Revelation 17 - Chishemanituu Utayimuwin: Kaa Uskaach Testament

Kaa pisikwaatisiit iskweu kaa tehtapit machi awesiisa

¹ Ekw peyakw anichii niishwaashch kaa tashitwaau enchilich kaa ayaatwaau aniyuu niishwaashch wiyaakanh kaa muutaayaayikwaau kaa pechi nituwaapamit ekw kaa iishit, “Aashtam maa. Chika waapahtiitan taan che ishi waweshihaat Chishemanituu aniyuu iskweuh kaa pisikwaatisiyich. An iskweu kaa apit anite e ihtakuniyikwaauh mihchetu siipiih.

² Chisheuchimaauch utah aschiihch kaa ihtaatwaau chii wiich pisikwaatisiimeuch aniyuuh iskweuh. Kaye maak misiwe awen utah aschiihch kaa ihtaat chii miyeyihtamuch nanaahkuu e chii ishi wiinisuu ihtuutawaatwaau aniyuuh iskweu, muyaam e chii minihkwewaatwaau ushuuminaapuuyuu ekun e ishinaakusitwaau ekw maak kaa chiishkwepetwaau.” Eukw uyuu kaa iishit an enchil.

³ Ekw Kaa payehchisiit Ahchaahkw kaa pechi piihchishkuut. Ekw an enchil anite pakwaatiskamikaahch kaa pechi ituhtahiit. Nichii waapamaau maak anite iskweu e tehtapit machi aweshiisa e mihkusiyich. Uu maak machi awesiis ishinihkaasuwiniyuu e maayeyimikuyich Chishemanituuh chii masinaateyuuh anit e ihtaat. Niishwaashch chii tahtiniyuu ustikwaan. Chii mitaahtashiyuuh uteskanh.

⁴ An maak iskweu chii mihkwaaspisuu kaye chii wiisisuumihkwaayuuh uchekwaanimh. Chii waweshihuu e ushaaushuuliyaawaapiskuniyikwaau chekwaayuu kaye nanaahkuu e miyushiyich asinii ekw maak e waaseyaapischisiyich asiniisha e chichishkawaat. Chii tahkunam maak e ushaaushuuliyaawaapiskuniyich minihkwaakaniyuu. Anit maak minihkwaakanihch chii saakastinesteyuu nanaahkuu wiinisuu ihtuwinh wesh ekun mikw waa itaatisiit uu iskweu.

⁵ Anit maak uskahtikuhch chii masinaateyuu ishinihkaasuwiniyuu ekaa chischeyihtaakuniyich taan e ishi chiisuwemakaniyich. Mwaau kaa itashteyich, “Niya Babylon an kaa chisteyihtaakuhch ihtaawin. Niya nuukaawiimaaututawaauch upisikwaatisiiskweuch kaye misiwe anichii kaa miyeyihtahkwaau e machi ihtuutahkwaau utah aschiihch.”

⁶ Nichii waapamaau maak an iskweu e miyuhkasut e chii minihkwewaat umihkuyuu kaa taapwehtamiitwaauh ekw maak umihkuyuu aniyuuh kaa nipahaakanuyikupanenh e taapweyimaayich Jesus. Iskutak maak kaa waapamak naashch nichii maskaasinawaau.

⁷ Ekw kaa pechi kakwechimit an enchil chekwaayuu wehchi naashch maskaasinaamach. Ekw kaa itwet, “Chika wiihtamaatin chekwaan taan e ishi ekaa chischeyimat an iskweu kaye aniyuuh machi awesiisa kaa tehtapit niishwaashch kaa tahtiniyikwaau ustikwaaniyuuh kaye mitaahtw kaa tahtiniyikwaau uteskaniyuu.

⁸ An machi awesiis kaa waapamit chii pimaatisiyuu peyakwaau mikw maak namui shaash pimaatisiyuu. Anite aniyuu kaa mista pukuneyaayich chika uhchi nuukuhiisuu ekw maak che nishuuwanaachihaakanuut. Anichii maak awenichii utah aschiihch kaa pimaatisiitwaau ekaa kaa masinaateyikwaau utishinihkaasuwinawaauh anite masinahiikanihch anit kaa masinahwaakanuyich aweyuuh che ayaayich kaachiche pimaatisiiwiniyuu eshkw ekaa kaa uhchi ihtakuniyich uyuu aschiiyuu chika miskaasinaweuch waapamaatwaawenich aniyuuh machi aweshiisa. Wesh chii pimaatisiyuuh mikw maak namui shaash pimaatisiyuuh. Kaau maak chika uhchi nuukusiyuu e pimaatisiyich.

⁹ Ekut uu netuweyihtaakuhch kachehtaaweyihtamuu mituneyihchikan. Aniyuuh niishwaashch kaa tahtiniyikwaau ustikwaan an machi awesiis eukunh aniyuuh niishwaashch wachiisa anit tiyehtapit an iskweu. Eukunich kaye niishwaashch chisheuchimaauch.

¹⁰ Niyaayinuu anichii chisheuchimaauch shaash namui ihtaauch. Peyakw mekwaach chisheuchimaau. Ekw an kutak chisheuchimaau eshkw namui nuukuhiisuu. Iskutak nuukusite mikw weipishchiish chika chisheuchimaau.

¹¹ An maak machi awesiis kaa pimaatisiit niishtam, mikw maak ekaa shaash kaa pimaatisiit, eukw an yaanaaneu e ihtaat chisheuchimaau kaye eukw peyakw anichii niishwaashch kaa tashitwaau chisheuchimaauch. Chishemanituuh chika wanaachihiikuu uu machi awesiis.

¹² Aniyuuh maak mitaahtu kaa tahtiniyikwaau uteskan an machi awesiis, wiihtamaachemakaniyuu mitaahtu che tashiyich chisheuchimaauh eshkw che chisheuchimaawiyich. Chii pachishtinaakanuuch kaye wiyawaau mikw weipishchiish chechii chisheuchimaautwaau uchii chisheuchimaauch mekwaach chisheuchimaawiyichenh aniyuu machi aweshiisa.

¹³ Misiwe maak uchii mitaahtu e tashitwaau chisheuchimaauch peyakunihch chika iteyihtamuch aniyuu taan waa ihtitwaau. Misiwe maak taan e ishi ayaatwaau suuhkaatisiiwiniyuu ekw maak tipeyihchichewiniyuu aniyuuh machi aweshiisa chika miiyeuch.

¹⁴ Uchii maak mitaahtu chisheuchimaauch ekw maak an machi awesiis chika nitupayihkahtaweuch aniyuuh Maanishchaanisha. Mikw maak chika tepahiikuuch aniyuuh Maanishchaanisha ekw maak aniyuuh kaa nuushuushkaakuyich. Wesh wiya an Maanishchaanish mwaauch chisteyihtaakusuu e tashiyich misiwe Utipeyihchikeuh kaye wiya mwaauch suuhcheyihtaakusuu e tashiyich misiwe chisheuchimaauh. Aniyuuh maak kaa nuushuushkaakut eukunh wiya wechiihch kaa tepwaataat kaye kaa wiyaapamaat chechii utiiniimit kaye eukunh aniyuuh kuiskw kaa ihtiyich e nuushuushkaakut.”

¹⁵ Ekw kaa iishit an enchil, “Aniyuuh siipiih kaa waapahtaman anit kaa apit an iskweu, iinuuch wesin anichii, e mihchetitwaau awenichii, nanaahkuu e uhtiskaanesitwaau, kaye nanaahkuu e ishi ayimitwaau.

¹⁶ Aniyuuh maak mitaahtw miteskanh kaa waapahtaman ekw maak an machi awesiis chika ati uhkaateuch aniyuuh iskweuh kaa pisikwaatisiyich. Misiwe chika utinamuweuch taan e ishi ayaayich. Che ati musheshkatenaatwaau kaye chika ati muuweuch kaye tekash chika wanaachiheuch e ishkwaaswaatwaau.

¹⁷ Wesh Chishemanituuh chii ihtuutaakuuch utehiiwaahch chechii uhchi iteyihtahkwaau chechii ihtuutamuwaatwaau taan e ishi nituweyihtamiyich chechii ihtuutaakanuyich. Ekw maak peyakunihch kaa iteyihtamihiikutwaau che miyaatwaau aniyuuh machi awesiisa taan e ishi ayaatwaau chechii uchimaautwaau. Chika pachishteyimitisuustaweuch maak paatish misiwe chii tipapayiche taan kaa ishi niikaan wiihtamiyich Chishemanituuh che ispayiyich.

¹⁸ An maak iskweu kaa waapamat, eukw wesin an kaa chisteyihtaakuhch ihtaawin anite wehchi uchimaahkahtuwaakanuutwaau misiwe chisheuchimaauch utah aschiihch.”