Matthew 26 - Chishemanituu Utayimuwin: Kaa Uskaach Testament

Kaa aayimuutaakanuyich chechii maakunaakanuut Jesus

¹ Iskutak maak kaa chiishi chiskutamaachet Jesus, chii iteu aniyuu uchischinuhamuwaakan,

² “Chichischeyihtenaawaau niishu chiishikaau ishpish ekw che chihchipayihch miyaaskaacheu makushewin. Ekut maak an mekwaach ispayihche che pachishtinaakanuut Iinuu Ukusisa chechii chiistaaskuhwaakanuut.”

³ Ekw anichii kaa niikaanapitwaau ayimiheuchimaauch ekw maak anichii kaa niikaanishkuwaatwaau iinuuh kaa nishtuwiitwaau anite chisheayimiheuchimaau Caiaphas uchisheuchimaaukamikuwiihch.

⁴ Ekw kaa wiyeyihtahkwaau chiimuut chechii maakunaatwaau Jesus kaye chechii nipahaatwaau.

⁵ Chii iteuch maak, “Namui wii mekwaach uu makushaanuuhche chika chii maakunaanuu, wesh naanituu chika mista chishuwaasuuch iinuuch chika chii ishinaakun chihchiwe chechii machipayinaanuuhch.”

Kaa niikaan tuumiskunaakanuut Jesus

⁶ Bethanyihch chii ihtaau Jesus, anite Simon wiichiihch. Uu Simon e maayaataniyich aahkusuwiniyuu usakaahch chii ayaakupane weskach.

⁷ Mekwaach maak Jesus e miichisut, chii uhchi piihcheyuu iskweu e pechi tahkunamiyich naashch e miywaashiyich puutayuu e piihchishtiniyich anit maauch kaa shuuliyaauniyich kaa wiihchimaakusiyich wiihchimaakuhuuniyuu. Jesus maak ustikwaaniihch chii kutapinam uyuu.

⁸ Iskutak maak anichii chischinuhamuwaakanich wiyaapamaatwaau uyuu e ihtiyich, chii chishuwaahiikuuch, e itwetwaau, “Taapwe nanaayuuhtaau aniyuu wiihchimaakuhuwiniyuu.

⁹ Chipaachii ataawaakaanuyuu aniyuu wiihchimaakuhuuniyuu ekw maak chipaachii miyaakanuuch aniyuu shuuliyaayuu anichii awenichii kaa chistimaatisiitwaau.”

¹⁰ Jesus maak chii chischeyimeu taan e itituyich, ekw kaa itaat, “Chekwaan wehchi aayimeyihtamihekw. Mista miywaashiyuu aniyuu e chii ihtuutuut.

¹¹ Muush chika ihtaauch kaa chistimaatisiitwaau utah e ihtaayekw, niya maak namui muush nika uhchi ihtaan utah e ihtaayekw.

¹² Uyuu kaa ishi pechi ihtuutuut kaa pechi kutapinahk wiihchimaakuhuuniyuu utah e ihtaauch, muyaam e ayeskuwiihkahk niyuuyuu che chiskashtaakanuyich ekun e ishinaakuniyich uyuu kaa ihtit.

¹³ Chihchiwe chititinaawaau, taanite mikw che kacheskwaanuukwe e waawiihtaakanuuhch miywaachimuwin misiwe e ispichiskamikaach uu aschii kata wiihtaakanuuyuu uyuu taan kaa ihtit e chischisiitutuwaakanuut uu iskweu.”

Judas kaa niskumut chechii wiyeshipachishtinaat Jesus

¹⁴ Ekw peyakw anit e niishushaapuutwaau anichii chischinuhamuwaakanich Judas Iscariot kaa ishinihkaasut chii nituwaapameu aniyuu kaa niikaanapiitwaauh ayimiheuchimaauh.

¹⁵ Ekw kaa itaat, “Chekwaan che miyekw wiichihiitakuche chechii maakunekw Jesus.” Nishtumitanuu maak shuuliyaawaapiskwa chii waapahtiikuu ekw kaa itikut, maau shuuliyaau che miitaahch.

¹⁶ Ekut maak anit iskunaak muush kaa naanituweyihtamuwaat Judas taanit chechii nihiipayiyich chechii pisiwiyaat Jesus chechii maakunaakunuyich.

Jesus kaa wiichimiichisuumaat uchischinuhamuwaakanh

¹⁷ An maak niishtam e chiishikaach anit aniyuuh e pimichiishikaakwaau ekaa uhpisut aaihkunaau kaa chii muwaakanuut, Jesus chii pechi nituwaapamikuu uchischinuhamuwaakan ekw kaa itikut, “Taanite netaweyimiyaahch chechii nituu ayeskuushtamaataahch miyaaskaacheun makushaan chechii miichiyin.”

¹⁸ Chii iteu maak, “Ituhtekw anite ihtaawinihch, che nituwaapamekw peyakw naapeu ekw che itekw, ‘Iteu Chischinuhamaachesuu, shaash wiipach chika utihchipayuu che nakatamaan uu aschii. Anite chiichihch nichischinuhamuwaakanich nika pechi makushenaan an miyaaskaacheu makushaan.’ ”

¹⁹ Uchischinuhamuwaakan maak chii ihtuutamiyuuh aniyuu taan kaa itashumaat, kaye chii ayeskuushtaayuu aniyuu makushaaniyuu.

²⁰ Aniyuu maak wetaakusiyich, Jesus ekw maak aniyuuh uchischinuhamuwaakanh chii ituhteuch anite che makushetwaau.

²¹ Mekwaach maak e miichisutwaau, Jesus chii iteu, “Chihchiwe chititinaawaau, peyakw utah e tashiyekw nika wiyeshipachishtinikw.”

²² Anichii maak chischinuhamuwaakanich chii misimeyihtamuch aniyuu e itweyich ekw paahpeyakw kaa itaatwaau, “Utipeyihchikeu, niya aa kaa iishiyin.”

²³ Ekw Jesus kaa itaat, “An awen che peyakuhtaawaahche wiyaakan e akuhchimachiht nitaaihkunaaminaan eukun an che wiyeshipachishtinit.

²⁴ Kata nipahaakanuu Iinuu Ukusisa aniyuu nihaau taan kaa ishi pechi masinahiikanuyich masinahiikanihch anite utaahch. Mikw maak taapwe kata aahkwaach machipayuu an awen che wiyeshapachistinaat Iinuu Ukusisa. Uste chipaa miywaayikupane an awen ekaa mechim uhchi pimaatisiikupane.”

²⁵ Ekw Judas an che wiyeshipachishtinaakupane Jesus kaa itwet, “Niya aa kaa iishiyin.” Ekw Jesus kaa itaat, “Ehe, eukun wesh kiipaa e itweyin.”

Jesus maahchishtai kaa wiich miichisuumaat uchischinuhamuwaakanh

²⁶ Aniyuu maak e miichisutwaau, Jesus chii utineu aaihkunaau ekw kaa nanaaskumaat Chishemanituu. Iskutak maak kaa nanaaskumut ekw kaa papahkwenaat aniyuu aaihkunaau ekw kaa miyaat uchischinuhamuwaakan e itaat, “Utinaahkw uu, muwaahkw, eukuu niyuu.”

²⁷ Ekw aniyuu minihkwaakaniyuu kaa utinahk, kaa nanaaskumaat Chishemanituu, ekw kaa miyaat aniyuu uchischinuhamuwaakan e itaat, “Niipitepayihtwaatukw uu chechii minihkweyekw misiwe e tashiyekw.

²⁸ Wesh eukun uu nimihkw che uhchi uschihtaakanuuhch niskumuwin, eukuu nimihkw che siikanikaatech chechii uhchi wepeyihtamuwaakanuutwaau mihchetu awenichii umachihtwaawinawaau.

²⁹ Chiwiihtamaatinaawaau maak namui miin nika uhchi minihkwen shuuminaapuu utah wii paatishkaan anite Nuuhtaawii uchisheuchimaawinihch miin maamuu minihkweyihkwe.”

³⁰ Iskutak maak kaa nikamutwaau ayimiheunikamuwiniyuu ekw kaa ituhtetwaau anite Olives kaa ishinihkaateyich wachiyuu.

Jesus kaa niikaaniwiihtahk taan che ihtiyich Peter

³¹ Ekw Jesus kaa itaat aniyuu uchischinuhamuwaakan, “Uu anuhchiish che tipiskaach misiwe e tashiyekw chika nakasinaawaau, an uhchi taan che ihtuutaakuyaan, wesh itashteyuu anite Chishemanituu utayimuwinihch, Nika niihtahwaau an maanishchaanishuiinuu, ekw anichii maanishchaanishach che ascheyaamuhchaanuuhch.”

³² Ekw Jesus miin kaa ati itaat, “Iskutak maak chii wanishkaanikuyaane nipuwinihch uhchi anite Galileehch nika ituhten. ekute anite che ashuwaapamitakuch.”

³³ Peter maak chii iteu, “Aat misiwe awen nakatiske an che ihtuutaakuyin namui wii niya nihtaa chika uhchi nakatitin.”

³⁴ Jesus kaa itaat aniyuu Peter, “Chihchiwe chititin. Anuhchiish uu che tipiskaach nishtwaau chika itwen ekaa chischeyimiyin eshkw ekaa chistute naape pakahaahkwaan.”

³⁵ Peter maak chii iteu, “Aat kaye niya wii nipahiikuyaane iskutak nipahiikuyine namui yaapach nika uhchi itwen ekaa chischeyimitaan.” Ekw anichii kutakach chischinuhamuwaakanich ekun kaye wiyawaau kaa itwetwaau aniyuu kaa itweyich Peter.

Jesus kaa ayimihaat anite Gethsemanehch

³⁶ Ekw Jesus kaa wiichewaat aniyuu uchischinuhamuwaakan anite nihtaauchihchikan aschiiyuu Gethsemane kaa ishinihkaateyich ekute kaa ituhtetwaau, ekw aniyuu Peter ekw maak niishu aniyuu Zebedee ukusiyuuh austesiis anite pahkaan kaa ituhtahaat ekw kaa itaat, “Ekut utah apikw, nete nika ituhten, nika nituu ayimihaan.”

³⁷ Naashch maak chii misimeyihtam Jesus kaye naashch chii kusikuteheu.

³⁸ Ekw kaa itaat aniyuu kaa wiichewaat, “Naashch taapwe misimeyihtam nitahchaahkw. Ekut utah ihtaakw mikw maak ekaawii wii kauhkusikw e ashuwaapamiyekw.”

³⁹ Ekw anite iiche kaa ituhtet wiya, chii uchihchiihkunipuu maak, kaa ayimihaat e itwet, “Nuuhtaawii, chechii ishinaakunikwe pechi iichenamuuh uu taan che ishi wawiisacheyihtamaan, mikw maak chii chititeyihtamuwin chika ihtuutaakanuu, namui niya nititeyihtamuwin.”

⁴⁰ Chii pisikuu maak kaa chiishi ayimihaat, kaau kaa nituwaapamaat aniyuu uchischinuhamuwaakan kaa ashuwaapamikut, wetihtaat maak chekwaayuu kaa nipaayich, ekw kaa itaat aniyuu Peter, “Taan e ihtiyekw wehchi ekaa waawaach peyakw tipahiikan uhchii ishpish ashuwaapamiyekw.

⁴¹ Yaakwaamiikw kaye ayimihaakw ekaa chechii shaakuuchihiikuyekw kakwechihiiwewin. Wesh chitahchaahkuwaahch naashch taapwe kuiskw chiwii ihtinaawaau mikw maak chiyaasiwaahch namui mitun chisaapisiinaawaau.”

⁴² Ekw miin kaa nituu ayimihaat Jesus kaa itwet, “Nuuhtaawii ekaa chechii iichenikanuukwe uu che ishi wiisacheyihtamaan ekun kiipaa che ishi ihtuutamaan, chiya chititeyihtamuwin chechii ihtuutaakanuuhch.”

⁴³ Miin kaa nituwaahaat aniyuu uchischinuhamuwaakan, chekwaayuu eshkw kaa nipaayich, wesh shaash namui uhchii ihtiyuuh ekaa chechii nipaayich.

⁴⁴ Jesus kaa nikataat, miin kaa nituu ayimihaat. Ekw nishtwaau kaa peyakuhtaat aniyuu e ishi ayimihaat.

⁴⁵ Ekw miin kaau kaa nituwaapamaat aniyuu uchischinuhamuwaakan, kaa itaat, “Eshkw aa chinipaanaawaau. Eshkw aa chitaasteyeskusinaawaau. Iitaapikw maa, shaash utihchipayuu an tipahiikan che wiyeshipachishtinaakanuut Iinuu Ukusisa anite umachihtwaauh e ihtaayich.

⁴⁶ Waniskaakw, maachiitaau ekw, wesh shaash takushinuu an naapeu che wiyeshipachishtinit.”

Jesus kaa maakunaakanuut

⁴⁷ Eshkw maak mekwaach e ayimit Jesus chii uhchi takushiniyuuh peyakw aniyuu kaa niishushaapuyich uchischinuhamuwaakan Judas kaa ishinihkaasuyich. Chii pechi wiicheukuyuu mihchetu aweyuuh e chii pechi itishahukutwaau kaa niikaanapitwaauh ayimiheuchimaauh kaye aniyuuh iinuuh kaa niikaanishkuwaayitwaauh. Chii pechi tahkunamuch maak nitupayuuhkumaan kaye utaamihiikanaahtikw.

⁴⁸ An che wiyeshipachishtinaat Jesus chii niikaan wiihtamuwekupane aniyuuh kaa wiicheukut taan che ihtit. Chii itweche, “An che uchemak naapeu eukun an naapeu netaweyimekw. Eukun an che maakunekw.”

⁴⁹ Judas maak kuiskw chii nituwaapameu aniyuu Jesus, ekw kaa itaat, “Kwei, chischinuhamaachesuu.” Ekw kaa uchemaat.

⁵⁰ Ekw Jesus kaa itaat, “Niwiichewaakan, ihtuut kiipaa taan kaa wii ihtiyin.” Ekw anichii iinuuch kaa maakunaatwaau Jesus ekw kaa ihtuutuwaatwaau taan kaa wii ihtuutuwaatwaau.

⁵¹ Peyakw aniyuuh uchischinuhamuwaakan chii uhchi yayishikaapischipatimiyuu shimaakanishiyuu muuhkumaaniyuu kaa chimihtuukayehwaat chisheayimiheuchimaau utaapachihaakaniyuuh.

⁵² Ekw Jesus kaa itaat, “Chiskashtaah an chimuuhkumaan, wesh misiwe awen kaa aapachihtaat shimaakanishiyuu muuhkumaaniyuu chechii nipahaat aweyuu eukw uyuu che aapataniyich nipahaakanuute kaye wiya.

⁵³ Namui aa chichischeyihtenaawaau nipaachii nitutamuwaau Nuuhtaawii chechii naatamuut, tiiwehch maak chipaachii pechi itishahweu uste mihchetwaau chishemitaahtumitanuu enchil chechii pechi naatamuyich.

⁵⁴ Mikw maak an ihtiyaane, taanite chechii uhchi ispayihch an kaa itashtech Chishemanituu utayimuwinihch an chipaa ispayuu.”

⁵⁵ Ekw Jesus kaa itaat aniyuu iinuu, “Muyaam taapwe kaa aahkwaatisiit chimutisk e ihtuutuuyekw e pechi nituwaapamiyekw e tahkunamekw shimaakanishiyuu muuhkumaan kaye utaamahiikanaahtikw. Wesh shaash chipaahchii maakunaawaau anite chisheayimiheukamikuhch kaa chii ihtaayihkw eshikum chiishikaau e chiskutamaacheyaan, namui maak nihtaa kuuhchi kakweteyihtenaawaau chechii maakuniyekw.”

⁵⁶ Mikw maak shaakuuch misiwe tipapayuu taan kaa ishi masinahahkwaau anite Chishemanituu utayimuwiniihch aniyehkaanaanich uchischiwehiichesuuch. Iskutak maak uyuu kaa itaat ekw misiwe uchischinuhamuwaakan kaa ushimuyich e nakachipahiikut.

Jesus kaa uhchishkuukaapuushtawaat chisheayimiheuchimaauh

⁵⁷ Anichii maak kaa maakunaatwaau Jesus chii ituhtaheuch anite chisheayimiheuchimaau Caiaphas e ihtaayich. Shaash maak chii nishtuwiyuuh aniyuu kaa niikaanishkuwaayich Jewa iinuuh kaye aniyuu wiishuwewiniyuu kaa chiskutamaacheyitwaauh anite aniyuu chisheayimiheuchimaau uwaaskahiikanimiihch.

⁵⁸ Peter maak waahiyuu anite chii uhchi nuushuushkuweu aniyuu kaa maakunaayich Jesus, piihiim kaa utihtahkwaau chisheayimiheuchimaauh uwaaskaahiikanimiyuu. Anit maak wiiwiitamihch ekut kaa ihtaat wiya Peter, kaa nituu wiitapamaat aniyuu kaa naanaakachihtaayich chisheayimiheuchimaau uwaaskaahiikanimiyuu e wii waapahtahk taan che ihtinaanuyikwe.

⁵⁹ Anichii maak kaa niikaanapitwaau ayimiheuchimaauch kaye anichii kaa niikaanishkuwaatwaau Jewa iinuu chii wii naanituu uhtinamuch taan chechii ishi nanatayaachimaatwaau Jesus chechii uhchi nipahaakanuyich.

⁶⁰ Mikw maak namui uhchii miskamuweuch chekwaayuu e chii ihtiyich anit chechii uhchi pachischisuwaatikutwaau wiishuwewiniyuu chechii nipahaatwaau Jesus, aat mihchetu e chii takushinitwaau e nanataiyaachimaatwaau. Chek maak niishu naapeuch kaa takushihkwaau.

⁶¹ Ekw kaa itwetwaau, “Uu naapeu Jesus nichii pehtawaanaan e itwet, ‘Nika chii wanaachitaawaan Chishemanituu uchisheayimiheukamikw, mikw maak nishtu chiishikaau ishpish shaash miin nika chii wiikaapuuhtaawaan.’ ”

⁶² Ekw an chisheayimiheuchimaau kaa pasikut, kaa itaat aniyuu Jesus, “Taan maak chechii itweyin kaa itachimikuyin.”

⁶³ Jesus maak namui uhchi chistuu. Ekw miin kaa itikut aniyuu chisheayimiheuchimaau, “Kuiskw maa pechi wiihtamunaan e pehtaask an pemaatisiit Chishemanituu, eukw aa chiya taapwe Christ, Chishemanituu Ukusisa.”

⁶⁴ Jesus chii iteu, “Ekun e itweyin. Mikw maak chiwiihtamaatinaawaau chika waapamaawaau Iinuu Ukusisa e apit anite Kaa Suuhkaatisiyich unihiiwiniihch itehche e ihtaayich. Kaye chika waapamaawaau pechi takushinite kihchikiishikw kaskawanishkuhch e uhchi nuukusit.”

⁶⁵ Ekw an chisheayimiheuchimaau kaa piikupatahk uchekwaanimh e itwet, “Ekun ekw che ishpish paashich itwet. Namui chinituweyihtamuwaanaanuu etituu chechii tipaachimaakanuut. Wesh chiyaanuu shaash mitun chichii pehtawaanuu taan e ishpish paashtaamut.

⁶⁶ Taan e iteyihtamihiikuyekw taan kaa ishi pehtaawekw.” Ekw kaa itwetwaau, “Iihtakuniyuu kiipaa taan e ishi wanituutahk iteyihtaakuniyuu maak chechii nipahaakanuut.”

⁶⁷ Chii sihkwaateuch utaashtamihkuyich eyuu chii utaamuhweuch kaye chii utitaamuhkwehweuch,

⁶⁸ Chii maayeyimeuch e itaatwaau, “Christ, chischiwehiiche maa, wiihtamuunaan maa awen kaa utaamuhuusk.”

Peter kaa nanatait e itwet ekaa chischeyimaat Jesus

⁶⁹ Mekwaach maak e maayeyimaakanuyich Jesus, Peter chii apuu anite e uhchi piihtukaanuyich aniyuuh chisheayimiheuchimaauh uwaaskaahiikaniyuu, peyakw maak aniyuu chisheayimiheuchimaau ukuuhpaaneskwemiyuuh chii pechi nituwaapamikuu kaa itikut, “Kaye chii chichii papaawiichewaau Jesus an naapeu Galilee aschiihch kaa uhchiit.”

⁷⁰ Peter maak chii nanatayuu e itwet, e pehtaakut misiwe anit kaa ihtaayich, “Namui nichischeyihten chekwaan kaa aayimuutaman.”

⁷¹ Ekw kaa ati wiiwiit anit e uhchi piihtukaanuyich anit aniyuu kaa ihtaanuyich. Ekw miin kutak kuuhpaaneskwesha kaa waapamikut, ekw an ishkwesh kaa itaat aniyuu naapeu anit kaa ihtaayich, “Uu naapeu kaye wiya chii papaawiicheweu Jesus, Nazareth ihtaawinihch kaa uhchiyich.”

⁷² Miin maak chii nanatayuu Peter e itwet, “Nitaapwen e itweyaan namui nichischeyimaau an naapeu.”

⁷³ Naanaacheshiish maak anichii iinuuch anit kaa naaniipuutwaau chii pechi nituwaapameuch aniyuu Peter kaa itaatwaau, “Mitun e cheshtinaahuyaahch kaye chiya ekut kaa wiichihiiweyin, wesh ekun mwehch e itihtaakusiyin kaye chiya e ayimiyin.”

⁷⁴ Peter maak chii iteu, “Taapwe wesin, namui nichischeyimaau an naapeu. Ekush nika waweshihiikw Chishemanituu nitamukw e itwewaane.” Ekut maak anit tiiwehch kaa uhchi chistut naapeu pakahaahkwaan.

⁷⁵ Ekw Peter kaa uhchi chischisit taan kaa itikut Jesus, “Eshkw ekaa chistute naapeu pakahaahkwaan anuhchiish kaa chiishikaach nishtwaau chika itwen ekaa chischeyimiyin.” Ekw maak kaa wiiwiit kaa nituu maatut, suuhk e maatut.