Revelation 18 - Chishemanituu Utayimuwin: Kaa Uskaach Testament

Kaa wanaatihch an ihtaawin Babylon kaa ishinihkaatech

¹ Iskutak kaa chiishi waapahtiikuyaan uu maahchishtai kaa ishi waapahtiikuyaan ekw miin kutak enchil kaa waapamak kihchikiishikuhch e uhchi asiit. Naashch mistahii chii miyaakanuukupane tipeyihchewiniyuu uu enchil. Misiwe e ispichiskamikaayich aschiiyuu chii waashtuweyuu kaa ishpish chiihkaayaashtuwet.

² Ekw kaa itwet uu enchil e chishewet wanaachihtaakanuu, “Wanaachihtaakanuu. Babylon an kaa chisteyihtaakuhch ihtaawin tekash wanaachihtaakanuu. Ekut ekw waachitwaau misiwe e ishinaakusitwaau machiahchaahkuch naashch e maayaatisiitwaau kaye e wiineyihtaakusitwaau. Ekut kaye ekw waachit misiwe e ishinaakusit kaa wiineyihtaakusit kaye ekaa kaa muwaakanuut piyesuu.

³ Wesh anichii anit kaa wiichitwaau misiwe e itiskaanesiyich aweyuuh naashch wehpem chii uhchi nihiipayihtuweuch chechii wanaachihiikuyich e wiinisuu pimaatisiyich. Muyaam e chii minihaatwaau shuuminaapuuyuu chechii chiishkwepeskaakuyich ekun kaa ishinaakuniyich aniyuu kaa ihtuutawaatwaau. Chii pechi wiich wiinisuu pimaatisiimikuuch chisheuchimaauh utah aschiihch kaa ihtaayich. Ekw aniyuuh e ataaweyich chekwaayuu kaa uhchi pimaachihuyich chii ushuuliyaamihiisuyuuh taan kaa ishi ekaa uhchi puunipayiyich e wii weyuutisiitwaau. Wiinisuupimaatisiiwinihch chii uhchi ushuuliyaamihkaasuuch.” Eukw uyuu kaa itwet an enchil.

⁴ Ekw miin kutak awen kaa pehtuuk kihchikiishikuhch e uhchi ayimit e itwet, “Chiyawaau nitiinimitikw anit kaa ihtaayekw wiiwiikw an ihtaawin ekaa kaye chiyawaau che machituutamekw muyaam taan e ihtitwaau anichii anit kaa ihtaatwaau kaye maak ekaa chechii asich waweshihiikuyekw iskutak waweshihaakanuutwaawenich.

⁵ Wesh kihchikiishikuhch ishpish ishpaanuushteyuuh umachituutamuwinawaauh kaa ishpish wesa chii mista machituutahkwaau. Chischisiyuuh maak Chishemanituuh taan kaa ishi machituutahkwaau. Ekw maak che waweshiikutwaau.

⁶ Mwehch kaa ihtuutawaatwaau nitiiniimh uchii iinuuch ekun ihtuutawaahkuch. Nihaau tip wii ishpish waweshihaahkuch taan chipaa ishpish waweshihaakanuuch kaa ishpish chii machituutahkwaau. Aniyuu kaa ishi wanituutawaatwaau aweyuuh ihtuutaweuch ekaa mitun chechii nakaawiiskaakuyich che ishi aahkuyuwesiistaakuyich Chishemanituu. Niishwaau maak chechii ishpish aahkuyuwesiistaakutwaau wiyawaau Chishemanituuh ihtuutawaahkuch.

⁷ Mwehch kaa ishpish chii chisteyihtaakuhiisutwaau uchii iinuuch kaye mwehch kaa ishpish naashch misiwe chii ishi mamiyeyihtamihiisutwaau nanaahkuu e wii ishi wawehchihutwaau ekun mwehch ihtuutawaahkuch chechii ishpish macheyihtahkwaau taan che ishpish nanehkaateyimuhaakanuutwaau. Wesh uu ihtaawin mwehch e maamihchimut awen utehiihch ekun e aihch. Itwemakan, ‘Muyaam chisheuchimaaskweu nititapin. Namayeu kaa peyakut iskweu niya. Kaye namui wii niya nihtaa nika uhchi muushitaan taan e ishi misimeyihtahk iskweu e wanihaat unaapemh.’

⁸ Uyuu maak e iteyihtahkwaau sischikuuch misiwe chika maausikupayuu taan che ishi nanehkaateyimuhaakanuutwaau. Kata mwaausikupayuuh maayaach itaaspinewinh, misimeyihtamuwiniyuu ekw maak kauhkatewiniyuu. Aniyuu utihtaawinawaau tekash kata mestaakahteyuu wesh suuhkaatisiyuuh aniyuuh Utipeyihchikeu Chishemanituu kaa wiyaaskunikutwaau.”

⁹ Anichii maak chisheuchimaauch misiwe e ispichiskamikaayich uyuu aschiiyuu kaa ihtaatwaau kaa wiich wiinisuu pimaatisiimaatwaau aniyuuh aweyuuh anit kaa ihtaayich kaye naashch misiwe kaa ishi mamiyeyihtamihiisutwaau nanaahkuu e wii ishi wawehchihutwaau mwehch aniyuu aweyuu anit kaa ihtaayich kaa ihtiyich chika maatuuch kaye chika nanehkaateutamuch waapahtahkwaawenich e pasiteyich aniyuu ihtaawiniyuu.

¹⁰ Waahiyuu anite chika uhchikaapuuwach wesh chika kushtaachuuch kaye wiyawaau chechii asich waweshihaakanuutwaau. Ekw che itwetwaau, “Taapwe kushtaatikun. Taapwe kushtaatikun. An ihtaawin Babylon kaa ishinihkaatech nuwach chii suuhcheyihtaakun kaye naashch chii chisteyihtaakanuu. Mikw maak peyakw tipahiikan chii ishpish tashiihkaakanuu tekash chechii wanaachihtaakanuuhch.”

¹¹ Anichii maak e ataawetwaau chekwaayuu kaa uhchi pimaachihutwaau misiwe e ispichiskamikaayich aschiiyuu e uhchiitwaau chika maatuuch kaye chika maamaateumuuch e wanaachihtaakanuyich aniyuu ihtaawiniyuu wesh taapaa ekw ihtaayuuh aweyuuh chechii utinamiyich utataawewinawaauh.

¹² Namui ekw ihtaayuuh aweyuuh chechii utinamiyich taan e ishi ayaatwaau chekwaayuuh ushaaushuuliyaawaapiskuhch maak waapishuuliyaawaapiskuhch e chii uhchi ushihtaakanuyikwaauh. Namui ekw ihtaayuuh aweyuuh chechii utinaayich utasiniimuwaauh kaa miyushisiyich, maak aniyuuh kaa waaseyaapischisiyich. Namui ekw ihtaayuuh aweyuuh chechii utinamiyich umachunishimuwaauh kaa shuushawekaniyikwaauh naashch kaa miyuwekasiyikwaauh maak aniyuuh umachunishiwaauh kaa paumuhkwekaniyikwaauh maak aniyuuh kaa asinekaniyikwaauh ekw maak aniyuuh kaa mihkwekaniyikwaauh. Namui ekw ihtaayuuh aweyuuh che utinaayich misiwe e ishinaakusiyich kaa wiihchimaakusiyich mistikw kaa ayaawaatwaau chechii ataawetwaau. Namui ekw ihtaayuuh aweyuuh chechii utinamiyich nanaahkuu e ishinaakuniyikwaauh chekwaayuuh waapikunihch maak kaa shuuliyaawiyich mistikw maak kaa wiipaapischisiyich shuuliyaawaapiskwa kaa uhchi ushihtaakanuyikwaauh. Namui ekw ihtaayuuh aweyuuh chechii utinamiyich aniyuuh chekwaayuuh piywaapiskuhch maak asiniih kaa shuusuwaapischisiyich kaa uhchi ushihtaakanuyikwaauh.

¹³ Namui kaye ihtaayuuh aweyuu chechii utinamiyich nihtaauchihchikanihch kaa uhtinikanuyich pimiiyuu kaa wiihchimaakuniyich maak aniyuuh niipisiih kaa wiichimaakuniyikwaauh. Kaye chii ayaauch e ataawetwaau aniyuuh kaa wiihchimaakuniyikwaauh e askwaasikanuyikwaauh, kaa shuuliyaauniyikwaau tuuminikanh, kaa wiihchimaasuyich pichuuh, ekw maak shuuminaapuuyuu, pimiiyuu, pahkweshikanh kaa miyushisiyich, ayuuminh, mistusa, Maanishchaanisha, kaapalakaskweuh, ekw maak aniyuuh tihtipitaapaanaaskwa kaapalakaskweu kaa chii utaapeyich. Kaye namui uhchi ihtaayuuh aweyuu che utinaayich aniyuuh aapachihaakanh kaa ataawetwaau.

¹⁴ Ekw maak uchii e ataawetwaau chekwaayuu kaa uhchi pimaachihutwaau che itaatwaau aniyuuh anit kaa ihtaayich, “Chiya Babylon, misiwe chekwaan naashch e miywaashich kaa wii ayaayin wanaatan. Misiwe anihiih chekwaayuuh ati naashch kaa uhchi wii mamiyeyihtamihiisuyin nanaahkuu e wii ishi wawehchihuyin kaye misiwe taan kaa ishi miywaashich kaa ishi ayaayin, wanaatin. Namui maak miin nihtaa chika uhchi ayaan.”

¹⁵ Anichii maak e ataawetwaau chekwaayuu kaa uhchi pimaachihutwaau chii ushuuliyaamihiikuuch aniyuu ihtaawiniyuu. Ekw maak waahiyuu anite che uhchikaapuutwaau wesh kushtaachuuch kaye wiyawaau chechii asich nanehkaateyimuhaakanuutwaau taan e ishi nanehkaateyimuhaakanuyich. Chika maatuuch kaye chika nanehkaatweutamuch.

¹⁶ Chika iteuch, “Taapwe kushtaatikun. Taapwe kushtaatikun. An kaa suuhcheyihtaakuhch ihtaawin tekash wanaatan. Machunishah kaa shuushawekaniyikwaauh naashch kaa miyuwekasiyikwaauh chii chichishkamuch anichii anit kaa ihtaatwaau, machunishiyuu kaa asinekaniyich chii chichishkamuch ekw maak machunisha kaa mihkwekaniyikwaauh. Chii miywaashpitisuuch ushaaushuuliyaawaapiskuhch e uhchi ushihtaakanuyikwaauh chekwaayuuh e chichishkahkwaau kaye nanaahkuu e miyuushiyich asiniih e uhchi ushihtaakanuyikwaau ekw maak e waaseyaapischisiyich asiniisha e chichishkawaatwaau.

¹⁷ Mikw peyakw tipahiikan chii ishpish tashiihkaakanuu tekash e wanaachihtaakanuuhch misiwe kaa ishi ihtakuhch weyuutisiiwin anit an ihtaawin.” Anichii maak chiimaan uchimaauch ekw maak misiwe awen kaa ihtakuniyich anite e ispayit chiimaanihch, chiimaan kuhpaaneuch ekw maak anichii chiimaanh kaa aapachihtaatwaau e papaa ataawetwaau chekwaayuuh waahiyuu anite chii uhchikaapuuch.

¹⁸ Iskutak maak wiyaapahtahkwaau aniyuu e akwaapahteyich e ishkwaateyich aniyuu ihtaawiniyuu chii maatuuch e itwetwaau, “Namui nihtaa uhchi ihtakun ihtaawin e ishpish chisteyihtaakuhch kaa ishpish chisteyihtaakuhch uu ihtaawin.”

¹⁹ Chii maatuuch kaye chii maamaatweutamuuch. Yekaayuu chii ishuwepinamuch ustikwaaniwaahch e waapahtiiwetwaau e ishpish macheyihtahkwaau. Ekun maak kaa ititwemutwaau, “Taapwe kushtaatikun. Taapwe kushtaatikun. Kushtaatikun taan e ispayihch an kaa chisteyihtaakuhch ihtaawin anit kaa uhchi ushuuliyaamihiisutwaau anichii chiimaan kaa chii aapachihtaatwaau nanaahkuu chekwaayuuh e papaa ataawetwaau. Aniyuu kaa ishi chii weyuuch ihtakuniyich chekwaayuu anit aniyuu ihtaawiniyuu ekut kaa uhchi ushuuliyiaamihiisutwaau. Peyakw tipahiikan maak ishpish shaash misiwe chii wanaatin.”

²⁰ Chiyawaau kihchikiishikuhch kaa ihtaayekw, miywaatamukw e chii wanaachihtaakanuuhch an ihtaawin. Chiyawaau kaa taapwehtamekw, kaye chiyawaau apastalach, ekw maak chiyawaau kaa uchischiwehiichesuyekw, miywaatamukw. Wesh Chishemanituu chii wiyaaskuneu aniyuuh anit kaa ihtaayich taan kaa ihtuutaakuwekw.

²¹ Ekw an enchil naashch e suuhcheyihtaakusit kaa uhchi utinaat e mihchaapischisiyich asiniih ekw anite chihchikamiihch kaa ishi pakashtawepinaat. Chii iteu, “Maak aniyuu e wepinaat ekun mwehch che ishpish ekaa manaachihtaakanuuhch taan che ishi tekash wanaachihtaakanuuhch an ihtaawin Babylon kaa ishinihkaatech. Namui miin nihtaa chika uhchi chischeyihtaakun aniyene.

²² Namui miin nihtaa chika uhchi pehtaakun anit e ihtaayin, Babylon, e miyuuhtaakuhtaatwaau anichii awenichii kaa metuwetwaau aniyuuh kaa miyuuhtaakuniyikwaauh chistuhchikanisha. Namui miin nihtaa chika uhchi pehtaakusuuch anichii nanaahkuu chekwaayuuh e miyuuhtaakuniyikwaauh kaa kaschihutwaau e metuwetwaau maak anichii nanaahkuu puutaachikanh kaa metuwetwaau. Namui miin wiiskach chika uhchi waapamaakanuuch anichii awenichii nanaahkuu chekwaayuuh kaa ishi kaschihutwaau e ushihtaatwaau. Namui kaye wiiskach miin chika uhchi pehtaakun e takuhiikanuuhkwaau nihtaauchihchikanh.

²³ Namui miin wiiskaat chika uhchi nuukun waashtenamaakan e waashtuwech anit e ihtaayin. Namui miin wiiskaat kata uhchi pehtaakusuuch e muuchikahtaatwaau uschinaapewaan ekw maak uschiskwewaan. Anichii nanaahkuu chekwaayuuh kaa ataawetwaau anit e ihtaayin eukunich maauch kaa chisteyihtaakusitwaau awenichii utah aschiihch. Anichii awenichii anit kaa wiichitwaau misiwe aweyuuh utah aschiihch chii wiyeshiheuch umaamaahtaawaatisiiwinawaau e aapachihtaatwaau.”

²⁴ Ekut an ihtaawinihch kaa nipahaakanuutwaau aniyehkaanaanich uchischiwehiichesuuch kaye kaa taapwehtahkwaau kaye maak kutakach awenichii.