Revelation 13 - Chishemanituu Utayimuwin: Kaa Uskaach Testament

Niishu machi awesiisach

¹ An maak mista manichuush anite yaayeu chihchikamiihch chii niipuu. Ekw kaa waapamak machi awesiis anite chihchikamiihch e uhchi nuukusit. Niishwaashch chii tahtiniyuu ustikwaanh kaye mitaahtu chii tahtiniyuuh uteskanh. Chisheuchimaau astutinh chii akuteyuuh paahpeyakw anit aniyuuh uteskanh. Paahpeyakw maak aniyuuh ustikwaanh chii masinaateyuu anit ishinihkaasuwinh e paashtaamikuyich Chishemanituu e itihtaakuniyikwaauh.

² An maak machi awesiis nuushe mistapisuu chii ishinaakusuu. Usitih muyaam kaakuus misit chii ishinaakuniyuuh. Utuun mwehch mistatim mituuniyuu chii ishinaakuniyuu. Ekw an mista manichuush kaa miyaat aniyuuh machi awesiisa wiya tipiiwe umaskuusiiwin kaye wiya tipiiwe utipeyihchichewin. Chii miyeu chechii apiyich anite uchisheuchimaau tehtapuwinihch.

³ Peyakw aniyuu ustikwaan an machi awesiis muyaam e chii mishwaakanihkaataakanuyich chii ishinaakuniyuu. Mikw maak shaash chii miiywaayuu. Misiwe maak anichii aschiihch kaa ihtaatwaau chii maamishkaateyimeuch aniyuu machi awesiisa kaye chii nuushuushkuweuch.

⁴ Mihchetu awenichii chii nuuchiishtuweuch aniyuu mista manichuusha aniyuu e chii miikuyich tipeyihchichewiniyuu machi awesiisa. Kaye aniyuuh machi awesiisa chii nuuchiishtuweuch, e itwetwaau, “Awen e iteyihtaakusit taan e iteyihtaakusiyich uyuu machi awesiisa. Awen keschihut chechii maasihaat.”

⁵ An maak machi awesiis chii pachishtinaakanuu naashch chechii maamihchimut kaye chechii paashtaamaat Chishemanituuh. Chii pachishtinaakanuu kaye chechii tipeyihchiket nemitanuu niishu piisim ishpish.

⁶ Chii chihchi paashtaameu Chishemanituu kaye chii maayeyihtamuweu utishinihkaasuwiniyuu. Chii maayeyihtamuweu taanite e ihtaayich kaye misiwe aniyuuh kihchikiishikuhch kaa ihtaayitwaauh chii maayeyimeu.

⁷ Chii pachishtinaakanuu chechii maasihaat kaa taapwehtamiitwaauh kaye chechii tepihaat. Chii miyaakanuu tipeyihchewiniyuu chechii uchimaaututawaat misiwe e itiskaanesiyich aweyuuh kaye misiwe nanaahkuu e ishi ayimiyich kaye misiwe e ishi maamuuteushiyich.

⁸ Ekw maak misiwe awen aschiihch kaa ihtaat chika nuuchiishtuweu aniyuu machi awesiisa. Mikw anichii pimaatisiyuu masinahiikanihch kaa masinaateyikwaau utishinihkaasuwinawaau, aniyuu masinahiikaniyuu taanit kaa masinaasutwaau awenichii eshkw ekaa uhchi usihtaakanuuhch aschii, eukunich anichii namui uhchi nuuchiishtuweuch aniyuu machi awesiisa. Uu maak masinahiikan an Maanishchaanish kaa nipahaakanuut tipeyihtam.

⁹ Misiwe chiyawaau kaa nituhtamekw suuhk tekash wii nisituhtamukw uu.

¹⁰ An awen kaa itashteyikupane chechii chipahwaakanuut chika chipahwaakanuu, kaye an awen kaa itashteyikupane nitupayuuhkumaaniyuu e aapataniyich chechii nipahaakanuut cheshtinaash ekun che ihtuutawaakanuut. Ekw maak anichii kaa taapwehtahkwaau netuweyihtaakusitwaau suuhk chechii siipiiwesitwaau e yaaichikaaputwaau kaye suuhk muush chechii taapwehtahkwaau.

Machi awesiis aschiihch kaa uhchi muuschipayihut

¹¹ Ekw miin kutak machi awesiis kaa waapamak anite aschiihch e uhchi muushchipayihut. Chii niishiniyuu uteskan muyaam Maanishchaanish uteskan kaa ishinaakuniyikwaauh ekun kaa ishinaakuniyikwaauh. Muyaam maak mista manichuush e chistut ekun kaa itihtaakusit e chistut.

¹² Uu maak kutak machi awesiis mistahii chii miikuu tipeyihchichewiniyuu aniyuuh niishtam machi aweshiisa e uchimaaut chechii itaapachihiikut anit e ihtaayich. Ekw kaa aayihkamihaat misiwe aweyuu anite aschiihch kaa pimaatisiyich chechii nuuchiishtuwaayich aniyuu Niishtam kaa ihtaayich machi aweshiisa, aniyuuh machi awesiisa chihchiwe kaa mishuwaakanihkaataakanuwiikupane ustikwaaniihch ekw maak kaa miinuwaachihtaakanuyich.

¹³ Ekw an kutak kaa ihtaat machi awesiis nanaahkuu chii ishi mista maamishkaach ihtuu. Waawaach chii ihtuutam ishkuteyuu chechii pahchishtiniyich chiishikuhch uhchi anite ishi aschiihch misiwe aweyuu e kanawaapamikut.

¹⁴ Anichii maak awenichii anite aschiihch kaa ihtaatwaau chii wiyeshihiikuuch uyuu kaa ishi pachishtinaakanuyich uyuuh machi aweshiisa chechii maamishkaach ihtiyich e kanawaapamikuyich aniyuu kutak machi aweshiisa. Anichii awenichii aschiihch kaa ihtaatwaau chii itikuuch aniyuu niishu kaa ihtaayich machi awesiisa chechii ushihaatwaau manituuhkaan e chisteyihtaakuhaatwaau aniyuu machi aweshiisa chihchiwe kaa mishuwaakanihkaatikuyich nitupayuuhkumaaniyuu mikw maak yaapach e chii pimaatisiyich.

¹⁵ Chii pachishtinaakanuu maak uu machi awesiis chechii ihtuutawaat aniyuu manituuhkaan chechii iiniiwiyich. Ekw maak kaa ayimiyich kaye chii ihtuutaweyuuh aweyuuh ekaa kaa wii nuuchiishtuwaayich aniyuuh manituuhkaanh chechii nipahaakanuyich.

¹⁶ Uu maak machi awesiis chii aayihkamiheu misiwe aweyuuh chechii chiishaawaachisinahwaakanuyich unihiiwin mitihchiihch maak uskahtikuwiihch, misiwe aniyuu kaa chisteyihtaakusiyich kaye aniyuu ekaa kaa chisteyihtaakusiyich, aniyuuh kaa miisichisiyich kaye aniyuu kaa chistimaatisiyich, aniyuuh kaa utaapachihaakanitutawaakanuyich kaye aniyuu ekaa kaa utaapachihaakanitutawaakanuyich.

¹⁷ Namui maak awen uhchii ataaweu kaye namui awen uhchii utinaasuu chiishpin ekaa uhchi chiishaawaachisinahwaakanuukwe. Aniyuu maak anit kaa chiishaawaachisinahwaakanuutwaau, aniyuu e ishinihkaasuyich aniyuu machi awesiisa maak aniyuu utachistaasuwiniyuu chii masinaateyuu anit.

¹⁸ Ekut maak utah kachehtaaweyihtamuwin netuweyihtaakuhch. An maak awen kecheyihtaaweyihtamukwe chika chii chischeyihtam taan e ishi wiihtamaachemakaniyich aniyuu achihtaasuwiniyuu, wesh an achihtaasun naapeu aniyuu utishinihkaasun. Kutwaashch kutwaashch kutwaashch maak itasinaateyuu utishinihkaasun.