Philippians 2 - Chishemanituu Utayimuwin: Kaa Uskaach Testament

Paul kaa aayimuutamuwaat Christ utipihteyimuwiniyuu neshta uchisteyihtaakusuwiniyuu

¹ Christ chitihtuutaakunuu chechii yaaichikaapuuhiituyihkw. Christ chitihtuutaakunuu chechii saachihiituyihkw kaye chechii kaachiichimituyihkw. Kaa payehchisiit Ahchaahkw chitihtuutaakunuu chechii miyu wiicheutuyihkw. Christ chitihtuutaakunuu chechii chishewaatutaatuyihkw kaye chechii chistimaacheyimituyihkw.

² Ekw maak miyeyihtamihiikw peyakunihch e ishi maamituneyihtamekw kaye peyakunihch e ishi saachihiituyekw. Peyakunihch e iteyihtamihiikuyekw chekwaan kaye peyakunihch e ishi pukuseyimuyekw.

³ Namui chipaa uhchi ihtuuten chekwaan mikw chiya e maamituneyimisuyin. Maak mikw chechii uhchi mamiywaachimikuyin. Tipihteyimisukw, uste kutakach awenichii e iteyimekuch.

⁴ Namui mikw chiya chipaa uhchi nanaakataweyimisun kutakach kaye awenichii chipaa nanaakataweyimaauch.

⁵ Taan kaa ishi maamituneyihtahk Christ ekun kaye chiyaanuu chipaa ishi maamituneyihtenaanuu.

⁶ Aat Chishemanituu kaa iteyihtaakusiyich e chii iteyihtaakusit, yaapach chii pachishtinam aniyuu taapituu e ishi ayaatwaau.

⁷ Misiwe chii pachishtinam uyuu ekw mwehch aapachihaakan kaa itahiisut. Ekw mwehch naapeu e iteyihtaakusiyich kaa iteyihtaakusit.

⁸ Chii tipihteyihtaakuhiisuu e nanihiihtuwaat Chishemanituu, aat iskutak kaa utihchipayiyich che nipit, aashiteyaahtikuhch kaa chiistaaskuhwaakanuut.

⁹ Eukw maak uyuu wehchii miikut Chishemanituu maauch e niikaaneyihtaakuniyich apuwiniyuu misiwe aweyuuh chechii chisteyimikut. Kaye Chishemanituu chii miikuu ishinihkaasuwiniyuu ekaa ihtakuniyich kutachiyuu ishinihkaasuwiniyuu e ishpish chisteyihtaakuniyich.

¹⁰ Ekw maak misiwe awen che maamihchimaat Jesus kaa ishinihkaataakanuyich, misiwe awen kihchikiishikuhch kaye aschiihch ekw maak nitamihch aschiihch kaa ihtaat.

¹¹ Misiwe awen chika itweu, Jesus eukw Utipeyihchikeu, e maamihchimaat Chishemanituu, Uhtaawiimaau.

Taan chipaa ishi waashtuweuch e pimaatisiitwaau anichii kaa taapwehtahkwaau

¹² Ekw maak niichishaanitikw, muush chichii naanahiihtuunaawaau eshkw mekwaach anite Philippihch kaa ihtaayaan. Etituu maak iteyihtaakun anuhchiish muush chechii nanihiihtamekw taan kaa ishi wiihtamaatakuch mekwaach uu ekaa ihtaayaan anit e ihtaayekw. Suuhk aapatisitaau chechii chiishihtaauhkw aniyuu kaa ishi chihchipayihtaat Chishemanituu chipimaatisiiwinaahch iskutak kaa pimaachihiitahkw. Ihtuutahtaau uu e chischisiihkw Chishemanituu eukw chipaa nanihchiishtuwaanuu kaye wiya chipaa chisteyimaakanuu.

¹³ Wesh Chishemanituu muush aapatisiihkahtam chipimaatisiiwinuuh. Chitihtuutaakunuu chechii naniheyihtamihiihkw kaye chiwiichihiikunuu chechii ihtuutamukw aniyuu e ishi naheyihtahk.

¹⁴ Ihtuutahtaau misiwe chekwaan ekaa mista ayimitutamuhkw kaye ekaa mamachipayihkahtaatuyihkw.

¹⁵ Wesh eukw uu chipaa ishi pimaatisiinaanuu e utawaashiimitutaatahkw Chishemanituu utah aschiihch mekwesiinuu kaa machaatisiitwaau e ihtaatwaau e ihtaayihkw. Ekw maak namui kata uhchi ihtakuniyuu taan chechii ishi ataameyimitahkw awen kaye mitun chika payehchinaakunh chipimaatisiiwinuuh. Mwehch achahkushach e chihkaashtuwetwaau e tipiskaayich ekun chipaa ishi waashtuwenaanuu uta aschiihch.

¹⁶ Ekun uu chipaa ishi pimaatisiinaanuu e waawiihtamuuhkwaau awenichii Chishemanituu e pimaachihiiweyich. Ekw maak iskutak utihchipayihche Christ che takushinit, ekw che maamihchihiyekw. Ekut che nuukuhch ekaa sehchei uhchi aapatisiyaan.

¹⁷ Maaskuuch nika nipahiikuun. Ekw maak an taapishkun tekash e chii pachishteyihtamuuhkw Chishemanituu chipimaatisiiwinuuh aat nipahiikuyaane nika miyeyihten kaye taapishkun chika miyeyihtenaanuu wesh ekut che uhchi asich pachishtinamuwaakanuut Chishemanituu taan e ishi taapweyimekw.

¹⁸ Kaye maak chiyawaau ekun mwehch chipaa ishi sichiyesinaawaau kaye chipaa wiich muuchicheyihtamuuminaawaau.

Paul kaa aayimuumaat Timothy ekw maak Epaphroditus

¹⁹ Nitaweyihtahke Utipeyihchikeu Jesus, nipukuseyihten chechii itishahuuk Timothy anite e ihtaawekw. Ekw maak che miyeyihtamaan pehtamaane taan e itaachimikuyekw.

²⁰ Wesh namui ihtaau kutak awen utah mistahii e iteyimitaakw mwehch niya e iteyimitakuch.

²¹ Misiwe kutakach awenichii mikw wiyawaau nanaakatuweyimisuuch, namui aapateyihtamihiikuuch chechii waawiihtahkwaau miywaachimuwiniyuu.

²² Chichischeyimaawaau Timothy e chii ishi nuukuhtaat e miywaapatisit. Nichii niishwaapatisinaan miywaachimuwin e waawiihtamaahch mwehch naapeu ekw maak ukusisa e niishwaapatisitwaau nichii ishinaakusinaan.

²³ Nipukuseyihten wiipach chechii itishahuuk anite e ihtaawekw iskutak chischeyihtamaane taan che ispayiwaane.

²⁴ Nitaapweucheyimaau Utipeyihchikeu chechii nihiipayihtaat kaye niya wiipach chechii nituwaapamitakuch.

²⁵ Nititeyihten kaau chechii chiiwetishahuuk chiichishaanuu Epaphroditus anite e ihtaawekw. Wesh suuhk nichii wiichihiikw e waawiihtamaan miywaachimuwin. Chiyawaau chichii pechi itishahwaawaau chechii pechi waawiichihiit.

²⁶ Pukuweyihtam miin chechii waapamitaakw misiwe. Chii mukushkaachishkaakuu e chii wiihtaamaakuwekw e chii aahkusit.

²⁷ Chii mista aahkusuu kiipaa taapwe, chekaat chii nipuu. Mikw maak Chishemanituu nichii chistimaacheyimikunaan taapishkun. Chii ihtuutaweu ekaa chechii nipiyich ekaa uste chechii misimeyihtamuch.

²⁸ Ekun maak wehch etituu sichiyesiyaan chechii itishahuuk anite e ihtaawekw chechii miyeyihtamekw miin waapamekwe. Ekw maak namui nika uhchi ishpish aayimeyihten.

²⁹ Waapahtiyaahkw e sichiyeyaapamekw mwehch e ihtitwaau kaa taapweucheyimaatwaau Utipeyihchikeu wiyaapamitutwaauh. Yaakwaau chipaa iteyimaawaauch misiwe awenichii uu e iteyihtaakusitwaau, e iteyihtaakusit wiya.

³⁰ Namui uhchi puuniyuu e atuskuwaat Jesus aat e chii kushpanaataniyich upimaatisiiwin e chii peshuwaapahtahk nipuwiniyuu. Eukw uyuu kaa ihtit e pechi wiichihiit ekaa uhchi ihtaayekw chiyawaau chechii pechi wiichihiyekw.