Philemon 1 - Chishemanituu Utayimuwin: Kaa Uskaach Testament

E waachiyemaakanuut Philemon

¹ Niya Paul kaa masinahiicheyaan. Chiichishaanuu Timothy kaye ihtaau utah. Chipahutuukamikuhch nitihtaan anuhchiish an uhchi e atushkuuk Jesus Christ. Chiya niwiichewaakanaan Philemon kaa masinahamaataan kaye chiya kaa atushkuwat Jesus mwehch niyaan e ishi atushkuwachiht.

² Anichii umaamuuayimihaauch chiichihch kaa maamuu ayimihaatwaau eukunich kaye mesinahamuukwaau. Chimisinuu Apphia kaa ishinihkaasut ekw maak Archippus eukunich kaye mesinahamuukwaau. Kaye wiya Archippus suuhchikaapuu e atushkuwaat Jesus mwehch niya e ihtuuch.

³ Nitayimihaan Chishemanituu Kuuhtaawiinuu ekw maak Utipeyihchikeu Jesus chechii miyutuutamaataakuch kaye chechii miitaakuch chechii chiyaameyihtamuwekw.

Philemon usaachihiiwewin ekw maak utaapwehtamuwin

⁴ Niichishaan Philemon muush chichischisiitutaatin tahtwaau e ayimihaan. Ninanaaskumaau maak Chishemanituu.

⁵ Muush nipehten e ishpish saachihiitwaau kaa taapwehtahkwaau. Nipehten kaye taan e ishi taapweyimat chitipeyihchikeminuu Jesus.

⁶ Nitutamaan aniyuu e ati aayimuutamuutwaau awenichii taan e ishi taapwehtaman chechii wiichihiiwemakahch etituu chechii ati chischeyihtaman taan chechii ishi miyutuutamaakuyihkw Christ Jesus.

⁷ Naashch taapwe nimiyeyihten kaye naashch nikaachiichihiikuun e chischeyihtamaan e ishi ayaan saachihiiwewin, niichishaan, wesh mihchetu kaa taapwehtahkwaau chii kaachiichihiikuuch taan e ishi ayaayin saachihiiwewin.

Paul kaa aayimuumaat Onesimus

⁸ Eukw maak wehchi wii kakwechimitaan chekwaan e chischeyimitaan e ishpish saachihiitwaau awenichii. Apastal e ihtaayaan chipaa chii wiishuwaatitin taan che ihtiyin.

⁹ Mikw maak saachihiiwewin nitihtuutaakuun teyakuch chechii kakwechimitaan. Namui chika uhchi aayihkamihiitin e wiihtamaataan taan chipaa ihtin aat e chisheinuuyaan kaye chipahutuukamikuhch e ihtaayaan e chii aayimuumak Jesus.

¹⁰ Chiwii kakwechimitin maak chechii wiichihiit an weskach chitaapachihaakan Onesimus kaa ishinihkaasut. Wesh mwehch tipiiwe nikus nititeyimaau niya e chii aayimuutamuuk miywaachimuwiniyuu iskutak che taapweyimaat Jesus. Utah chipahutuukamikuhch kaa ihtaayaan ekut kaa pimaachihut.

¹¹ Taapwe kiipaa namui chuuhchi wiyesh itaapachihaau anite utaahch. Anuhchiish maak taapishkun taapwe chika miywaapachihaanuu.

¹² Ekw maak kaau e itishahuuk anite e ihtaaut. Mikw maak wii chischeyihta naashch e macheyihtamaan e pachishtinak.

¹³ Nipaa miyeyihten kiipaa utah chii kanuweyimaauchipane. Ekw maak mwehch chiya Philemon e wiichihiyin chipaa ishinaakun utah chii ihtaakupane Onesimus mekwaach chipahutuukamikuhch e ihtaauch miywaachimuwin uhchi.

¹⁴ Mikw maak namui nuuhchi wii kanuweyimaau ekaa eshkw uhchi niskumuyin. Nipaa miyeyihten chiya tipiiwe wiyeyihtaman taan che itashuwaatat Onesimus, namui chiwii aayihkamihiitin.

¹⁵ Maaskuuch eukw uyuu wehchii pachishtinikut Onesimus Chishemanituuh chechii nakatisk eshkw anite paatimaa muush chechii ihtaat anite e ihtaaut.

¹⁶ Taapaa ekw aapachihaakan chika uhchi ishi kanawaapamaakanuu. Uste chisteyihtaakusuu ishpishaat aapachihaakan. Mwehch tipiiwe chiichishaanuu chika ishi kanawaapamaanuu. Ekun wesh kiipaa e ishi kanawaapamak niya. Ekun maak mwehch che ishi kanawaapamat kaye chiya, mwehch tipiiwe chiichishaan kaye maak Utipeyihchikeu utaapachihaakanh.

¹⁷ Taapwe niwiichewaakan e iteyimuune mikw ishi piihtakahii mwehch niya chipaa ihtuutuun nituwaapamitaan.

¹⁸ Chiishpin e ihtakuniyikwe taan kaa ishi machipayihiisk maak e ihtakuniyikwe e ishi masinahamaask niya nika nihiipayihtaan.

¹⁹ Ekw maak niya tipiiwe e itisinahiicheyaan, niya Paul, chika taapishtwaatin. Namui chipaa uhchi nitaweyihtaakun chechii chischisuumitaan e masinahamuuyin chiya tipiiwe chipimaatisiiwin.

²⁰ Ekw maak e saachihiit Utipeyihchikeu, niichishaan, chipukuseyimitin chechii ihtuutaman uu kaa ishi kakwechimitaan chechii ihtiyin. Naashch chika miyeyihtamihiin ihtuutamane taan kaa ishi kakwechimitaan.

²¹ Nicheshtinaahun maak taapwe che ihtuutaman misiwe uu kaa ishi aayimuutamaataan chechii ihtiyin. Nicheshtinaahun kaye ayuwaak yaapach che ihtuutaman.

²² Miin kutach chekwaan kaa wii kakwechimitaan chechii ihtuutamuuyin. Chipaa chii aa ayeskuunamuun peyakw e pischisaach anit e chiichihch. Wesh nipukuseyimaau Chishemanituu chechii nihiipayihtuut wiipach chechii nituwaapamitakuch muyaam e ishi nitutamuwekw.

Waachiyemuwewin

²³ Chiwiichewaakanuu Epaphras kaye wiya ihtaau utah chipahutuukamikuhch aniyuu uhchi e chii aayimuumaat Jesus. Chiwaachiyemikuwaau kaye wiya.

²⁴ Chiwaachiyemikuwaauch kaye Mark, Aristarchus, Demas ekw maak Luke. Kaye wiyawaau atushkuweuch Utipeyihchikeuh uchii.

²⁵ Nitutamaan Utipeyihchikeu Jesus Christ misiwe chechii shaweyimitaakw. Amen.