Revelation 1 - Chishemanituu Utayimuwin: Kaa Uskaach Testament

John kaa wiihtahk taan kaa ishi chischeyihtamihaakanuut

¹ Eukw uyuu kaa ishi waapahtiiwet Jesus, Chishemanituu chii miikuu chechii chischeyihtamihaat aniyuu kaa atushkuwaayich Chishemanituu taan che ispayiyich wiipach. Niya, John, Chishemanituu kaa atushkuwaat, nichii itishahamaakw Christ enchil chechii pechi wiihtamuyich taan aniyuuh shaash wiipach che ispayiyich.

² Misiwe maak nichii masinahen taan kaa ishi waapahtiikuyaan. An maak kaa ishi masinahamaan taapwe Chishemanituu utayimuwin aniyuu. Jesus chii nuukuhtaau taapwe e taapwemakaniyich.

³ Chika shaweyihtaakusuu an awen che ayimihtaat uyuu taan e itashteyich utah anit chechii uhchi pehtamiyich kutak aweyuuh. Anichii kaa pehtahkwaau kaye kaa nanihiihtahkwaau taan e itashteyich anit kaye wiyawaau chika shaweyihtaakusuuch. Wesh shaash peshunaakun che uhtihchipayihch misiwe chechii ispayihch taan kaa ishi waapahtiikuyaan.

John kaa waachiyemaat aniyuu umaamuuayimihaauh anite kaa ihtaayich niishwaashch ayimiheukamikuh

⁴ Niya John. Chiyawaau umaamuuayimihaauch chimasinahamaatinaawaau anite kaa ihtaayekw aniyuuh niishwaashch ayimiheukamikuh Asia kaa ishinihkaatech aschii. Chishemanituu, an anuhchiish kaa ihtaat kaye muush kaa pechi ihtaat, kaye an che takushihk chika shaweyimikuwaau kaye chika miikuwaau chiyaameyihtamuwiniyuu. Kaye anichii niishwaashch ahchaahkuch uhchishkuu Chishemanituu uchisheuchimaau tehtapuwiniihch kaa ihtaatwaau chika shaweyimikuwaauch kaye chika miikuwaauch chiyaameyihtamuwiniyuu.

⁵ Jesus Christ kaye, an muush kuiskw kaa wiihtahk e tipaachimaat Chishemanituuh, nipukuseyimaau chechii shaweyimitaakw kaye chechii miitaakw chiyaameyihtamuwiniyuu. Wiya Jesus Christ maauch niishtam chii wanishkaanaakanuu nipuwinihch uhchi kaachiche chechii pimaatisiit. Wiya chisheuchimaaututaweu misiwe chisheuchimaauh utah aschiihch. Chisaachihiikunuu kaye chii pachishtinisuu chechii nipahaakanuut chiyaanuu uhchi ekaa chechii tipeyimikuyihkw chimachihtwaawinuuh.

⁶ Chii ihtuutam chechii masinaasuuhkw anite uchisheuchimaawinihch e atushkaamahkw Chishemanituuh Uhtaawii e ayimiheuchimaau aapatisuuhkw. Wiya chika chisteyihtaakuhaakanuu kaye chika tipeyichicheu kaachiche kaye kaachiche. Amen.

⁷ Iitaapikw maa. Pechi takushinuu kaskawanishkuhch e pechi aasiit. Misiwe aweyuuh chika waapamikuu, mechim aniyuuh kaa tahkamikut. Misiwe e itiskaanesiyich aweyuuh chika mista maatuuyuuh waapamikute. Cheshtinaash chika ispayuu uu. Amen.

⁸ “Eukw niya misiwe chekwaan kaa chihchipayihtaayaan kaye misiwe chekwaan che chiishihtaayaan.” Eukw e itwet Chishemanituu Utipeyihchikeu, an maauch kaa suuhkaatisiit, an kaa ihtaat anuhchiish, an muush kaa pechi ihtaat kaye an che takushihk.

John waapahtiiwewinihch kaa waapamaat Jesus

⁹ Eukw niya chiichishaanawaau John. Misiwe chiwiichishaanihtunaanuu Jesus e ihtaat ishi. Chinanehkaateyimuhiikuyihkw an uhchi e nuushuushkuuhkw Jesus mikw maak maamuu chiwii siipiiwesinaanuu taanit anit nechishkamuhkw maan e aayimihch chekwaan. Nichii maakunikuun ekw anite an ministikw Patmos kaa ishinihkaatech kaa tayikuyaan an uhchi e chii waawiihtamaan Chishemanituu utayimuwin kaye e chii tipaachimak Jesus taan kaa aihtit.

¹⁰ Peyakwaau maak e ayimiheuchiishikaach, Kaa payehchisiit Ahchaahkw nichii saakaschineshkaakw. Anite maak nispiskunihch nichii uhchi pehten pehtaakusuwin e chishewet awen e ayimit. Muyaam puutaachikan e ishpish chishewemakahch ekun kaa ishpish chishewet e ayimit.

¹¹ Eukw maak uyuu kaa itwet, “Masinaha taan che ishi waapahtaman anuhchiish ekw che itishahamuutwaau anichii umaamuuayimihaauch anite aniyuu niishwaashch ayimiheukamikuh Ephesus, Smyrna, Pergamum, Thyatira, Sardis, Philadelphia ekw maak Laodicea kaa ihtaatwaau.” Eukw uyuu kaa pechi iishit.

¹² Nichii kweschikaapuun maak e naanituuwaapamak an awen kaa pechi ayimihiit. Ekw kaa waapahtamaan niishwaashch waashtenamaakanaahtikw e ushaaushuuliyaaunaapiskuuhkwaau.

¹³ Mekwesiinuu maak aniyuuh waashtenamaakanaahtikw e ihtakuhkwaauh ekut kaa waapamak awen mwehch iinuu ukusisa e ishinaakusit. An maak awen chii chichishkam akuhpiyuu anite ishi usitihch e iskwekaniyich. Kaye chii pahkuhtehuu uskaaschikanihch e usaaushuuliyaawaapetisiyich pahkuhtehun.

¹⁴ Ustikwaan kaye ustikwaaniyaapiih chii waapaayuuh muyaam Maanishchaanish upiiwiih e ishpish waapaayich maak muyaam kuun e ishpish waapisit. Uschiishikuh muyaam e ishkuteuniyikwaauh chii ishinaakuniyuu.

¹⁵ Usith muyaam kaa wiipaapischisit shuuliyaawaapiskush ekun kaa ishinaakuniyikwaauh. Muyaam naashch e waaskushteyikwaau kaye e suusuwaasiyikwaau chii ishinaakuniyuu. Upehtaakusuwin muyaam anite nipii e chisheweyaachuuhch ekun kaa itihtaakuniyich.

¹⁶ Niishwaashch achahkusha chii tahkuneu unihiiwinitihchiihch. Iituu e ishi kaasaayich shimaakanishuu nitupayuuhkumaaniyuu chii uhchipayuu anite utuunihch. Utaashtamuhkw naashch chii waashteyuu muyaam piisim kaa itaashtuwet.

¹⁷ Iskutak maak wiyaapamak anite usitihch nichiishi pahchishinuwaan muyaam e nipuuch. Unihiiwinitihchii e aapachihtaat nichii pechi taahtinikw ekw kaa iishit, ekaawii kushtaach. Eukw niya niishtam kaa ihtaat kaye maahchishtai che ihtaat.

¹⁸ Eukw niya kaa pimaatisiit. Nichii nipin mikw maak anuhchiish kaachiche nipimaatisiin. Niya nuuchimaahkahten nipuwin kaye niya nuuchimaawin anite e ihtaatwaau anichii kaa nipitwaau.

¹⁹ Masinaha misiwe taan che ishi waapahtaman. Masinaha taan e ispayihch anuhchiish kaye taan che ispayihch anite niishtamihch.

²⁰ Anichii maak niishwaashch achahkushach kaa waapamiin nihiiwinitihchiihch e tahkunihkwaau kaye aniyuuh niishwaashch kaa ushaaushuuliyaawaapiskuuhkwaau waashtenamaakanaahtikw eukw uu e ishi wiihtamaachemakahkwaauh. Anichii niishwaashch achahkushach eukw anichii enchilich kaa niikaanishkuwaatwaau umaamuuayimihaauh anite aniyuu niishwaashch ayimiheukamikuh kaa ihtaatwaau. Ekw aniyuuh niishwaashch kaa ushaaushuuliyaawaapiskuuhkwaauh waashtenamaakanaahtikw eukw aniyuuh niishwaashch ayimiheukamikuh kaa aayimuutekwaauh.