyihtaakusiyekw.”

⁶ Ekw kaa pehtuukwaau e mihchetuwetahkwaau awenichii muyaam nipii e chisheweyaachuuhch kaye muyaam nimischuuch e pehtaakusitwaau e itihtaakusitwaau. Chii iteuch, “Hallelujah, Utipeyihchikeu Chishemanituu maauch kaa suuhkaatisiit wiya tepeyihchicheu.

⁷ Muuchicheyihtahtaau maak kaye sichiyesitaau. Maamihchimaataau aniyuu e ishpish chisteyihtaakusit. Wesh shaash utihchipayuu che niipuut an Maanishchaanish. Shaash chiishi ayeskuwiihkaatisuu an uschiskwewaan.

⁸ Chii miiyaakanuu an uschiskwewaan machunishiyuu kaa shuushawekasiyich naashch kaa miyuwekasiyich chechii chichishkahk. Mitun maak chii waaseskusteyuuh uchekwaanimh kaye naashch chii payehkaniyuuh.” Eukw uyuu kaa itwetaau. Uu maak machunish e ishpish miyuwekasich ekun e ishinaakuniyikwaauh ukuiiskw ihtuwinawaauh anichii kaa taapwehtahkwaau.

⁹ Ekw kaa pechi iishit enchil, “Masinaha uu, shaweyihtaakusuuch anichii kaa wiishaamaakanuutwaau e makushaanuyich aniyuu Maanishchaanisha uniipuu makushewiniyuu.” Ekw miin kaa ati itwet an enchil, “Eukw uyuu kaa itwet Chishemanituu, taapwemakaniyuu maak.”

¹⁰ Nichii uchihchiihkunipayistwaau maak chechii nuuchiishtuuk uu enchil. Mikw maak nichii itikw, “Ekaa wii an ihtih. Wesh kaye niya nitatushkuwaau Chishemanituu muyaam chii ekw maak chiichishaanich e ihtiyekw, misiwe anichii kuiskw kaa ishi waawiihtahkwaau aniyuu taapwewiniyuu Jesus kaa waapahtiiweyich. Chishemanituu eukw nuuchiishtuu.” Ekun kaa iishit an enchil. Wesh aniyuu taapwewiniyuu Jesus kaa pechi waapahtiiwet eukw aniyuu kaa suuhcheyihtaakuhiikutwaau anichii uchischiwehiichesuuch taan kaa ishi ayimitwaau.

An awen kaa tehtapit kaa waapasiyich kaapalakaskweuh

¹¹ Ekw kaa waapahtamaan kihchikiishikw e aapahiipayihch. Chii uhchi nuukushuu maak kaapalakaskweu e waapisit. An maak kaa tehtapit aniyuuh kaapalakaskweuh kaa taapweucheyihtaakusit kaye kaa taapwet chii ishinihkaataakanuu. Kuiskutaatisiiwinihch ishi wiyaaskunicheu kaye kuiskutaatisiiwiniyuu maasihchestam.

¹² Uschiishikuh muyaam ishkuteyuu e chiihkaayaashtuweyich e wiihkuyepayiyich ishinaakuniyuuh. Mihcheniyuuh chisheuchimaau astutin e chichishkahk. Masinaateyuu ishinihkaasuwiniyuu anit e ihtaat ekaa aweyuuh chischeyihtamiyich. Mikw wiya chischeyihtam aniyuu ishinihkaasuwiniyuu.

¹³ Akuhpiyuu chichishkam mihkuhch e chii chistaanikanuyikupane. “Chishemanituu utayimuwin” ekun e ishinihkaataakanuut.

¹⁴ Maasihchesuuh maak kihchikiishikuhch kaa ihtaayich chii uhchi nuushuushkaakuu kaa waapisiyich kaapalakaskweuh e aapachihaayich. Naashch kaa miyuwekaniyich kaa shuushawekasiyich machunishiyuu e waapekisiyich ekun e ishinaakuniyikwaauh uchekwaanimuwaauh uchii maasihchesuuch. Naashch payehkaniyuuh aniyuuh uchekwaanimuwaauh.

¹⁵ E kaasaayich nitupayiyuuhkumaaniyuu uhchipayuu utuunihch an kaa tehtapit kaapalakaskweuh. Eukw uyuu che aapachihtaat chechii tepihaat e tahtuskaanesiyich aweyuuh. Namui maak kata uhchi manaatisiyuu uchimaaute. Chika waapahtiiweu Chishemanituuh maauch siyuuhkaatisiyich e ishi aahkwaateyihtaakuniyich utaahkuyuwesuwiniyuu. Muyaam anite miinishah kaa maamihchiminikaakwaauh kaa chii takuhiikanuuhkwaau shuuminaapuu e ushihtaakanuuhch ekun che iteyihtaakuniyich iskutak waweshihaate aweyuu.

¹⁶ Utakuhpihch ekw maak upwaamihch masinaateyuu ishinihkaasuwiniyuu. Itashteyuu “Mwaauch e chisteyihtaakusit e tashiyich misiwe Utipeyihchikeuh kaye wiya maauch suuhcheyihtaakusuu e tashiyich misiwe chisheuchimaauh.”

¹⁷ Ekw miin kutak enchil kaa waapamak e niipuut anite e chihkaasuyich piisim. Misiwe piyesuuh kaa ispahamiyich chiishikuhch e papaamihiyaayich chii tepwaateu. Chii chisheweu aniyuu e tepwaataat. Chii iteu, “Aashtamukw misiwe. Pechi maamuuyihkw, che pechi makusheyekw taan kaa ishi miyu ayeskuushtamaataakw Chishemanituu.

¹⁸ Aastamukw che miichuwekw chisheuchimaauch ekw maak nitupayuu uchimaauch wiyaasuwaauh. Pechi miichuwaahkw wiiyuwaauh shimaakanishach kaapalakaskweuch ekw maak anichii kaa tehtapitwaau aniyuuh kaapalakaskweuh. Misiwe awenichii kaa nipitwaau wiiyuuwaauh pechi miichuwekw, kaa kuuhpaneutwaau maak ekaa kaa kuuhpaneutwaau, kaa chisteyihtaakusitwaau maak ekaa kaa chisteyihtaakusitwaau.”

¹⁹ Ekw kaa waapamak an machi awesiis ekw maak misiwe chisheuchimaauch utah aschiihch e maamuuwiitwaau chechii nitupayihkahtuwaatwaau aniyuuh anit kaa waapasiyich kaapalakaskweuh kaa tehtapiyich ekw maak aniyuuh umaashihchesiimiyuu.

²⁰ Ekw kaa maakunaakanuutwaau an machi awesiis ekw maak an machi uchischiwehiichesuu. Eukw uu machi uchischiwehiichesuu kaa maamishkaach ihtit uhchishkuu aniyuuh machi awesiisa e ihtaayich. Ekut kaa uhchi wiyeshihaat aniyuuh aweyuuh kaa utinamiyich aniyuuh machi awesiisa uchiisaawaachihiiwewiniyuu kaye kaa nuuchiishtuwaayich aniyuu manituuhkaan muyaam aniyuuh machi awesiisa e ishinaakusiyich kaa ishihaakanuyich. Taapishkun an machi awesiis ekw maak an machi uchischiwehiichesuu chichi iiniihch chii ishuwepinaakanuuch anite machishkuteu saakahiikanihch anite e ishkwaateyich e usaawaapahteyich chekwaayuu naashch e wiinimaasteyich.

²¹ Misiwe maak aniyuuh ushimaakanisiimuwaauh an machi awesiis ekw maak an kaa wiyeshihiiwet uchischiwehiichesuu chii nipahaakanuuyuuh aniyuu nitupayuuhkumaaniyuu utuuniihch aniyuuh kaa tehtapit kaapalakaskweuh kaa uhchipayiyich e aapataniyich. Misiwe maak anichii piyesuuch chii chiishpuhiisuuch e miichitwaau aniyuuh miiyuuh.