Matthew 28 - Chishemanituu Utayimuwin: Kaa Uskaach Testament

Jesus kaa wanishkaat nipuwinihch uhchi

¹ Iskutak maak kaa miyaaupayiyich aniyuu e ayimiheuchiishikaayich, an maak e ati petaapihch Mary Magdalene ekw maak Mary chii nituwaapahtamuch aniyuu chiipaikamikuyuu.

² Sischikuuch maak chii mista kuihkun, ekw Utipeyihchikeu utenchilam kaa pechi aasiich kihchikiishikuhch uhchi, kaa iiche tihtipinaayich aniyuu asinii anit ishkwaahtemihch uhchi kaa ati tehtapiyich anit.

³ Muyaam maak e waashtepayihch kaa ishpish chiihkaayaashtuwech ekun kaa ishinaakusit an enchil iskutak wehchi nuukusit, nesht uchekwaanim taapishkuuch kuun kaa ishpish waapisit ekun kaa ishinaakuniyikwaauh.

⁴ Anichii maak shimaakanishach kaa naanaakachihtaatwaau aniyuu chiipaikamikuyuu e ishpish kushtaachitwaau, chii nanamipayuuch chii pahchishinuuch maak ekw mwehch e nipitwaau kaa ishinaakusitwaau.

⁵ Ekw an enchil kaa itaat aniyuu iskweu, “Ekaawii kushtaachikw, chichischeyimitinaawaau e naanituuweyimekw Jesus an kaa chiistaaskuhwaakanuut.

⁶ Namui ihtaau utah, wesh chii wanishkaau muyaam taan kaa itwet che ihtit. Aashtamukw pechi kanawaapahtamuwaahkw anit kaa pimishimaakanuut.

⁷ Wii chishipayikw maak nituu wiihtamuumaahkw uchischinuhamuwaakanh, e chii wanishkaat nipuwinihch uhchi, anuhchiish maak niikaan ituhteu Galileehch ekute anite che waapamekw. Wii chischisikw maak uu kaa ititakuch.”

⁸ Anichii maak iskweuch chii wiiwiipahiituuch anit chiipaikamikuhch uhchi e sechisitwaau nesht kaye e muuchicheyihtahkwaau, kaa nituu wiihtamuwaatwaau aniyuu chischinuhamuwaakanh.

⁹ Sischikuuch maak chii uhchi nachishkaweuch Jesus ekw kaa itikutwaau, “Wii chiyaameyihtamukw.” Ekw kaa uchihchiihkunipayihutwaau e ihtaayich kaa maakunamuwaatwaau usith ekw kaa nuuchiishtuwaatwaau.

¹⁰ Ekw Jesus kaa itaat, “Ekaawii kushtaachikw, nituu itaahkuch niichishaanich Galileehch chechii ituhtetwaau, ekute anite che waapamitwaau.”

Taan kaa itashumaakanuutwaau anichii chiipaikamikuyuu kaa naanaakachihtaatwaau

¹¹ Mekwaach maak anichii iskweuch e ishpishiitwaau e wii nituu wiihtamuwaatwaau aniyuu chischinuhamuwaakanh, pasch anichii shimaakanishach kaa naanaakachihtaatwaau aniyuu chiipaikamikuyuu chii ituhteuch anite ihtaawinihch, kaa nituu wiihtamuwaatwaau aniyuu kaa niikaanishkuwaayich ayimiheuchimaauh misiwe taan kaa ishi waapatahkwaau e ispayiyich.

¹² Ekw anichii kaa niikaanishkuwaatwaau ayimiheuchimaau kaye anichii kaa niikaanishkuwaatwaau iinuu kaa nishtuwiitwaau ekw kaa wiyeyihtahkwaau taan che ihtitwaau. Chii mista miyeuch maak shuuliyaayuu aniyuu shimaakanisha.

¹³ Ekw anichii kaa niikaanishkuwaatwaau ayimiheuchimaau kaa itaatwaau aniyuu shimaakanisha, “Che itekuch awenichii, Tepiskaach mekwaach kaa nipaayaahch uchischinuhamuwaakanh chiimuut chii pechi nituwaahtamuweuch aniyuu wiiyuuyuu, ekw kaa chistuhtataayich.

¹⁴ Pehtahke maak uyuu an chisheuchimaau, nika shaakuuchimaanaan ekaa chiyawaau chechii ataameyimikuyekw, chika miyupayihiitinaan ekaa wiyesh chechii ihtuutaakuyekw.”

¹⁵ Ekw anichii shimaakanishach kaa utinahkwaau aniyuu shuuliyaayuu, ekun maak kaa ihtitwaau aniyuu kaa itashumaakanuutwaau. Uu maak tipaachimuwin ekun kaa ishi tipaachimushtuwaakanuutwaau Jewa iinuuch uu mekwaach kaye anuhchiish kaa chiishikaach eshkw ekun e itaakanuutwaau.

Jesus kaa wiishumaat misiwe uchischinuhamuwaakanh

¹⁶ Ekw anichii peyakushaap chischinuhamuwaakanich kaa ituhtetwaau anite aniyuu wachiyuu Galileehch kaa ihtakuniyich anite kaa itikutwaau Jesus che ituhtetwaau.

¹⁷ Iskutak maak wiyaapamaatwaau, chii nuuchiishtuweuch aat pasch anit e tashitwaau e chii aanuwehtahkwaau.

¹⁸ Ekw kaa naatikutwaau Jesus kaa itikutwaau, “Nichii miikuun niya tekash chechii uchimaahkahtamaan kihchikiishikw nesht aschii.

¹⁹ Uu maak uhchi maachiikw nituwaapamaahkuch misiwe e itiskaanesitwaau awenichii che ihtuutawekuch chechii uchischinuhamuwaakaniyaan, che siikahaahtuwekuch utishinihkaasuwiniyuu Uhtaawiimaau nesht Ukusiisimaau nesht Kaa payehchisiyich Ahchaahkwa.

²⁰ Kaye che chiskutamuwekuch chechii nanihiihtahkwaau misiwe taan kaa itashumitakuch. Muush maak chika wiicheutinaawaau piihiim ati iskwaapayihche aschii.”