Matthew 25 - Chishemanituu Utayimuwin: Kaa Uskaach Testament

Kaa mitaahtashitwaau ishkweshach kaa tipachimaakanuutwaau

¹ “Chika wiihtamaatinaawaau taan che ishinaakuhch kihchikiishikw chisheuchimaawin iskutak Iinuu Ukusisa takushihke che chisheuchimaaut. Mwehch mitaahtu ishkweshach e tahkunihkwaau uwaastenimaakanawaauh, e nituu nachishkawaatwaau uschinaapewaan.

² Niyaain maak uchii namui naashch uhchi iipwaahkaauch, ekw anichii kutakach niyaain chii iipwaahkaauch wiyawaau.

³ Anichii maak ekaa naashch kaa iipwaahkaatwaau chii chistuhtataauch uwaastenimaakanawaauh mikw maak namui ayuwaak uhchi ayaauch pimiyuu.

⁴ Ekw anichii kaa iipwaahkaatwaau ayuwaak chii chistuhtataauch wiyawaau pimiyuu che piihchipimetwaau aniyuuh uwaastenimaakanawaauh.

⁵ Namui maak tiiwehch uhchi takushinuu an uschinaapewaan. Chek kaa chisihkusitwaau anichii ishkweshach, ekw chek kaa kauhkusitwaau.”

⁶ “Shaash maak chii aapihtaatipiskaayuu, kaa mate tepwet awen e itwet, ‘Shaash takushinuu uschinaapewaan, pechi nachishkawaahkw.’

⁷ Kiipaa kaa wanishkaatwaau anichii mitaahtu ishkweshach, kaa waweshihtaatwaau uwaastenimaakanawaauh.

⁸ Ekw anichii ekaa naashch kaa iipwaahkaatwaau ishkweshach kaa itaatwaau aniyuu kaa iipwaahkaayich ishkwesha, ‘Pechi miinaan maa apishiish chipimiimuwaau. Shaash chekaat aastuweuh niwaastenimaakanaanh.’

⁹ Ekw anichii kaa iipwaahkaatwaau ishkweshach kaa itaatwaau aniyuu, ‘Namui, namui chika uhchi ispayinaanuu taapishkun chechii aapachihtaayihkw uu pimii. Ataawaaukamikuhch nituu utinamaasukw pimii.’

¹⁰ Ekw anichii ekaa naashch kaa iipwaahkaatwaau ishkweshach kaa nituu utinihkwaau pimiyuu. Mekwaach maak e ispihtanihutwaau, chii takushiniyuu aniyuu uschinaapewaan. Anichii maak ishkweshach kaa ayeskuwiitwaau chii ati wiicheweuch e ati piihcheyich anite e makushaanuyich, ekw kaa chipahwaakanuut an chishtuhkan.”

¹¹ “Paatimaa maak kaa uhchi takushihkwaau anichii kutakach ishkweshach, ekw kaa itwetwaau, ‘Utipeyihchikeu, pechi piihtakahiinaan.’

¹² Ekw kaa itikutwaau aniyuu uschinaapewaan, ‘Chihchiwe chititinaawaau, namui chichischeyimitinaawaau.’ ”

¹³ Ekw Jesus kaa ati itwet, “Eukw maak uu uhchi kaye chiyawaau muush chipaa ayeskuwiinaawaau wesh namui chichischeyihtenaawaau taaishpish nihaau che takushinit Iinuu Ukusisa.”

Uchimaau kaa wiishaamaat nishtu utaapachihaakanh che naanaakachihtaayich aniyuu e ishi tipiyeusiit

¹⁴ “Mwaau miin che ishinaakuhch kihchikiishikw chisheuchimaawin takushihke Iinuu Ukusisa. Mwehch naapeu waahyuu aschiihch e ituhtet, e wiishaamaat maak utaapachihaakanh ekw e itaat che naanaakachihtaayich aniyuu e ishi tipiyeusiit.

¹⁵ Chii miyeu maak shuuliyaayuu e pukuseyimaat ayuwaak chechii ushihtamaakut che ispihtanihut. Chii maatinamuweu aniyuu ushuuliyaam mikw aniyuu e ishi iteyimaat che ishi kaschihuyich e kanuweyihtamiyich. Peyakw maak aniyuu aapachihaakanh niyaayinwaau chishemitaahtumitanuu shuuliyaanaapiskwa chii miyeu, ekw aniyuu kutak niishwaau chishemitaahtumitanuu, ekw aniyuu kutak peyakwaau chishemitaahtumitanuu chii miyeu. Ekw maak kaa chistuhtet.

¹⁶ An maak aapachihaakan niyaayinwaau chishemitaahtumitanuu kaa miyaakanuut, chiichihch aapatisuwaacheu aniyuu ushuuliyaamiyuu etituu chechii ihchihtaat. Miin maak niyaayinwaau chishemitaahtumitanuu chii takuheu aniyuu shuuliyaau.

¹⁷ Kaye maak an niishwaau chishemitaahtumitanuu kaa miyaakanuut, miin niishwaau chishemitaahtumitanuu chii tahkuheu aniyuu shuuliyaau.

¹⁸ An maak aapachihaakan peyakwaau chishemitaahtumitanuu kaa miyaakanuut, chii muunaauhkaham anite aschiihch ekute kaa kaataat aniyuu uchimaam ushuuliyaamiyuu.”

¹⁹ “Chineush maak namui uhchi ihtaayuuh aniyuu uchimaamuwaauh anichii aapachihaakanich chek kaa pechi chiiweyich ekw kaa kakwechimukutwaau taan kaa ihtuutahkwaau aniyuu shuuliyaayuu kaa miikutwaau.

²⁰ An maak aapachihaakan niyaayinwaau chishemitaahtumitanuu kaa miyaakanuut shuuliyaayuu chii pechi piihcheu, kaa miyaat aniyuu uchimaam aniyuu niyaayinwaau chishemitaahtumitanuu shuuliyaayuu ayawaak kaa tahkuhaat. Chii iteu maak aniyuu uchimaamuwaauh, ‘Niyaayinwaau chishemitaahtumitanuu chichii miin shuuliyaau, miin maak niyaayinwaau chishemitaahtumitanuu ayawaak nichii tahkuhaau.’

²¹ ‘Taapwe chimiyutuuten kaye taapwe chimiywaapatisin,’ chii itikuu aniyuu uchimaam. ‘Kuiskw e chii ishi aapatisiihkahtaman an e apishaashich taan kaa ishi pukuseyimikuyin ekw etituu e mishaakwaau chekwaayuu che pachishtinamaakuyin chechii uchimaahkahtaman. Aashtam pechi piihche, che pechi wiichihiyin taan e ishi miywaatamaan.’

²² Ekw an niishwaau chishemitaahtumitanuu kaa miyaakanuut shuuliyaayuu chii pechi piihcheu kaa itaat aniyuu uchimaam, ‘Niishwaau chishemitaahtumitanuu chichii pechi miin, miin maak niishwaau chishemitaahtumitanuu ayawaak nichii tahkustaan.’

²³ ‘Taapwe chimiyutuuten kaye nuwach kaa miywaapatisiyin’ chii itikuu aniyuu uchimaam. ‘Kuiskw e chii ishi aapatisiihkahtaman an e apishaashich taan kaa ishi pukuseyimikuyin, etituu e mishaakwaau chekwaayuu chika pachishtinamaakuun chechii uchimaahkahtaman. Aashtam pechi piihche, che pechi wiichihiyin taan e ishi miywaataman.’

²⁴ Ekw an aapachihaakan peyakwaau chishemitaahtumitanuu kaa miyaakanuut kaa pechi piihchet, kaa itaat aniyuu uchimaam, ‘Utipeyihchikeu, chichischeyimitin e machihtwaain kaye uste mistahii e nituweyihtaman ishpish wii taan e ishpish miiweyin.

²⁵ Chichii kushtitin, kaa nituu kaataayaan an chishuuliyaam anite aschiihch. Maau maak chishuuliyaam kaa pechi miin.’

²⁶ Ekw kaa itikut aniyuu uchimaam, ‘Taapwe kaa nuuhtesiyin kaye taapwe kaa machikuuhpaanewiyin. Chichii chischeyihten uste mistahii e nituweyihtamaan ishpish wii taan e ishpish miiweyaan.

²⁷ Chekwaan maak wehchi ekaa uhchi ashtaayin an shuuliyaau anite shuuliyaaukamikuhch chechii ushihuumakahch. Ekw maak iskutak miin takushiniyaan nipaa misken taan kaa ishpish ayahchihuumakanikupane an nishuuliyaam.’

²⁸ Ekw an uchimaau kaa itwet, ‘Utinamuwaahkw aniyuuh ushuuliyaanaapiskwa, che miyekw an aapachihaakan mitaahtwaau chishemitaahtumitanuu kaa tashiyich ushuuliyaanaapiskwa.

²⁹ Misiwe awen kaa ayaat chekwaayuu etituu chika ihtakuniyuu che ishi miyaakanuut. Chika weyuuchisiyuu maak. Ekw an awen ekaa naashch kaa ayaat chekwaayuu mechim aniyuu taan e ishi apishiish ayaat kata utinikanuuyuu.

³⁰ Uu maak aapachihaakan ekaa kaa wiyeshitaapatisit anite wanitipiskusiiwinihch ishiwepinaahkw. ekute anite che maatuunaanuuhch kaye che mamatweyaapitesinaanuuhch che ishpish wiisacheyihtaakanuuhch.’ ”

Taan che ishi wiyaaskunaat misiwe aweyuuh Iinuu Ukusisa

³¹ “Anite maak niishtaamihch iskutak Iinuu Ukusisa takushinite naashch e chisteyihtaakusit kaye e suuhcheyihtaakusit misiwe enchil e pechi wiichewaat, ekw che apit anite chisheuchimaau tehtapuunihch anit chechii uhchi wiyaaskunaat aweyuu.

³² “Ekw misiwe e itiskaanesiyich aweyuu che maamuuyich anite e ihtaat. Ekw che pahkaanihaat uyuu, mwehch maanishchaanishuiinuu kaa chii ihtuutawaat maanishchaanishah ekw maak aniyuuh uhkaanh kaa uteskanishiyich.

³³ Unihiiwinihch chika aheu aniyuu maanishchaanisha ekw aniyuu kutak uhkaanh anite unimihchiiwinihch che ahaat.

³⁴ Ekw che itaat an Chisheuchimaau aniyuu iinuu anite unahiiwinihch kaa ihtaayich, ‘Aashtamukw chiyawaau kaa shaweyimitaakw Nuuhtaawii. Aashtamukw, utinamukw an chisheuchimaawin an kaa ashutamaakuyekw iskutak maauch niishtam kaa usihtaakanuuhch uu aschii.

³⁵ Wesh kaa siiweyaan, chichii ashaminaawaau, kaye kaa wii minihkweyaan, chichii minihiinaawaau, kaa maanitewiyaan chichii piihtakahiinaawaau.

³⁶ Ekaa uhchi uchekwaanimiyaan, chichii waaspisinaawaau, kaa aahkusiyaan, chichii kanuweyiminaawaau, kaye chipahutuukamikuhch kaa ihtaayaan chichii chiiutaminaawaau.’

³⁷ Ekw maak che itikut aniyuu kaa kuiskutaatisiyich, ‘Utipeyihchikeu namui nihtaa chuuhchi waapamitinaan e siiweyin, chechii ashamitaahch maak, maak e wii minihkweyin, chechii minihiitaahch.

³⁸ Kaye namui nihtaa chuuhchi waapamitinaan e maanitewiyin, chechii piihtakahiitaahch, maak ekaa uchekwaanimiin, chechii waaspititaahch.

³⁹ Kaye namui nihtaa chuuhchi waapamitinaan e aahkusiyin maak e chipahukuyin, chechii nituu chiiutamitaahch.’

⁴⁰ Ekw Chisheuchimaau kaa itaat, ‘Chiwiihtamaatinaawaau, aniyuu taan kaa ishi ihtuutawekw peyakw an niichishaan ekaa mitun kaa aapateyihtaakusit kaa iteyimaakanuut, niya chichii ihtuutuunaawaau.’ ”

⁴¹ “Ekw che itaat aniyuu unimihchiiwinihch kaa ihtaayich aniyuu kaa machaatisiyich, ‘Aushikw nete chiyawaau Chishemanituu che waweshihiitaakw anite ishi kaachiche machishkutehch aniyuu kaa ishi ayeskuushtamuwaakanuyich machimanituuh ekw maak utaapachihaakaniyuuh.

⁴² Wesh nichii siiweyin namui maak chuuhchi ashaminaawaau, nichii wii minihkwen namui chuuhchi minihiinaawaau.

⁴³ Nichii maanitewin, namui chuuhchi piihtakahiinaawaau chiichiwaawaahch, namui nuuhchi uchekwaaniman, namui chuuhchi waaspisinaawaau. Nichii aahkusin kaye nichii chipahukuun namui maak chuuhchi chiiutaminaawaau.’

⁴⁴ Ekw maak che itaatwaau, e nishkweushihaatwaau, ‘Utipeyihchikeu namui nihtaa chuuhchi waapamitinaan e siiweyin maak e wii minihkweyin kaye e maanitewiyin kaye ekaa uchekwaanimiin, maak e aahkusiyin kaye e chipahukuyin, ekaa maak uhchi wiichihiitaahch.’

⁴⁵ Ekw maak che itikutwaau Utipeyihchikeu, ‘Taapwe chiwiihtamaatinaawaau an ekaa uhchi wiichihekw peyakw niichishaan an ekaa mitun kaa aapateyihtaakusit kaa iteyimaakanuut, niya kaye namui chuuhchi wiichihiinaawaau.’

⁴⁶ Eukw maak uchii kaa machaatisiitwaau che itishahwaakanuutwaau anite kaachiche che ishi nanehkaateyimutwaau, ekw anichii kaa kuiskutaatisiitwaau anite kaachiche pimaatisiiwinihch che itishahwaakanuutwaau.”