Revelation 10 - Chishemanituu Utayimuwin: Kaa Uskaach Testament

Enchil ekw maak an kaa apishaashich masinahiikan

¹ Miin kaa ishi waapahtiikuyaan, miin kutak e suuhcheyihtaakusit enchil nichii waapamaau kihchikiishikuhch e uhtuhtet, kaskawanishkwa e utakuhpit. Piisimuyaapiyuu chii waaskaakuteyuu anite ustikwaanich. Utaashtamuhkw mwehch piisim e ishi chiihkaayaashtuwet chii ishinaakuniyuu. Ekw uskaath muyaam chiituwaaskuhiikanh e ishkuteuniyikwaauh chii ishinaakuniyuuh.

² Chii tahkunam masinahiikanishiyuu utihchiihch. E chii aapahwetinikanuyikupane. Ekw aniyuu unihiiusit anite itehche chihchikamiihch chii ishi tahkuscheu ekw aniyuu unimihchiiusit aschiihch chiishi tahkuscheu.

³ Ekw kaa tepwet muyaam mista atim e itihtaakusit. Iskutak maak kaa tepwet anichii niishwaashch kaa tashitwaau nimischuuch chii uhchi pehtaakusuuch mwehch e ayimitwaau e itihtaakusitwaau.

⁴ Iskutak maak kaa pehtaakusitwaau anichii niishwaashch kaa tashitwaau nimischuuch muyaam e ayimitwaau kaa itihtaakusitwaau, nichii wii chihchi masinahiichen. Ekw kaa uhchi pehtamaan pehtaakusuwin kihchikiishikuhch uhchi e itikuyaan, “Ekaawii masinaha taan kaa itwetwaau anichii nimischuuch. Ekaawii awen chika uhchi chischeyihtam.”

⁵ Ekw an enchil napate anite chihchikamiihch ekw maak napate aschiihch kaa ishi tahkuschet kaa uhpanishchepayihtaat unahiitihchii kihchikiishikuhch ishi.

⁶ Ekw kaa itwet, “Eukw uu e itweyaan uhchishkuu Chishemanituu e ihtaat, an kaachiche kaa pimaatisiit, chiishikuyuu, aschiiyuu ekw maak chihchikamiyuu kaye misiwe e ishi ihtakuniyich anite chiishikuhch, aschiihch ekw maak chihchikamiihch kaa ushihtaat, ekun che ishpish nakaawiit ekw Chishemanituu chechii ihtuutahk taan aniyuuh waah ihtuutahk.

⁷ Iskutak maak an niishwaashch e ihtaat enchil puutaatahke upuutaachikan ekw che chiishihtaat Chishemanituu e tipihtuutahk taan kaa iteyihtamihiikut chechii ihtuutahk aniyuu chekwaayuu ekaa aweyuuh uhchi chischeyihtamiyich, aniyuu kaa ishi wiihtamuwaakupane aniyehkaa utaapachihaakanh kaa chischiwehiicheyitwaauh.”

⁸ Ekw miin kaa pehtuuk an awen kaa pechi ayimihiit kihchikiishikuhch uhchi e pechi iishit, “Maachiih utinim aniyuu masinahiikanishiyuu kaa aapahiisteyich utahchiihch an enchil anite chihchikamiihch kaye aschiihch kaa ishi tahkuschet.”

⁹ Ekw kaa naatak an enchil ekw kaa itak chechii pechi miit aniyuu masinahiikanishiyuu kaa tahkunahk. Ekw kaa pechi iishit, “Utin che miichiyin. Chika siiwaau chituunihch muyaam aamuusuukaau ekun che ishpitaman. Mikw maak iskutak chii kuhchipayihtaayine chika ati wiisakan anite chiskataahch.”

¹⁰ Kaa utinamuch aniyuu masinahiikanishiyuu kaa tahkunahk an enchil ekw kaa miichuuch. Iskutak maak kaa saskamuyaan nichii maspiten e siiwaach muyaam aamuusuukaau ekun kaa ispitamaan. Mikw maak iskutak kaa kuhchipayihtaayaan chii ati wiisakan anite niskataahch.

¹¹ Ekw kaa itikuyaan, “Miin chika chischiwehiichen chika aayimuuten taan e ishi aayimuumikutwaau Chishemanituuh utayimuwiniyuu mihchetu awenichii, nanaahkuu e itiskaanesitwaau, nanaahkuu e ishi maamuuteushiitwaau, kaye maak nanaahkuu e ishi ayimitwaau. Chisheuchimaauch kaye taan e ishi aayimuumikutwaau Chishemanituuh utayimuwiniyuu chika aayimuutamuwaauch.”