Matthew 22 - Chishemanituu Utayimuwin: Kaa Uskaach Testament

E niipuu makushaanuuhch kaa aayimuutech

¹ Ekw Jesus miin kaa ayimihaat aniyuu iinuu tipaachimuwin chiskutamaachewiniyuu e aapachihtaat.

² “Chika wiihtamaatinaawaau taan e iteyihtaakuhch kihchikiishikw chisheuchimaawin. Muyaam chisheuchimaau e chii ayeskuushtaat e mishaayich makushaaniyuu, ukusisa e makushehaat e chii niipuyich.

³ Chii itishahweu maak aapachihaakan chechii nituwaapamaayich aniyuu aweyuu kaa wiishaamaakanuyich. Ekw namui uhchiwii takushiniyuuh aniyuu kaa wiishaamaakanuwiitwaauh.

⁴ Ekw miin kutak aapachihaakanh kaa itishahwaat yaapach chechii wiishaamaayich aweyuu. Maauyuu kaa itashumaat chechii itweyich, ‘Shaash nichiishaihtin che makusheyaan. Shaash chii nipahaakanuuch mistusich ekw maak mistusishach che makushaanuuhch kaye shaash chiishi wiishtaasunaanuu. Pechi takushinikw maak.’

⁵ Mikw maak anichii kaa wiishaamaakanuutwaau namui uhchi ayaapatihtamuch, aahchiiuh chii ishi kachistuhteuch. Peyakw an anite unihtaauchihchikan e ihtakuniyikwaauh chii ituhteu. Ekw miin kutak chii ayaakupane taan e ishi ataawet. ekute kaa ituhtet wiya.

⁶ Ekw anichii kutakach kaa maakunaatwaau aniyuu utaapachihaakaniyuu aniyuu chisheuchimaau ekw kaa kusiihkuwaatwaau, kaa ati nipahaatwaau.

⁷ Iskutak maak an chisheuchimaau chescheyihtahk uyuu e chii ihtinaanuyich chii mistachishuwaasuu. Ekw kaa itishahwaat ushimaakanishim chechii nituu nipahaayich aniyuu kaa nipahaayich utaapachihaakan ekw kaye kaa ati ishkwaasamuwaat aniyuu utihtaawiniyuu.

⁸ Ekw miin kaa wiishaamaat kutak utaapachihaakan, kaa itaat, ‘Shaash wesh ayeskuushteu an niipuu makushaan. Anichii maak kaa wiishaamakwaau namui uhchiwii takushinuuch ekw maak namui tepicheyihtaakusuuch anit chechii ihtaatwaau.

⁹ Maachiikw maak ituhtekw anite meskanaahch anite e weyuutisiitwaau iinuuch mikw tahtu awenichii che waapamekuch che wiishaamekuch chechii pechi naachimakushetwaau.’

¹⁰ Ekw anichii aapachihaakanich kaa ituhtetwaau anite meskanaahch, ekut maak kaa waapamaatwaau misiwe e iteyihtaakusiyich aweyuu, umachihtwaau kaye kaa kuiskutaatisiyich. Eukw uyuu kaa waawiisaamaatwaau. Ekw maak mitun kaa ati saakaschinaanuyich anit aniyuu kaa makushaanuyich.”

¹¹ “Iskutak maak an chisheuchimaau piyechi piihchet chechii waapamaat aniyuu aweyuu kaa takushiniitwaauh, chii waapameu peyakw anit naapeu ekaa muyaam itaaspisuyich taan chipaa itaaspisuyuu e niipuunaanuyich.

¹² Ekw kaa itaat aniyuu naapeu, ‘Niwiichewaakan taanite kaa uhchi piihcheyin utah uu e makusheyaan ekaa maak muyaam itaaspisuyin.’ Namui maak uhchii chistuu an naapeu.

¹³ Ekw an chisheuchimaau kaa itaat aniyuu ukuhpaanem, ‘Maahkupitamuwaahk usit kaye utihchii, che ishuwepinekw nete e ukaashteyaayich taanite che nanehkaateyimut anite che maatuutwaau awenichii kaye che mamatweyaapitesinitwaau.’ ”

¹⁴ Ekw Jesus kaa ati itwet, “Mihchetu awenichii tepwaataakanuuch, mikw maak namui mihchet wiyaapamaakanuuch.”

Chisheuchimaau shuuliyaau e chiishiihkaasunaanuuhch

¹⁵ Ekw kaa chistuhtetwaau anichii Phariseech, che nituu ayimihiitutwaau taanite chechii uhchi pisiiwiyaatwaau Jesus e kakwechimaatwaau chekwaayuu.

¹⁶ Chii itishahweuch maak uchischinuhamuwaakanawaau kaye Herod utaapachihaakaniyuu anite Jesus e ihtaayich. Ekw kaa itaatwaau aniyuu Jesus, “Chischinuhamaachesuu, chichischeyimitinaan taapwe e taapwemakahch taan e ishi chiskutamaacheyin kaye misiwe peyakunihch e ishi chiskutamuutwaau awenichii taan e ishi nituweyimikutwaau Chishemanituu chechii ishi pimaatisiitwaau. Namui mitun wiyesh chititeyihtamihiikuun taan che ati iteyihtamihiikutwaau awenichii taan e ishi chiskutamaacheut, kaye misiwe peyakunihch chititeyimaauch awenichii.

¹⁷ Ekw maak netuweyimitaahch chechii wiihtamuyaahch, itashteu aa wiishuwewinihch Rome chisheuchimaau chechii miyaakanuut aniyuu shuuliyaayuu kaa chiishiihkamiyich aweyuu.”

¹⁸ Jesus maak chii chischeyimeu nitamukw e chii wii itwehiikut ekw kaa itaat, “Chiyawaau kaa ayimihehkaasuyekw, chekwaan wehchi wii pechi kakwechihiyekw.

¹⁹ Pechi waapahtiikw maa an shuuliyaau e pahkwenamuwaakanuut chisheuchimaau.” Ekw kaa miikut shuuliyaanaapiskwa.

²⁰ Ekw kaa itaat, “Awen maak utaashtamuhkw e nuukuniyich utah kaye awen uyuu utishinihkaasun kaa masinaateyich.”

²¹ Ekw kaa itikut, “Rome chisheuchimaau Caesar aniyuu utaashtamuhkw kaye wiya anit masinaasuu.” Ekw Jesus kaa itaat, “Miyaahkw chisheuchimaau Caesar taan aniyuuh wiya tepiyeusiit, kaye maak miyaahkw Chishemanituu taan aniyuuh wiya tepiyeusiit.”

²² Iskutak maak anichii kaa pechi itishahwaakanuutwaau piyehtawaatwaau uyuu e itikutwaau, naashch chii miskaateyihtamihiikuuch taan kaa ishi nishkweushihiikutwaau, kaa nakataatwaau ekw kaa ati chistuhtetwaau.

Jesus kaa ayimitutahk kaau che pimaatisiinaanuyich

²³ Aniyuu maak e peyakuniyich e chiishikaayich Sadduceeh chii pechi nituwaapamikuu Jesus. Eukun aniyuu kaa itweyich chiishpin e puunipimaatisiyich aweyuu utah aschiihch ekaa miin che uhchi wanishkaayich.

²⁴ Chii itikuu aniyuu Sadduceeh, “Chischinuhamaachesuu, Moses chii masinaham uyuu wiishuwewiniyuu. Itashteyuu maak, ‘Nipite naapeu, ekaa maak uhchi ayaawaakwe awaasha, aniyuu wiichishaanh an naapeu kaa nipit chipaa wiichimeyuu aniyuu wiichiskweu. Ekw maak chipaa ayaaweuch awaasha aniyaa ustesa chechii uhpinihtaauchishtamuwaat.’ ”

²⁵ Ekw uyuu kaa ishi tipaachimushtuwaatwaau Jesus anichii Sadduceech, “Chii ihtaauch peyakwaau niishwaashch naapeuch e chii wiichishaanihtuutwaau. Ekw an kaa ustesimaaut kaa niiput. Chii puunipimaatisiyuu maak ekaa uhchi ayaawaatwaau awaasha. Ekw aniyuu wiichishaanh kaa uhchi taahchishkaakut kaa wiichimaayich aniyuu wiichiskweu.

²⁶ Chek maak kaye wiya an wiichishaanimaau kaa wiichimaat aniyaah wiichishaanh wiichiskweuyuuh kaa puunipimaatisiyich. Namui kaye wiya uhchi ayaaweu awaasha. Ekw miin aniyuuh wehchi taahchiskaakut an anuhchiish kaa puunipimaatisiit kaa wiichimaayich aniyuu iskweu. Ekun mwehch kaa ati ispayit kaye wiya uu. Chii puunipimaatisiyuu ekaa mechim uhchi ayaawaat awaasha. Chek misiwe ekun kaa ati ishinaakusitwaau anichii niishwaashch wiichishaanimaauch. Misiwe chii wiichimeuch aniyuuh iskweu kaye misiwe chii ati puunipimaatisiyuuch ekaa uhchi ayaawaatwaau awaasha.

²⁷ Chek kaye wiya an iskweu kaa puunipimaatisiit.

²⁸ Iskutak maak kaa chiishi tipaachimushtuwaatwaau Jesus anichii Sadduceech ekw kaa kakwechimaatwaau, Iskutak utihchipayihche chechii wanishkaatwaau anichii kaa puunipimaatisiitwaau awen che wiichiskweut aniyuu iskweu, wesh misiwe anichii niishwaashch wiichishaanimaauch chii wiichimeuch aniyuu iskweu.”

²⁹ Ekw Jesus kaa itaat, “Chiwanipayinaawaau. Namui chichischeyihtenaawaau taan e itashteyich Chishemanituu utayimuwin kaye namui chichischeyihtamuwaanaawaau Chishemanituu umaskuusiiwin uu kaa ishi kakwechimiyekw.

³⁰ Wesh iskutak utihchipayihche che wanishkaatwaau anichii kaa puunipimaatisiitwaau, taapaa kata uhchi niipuuch kaye namui kata uhchi niipuuhaakanuuch, wesh aniyuu e iteyihtaakusiyich Chishemanituu utenchilimh kihchikiishikuhch kaa ihtaayich ekun mwehch che iteyihtaakusitwaau.

³¹ Ekw maak an wii, che wanishkaatwaau anichii kaa nipitwaau, namui aa kuuhchi ayimihtaanaawaau kaa ititaakw Chishemanituu, miin che wanishkaayich misiwe aniyuu kaa puunipimaatisiyich.

³² Chii iteu, ‘Eukw niya uchishemanituumiwaau, Abraham, Isaac ekw maak Jacob.’ Namui uchishemanituumitutaakuu Chishemanituu aniyuu kaa nipiyich mikw aniyuu kaa pimaatisiyich.”

³³ Iskutak maak anichii iinuuch piyehtawaatwaau uyuu e itweyich, chii miskaateyihtamihiikuuch aniyuu e ishi chiskutamaacheyich.

An maauch chesteyihtaakuhch itashuwewin

³⁴ Iskutak maak anichii Phariseech piyehtahkwaau e chii chiputunehwaayich Jesus aniyuu Sadduceeh, ekw kaa nishtuwiitwaau maamuu kaa nituwaapamaatwaau Jesus.

³⁵ Peyakw maak anit e tashitwaau anichii Phariseech, kaa chiskutamaachet wiishuwewiniyuu e itaapatisit, chiwii naanituu pisiiwiyeu Jesus, e kakwechimaat chekwaayuu.

³⁶ Chii iteu maak, “E tahtihkwaau kacheskwewinh Chishemanituu kaa wiishtaat, taan maauch e chisteyihtaakuhch.”

³⁷ Ekw Jesus kaa itaat, “ ‘Saachihii Utipeyihchikeu Chichishemanituum, misiwe chitehiihch, kaye misiwe chitahchaahkuhch kaye misiwe chimituneyihchikanihch.’

³⁸ Eukw uu maauch naakaaneyihtaakuch kaye maauch chesteyihtaakuhch kacheskwewin.

³⁹ An maak wiishuwewin miin maauch chesteyihtaakuhch eukw uu kaa itwemakahch, ‘Saachihiich kutakach awenichii mwehch chiya e ishpish saachihiisuyin.’

⁴⁰ Eukw maak uyuu niishu kacheskwewinh anit chechii uhchi nanaakataweyihtamihiikuuhkw aniyuu Moses uwiishuwewiniyuu kaa miyaakanuut kaye maak taan kaa ishi chiskutamaachetwaau uchischiwehiichesuuch.”

Awen uu Christ

⁴¹ Mekwaach maak maausuk e pechi ihtaayich aniyuuh Phariseeh, Jesus chii kakwechimeu,

⁴² “Taan e iteyimekw Christ. Awen aniyuu ukusisa. Aweyuu e ihtaayich kaa uhchi aanische pimaatisiit.” Ekw kaa itikut, “David e ihtaayich chii uhchi aanische pimaatisiyuu.”

⁴³ Ekw Jesus kaa itaat, “Chekwaayuu maak Utipeyihchikeu wehchii ishinihkaatikut David. Wesh David, Kaa payehchisiyich Ahchaahkwa chii miikuu chechii itwet,

⁴⁴ Utipeyihchikeu chii iteu Nitipeyihchikemh, ute pechi apih nihiiwinihch paatish chii ashpashihiikwaawenich anichii kaa uhkaatiskwaau.

⁴⁵ Ekw maak David ‘Nitipeyihchikem’ e chii ishinihkaataat aniyuuh Christ taanite chechii uhchi ukusiitutawaat.”

⁴⁶ Namui maak aweyuu uhchii nishkweushihiikuu Jesus. Anit maak uhchi aniyuu kaa chiishikaayich namui miin aweyuu uhchi kuchihtaayuu chechii kakwechimikut chekwaayuu.