Revelation 11 - Chishemanituu Utayimuwin: Kaa Uskaach Testament

Kaa niishitwaau kaa wiihtahkwaau taan kaa ishi waapahtahkwaau

¹ Ekw kaa miikuyaan mistikw tipaaskunikan. Nichii itikuun, “Chishemanituu iteu, pisikuuh. Che nituu tipaaskunaman nichisheayimiheukamikw kaye an pachishtinicheunaapiskw. Kaye maak che achimatwaau anichii anit kaa ihtaatwaau kaa nuuchiishtuutwaau.

² Mikw ekaawii tipaaskunh anit e pwaahchihch waaskaa an chisheayimiheukamikw. Ekaawii tipaaskunh wesh anichii ekaa Jewa kaa itiskaanesitwaau chii miyaakanuuch aniyuu. Eukunich uchii che taahtahkushkaatahkwaau aniyuu ihtaawiniyuu kaa payehchisiimakaniyich nemitanuu niishu piisim ishpish.”

³ Mekwaach maak aniyuuh e chiishikaakwaauh nika itishahwaauch niishu awenich che utaapachihaakaniyaan chechii chischiwehiichetwaau. Kalwaakas machunishiyuu e chichishkahkwaau. Peyakwaau chishemitaahtumitanuu niishwaau mitaahtumitanuu miin kutwaashumitanuu chiishikaauh ekun che ishpish waawiihtahkwaau taan che ishpish miikwaau chechii ishi aayimuutahkwaau. Ekun e tahtihkwaau e chiishikaakwaauh nemitanuu niishu piisimh.

⁴ Uchii maak niishu aapachihaakanch eukunich anichii kaa niishukaapuutwaau Olive mistikuch kaye eukunich anichii aniyuuh niishu waashtenamaakanaahtikw uhchishkuu Chishemanituu e ihtaat kaa ihtakuniyikwaauh, aniyuuh misiwe aschiiyuu kaa uchimaaututamiyich.

⁵ Wii wiyesh ihtuutaakutwaawenich maak aweyuuh uchii niishu aapachihaakanich, ishkuteyuu chika uhchipayuu utuuniwaahch uhchi. Ekut maak che uhchi wanaachihaatwaau aniyuuh kaa uhkaatikutwaau. Ekut kaye che uhchi nipahaatwaau mikw e ishinaakusiyich aweyuuh waah wiyesh ihtuutaakutwaau.

⁶ Mekwaach maak aniyuu che ishpish chischiwehiichetwaau chika ayaauch tipeyihchichewiniyuu chechii ihtuutahkwaau ekaa chechii chimuuniyich. Chika miyaakanuuch kaye misiwe e ishi ihtakuniyich nipiiyuu chechii tipeyihtahkwaau ekw maak che ihtuutahkwaau aniyuu nipiiyuu mihkuhch chechii ishinaakuniyich. Mikw waa ishpish ihtuutahkwaau chika chii ihtuutamuch nanaahkuu itaaspinewiniyuu chechii ihtakuniyich aschiihch.

⁷ Iskutak maak chiishi waawiihtahkwaawenich Chishemanituu utayimuwiniyuu ekw aniyuuh machi awesiisa anite kaa mista pukuneyaayich kaa uhchi kuikwaahtawiyich che maasihiikutwaau. Chika ashpashihiikuuch maak. Ekw che nipahiikutwaau.

⁸ Aniyuuh maak wiiyuuwaauh ekut anit meskanaahch aniyuu mista utenaayuu taanit kaa nipahaakanuyich kaa chiistaaskuhwaakanuyich aashiteyaahtikuhch utipeyihchikemuwaauh ekut che ihtakuniyikwaauh. Uu maak ihtaawin muyaam taan kaa iteyihtaakuhkwaauh aniyuuh ihtaawinh Sodom ekw maak Egypt kaa ishinihkaatekwaauh ekun kaa iteyihtaakuhkwaauh, naashch chii mishaau anit machaatisiiwin.

⁹ Misiwe maak e itiskaanesitwaau awenichii kaye nanaahkuu e ishi ayimitwaau kaye misiwe e ishi maamuuteushiitwaau mikw chika kanawaapahtamuweuch aniyuu wiiyuuyuu nishtu chiishikaau miin aapihtuu ishpish. Namui chika uhchi pachishtineuch chechii chiskahaakanuyich.

¹⁰ Anichii maak awenich aschiihch kaa ihtaatwaau chika miyeyihtamuch e chii nipahaakanuyich aniyuuh kaa niishiyich. Chika miywaatamuch kaye chika maamiituuch miiwewinh e chii nipahaakanuyich aniyuuh kaa niishiyich kaa ihtuutamiyich chechii nanehkaateyimunaanuyich utah aschiihch.

¹¹ Mikw maak iskutak miyaaupayiniyikwaawen aniyuuh nishtu chiishikaau miin aapihtuu ekw Chishemanituu che miyaat yehewiniyuu aniyuuh e niishiyich ekw che uhchi pisikuyiyich. Misiwe maak awenichii che waapamaatwaau naashch chika sechisuuch.

¹² Ekw anichii kaa niishitwaau kaa pehtawaatwaau aweyuu e ayimihiikutwaau kihchikiishikuhch uhchi. Chii itikuuch e chisheweyich, “Aashtamukw ute.” Ekw mekwaach e kanawaapamikutwaau aniyuu kaa uhkaatikutwaau chii uhpipayiyuuch kihchikiishikuhch ishi kaskawanishkuhch.

¹³ Iskutak maak kaa ispayihch uu, chii mista kuihkun. Peyakw eshikum mitaahtw waaskaahiikanh anit an ihtaawinihch chii wanaatin. Niishwaashwaau chishemitaahtumitanuu awenichii chii wanaatisiyuuch aniyuu kaa mista kuihkuniyich. Ekw anichii awenichii eshkw kaa ihtaatwaau aschiihch chii mista sechisuuch. Chii itweuch, Taapwe suuhcheyihtaakusuu Chishemanituu kihchikiishikuhch kaa ihtaat.

¹⁴ Uu maak niishu kaa ihtakuhch kaa ishi nanehkaateyimunaanuuhch shaash chii chiishipayuu. Eshkw maak miin kutach e nanehkaateyimunaanuuhch chika utihchipayuu. Shaash peshunaakun che utihchipayihch.

Enchil kaa puutaatahk aniyuu maahchishtai puutaachikaniyuu

¹⁵ Ekw miin kutak enchil kaa puutaatahk upuutaachikan. Eukw uu niishwaashch kaa ihtaat enchil. Nichii pehtawaauch maak awenichii e chishewetwaau, anite kihchikiishikuhch e ayimitwaau e itwetwaau, “Ekw wetinamaasut Chitipeyihchikeminuu kaye aniyuuh kaa pechi itishahwaat chechii uchimaautwaau utah aschiihch. Wiya maak Utipeyihchikeu chika uchimaau kaachiche kaye kaachiche.”

¹⁶ Ekw anichii niistanuu neu kaa chisteyihtaakusitwaau chisheinuuch kaa apitwaau uchisheuchimaau tehtapuwinawaauh uhchishkuu Chishemanituu e ihtaayich chii utishipayihuuch kaye chii nuuchiishtuweuch Chishemanituu

¹⁷ e itwetwaau, “Nitipeyihchikeminaan Chishemanituu maauch kaa suuhkaatisiyin, an kaa ihtaat kaye muush kaa pechi ihtaat, chinanaaskumitinaan e chii aapachihtaayin chisuuhkaatisiiwin chii e tipeyihchicheyin.

¹⁸ Misiwe e itiskaanesitwaau awenichii chii mista chishuwaasuuch. Ekw maak chiya wetihchipayihch chechii chishuwaasiyin kaye chechii wiyaaskunitwaau anichii kaa nipitwaau. Shaash utihchipayuu chechii tipahamuutwaau utipahamaakusiiwinawaau anichii chitaapachihaakanich kaye anichii uchischiwehiichesuuch kaye anichii kaa taapwehtahkwaau kaye maak anichii kaa chisteyihtahkwaau chitishinihkaasuwiniyuu, anichii kaa chisteyihtaakusitwaau kaye anichii ekaa kaa chisteyihtaakusitwaau. Shaash utihchipayuu chechii wanaachihaakanuutwaau anichii kaa wanaachihaatwaau aweyuuh utah aschiihch.”

¹⁹ Ekw Chishemanituu uchisheayimiheukamikw kihchikiishikuhch kaa ihtakuniyich kaa aapahiikanuyich. Anite maak piihtakamihch chii nuukun an kaa payehchisiimakahch mistikuwat anite kaa tataakanuyich aniyuu niskumuwiniyuu Chishemanituu kaa ushihtamuwaat utiiniimh. Ekw kaa waaswaastepayihch kaye nimischuuch chii pehtaakusuuch. Kaye maak chii kuihkun kaye chii mista miskuumitaan.