Matthew 8 - Chishemanituu Utayimuwin: Kaa Uskaach Testament

Jesus kaa miinuwaachihaat naapeu kaa umichiiwaaspineyich

¹ Iskutak maak Jesus piyechi pinisuwet aniyuu wachiyuu, mihchetu aweyuuh chii ati nuushuushkaakuu.

² Ekw naapeu kaa maayaataniyich umichiiwaaspinewiniyuu e ayaayich kaa pechi naatikut kaa uchihchiihkunipayihuyich anite uhchishkuu e ihtaat, ekw kaa itikut, “Utipeyihchikeu, wii pechi wiichihiyine chika chii ihtuuten chechii payehtisiyaan.”

³ Jesus maak chii taahtineu e itaat, “Chiwii wiichihiitin, payehchisiih.” Tiiwehch maak chii miinuwaatisiyuu an naapeu aniyuu kaa itaaspinet.

⁴ Ekw Jesus kaa itaat, “Yaaitei, ekaawii mitun wiihtamuu awen paatishkaan chii nituuchischeyimiske ayimiheuchimaau itiske maak shaash e miinuwaatisiyin. Kaye chii pachishtinamane an miiwewin aniyaa Moses kaa itashuwet chechii miiwaanuyich iskutak e miinuwaachihaakanuut awen. Eukw maak uyeyuu uhchi che chischeyimiskwaau awenichii tekash e miinuwaatisiyuut.”

Jesus kaa miinuwaachihiimaat shimaakanisha kaa niikaanishkuwaayich utaapachihaakaniyuuh

⁵ Iskutak Jesus tekushihk anite ihtaawinihch Capernaum kaa ishinihkaateyich, chii nachishkaakuu aniyuu naapeu kaa niikaanishkuwaayich shimaakanisha e pukuseyimikut chechii wiichihaat.

⁶ E itikut, “Utipeyihchikeu, nitaapachihaakan e ihtaayaahch ihtaau e aahkusit ekaa chii aahtinisut kaye maak naashch wiisacheyihtamihpineu mikw e pimishinit unipewinihch.”

⁷ Ekw Jesus kaa itaat, “Nika nituwaapamaau, che miinuwaachihiik.”

⁸ Ekw an shimaakanishuuchimaau kaa itaat aniyuu Jesus, “Namui nitepicheyihtaakusin chechii pechi piihcheyin niwaaskaahiikanimihch. Mikw maak itweh chechii miinuwaatisiit nitaapachihaakan ekw maak che miinuwaatisiit aat ekaa takushiniyine.

⁹ Nichischeyihten chechii ihtuutaman uu, kaye niya ihtaauch nuuchimaamach e pishichihiikwaau. Kaye maak ihtaauch shimaakanishach niya e wawiishuumakwaau. E itak peyakw shimaakanish ‘Anite ituhte,’ tiiwehch ekute e ituhtet kaye maak e itak shimaakanish, ‘Aashtam,’ tiiwehch takushinuu. Ekw kaye kutak e itak nitaapachihaakan ‘Uu maa ihtuut,’ eukw aniyuu e ihtuutahk.”

¹⁰ Iskutak maak Jesus piyehtawaat uyuu e itweyich naashch taapwe chii miskaateyihtamihiikuu utaapwehtamuwiniyuu. Ekw kaa itaat aniyuu aweyuuh kaa wiicheukut, “Aat maak ekaa Jewa itiskaanesit uu naapeu eshkw namui nuuhchi waapamaau Jewa e itiskaanesit awen utah Israelihch chechii ishpish suuhchitaapwehtahk.

¹¹ Chiwiihtamaatinaawaau waapanuutaahch kaye maak paashtaachiiwetinuutaahch chika uhtuhteuch awenichii che wiitapimaatwaau Abraham, Isaac ekw maak Jacob makushaanuyiche kihchikiishikw chisheuchimaawinihch.

¹² Mikw maak anichii kaa masinaasutwaau chisheuchimaawinihch che ishi wiichihiiwewaakupanenich namui chika uhchi piihtakahaakanuuch anite. Wanitipiskusiiwinihch chika ishiwepinaakanuuch, ekute anite che maatutwaau kaye che mamiteyaapitesinitwaau.”

¹³ Ekw Jesus kaa itaat aniyuuh shimaakanishuuchimaauh, “Chiiwe, taan kaa ishi taapwehtaman ekun che ishi ihtuutamaakuyin.” Aniyuu maak mekwaach kaa itaat aniyuu shimaakanisha, ekut mwehch aniyuu tipahiikaniyuu kaa miinuwaatisiyich aniyuu utaapachihaakanh an shimaakanishuuchimaau.

Jesus kaa miinuwaachihaat mihchetu aweyuuh

¹⁴ Ekw Jesus kaa ituhtet anite Peter wiichiihch, ekw kaa waapamaat aniyuu Peter usikusiyuuh e aahkusiyich e chishiteunikusiyich.

¹⁵ Ekw Jesus kaa taahtinamuwaat aniyuu Peter usikusiyuuh utihchiyuu, kaa iishtepayiyich aniyuu kaa chishiteunikusiyich, ekw kaa ati wanishkaayich aniyuu iskweu, kaa ati miyuhkaakut Jesus aniyuuh iskweuh.

¹⁶ Iskutak maak e ati utaakushiyich, ekw kaa peshuwaatwaau awenichii mihchetu aweyuuh kaa piihchishkaakuyich machiahchaahkwa anite Jesus e ihtaayich. Jesus maak chii itashumeu chechii wiiwiyich aniyuu machiahchaahkwa aniyuu kaa piihchishkaakuyich iinuuh, kaye maak misiwe chii miinuwaachiheu aniyuu kaa aahkusiitwaauh.

¹⁷ Aniyuu maak kaa ihtuutahk chii ispayiniyuu taan kaa ishi niikaan wiihtamukupane che ispayiyich aniyaa uchischiwehiichesuu Isaiah kaa itwet, Chichii miinuwaachihiikunuu kaye chii iichenam misiwe nanaahkuu chititaaspinewinuuh.

Jesus kaa wiihtahk taan e iteyihtaakuniyich e nuushuushkuwaakanuut

¹⁸ Iskutak maak Jesus wiyaapamaat aniyuu mihchetu aweyuuh anite waaskaa e ihtaat kaa ihtaayich, ekw kaa itaat aniyuu uchischinuhamuwaakanh nete kwestehchekaam aniyuu saakahiikaniyuu chechii itahuyikut.

¹⁹ Eshkw maak ekaa uhchi mushaauhahkwaau peyakw an kaa chiskutamaachet wiishuwewiniyuu chii iteu aniyuu Jesus, “Chischinuhamaachesuu, chika papaawiicheutin taanite che ituhtewane.”

²⁰ Ekw Jesus kaa itaat, “Mahcheshuuch ihtakuniyuu uwaatakuwaauh, piyeshiishach kaye ihtakuniyuu uwachishtunawaauh, mikw maak Iinuu Ukusisa namui ayaayuuh taanit chechii waweyishiniyiyich chechii iiwepiyich.”

²¹ Ekw maak kutak naapeu e nuushuushkuwaat Jesus chii iteu, “Utipeyihchikeu, pachishtinh pitamaa chechii nahiihkuuk nuuhtaawii puunipimaatisiite ekw maak yaakw che wiicheutaan.”

²² Ekw Jesus kaa itaat, “Pechi wiicheuh. Ekush anichii mwehch kaa nipitwaau kaa iteyihtaakusitwaau awenich kata nahiihkuweuch aniyuu utiiniimuwaauh kaa nipiyich.”

Jesus kaa wiishuwaatahk e yuutiniyich kaye maak nipiyuu

²³ Ekw Jesus kaa puusit chiimaaniyuu, uchischinuhamuwaakanh e chiimikut.

²⁴ Chek sischikuuch kaa mistachiishtiniyich anit saakahiikanihch, chii kushtaatikuniyuu maak chechii kushaapeyaahaniyich aniyuu uchiimaanuwaau. Chii nipaau maak wiya Jesus.

²⁵ Chek anichii chischinuhamuwaakanich kaa pekunaatwaau Jesus e itaatwaau, “Utipeyihchikeu, pechi wiichihiinaan, shaash chika wanaachihunaanuu.”

²⁶ Ekw Jesus kaa itaat, “Chekwaan wehchi naashch kushtaachiyekw, taapwe nuwach kaa apishaashich chitaapwehtamuwinawaau.” Ekw kaa wanishkaat kaa itashuwaatahk aniyuu e yuutiniyich chechii puunipayiyich kaye aniyuu kiskanh kaa itaat, “Chiyaamisiikw.” Tiiwehch maak chii uhchi ywaashtiniyuu.

²⁷ Misiwe maak anchii naapeuch chii maamishkaateyihtamuch e itwetwaau, “Awen uu waawaach e yuutiniyich kaye maak kiskanh e pishichihiikut.”

Niishu naapeuch machiahchaahkwa kaa piihchishkaakutwaau

²⁸ Iskutak maak Jesus mesikaatwaau anite aniyuu Gadarene kaa ishinihkaateyich aschiiyuu kwestehchekaam aniyuu saakahiikaniyuu, chii nachishkaakuu niishu naapeuh e piihchishkaakuyich machiahchaahkwa anite iihkuhiiskaanihch e uhtuhteyich. Namui waawaach aweyuuh uhchii pimuhteyuuh anite aniyuu meskanaayuu kaa ishpish chii kushtaatikusiitwaau uchii naapeuch.

²⁹ Iskutak maak wiyaapamikut Jesus aniyuuh naapeuh tiiwehch chii uhchi aashihkweyuuh e itweyich, “Jesus, taan waa ishiihkuuyaahch, chiya Chishemanituu Ukusisa, shaash aa chiwii pechi wawiisacheyihtamihiinaan eshkw maak ekaa utihchipayihch anit che wawiisacheyihtamuwaauhchipane.” Ekun kaa itikut aniyuuh niishu naapeuh.

³⁰ Anit maak aniyuu kaa ihtaatwaau namui waahyuu anit chii ihtaauch e mihchetitwaau kuuhkuushach e miichisutwaau.

³¹ Ekw anichii machiahchaahkuch naashch suuhk chii nitutamuweuch Jesus e itaatwaau, “Che wiiwiitishihuwaauhche, nete itishahunaan anechii kuuhkuushach chechii piihchishkuwachihtwaau.”

³² Ekw Jesus kaa itaat, “Maachiikw.” Iskutak maak kaa wiiwiitwaau anichii machiahchaahkuch anit uhchi aniyuu niishu naapeuh e ihtaayich ekw kaa aashuupiihchishkuwaatwaau aniyuu kuuhkuushah. Ekw anichii kuuhkuushach kaa yaamitaauhchipahiitutwaau anite ishi saakahiikanihch, kaa nishtaapaawetwaau.

³³ Iskutak maak anichii kaa naanaakachihaatwaau aniyuuh kuuhkuushah kaa waapahtahkwaau taan kaa ispayiyich chii ushimuuch, kaa nituu wiihtahkwaau anite ihtaawinihch taan kaa ispayiyich aniyuu niishu naapeuh kaa piihchishkaakuyich machiahchaahkwa.

³⁴ Naanaacheshiish maak misiwe awenichii anit ihtaawinihch kaa ihtaatwaau chii nituwaapameuch Jesus. Iskutak maak wiyaapamaatwaau chii siihchimeuch chechii iichesiyich anit utaschiiwaahch uhchi.