Philippians 3 - Chishemanituu Utayimuwin: Kaa Uskaach Testament

Ekaa chechii aspeyimututamuhkw chiyaanuu chikuiskutaatisiiwinuu

¹ Ekw maak niichishaanitikw, eshkw ekaa chiishihtaayaan uu kaa masinahamaatakuch chiwii ititinaawaau chechii miyeyihtamekw Utipeyihchikeu e tipeyimitaakw. Namui wiyesh nititeyihten miin chechii aayimuutamaatakuch taan kaa itasinahamaatakuch utah utaahch, wesh chika ihtakun taan che ishi wiichihiikuyekw uu.

² Yakwaamiishtuwaahkuch anichii kaa wiyeshahiiwetwaau, nitamukw kaa ihtitwaau. Anichii kaa itwetwaau paatish chischinuwaachishwaakanuyichen aweyuu yaakw chechii utiiniimitutaakuyich Chishemanituu.

³ Chiyaanuu eukw taapwe weutiiniimihtutaatahkw Chishemanituu, chiyaanuu Utahchaahkwa kaa wiichihiikuuhkw e nuuchiishtuuhkw kaye maak chichisteyihtaakuhaanuu Christ Jesus wiya e chii ihtuutaatahkw chechii utiiniimitutaakuuhkw Chishemanituu. Namui wii uschich taan e ihtuutaasuyihkw chika chii uhchi maamihchimunaanuu.

⁴ Niya eukw taapwe chipaa chii ihtakun taanite chechii uhchi maamihchimuyaan. Chiishpin e ihtaakwe awen e iteyihtahk chechii maamihchimut uschich e ishi naanaakachihtaakanuyich chekwaayuu niya uste ihtakun an chechii iteyihtamaan.

⁵ Wesh nichii chischinuwaachishukuun yaanaaneu chiishikaau kaa ishpish pimaatisiyaan. Anite Israel iinuuch e ihtaatwaau nichii pimaatisiin. Benjamin e ihtaat nichii uhchi aanische pimaatisiin. Tep Jewa iinuu niya. Tekash nichii kanuweyihten wiishuwewin mekwaach Pharisee kaa ihtaayaan.

⁶ Kaa ishpish chii aashihcheyihtamaan kuiskw e wii ihtuutamaan taan e ishi wiishtech wiishuwewinihch nichii nenehkaachihaauch umaamuuayimihaauch. Mitun tekash nichii iteyihten e chii nanihiihtamaan wiishuwewin. Namui awen nipaa uhchii itikw ekaa misiwe uhchi nanihiihtamaan wiishuwewin.

⁷ Aniyuu chekwaayuuh kaa chii iteyihtamaan e wiichihiikuyaan shaash nichii wepinen etituu chechii chischeyimak Jesus.

⁸ Namui maak mikw aniyuuh chekwaayuuh kaa aayimuutamaan nuuhchi wepinen. Misiwe kutach chekwaan namui mitun nitaapateyihtamihiikun e ishpish etituu iteyihtaakuhch e chischeyimak Christ Jesus taapwe e Utipeyihchikemiyaan. Wiya uhchi eukuu wehchii pachishteyihtamihiikuyaan misiwe uyuuh chekwaayuu, wepinaasun nititeyihtamihiikun uyuuh chekwaayuuh, wiya chechii wiicheuk,

⁹ kaye maak taapwe wiya e ihtaat chechii ishi tipeyihtaakusiyaan. Namui ekw nititeyihten e kuiskutaatisiyaan mikw an e nanihiihtamaan wiishuwewin. Wesh e taapweyimak Christ eukun an e kuiskutaatisiihiikuyaan. Eukuu kuiskutaatisiiwin Chishemanituu e ihtaat kaa uhchipayihch. Mikw taapwehtamuwinihch uhchi ayaau awen uyuu kuiskutaatisiiwiniyuu.

¹⁰ Nichii pachishteyihtamihiikuun misiwe uyuuh chekwaayuu tekash chechii chischeyimak Christ, chechii chischeyihtamuch nipimaatisiiwinihch aniyuu suuhkaatisiiwiniyuu kaa wanishkaanikut kaa nipit, chechii nanehkaateyimuyaan kaye niya taan kaa ishi nanehkaateyimut wii. Kaye chechii pachishteyimisuyaan kaye niya chechii nipiyaan mwehch wiya kaa ishi pachishteyimisut.

¹¹ E pukuseyihtamaan kaye niya chechii wanishkaanikuyaan nipuwinihch uhchi.

Paul suuhk kaa kuchihtaat chechii wiihkuchihtamaasut aniyuu kaaniyuwiniyuu Chishemanituuh che miikuukupane

¹² Namui kiipaa wii nititwen shaash tekash e iteyihtaakusiyaan uu kaa ishi pukuseyimuyaan maak tekash chechii iteyihtaakusuuch aniyuu kaa ishi nitaweyimit Chishemanituu chechii iteyihtaakusuuch. Mikw maak suuhk nika kuchihtaan an chechii iteyihtaakusiyaan, wesh shaash nitipeyimikw Christ Jesus.

¹³ Uu maak kaa itweyaan niichishaanitikw, nichischeyihten eshkw ekaa tekash uu iteyihtaakusiyaan mikw maak peyakw chekwaan nitihtin, namui nipiskaaten taan kaa iteyihtaakusiyaan anite utaahch mikw niikaanihch suuhk niwii ishi aahchiin.

¹⁴ Kwaasht e ishpishiyaan suuhk niwii chiishihtaan chechii wiihkuchihtamaasuyaan an kaaniyuwin taan aniyuu kaa ishi ayeskuushtamuut Chishemanituu che ayaauch Christ Jesus uhchi, eukuu kaachiche pimaatisiiwin.

¹⁵ Misiwe maak chiyaanuu kaa nisituhtamukw taan e ishi taapwehtamuhkw eukuu chipaa iteyihtenaanuu taan kaa ishi aayimuutamaan. Michihpin ekaa che taapwehtuyekwe taan kaa ishi aayimuutamaan Chishemanituu chika piyekasch waapahtiikuwaau.

¹⁶ Tepiyaahch misiwe nanaakataweyihtamihiikuyihkwe taan shaash kaa ishi chiskutamaakuyihkw.

¹⁷ Niichishaanitikw, suuhk wii chischinuwaapamukw e ishi pimaatisiyaan. Chichii waapahtiitinaan taan nihaau chipaa ishi pimaatisiinaanuu. Suuhk maak chischinuwaapamaahkuch anichii kaa chischinuwaapamiyimihtwaau e ishi pimaatisiyuuchiht.

¹⁸ Aat shaash mihchetwaau e chii wiihtamaatakuch uu, miin chiwiihtamaatinaawaau. Nuuhchikuwaapin maak e wiihtamaatakuch. Mihchetu ishi pimaatisiyuuch e nishkuushtahkwaau aniyuu miywaachimuwiniyuu anit yaayimuumaakanuyich Christ aashiteyaahtikuhch e chii nipahaakanuyich.

¹⁹ Eshkw kata nachishkamuch wanaachihiiwewiniyuu. Taan e ishi nituweyihtamuumakaniyikwaauh wiiyuuwaauh eukw chihchiwe niyaakataweyihtamihiikutwaau. Mamihchihiikuuch taan e ihtitwaau. Chipaa pimaameyimuhiikuuch maak aniyuuh ihtuwinh. Mikw taan e itaatisiinaanuyich utah aschiihch eukun mikw miyaamituneyihtamihiikutwaau.

²⁰ Chiyaanuu maak wii, kihchikiishikuhch chihchiwe chit ishi tipeyihtaakusinaanuu. ekute wehchi nituu muushihiihkw che chii uhtuhtet upimaachihiiweu, eukw Utipeyihchikeu Jesus Christ.

²¹ Aahchiiuh e iteyihtaakaniyikwaauh miiyuuh chika miikunuu. Anuhchiish namui saapisiimakanh uyuuh chiiyuunuuh kaye chika nipiimakanh. Jesus maak aniyuu maskuusiiwiniyuu kaa ayaat misiwe chekwaayuu chechii tipeyihtahk eukw uyuu che aapachihtaat chechii miiskutuunaakuhtaat chiiyuunuuh. Muyaam wiya wiiyuu kaa ishpish miyunaakuniyich iskutak kaa wanishkaat nipuwinihch uhchi ekun che ishinaakuhtaat uyuuh chiiyuunuuh.