Matthew 23 - Chishemanituu Utayimuwin: Kaa Uskaach Testament

Jesus kaa aayimuumaat aniyuu wiishuwewiniyuu kaa chiskutamaacheyitwaau ekw maak Phariseeh

¹ Ekw Jesus kaa ayimihaat aniyuu iinuu kaye aniyuu uchischinuhamuwaakan.

² Chii iteu maak, “Anichii kaa chiskutamaachetwaau wiishuwewiniyuu ekw maak anichii Phariseech chiskutamaacheuch Moses uwiishuwewiniyuu, Chishemanituu kaa miikuyich.

³ Eukw maak uu uhchi, nanihiihtamuwaahkw misiwe taan e ishi wiihtamaataakuch. Mikw maak ekaawii chika uhchi chischinawaapamaawaauch taan e itaatisiitwaau, wesh taapaa ihtuutamuch aniyuu taan e ishi kacheskwetwaau.

⁴ Pukuseyimeuch aweyuu chechii nanihiihtamiyich aniyuu taan e ishi kacheskwetwaau. Aayihkamiheuch aweyuu e kusikuniyikwaau chekwaayuu chechii pimuhtataayich. Aayimihiikuyuu maak uyuu chechii pimuhtataayich. Namui maak mitun wii wiichiheuch aniyuu taan e ishi aayimihiikuyich.

⁵ Misiwe chekwaayuu kaa ihtuutahkwaau uchii kaa chiskutamaachetwaau wiishuwewiniyuu ekw maak Phariseech pukuseyihtamuch misiwe aweyuu chechii waapamikutwaau. Aniyuu e itaaspisutwaau kaye e taapiskahkwaau miiwatishiyuu chii pukuseyimuuch chechii iteyimikutwaau aweyuu naashch e ayimihewaatisiitwaau.

⁶ Nituweyihtamuch anite maauch e paihtepitwaau chechii apihaakanuutwaau ayimiheukamikuhch, kaye e makushaanuyich chechii apihaakanuutwaau anite e uchimaaupinaanuyich.

⁷ Nituweyihtamuch yaaitei muush chechii waautinischenaakanuutwaau anite e mihchetinaanuyich kaye nitaweyimeuch aweyuu ‘Chischinuhamaachesuu’ chechii ishinihkaatikutwaau.

⁸ Ekaawii maak wii chiyawaau nitaweyihtamukw ‘chischinuhamaachesuu’ chechii ishinihkaatikuyekw, wesh misiwe chiwiichishaanihtunaawaau, kaye maak mikw peyakushuu chichischinuhamaachesiimuwaau.

⁹ Ekaawii kaye chika uhchi ishinihkaataawaau awen utah aschiihch, ‘Nuuhtaawiinaan,’ wesh mikw peyakushuu chuuhtaawaau eukw an kihchikiishikuhch kaa ihtaat.

¹⁰ Ekaawii nitaweyihtamukw, ‘Uchimaau’ chechii ishinihkaatikuyekw, wesh peyakushuu mikw kuuchimaamuwaau, eukw Christ.

¹¹ Awen e niikaaneyihtaakusit anit e tashiyekw, ekush mikw aapachihaakan chika ishi kanawaapamisuu.

¹² Wesh awen mistahii kaa wii iteyimikusiit kata ihtakuniyuu taan che ihtuutawaakanuut anit chechii uhchi niihteyimitisuut. An maak kaa tipihteyimitisut eukun an mistahii che iteyihtaakuhiikut Chishemanituu.”

¹³ “Chekwaan chika ishi machipayinaawaau chiyawaau wiishuwewin kaa chiskutamaacheyekw kaye chiyawaau Phariseech, chiyawaau kaa ayimihehkaasuyekw, chiyawaau kaa kachipiskuwekuch awenichii chechii piihchetwaau anite kihchikiishikw chisheuchimaawinihch, ekaa maak mechim chechii piihcheyekw chiyawaau. Namui chipachishtinaawaauch anichii kaa wii piihchetwaau anite kihchikiishikw chisheuchimaawinihch chechii piihchetwaau.

¹⁴ Chekwaan chika ishi machipayinaawaau chiyawaau wiishuwewin kaa chiskutamaacheyekw kaye chiyawaau Phariseech, chiyawaau kaa ayimihehkaasuyekw. Naashch chiwii kuiskunaakuhiisunaawaau an uhchi chineush e ayimihaayekw, mikw maak anit e utinamuwekw maan kaa paahpeyakutwaau iskweuch taan e ishi tipiyeusiitwaau ekut e nuukuhch chihchiwe taan e iteyihtaakusiyekw. Uu maak kaa ishi ihtuutamekw etituu chiyawaau chika waweshihiikunaawaau.”

¹⁵ “Chekwaan chika ishi machipayinaawaau chiyawaau wiishuwewin kaa chiskutamaacheyekw ekw maak chiyawaau Phariseech mikw kaa ayimihehkaasuyekw. Misiwe e ispichiskamikaach uu aschii chitituhtenaawaau peyakw awen chechii ihtuutawekw chechii taapwehtaataakw maak chechii ihtuutahk taan e ishi chiskutamaachewekw. Iskutak maak kaa saakutaaskunekw chitihtuutawaawaau uste wii chechii machaatisiit ishpishaat chiyawaau. Niishwaa chitahkuchishtaawaanaawaau taan e iteyihtaakusit chechii uhchi ituhtet machishkutehch.”

¹⁶ “Chekwaan chika ishi machipayinaawaau chiyawaau muyaam ekaa kaa waapahtamekw kaa ishinaakusiyekw yaapach maak kaa wii kachistinuhtahekuuch awenichii. Chititwenaawaau, ‘Awen e wii nispichistaapwet che ihtuutamuwaat Chishemanituu chekwaayuu, anite maak chisheayimiheukamikuhch e ishi taapwet aniyuu, namui nitaweyihtaakusuu yaaitei chechii ihtuutahk aniyuu taan kaa itwet che ihtuutahk. Ekw awen e wii nispichistaapwet che ihtuutamuwaat Chishemanituu chekwaayuu anite maak aniyuuh ushaaushuuliyaanaapiskwa anite chisheayimiheukamikuhch kaa ihtaayich ishi taapwete uyuu kaa itwet, iteyihtaakuniyuu yaaitei chechii ihtuutahk aniyuu taan kaa itwet.’

¹⁷ Chiyawaau ekaa kaa waapahtamekw kaa ishinaakusiyekw, taapwe namui chichii nisituhtenaawaau. Taan uste chesteyihtaakuhch, an ushaaushuuliyaanaapiskw maak an chisheayimiheukamikw anite wehchi payehcheyihtaakusit an ushaaushuuliyaanaapiskw.

¹⁸ Chititwenaawaau kaye awen e wii nispichistaapwet che ihtuutamuwaat Chishemanituu chekwaayuu aniyeyuu pachishtinichenaapiskuyuu anite ayimiheukamikuhch uhchi, namui nitaweyihtaakusuu yaaitei chechii ihtuutahk aniyuu kaa itwet che ihtuutahk. Kaye chititwenaawaau, an awen e wii nispichistaapwet che ihtuutamuwaat Chishemanituu chekwaayuu anite aniyuu miiwewiniyuu anit pachishtinicheunaapiskuhch kaa ashtaakanuyich ishi taapwete iteyihtaakuniyuu yaaitei chechii ihtuutahk aniyuu taan kaa itwet che ihtuutahk.

¹⁹ Chiyawaau ekaa kaa waapahtamekw kaa ishinaakusiyekw, taan uste chesteyihtaakuhch, an aa miiwewin maak an pachishtinichenaapiskw. Wesh e ashtaakanuuhch miiwewin anit an kaa chii pachishtinamuwaakanuut Chishemanituu chekwaayuu ekut mikw wehchi chisteyihtaakuhch an miiwewin.

²⁰ Namui aa chinisituhtenaawaau. Awen e nispichistaapwet che ihtuutamuwaat Chishemanituu chekwaayuu anite ishi pachishtinicheunaapiskuhch, misiwe taan e ishi ashteyich anite ekut kaye e ishi nispichistaapwet.

²¹ Ekw an awen kaa nispichistaapwet chisheayimiheukamikuhch ishi, Chishemanituu e ihtaayich ishi nispichistaapweu, aniyuu kaa ihtaayich anit chisheayimiheukamikuhch.

²² An awen kaa nispichistaapwet kihchikiishikuhch ishi, Chishemanituu uchisheuchimaau tehtapuuniihch ishi nispichistaapweu kaye aniyuuh anit kaa tehtapiyich ekute e ishi nispichistaapwet.”

²³ “Chekwaan chika ishi machipayinaawaau chiyawaau wiishuwewin kaa chiskutamaacheyekw kaye chiyawaau Phariseech. Eukw chiyawaau kaa ayimihehkaasiyekw. Naashch yaakwaau chinaanaakachihtaanaawaau e ishi pahkwenamuwekw Chishemanituu nanaahkuu nihtaauchihchikanisha kaa nihtaauchihtaayekw muyaam anihiih minit, til ekw maak kuumin kaa ishinihkaatekwaauh. Miywaau kiipaa uu e ihtuutamekw. Mikw maak namui mitun chitaapateyihtamihiikunaawaau aniyuuh chihchiwe kaa iteyihtaakuhkwaauh chiskutamaachewinh anite wiishuwewinihch kaa aayimuutekwaauh, muyaam kuiskw wiyaaskunichewin, shaweyihchichewin ekw maak taapwehtamuwin. Eukw uyuu niishtam yaaitei chipaa wii ishi nanaakataweyihtamihiikunaawaau chechii ihtuutamekw mikw maak ekaawii chika uhchi wanichischisiituutenaawaau kaye chechii pahkwenamuwekw Chishemanituu.

²⁴ Chiyawaau ekaa kaa waapahtahkwaau kaa ishinaakusiyekw, ekaa mitun nisituhtamekw, yaapach e wii chischinuhtahekuch awenichii. Naashch yaakwaau chiwiishi naanaakachihtaanaawaau taan e ishi nihiitaakanuuhkwaau aniyuu wiishuwewin ekaa naashch kaa chisteyihtaakuhkwaau ekw aniyuu kaa chisteyihtaakuhkwaau namui chit ishpish nanaakatuweyihtamihiikunaawaau, muyaam awen naashch yaakwaau kaa ihtit chechii saapupayihaat manichuushiisha mikw maak muush kaa saapuhtuwepayihiikut ekun e ishinaakusiyekw.”

²⁵ “Chekwaan chika ishi machipayinaawaau chiyawaau kaa chiskutamaacheyich wiishuwewin ekw maak chiyawaau Phariseech kaa ayimihehkaasuyekw. Naashch yaakwaau e ishi payehchihtaayekw uschich kuuyaakanawaau kaye chiminihkwaakanawaau ekaa maak payehchihtaayekw anite piihch. Ekun e ishinaakuhiisuyekw kaye chiyawaau naashch e miyunaakuhiisuyekw anite uschich mikw maak anite piihch chititaatisiiwiniwaahch namui chimiyunaakusinaawaau e ishpish wesaa weyuuchipayihch taan waa ishi nanaakatuweyimisuyekw.

²⁶ Chiyawaau Phariseech e chischinuhtahekuch anichii ekaa kaa waapahtahkwaau kaa ishinaakusiyekw, niishtam anite piihch chipaa payehchihtaanaawaau aniyuu chiminihkwaakanawaau, ekw maak yaakw tekash che payehkaapiskaakwaau.”

²⁷ “Chekwaan chika ishi machipayinaawaau chiyawaau kaa chiskutamaacheyekw wiishuwewin ekw maak chiyawaau Phariseech mikw kaa ayimihehkaasuyekw. Mwehch chiipaikamikw anit uschich naashch e miyunaakuhtaakanuuhch ekw mikw anite piihch pisikw nipuwin ekw maak e wiinaach chekwaan e ishinaakuhch ekun e iteyihtaakusiyekw chipimaatisiiwiniwaahch.

²⁸ Ekun taapwe mwehch e ishinaakusiyekw. Naashch chimiyunaakusinaawaau uschich anit e kanawaapamukuyekw mikw piihch anite chiiyuuwaahch pisikw ayimihehkaasuwin ekw maak machituutamuwin chitishinaakusinaawaau.”

Jesus kaa niikaan wiihtahk taan che ishi waweshihaakanuyich Phariseeh ekw maak aniyuuh Jewa wiishuwewiniyuu kaa chiskutamaacheyich

²⁹ “Chekwaan chika ishi machipayinaawaau chiyawaau wiishuwewin kaa chiskutamaacheyekw kaye chiyawaau Phariseech, chiyawaau kaa ayimihehkaasuyekw. Naashch chichii miyuuhtaanaawaau anit kaa chiskahaakanuutwaau anichii uchischiwehiichesuuch, kaye chichii waweshihtaawaanaawaau uchiipaikamikuwaau anichii kuiskw kaa ishi pimaatisiitwaau.

³⁰ Eyuu maak chititwenaawaau, chii pimaatisiyaahch mekwaach kaa pimaatisiitwaau aniyehkaananich aanische niwaahkumaakanaanich, namui nipaa uhchi ihtinaan aniyuu kaa ihtuwaakupanenich, kaa nipahaatwaau aniyehkaanaan uchischiwehiichesuuh.

³¹ Ekut maak mitun tepaachimisuyekw taapwe e chii aanische pimaatisiyekw anite uhchi aniyehkaanaanich kaa nipahaatwaau aniyuu uchischiwehiichesuuh.

³² Ekun kiipaa che wii ihtiyekw, chiishihtaawaahkw aniyuu taan kaa ishi chihchipayihtaatwaau aniyehkaanaanich aanische chiwaahkumaakanuwaauch.”

³³ “Chiyawaau chinepukuch kaye kaa ukusiitutaataakuch chinepukuch naashch kaa kaschihuuyekw nitamukw e ishi wiyeshimekuch awenichii, taanite chechii uhchi wiihkuchihuyekw ekaa chechii ituhteyekw machishkutehch.”

³⁴ Ekw Jesus kaa itaat, “Eukw maak uu wehchi ititakuch, nika pechi itishahwaauch anichii uchischiwehiichesuuch kaye anichii kaa kachehtaaweyihtahkwaau kaye kaa chiskutamaachetwaau wiishuwewiniyuu. Yaapach maak wesh ekun che ishinaakusiyekw e nanipahekuch pasch, kutakach e chiistaaskuhwekuch asiteyaahtikuhch kaye kutakach e papasistehwekuch anite chichisheayimiheukamikuwaahch, kaye nanaahkuu ihtaawinihch e itaamuhcheyekw.

³⁵ Chiyawaau maak chika aanische maahtakushkaakunaawaau taan che ishi waweshihaakanuutwaau anichii kaa nipahaatwaau misiwe aniyuu kaa kuiskutaatisiyich aweyuuh, Abel e ihtaat uhchi anite maak ishi Zechariah, Barachiah ukusisa. Zechariah maak chishtauch aniyuu pachishtinicheunaapiskuyuu anit maak maauch e payehcheyihtaakuhch chisheayimiheukamikw ekut kaa nipahaakanuut.

³⁶ Ehe, chiwiihtamaatinaawaau, kaye chiyawaau anuhchiish kaa pimaatisiyekw chika aanische maahtakushkaakunaawaau taan che ishi waweshihaakanuutwaau uchii.”

Taan kaa ishpish chii saachihtaat Jesus Jerusalemiyuu

³⁷ “Chiyawaau Jerusalemihch kaa ihtaayekw, kaa nipahekuch anichii uchischiwehiichesuuch kaye kaa paahpimusinaatahwekuch aniyuu Chishemanituu kaa pechi itishahamaataakw, taan tahtwaau kaa wii maausukupititakuch anite ishi e ihtaayaan, muyaam pakahaahkwaan e ihtuutuwaat upakahaahkwaanishimh, shiipaa utatahkunihch e ishi maausukunaat e wii naanaakachihaat. Ekun maak mwehch kaa wii ihtuutaatakuch. Mikw namui kuuhchi pachishtinaawaau uu chechii ihtuutaatakuch.

³⁸ Nituhtamukw maa chika nakatamaakunaawaau chiichiwaauh mitun tekash e pisikwaakwaau kaye e nishuunaatahkwaau.

³⁹ Wesh chiwiihtamaatinaawaau namui miin chika uhchi waapaminaawaau paatish utihchipayihche che itweyekw, Shaweyihtaakusuu an kaa pechi takushinit Utipeyihchikeu utishinihkaasuwiniihch.”