Philippians 4 - Chishemanituu Utayimuwin: Kaa Uskaach Testament

Paul kaa itaat aniyuuh kaa taapwehtamiyich ekaa chechii mukushkaateyihtamiyich

¹ Ekw maak niichishaanitikw, chiyawaau naashch kaa saachihiitakuch, muush kaa mwestaatitakuch. Nuwach chimiyeyihtamahiinaawaau kaye chimaamihchihiinaawaau chechii tipaachimitakuch. Eukw uu kaa ishi aayimuutamaatakuch e nitaweyimitakuch chechii yaaichikaapuyekw e taapweyimekw Utipeyihchikeu.

² Nipukuseyimaauch anichii iskweuch Euodia ekw maak Syntyche chechii nanihiihtuwaatwaau Utipeyihchikeu ekaa mamachipayitwaau.

³ Niwiichewaakan muush kuiskw kaa chii ihtiyin e wiich aapatisiimitaan chipukuseyimitin chechii wiichihiitwaau uchii iskweuch chechii puuniitwaau e machipayitwaau. Wesh taapishkun chii mista aapatisuuch e wiichihiitwaau e waawiihtamuch miywaachimuwiniyuu. Kaye Clement ekw maak anichii kutakach kaa wiich aapatisiimakwaau, utishinihkaasuwinawaau kaa masinaateyikwaauh Chishemanituu upimaatisiiwin masinahiikanihch chechii ayaatwaau kaachiche pimaatisiiwiniyuu nichii wiichihiikuuch.

⁴ Muush miyeyihtamukw e taapweyimekw Utipeyihchikeu. Miin maak chititinaawaau miyeyihtamukw.

⁵ Iishi pimaatisiikw misiwe awenichii chechii chischeyimitaakuch e ishpish miyuhtwaawekw. Shaash peshunaakuniyuu che ishpish takushihk Utipeyihchikeu.

⁶ Ekaawii chekwaan chika uhchi mukushkaateyihtamihiikunaawaau. Teyakuch misiwe taan che ati ispayiwekwe ayimihaakw, e waawiihtamuwekw Chishemanituu chekwaayuu e ishi nitaweyihtamuwekw. Kaye maak chipaa nanaaskumaawaau.

⁷ Ekw maak Chishemanituu che miitaakw chiyaameyihtamuwiniyuu ekaa chechii aayimeyihtamiskaakuwekw chekwaayuu chimituneyihchikaniwaahch maak chitehiiwaahch aniyuu e taapweyimekw Christ Jesus. Eukw uu chiyaameyihtamuwin kaa aayimuutech namui tekash chii nisituhtaakanuu taan e ishpish miyeyihtaakuhch.

⁸ Niichishaanitikw, eshkw ekaa chiishihtaayaan e masinahamaatakuch peyakw miin chekwaan chika wiihtamaatinaawaau, Suuhk muush maamituneyihtamukw anihiih chekwaayuuh kaa miywaashikwaauh, anihiih kaa maamihchihiiwekwaauh, muyaam chekwaan e kuiskunaakuhch, chekwaan e chisteyihtaakuhch, kaye kuiskw ihtuwin, payehchi pimaatisiiwin, chekwaan e naheyihtamihiiwech ekw maak chekwaan e miyu tipaatutech.

⁹ Chipaa ihtuutenaawaau an kaa ishi chischinuhamaatakuch kaye an kaa ishi waapamiyekw e itaatisiyaan. Ekw maak Chishemanituu an kaa miitahkw chiyaameyihtamuwiniyuu chika wiicheukuwaau.

Paul kaa nanaaskumut taan kaa ishi wiichihaakanuut

¹⁰ Naashch taapwe nimiyeyihtamahiikw Utipeyihchikeu miin e miitaakw chechii wiichihiyekw. Shaash weshkach kaa wii wiichihiyekw. Mikw maak ekw yaakw miin nehiipayihch chechii nuukuhtaayekw e maamitunemiyekw, namayeu kiipaa wii e iteyimitakuch ekaa uhchi aapateyimiyekw shaakuuch namui uhchi nihiipayuu chechii wiichihiyekw.

¹¹ Namayeu kiipaa wii e nuuhtepayaan chekwaan wehchi itweyaan uu. Wesh shaash nichischeyihten yaapach chechii naheyihtamaan aat ekaa naashch ayaayaan chekwaan.

¹² Nichischeyihten wesh taan e iteyihtaakuhch e nuuhtepayinaanuuhch chekwaan, kaye taan e iteyihtaakuhch e weyuuchihtaakanuuhch chekwaan. Mikw taan e ispayiwaane nichischeyihten yaapach chechii naheyihtamaan. Namui wiyesh nititeyihten e siiweyaan maak e chiishpuyaan, e chistimaatisiyaan maak e weyuuchihtaayaan chekwaan.

¹³ Taan mikw che ispayiwaane misiwe nika chii shaapushken wesh Christ nimiikw suuhkaatisiiwiniyuu.

¹⁴ Taapwe chichii miyutuutuunaawaau kaa wiichihiyekw taan kaa ishi aayimihuyaan.

¹⁵ Chiyawaau Philippihch kaa uhchiyekw, chichischeyihtenaawaau e tashitwaau umaamuuayimihaauch chiyawaau mikw e chii wiichihiyekw shuuliyaau iskutak kaa nakatamaan Macedonia. Chiyawaau mikw chichii wiichihiinaawaau uskach kaa waawiihtamaan miywaachimuwin.

¹⁶ Namui mikw peyakwaau kuuhchi pechi itishahamuunaawaau shuuliyaau kaa chii nuuhtepayaan mekwaach anite Thessalonicahch kaa chii ihtaayaan.

¹⁷ Namui wii e nituweyihtamaan chishuuliyaamuwaau uste nitaweyihten chechii weyuutihch che ishi shaweyimikuyekw.

¹⁸ Ekut uu waahtamaatakuch shaash misiwe e chii miskamaan an kaa ishi pechi wiichihiyekw. Shaash paashich nit ishpish ayaan taan kaa ishi nuuhtepayaan. Ekw maak misiwe e ayaayaan taan kaa ishi nuuhtepayaan Epaphroditus e chii petuut aniyuuh chimiiwewinawaauh. Uu kaa ishi miyekw naashch e miywaashich pachishtinichewin ishi kanawaapahtam Chishemanituu kaye naashch naheyihtamihiikuu.

¹⁹ Ekw maak Chishemanituu chika uhchistamaakuwaau misiwe chekwaayuu e ishi nuuhtepayiwekw. Misiwe chika miikuwaau e ishi nuuhtepayiwekw taan e ishi naashch weyuuch miyutuutamaachet Christ Jesus uhchi.

²⁰ Kaachiche kata maamihchimaakanuu Chishemanituu Kuuhtaawiinuu. Amen.

Maahchishtai kaa itasinahamuwaat Paul aniyuuh iinuuh

²¹ Waachiyemaahkuch misiwe anichii kaa taapweyimaatwaau Christ Jesus. Chiichishaanuuch utah kaa ihtaatwaau chiwaachiyemikuwaauch kaye wiyawaau.

²² Misiwe anichii kaa taapwehtahkwaau chiwaachiyemikuwaauch, kaye anichii kaa aapatisitwaau chisheuchimaau Caesar e ihtaayich.

²³ Nitutamuwaau maak Utipeyihchikeu Jesus Christ misiwe chechii chishewaatutaataakw.