Matthew 27 - Chishemanituu Utayimuwin: Kaa Uskaach Testament

Jesus kaa ituhtahaakanuut Pilate e ihtaayich

¹ Wiipach maak chiyechishepaayaayich misiwe anichii kaa niikaanishkuwaatwaau ayimiheuchimaauh ekw maak anichii Jewa iinuu kaa niikaanishkuwaatwaau chii nishtuwiyuch chechii wiyeyihtahkwaau taanite chechii uhchi nipahaakaanuyich Jesus.

² Iskutak maak kaa mamechimaapihkaatamuwaatwaauh utihchiiyuuh, ekw kaa chistuhtahaatwaau. Anite maak aniyuu Rome chisheuchimaau aapachihaakan Pilate kaa ishinihkaasuyich e ihtaayich ekute kaa ituhtahaatwaau.

Judas kaa nipahiisut

³ Judas maak an kaa wiyeshipachishtinaat Jesus iskutak neshitaunahk taapwe che nipahaakanuyich Jesus naashch chii mihchiiwesuu ekw kaau kaa ituhtutawaat aniyuu chisheayimiheuchimaau ekw maak aniyuu Jewa iinuuh kaa niikaanishkuwaayich aniyuuh nishtumitanuu shuuliyaawaapiskusha kaa miyaakanuut,

⁴ ekw kaa itaat, “Taapwe nuwach niwanituuten taan kaa ishi wiyeshipachishtinak naapeu ekaa uhchi machituutahk.” Ekw kaa itikut aniyuuh ayimiheuchimaau ekw maak aniyuu Jewa iinuuh kaa niikaanishkuwaayich, “Taapaa wiyesh nika chii ihtinaan niyaan. Chiya chikaa wii miyupayihtwaasun an.”

⁵ Ekw Judas anite napachistakuhch kaa ishi wepinaat aniyuuh shuuliyaawaapiskwa anite ayimiheukamikuhch. Chii ati wiiwiyuu maak ekw kaa nituu akuwiisut.

⁶ Ekw anichii kaa niikaanishkuwaatwaau ayimiheuchimaau kaa utinahkwaau aniyuu shuuliyaayuu ekw kaa itwetwaau, “Namui chika chii kanuweyihtenaanuu uu shuuliyaau utah chisheayimiheukamikuhch, wesh chii aapatan e chiishiihkuwaakanuut awen chechii nipahaakanuut naapeu.”

⁷ Pitamaa maak chii ayimitutamuch uyeyuu. Ekw chek kaa niskumutwaau chechii utinihkwaau aschiiyuu anite kaa chii uhtinaakanuut saschuu nanaahkuu chekwaayuuh e usihtaakanuuhkwaau. Eukw maak aniyuu aschiiyuu kaa ati itaapachihtaataau e chiskahaatwaau maaniteuh e puunipimaatisiyich.

⁸ Eukw maak wehchii ati ishinihkaatech an aschii, “Mihkw aschii.” Ekun maak eshkw e ishinihkaatech an aschii anuhchiish.

⁹ Ekw maak kaa tipipayiyich taan kaa itwet aniyaa Jeremiah kaa ishinihkaasut uchischiwehiichesuu kaa itwet, Chii utineuch aniyuu nishtumitanuu shuuliyaawaapiskwa taan kaa ishi niskumutwaau pasch Israel iinuuch che ishpish chiishiihkaasutwaau aniyuu kaa itachimaakanuyich.

¹⁰ Ekw maak kaa pachishtinahkwaau aniyuu shuuliyaayuu chechii utinikanuyich aniyuu aschiiyuu anite kaa chii uhtinaakanuut saschuu nanaahkuu chekwaayuu e ushihtaakanuuhkwaauh anit uhchi. Wesh eukw uyuu kaa itashumit Utipeyihchikeu che ihtuuch. eukw uyuu chii itweche Jeremiah.

Pilate kaa ishi kakwechimaat Jesus

¹¹ Jesus maak chii uhchishkuukaapuushtaweu Pilate aniyuuh Rome chisheuchimaau aapachihaakanh. Ekw kaa kakwechimikut, “Chiya aa Jewa iinuuch uchisheuchimaamuwaau.” Jesus maak chii iteu, “Ekun e itweyin.”

¹² Ekw aniyuuh kaa niikaanishkuwaayich ayimiheuchimaauh ekw maak aniyuuh Jewa iinuuh kaa niikaanishkuwaayich nanaahkuu chii ishi mamachaachimikuu. Namui maak uhchi chistuu Jesus.

¹³ Ekw kaa itikut aniyuu Pilate, “Namui aa chipehtawaauch taan e ishi nanaahkuu itaachimiskwaau.”

¹⁴ Namui maak yaapach uhchi chistuu Jesus. Ekw aniyuu Rome chisheuchimaau aapachihaakan naashch kaa miskaateyimikut.

Kaa itashuwaanuuhch Jesus chechii nipahaakaanuut

¹⁵ Eshikum pipun maak iskutak wetihchipayihch an miyaaskaacheu makushewin Pilate chii pachishtineu maanh peyakw aweyuuh e chii chipahwaakanuyich e chii wanihpisuyich uhchi. Mikw aniyuu netuweyimaayich aniyuu iinuu chechii pachishtinaakanuyich eukunh aniyuu kaa chii pachishtinaat.

¹⁶ Mekwaach maak chii ihtaau naapeu anite chipahutuukamikuhch naashch e miyu chischeyimaakanuut taan kaa ishi nanaahkuu waanihpisut, Barabbas e ishinihkaasut.

¹⁷ Iskutak maak nestuwiyich aniyuuh iinuuh, Pilate chii kakwechimeu, “Awen netuweyimiyekw chechii pachishtinamaatakuch, Barabbas aa maak Jesus an Christ kaa ishinihkaataakanuut.”

¹⁸ Chii chischeyimeu Pilate aniyuuh Jewa iinuuh kaa niikaanishkuwaayich e uhteyimaayich Jesus eukw aniyuu wehchi pachishtishuwaatamaakut.

¹⁹ Mekwaach maak Pilate e apit anite wiyaaskunicheukamikuhch wiichiskweuh chii pechi itishahweyuuh aweyuuh chechii itikut, “Ekaawii wiyesh ihtuutuu an kaa kuiskutaatisiit naapeu. Wesin naashch nimukushkaateyihtamihiikuun taan kaa ishi puwaatak tepiskaayich.”

²⁰ Anichii maak kaa niikaanishkuwaatwaau ayimiheuchimaauh ekw maak anichii Jewa iinuuh kaa niikaanishkuwaatwaau chii shaakuuchimeuch aniyuuh iinuuh anit kaa ihtaayich chechii kakwechimaayich Pilate Barabbas chechii pachishtinaayich ekw Jesus chechii nipahaakanuyich.

²¹ Ekw Pilate miin kaa kakwechimaat aniyuu iinuuh, “Taan eukw netuweyimiyekw chechii pachishtinamaatakuch uchii e niishitwaau.” Ekw anichii iinuuch kaa itwetwaau, “Barabbas.”

²² Ekw Pilate kaa itaat, “Taan maak che ihtuutuuk uu Jesus, an Christ kaa ishinihkaataakanuut.” Ekw misiwe anichii iinuuch kaa itwetwaau, “Chiistaaskuhwaahkw aashiteyaahtikuhch.”

²³ Ekw Pilate kaa itaat, “Chekwaayuu maak. Taan kaa ishi machituutahk.” Ekw aahch kaa aashihkwetwaau anichii iinuuch, “Chiistaaskuhwaahkw aashiteyaahtikuhch,” e ishi tepwetwaau.

²⁴ Iskutak maak neshituunahk Pilate ekaa chechii shaakuuchimaat aniyuuh iinuuh kaye piskunuu e ati chihchi machipayinaanuyich chii kaasiihtahcheu uhchishkuu aniyuuh iinuuh e ihtaayich. Ekw kaa itaat, “Namui wii niya nika uhchi ataameyihtaakusin che nipahaakanuut uu naapeu. Chiyawaau uu kaa ihtiyekw.”

²⁵ Ekw anichii iinuuch kaa itwetwaau, “Ekush niyaan ekw maak nitawaashiiminaanich nika maahtakushkaakuwaanaan taan che ishi nipahaakanuut.”

²⁶ Ekw Pilate kaa itashuwet chechii pachishtinaakanuyich Barabbas. Iskutak maak kaa itashuwet chechii pishishtehwaakanuyich Jesus, ekw kaa pachishtishuwaataat chechii chiistaaskuhwaakanuyich aashiteyaahtikuhch.

Shimaakanishach kaa maayeyimaatwaau Jesus

²⁷ Ekw Pilate ushimaakanishimh kaa ituhtahaayich Jesus anite aniyuuh chisheuchimaau aapachihaakanh wiichiihch. Misiwe maak anichii shimaakanishach anit kaa ihtaatwaau chii waaskaakaapuushtaweuch Jesus.

²⁸ Chii manamuweuch maak uchekwaanimiyuuh. Ekw e mihkwekaniyich akuhpiyuu kaa pushchishkamutiyaatwaau muyaam chisheuchimaau e itaaspitaatwaau.

²⁹ Ekw kaa ushihtamuwaatwaau chisheuchimaau astutaniyuu, kaa kaasuutewaayikwaauh niipisiyaahtikw e chii aapachihtaawaatwaau. Eukw aniyuu kaa utastutinahaatwaau. Kaye chii miyeuch mistikuyuu chechii tahkunamiyich. Ekw kaa niipaskuupuwaatwaau uhchishkuu anit e ihtaayich. Chii maayeyimeuch mwehch e maamihchimaatwaau e itaatwaau, “Eukw chiya Jewa iinuuch uchisheuchimaamuwaauh.”

³⁰ Chii sihkwaateuch maak. Ekw kaa utataamistikwaanehwaatwaau aniyuu mistikuyuu kaa tahkunamiyich.

³¹ Iskutak maak kaa chiishi maayeyimaatwaau ekw kaa manamuwaatwaau aniyuu akuhpiyuu kaa chichishkamiyich ekw wiya uchekwaanimiyuuh kaa pushchishkamutiyaatwaau. Ekw kaa wiiwiihtahaatwaau che nituu chiistaaskuhwaatwaau aashiteyaahtikuhch.

Jesus kaa chiistaaskuhwaakanuut aashiteyaahtikuhch

³² Mekwaach maak e ati wiiwiitwaau aniyuu ihtaawiniyuu, chii nachaheuch naapeuh Simon e ishinihkaasuyich Cyrene kaa ishinihkaateyich ihtaawiniyuu e uhchiyich. Eukw uyuu kaa aayihkamihaatwaau chechii wanikaatihwaayich Jesus utaashiteyaahtikumiyuuh.

³³ Golgotha kaa ishinihkaateyich ekute kaa ituhtahaatwaau Jesus. Uu Golgotha kaa iinaanuuhch, anit e ihtakuhch chiipaistikwaan ishi itweshtamuwaataakanuu.

³⁴ Iskutak maak wetihtahkwaau aniyuu Golgotha kaa ishinihkaateyich ekut kaa wii minihaakanuut Jesus shuuminaapuuyuu chiikuu chekwaayuu e wiisakaniyich e chii pachishtinikanuyich anit. Mikw maak iskutak kaa kuchishtahk Jesus aniyuu namui uhchiwii minihkweu.

³⁵ Iskutak maak kaa chiistaaskuhwaatwaau Jesus, chii katetaaunamaatuuch uchekwaanimiyuuh. Chii chaahkahuutuuch, ekut kaa uhchi wiyeyihtahkwaau aweyuu che ayaayich aniyuuh uchekwaanimiyuuh. Uyuu maak kaa ihtitwaau ekut kaa tipipayiyich taan kaa itweyich aniyaa uchischiwehiichesuu, chii mamaatinamaatuuch nichekwaanim kaye chii taauhiikaanuu nitakuhp.

³⁶ Ekw maak kaa waweyapitwaau e naanaakachihaatwaau.

³⁷ Ishpimiishiish maak anit ustikwaanihch chii akuhtakahiikanuuyuu e masinaateyich taan kaa ishi ataameyimaakanuut. Chii itashteyuu, “Eukw uu Jesus, Jewa iinuuch uchisheuchimaamuwaauh.”

³⁸ Niishu maak chimutiska chii chiistaaskuhweuch kaye, peyakw anite Jesus unihiiwiniihch itehche chii akuchinuu ekw an kutak anite unimihchiiwiniihch itehche.

³⁹ E pimuhtetwaau maak awenichii anit chii wewepiskweyuuch kaye chii maayeyimeuch Jesus.

⁴⁰ Chii iteuch, “Chiya kaa itweyin chechii wanaachihtaayin chisheayimiheukamikw ekw maak nishtu chiishikaauh ishpish kaau chechii wiikaapuuhtaayin, taapwe e aawane Chishemanituu Ukusisa, wiichihiisu pechi niishaahtawiih an chitaashiteyaahtikum.”

⁴¹ Ekun kaye kaa ishi maayeyimaatwaau anichii kaa niikaanishkuwaatwaau ayimiheuchimaauh ekw maak anichii kaa Chiskutamaachetwaau wiishuwewiniyuu ekw maak anichii kaa niikaanishkuwaatwaau Jewa iinuuh. Chii itweuch,

⁴² “Chii pimaachiheu kutak aweyuuh. Namui maak mechim chii pimaachihiisuu wiya. Namayeu aa maak uu Israel iinuuch uchisheuchimaamuwaau. Chechii wiihkuchihiisukwe maak aashiteyaahtikuhch uhchi ekw che taapweyimahkw.

⁴³ Taapweyimeu Chishemanituuh taapwe maak yaahch che wii wiichihiikuukwe Chishemanituu anuhchiish. Wesh chii iteu, ‘Niya Chishemanituu Ukusisa.’ ”

⁴⁴ Kaye aniyuuh kaa aahkwaateyihtaakusiyich chimutiska kaa asich chiistaaskuhwaakanuyich ekun kaa ishi maayeyimikut.

Jesus kaa nipit

⁴⁵ Kaa aapihtaachiishikaach maak ekut mitun e kaschitipiskaach kaa ishinaakuhch misiwe e ishpishaach anit an aschii. Nishtu tipahiikan ekun kaa ishinaakuhch.

⁴⁶ Wiyesh maak nishtu e ispayiyich, Jesus chii tepweu e itwet, “Eloi, Eloi, lama sabachthani.” Maau e ishi itweshtamuwaataakanuuhch uu, “Nichishemanituum, Nichishemanituum, chekwaan wehchii pechi nakasiyin.”

⁴⁷ Pasch maak anichii anit kaa naaniipuutwaau chii pehtaweuch aniyuu kaa itweyich. Ekw kaa itaatwaau “Elijah aahchin tepwaateu.”

⁴⁸ Tiiwehch maak peyakw anit e tashitwaau chii uhchi utinam chekwaayuu uhpanihch e iteyihtaakuniyich kaa chihtaanahk anite e chii nanaayuwaakamihtiniyich shuuminaapuuyuu. Ekw e wanishkwaaskuniyich mistikuhch kaa chikamuhtaat. Ekw anite Jesus utuuniihch kaa itinahk e wii minihaat.

⁴⁹ Mikw maak anichii kutakach awenichii chii itweuch, “Ekaawii pitamaah. Ashuwaapamaataau maa che pechi wiichihiikuukwe aahch Elijah.”

⁵⁰ Jesus maak miin chii tepweu e chishewet. Ekw kaa nipit.

⁵¹ Iskutak maak nepit an aakuuyekahiikan anite chisheayimiheukamikuhch kaa ihtakuhch mitun tekash chii tetaau taaschipayuu. Tekash e iskwekach chii ishi taaschipayuu. Aschii kaye chii aayaahchipayuu. Kaye asiniich chii taaschipayuuch.

⁵² Chiipaikamikuh chii aapahiipayuuh. Mihchetu maak Chishemanituu utiiniimah kaa nipiyich chii wanishkaanaakanuyuuh.

⁵³ Chii chistuhteuch maak anit chiipaikamikuhch anichii kaa wanishkaanaakanuutwaau. Iskutak maak kaa wanishkaayich Jesus nipuwinihch uhchi ekw anite Jerusalemihch kaa ituhtetwaau. Ekut maak mihchetu aweyuuh kaa waapamikutwaau.

⁵⁴ An maak shimaakanishuuchimaau ekw maak aniyuuh ushimaakanishimh kaa naanaakachihaayich Jesus iskutak wiyaapahtahkwaau e kuihkuniyich ekw maak misiwe aniyuu taan kaa ispayiyich chii sechisuuch. Ekw kaa itwetwaau, “Taapwe kwaa eukw uyuuh Chishemanituu Ukusisa.”

⁵⁵ Chii mihchetuuch maak iskweuch anit. Eukunich uchii anite Galilee aschiihch kaa uhchi wiichewaatwaau Jesus kaye kaa chii waawiichihaatwaau. Waahiyuu anite chii uhchikaapuuch e kanawaapitwaau taan e ihtinaanuyich.

⁵⁶ Ekut kaa ihtaatwaau Mary Magdalene ekw maak Mary, James ekw maak Joseph ukaawiiwaau, ekw maak Zebedee ukusisa ukaawiiwaauh.

Jesus wiiyuu kaa nahiihkaakanuyich

⁵⁷ Iskutak maak e ati utaakushich chii takushinuu naapeu Joseph e ishinihkaasut. Naashch chii miisitisiyuu uu naapeu. Anite maak ihtaawiniyuu Arimathea kaa ishinihkaateyich ekute kaa uhchiit. Chii nuushuushkuweu kaye wiya Jesus.

⁵⁸ Chii nituwaapameu maak Pilate. Ekw kaa kakwechimaat chechii pachishtinamaakut Jesus wiiyuuyuu. Pilate maak chii itashuweu chechii miyaakanuyich Joseph aniyuu miiyuuyuu.

⁵⁹ Ekw Joseph kaa niihtinamuwaat Jesus wiiyuuyuu anit aashiteyaahtikuhch uhchi. Chii ati piskweyetinam maak naashch e payehchekaniyich machunishiyuu.

⁶⁰ Anite maak e chii waatakwaapiskahamukupane ekaa weskach uhchi ushihtaakupane ekute kaa piihtahahk. Wiya maak chipaa chiskahaakanuu anit iskutak puunipimaatisiite. Ekw e mihchaapischisiyich asiniih kaa tihtipinaat anite e ishkwaahtemuuniyich aniyuu chiipaikamikuyuu kaa chipishimaat. Ekw kaa chistuhtet.

⁶¹ Ekut maak kaa ihtaatwaau Mary Magdalene ekw maak an kutak Mary e utaashtamipishtahkwaau aniyuu kaa waatakwaapisikahiikanuyich.

Kaa naanaakachihtaakanuuch chiipaikamikw

⁶² An maak miin wiyaapahch eukw uyuu Jewa iinuuch utayiwepuu chiishikaamuwaau. Anichii maak chisheayimiheuchimaauch ekw maak anichii Phariseech chii nachishkaweuch Pilate.

⁶³ Ekw kaa itaatwaau, “Uchimaau, nichischisinaan eshkw e chii pimaatisiit an kaa nanatayit e chii itwet, ‘Nishtu chiishikaauh ishpish ekw che wanishkaanikuuyaan nipuwinihch uhchi.’

⁶⁴ Itashuweh maa yaakwaau chechii naanaakachihtaakanuuhch an chiipaikamikw paatish chii nishtuchiishikaache. Wesh kata chii pechi chimutiyuuh uchischinuhamuwaakanh aniyuu wiiyuu chechii nanatayimaayich aweyuuh e itaatwaau e chii wanishkaayich nipuwinihch uhchi. Ekw an nanataayuun uste namui kata uhchi chihkaawaastaakun ishpishaat an niishtam nanataayuun.”

⁶⁵ Ekw Pilate kaa itaat, “Utinaahkuch shimaakanishach. Che nituu yaaichihtaayekw an chiipaikamikw kwaast chechii ishpish yaaichihtaayekw.”

⁶⁶ Ekw maak kaa chistuhtetwaau. Chii nituu chiishaawaachiheuch aniyuuh asiniih kaa chipishimaakanuyich anit chiipaikamikuhch ekaa aweyuuh chechii pischeyimaayich. Ekw kaa itaatwaau shimaakanisha chechii naanaakachihtaayich aniyuu chiipaikamikuyuu.