Revelation 15 - Chishemanituu Utayimuwin: Kaa Uskaach Testament

Niishwaashch enchilch che petaatwaau niishwaashch nanehkaateyimuhiiwewinh

¹ Miin maak kutach chekwaan nichii waapahten anite kihchikiishikuhch naashch e miskaasinaakuhch. Nichii waapamaauch niishwaashch enchilch. Misiwe paahpeyakw chii ayaauch nanaahkuu che ishi nanehkaateyimuhaatwaau aweyuu. Eukw maak uyuu maahchishtai che ishi nanehkaateyimunaanuyich wesh ekut uyuu che chiishipayiyich Chishemanituu utaahkuyuwesuwin.

² Ekw kaa waapahtamaan chekwaan muyaam chihchikamii e shaapwaastenaakuhch mwehch waasenihtaakanaapiskw e ishinaakuhch chiikuu ishkuteu e ihtakuhch anite. Kaye nichii waapamaauch anichii awenichii kaa shaakuuchihaatwaau aniyuuh machi awesiisa. Namui uhchi nuuchiishtuwewaakupanenich uyuu machi awesiisa kaye aniyuu manituuhkaan kaye namui uhchi utinamuwewaakupanenich aniyuu achihtaasuwiniyuu utishinihkaasuwiniyuu e itasinaateyich. Chii niipuuch anite yaayeu aniyuu saakahiikaniyuu ayimiheuchistuhchikanh e tahkunihkwaau aniyuuh Chishemanituu kaa miikutwaau.

³ Chii nikamuuch maak Moses unikamuwiniyuu. Eukw uu Moses Chishemanituu kaa utaapachihaakanitutaakut. Uyuu maak unikamuwiniyuu chii nikamuuch e chishtaachimaatwaau Maanishchaanisha. Eukw uyuu kaa ishi nikamutwaau, “Utipeyihchikeu Chishemanituu chiya maauch kaa suuhkaatisiyin. Naashch taapwe miyeyihtaakun kaye chisteyihtaakun taan e ishi ihtuutaman. Chiya chichisheuchimaaututawaauch misiwe e itiskaanesitwaau awenichii, muush kuiskw chitihtin kaye muush taapwemakan taan e itweyin.

⁴ Utipeyihchikeu, awen ekaa che nanihchiishtaask kaye ekaa che chishtaatutahk chitishinihkaasuwiniyuu. Wesh mikw chiya chipayehchisiin. Misiwe awenichii e itiskaanesitwaau chika pechi nuuchiishtaakuch wesh chichii waapahtiiwen e ishpish kuiskw ihtiyin.” Eukw uyuu kaa itahamaasutwaau e nikamutwaau.

⁵ Iskutak maak kaa chiishipayihch uu ekw miin kutach chekwaan kaa waapahtamaan. Chishemanituu uchisheayimiheukamikw anite kihchikiishikuhch kaa ihtakuniyich chii aapahiipayiniyuu. Eukw uyuu maahkiiyuu anite kaa chii ihtaat Chishemanituu e papaawiichewaat utiiniim.

⁶ Ekw anichii niishwaashch enchilich kaa petaatwaau taan che ishi nanehkaateyimunaanuyich kaa uhchi wiiwiitwaau aniyuu chisheayimiheukamikuyuu. Chii waapaaspisuuch maak e waaskushteyikwaau uchekwaanimuwaau e ishpish payehkaniyikwaau, ekw anite uskaaschikaniwaahch chii maahkupisuuch chekwaayuu muyaam e ushaaushuuliyaaunaapiskusiyich pahkuhtehun e ishinaakuniyich.

⁷ Ekw peyakw anichii e neutwaau kaa pimaatisiitwaau awenichii kaa miyaat paahpeyakw aniyuu niishwaashch enchil wiyaakaniyuu e muutaayaayich e saakaschineshteyich anit Chishemanituu an kaachiche kaa pimaatisiit utaahkuyuwesuwin.

⁸ Chii chiispwaapahteu maak an chisheayimiheukamikw anite wehchipayihch Chishemanituu uchisteyihtaakusuwin kaye usuuhkaatisiiwin. Namui maak awen chika chii piihcheu anite paatish tekash chiishipayihche an taan che ishi nanehkaateyimunaanuuhch. Namui maak awen uhchiih piihcheu anite paatish tekash kaa chiishipayihch aniyuu niishwaashuyich chipaa ishi nanehkaateyimuhaakanuuch awenichii anichii niishwaashch enchilch kaa ishi pechi pachishtinahkwaau chechii ishi nanehkaateyimunaanuyich.