Matthew 19 - Chishemanituu Utayimuwin: Kaa Uskaach Testament

Jesus kaa aayimuutahk e wepinitunaanuyich

¹ Iskutak maak Jesus kaa chiishkwaa wiihtahk uyuu chii chistuhteu anit Galileehch uhchi, ekw anite Judea aschiihch kaa ituhtet kwestehchekaam aniyuu Jordan siipiiyuu.

² Chii mihchetiyuu maak iinuu e nuushuushkaakut, ekute anite kaa miinuwaachihaat.

³ Pasch maak Phariseeh chii pechi nituwaapamikuu e wii kakwechihiikut. Chii itikuu maak, “Wiihtamuunaan maa, itashteu aa wiishuwewinihch che pachishtinaakanuut naapeu chechii wepinaat wiichiskweu.”

⁴ Ekw Jesus kaa nishkweushihaat e itaat, “Namui aa kuuhchi ayimihtaanaawaau masinahiikanihch anit kaa itashtech, niishtam iinuuh kaa ushihaat Chishemanituu, naapeu ekw maak iskweu chii ushiheu.

⁵ Chii itekupane maak Chishemanituu, ‘Uu uhchi, naapeu chika nakateu uniichihiikw che wiichimaat wiichiskweu ekw maak che peyakunakusitwaau.’ Eukw uyuu kaa itwekupane Chishemanituu.

⁶ Namui shaash niishu awenichii chika uhchi ishinaakusuuch, maak mikw e peyakushit awen chika ishinaakusuuch. Aniyuu maak aweyuu Chishemanituu kaa wiichistiyaat, namui awen chipaa uhchi pahkaaniheu.”

⁷ Ekw kaa itikut aniyuu Phariseeh, “Chekwaayuu maak wehchi wiishtaat uyuu wiishuwewiniyuu Moses e itashteyich, ‘Naapeu wii wepinaate wiichiskweu yaaitei niyaakan chika wiihtamuweu masinahiikaniyuu e miyaat, ekw maak yaakw che nakataat.’ ”

⁸ Ekw Jesus kaa nishkweushihaat e itaat, “Moses chichii pachishtinikuwaau chechii wepinamekw chiichiskweuwaauh wesh chii chischeyihtam e siipihtamekw. Namui maak wii Chishemanituu uhchi nituweyihtam chechii ishinaakuniyich uskach weshihaat naapeu ekw maak iskweu.

⁹ Chiwiihtamaatinaawaau maak, naapeu wepinaate wiichiskweu ekaa maak uhchi pisikwaatisiyich aniyuu wiichiskeu, an maak naapeu wiichimaate kutak iskweu pisikwaatisiyuu an naapeu.”

¹⁰ Ekw kaa itikut uchischinuhamuwaakanh, “Uu e ispayiwaakwenich naapeu wiichiskweu, ekush miywaashuu ekaa chechii niipuunaanuuhch.”

¹¹ Ekw Jesus kaa itaat, “Namui misiwe awen chika uhchi nisituhtam uyeyuu Chiskutamaachewiniyuu, mikw aniyuu aweyuu Chishemanituu kaa miyaat chechii nisituhtamiyich.

¹² Pasch maak awenichii namui chika chii niipuuch wesh ekun kaa ishi pimaatisiitwaau ekaa maamituneyihtamihiikutwaau chechii niipuutwaau, ekw kutakach namui pachishtinaakanuuch chechii niipuutwaau ekw kutakach wiyawaau wiyeyihtamuch ekaa chechii niipuutwaau wesh iteyihtamuch uste chechii atushchehkahtahkwaau kihchikiishikw uchimaawiniyuu mikw e peyakutwaau. An maak awen kaa nisituhtahk uyuu ekush chika ihtuutam.”

Jesus kaa shaweyimaat awaasha

¹³ Chii peshuweuch maak awenichii utawaashiimuwaau anite Jesus e ihtaayich e chii nituweyimaatwaau chechii saaminaayich chechii ayimiheshtamuwaayich maak, mikw maak anichii chischinuhamuwaakanich chii chistahamuweuch aniyuu iinuu.

¹⁴ Ekw Jesus kaa itaat, “Pachishtinaahkuch awaashach chechii pechi naasitwaau ekaawii uhchi chistahamuwaahkuch, wesh uyuu kaa iteyihtaakusitwaau awenich kihchikiishikw uchimaawinihch ishi tipeyihtaakusuuch.”

¹⁵ Jesus kaa saaminaat aniyuu awaasha ekw kaa chistuhtet.

Kaa miisitisiit naapeu

¹⁶ Peyakwaau naapeu chii pechi nituwaapameu Jesus e itaat, “Chiskutamaachesuu, chekwaan chechii ihtuutamaan e miywaashich chechii uhchi ayaayaan kaachiche pimaatisiiwin.”

¹⁷ Ekw Jesus kaa itaat, “Chekwaan wehchi kakwechimiyin chechii wiihtamaataan chekwaan meyaashich. Namui awen ihtaau tekash chechii miyu ihtit, mikw Chishemanituu. Wii ayaayine kaachiche pimaatisiiwin misiwe nanihiihta kacheskwewinh.”

¹⁸ Ekw an naapeu kaa itaat, “Chekw wiishuwewin.” Jesus kaa nishkweushihaat e itaat, “Ekaawii nipahii awen, ekaawii pisikwaatisii, ekaawii chimuth, ekaawii nanatayaachim awen,

¹⁹ miyutuutuu e chisteyimat kuuhtaawii kaye chikaawii, kaye saachihii kutak awen mwehch chii e ishpish saachihiisuyin.”

²⁰ Ekw an naapeu kaa itwet, “Kaa pechi awaashiyuuyaan shaash nichii nanihiihten uyuuh kacheskwewinh. Chekwaan maak yaapach eshkw nipaa ihtuuten.”

²¹ Ekw Jesus kaa itaat, “Tekash misiwe chekwaan waa ihtuutamuwane chechii kuiskutaatisiyin, nituu ataawe misiwe taan e ishi ayaayin, ekw an shuuliyaau kaa chistimaatisiitwaau che miitwaau. Ekw maak che ayaayin miisitisiiwin kihchikiishikuhch kaa ihtakuhch. Chii ihtuutamane maak uu ekw maak che pechi nuushuushkuwiyin. Chii ihtuutamane maak uu aashtam ekw maak che pechi nuushuushkuwiyin.”

²² Iskutak maak piyehtahk an naapeu uyeyuu naashch taapwe chii macheyihtam wesh naashch chii miisitisiyuu.

²³ Ekw Jesus kaa itaat aniyuu uchischinuhamuwaakan, “Taapwe chiwiihtamaatinaawaau, awen kaa miisitisiit taapwe chika aayimaniyuu chechii piihchet kihchikiishikw chisheuchimaawinihch.

²⁴ Miin peyakwaau nika itwen, etituu aayimaniyuu awen kaa miisitisiit chechii piihchet Chishemanituu uchisheuchimaawiniihch ishpishaat an awesiis kaa mista piskwaakunet chechii shaapushkahk shaapunikaniyuu anite pekuneyaapiskaayich.”

²⁵ Iskutak maak piyehtahkwaau anichii chischinuhamuwaakanich uyuu, naashch chii kushkupayuuch, ekw kaa ititutwaau, “Awen maak ekw chechii pimaachihut.”

²⁶ Ekw Jesus kuiskw kaa kanawaapamaat e itaat, “Taan aniyuuh ekaa chii ihtuutahk iinuu kata chii ihtuutam wiya Chishemanituu.”

²⁷ Ekw Peter kaa itwet, “Kanawaapahta maa. Shaash misiwe chekwaan nichii nakatenaan chechii nuushuushkaataahch. Uu maak kaa ishi ihtuutamaahch chekwaayuu maak che miikuyaahch Chishemanituu.”

²⁸ Ekw Jesus kaa itaat, “Chika cheshtinaahunaawaau, iskutak Iinuu Ukusisa apiyichen chisheuchimaau tehtapuunihch miin uskaache aschii, ekw kaye chiyawaau nichischinuhamuwaakanitikw che apiyekw niishushaap uchimaau tehtapuunih, che wiyaaskunekuch niishushaap kaa itiskaanesitwaau Israel iinuuch.

²⁹ Misiwe awen kaa nakatahk wiichi kaye kaa nakataat wiichishaanh, uniichihiikuh kaye utawaashiimh kaye maak kaa nakatahk utaschii niya uhchi uste mitaahtumitanewaau chika chiiwemiyaakanuu kaye kaachiche pimaatisiiwiniyuu chika miyaakanuu.

³⁰ Mikw maak mihchetu anichii e chisteyihtaakusitwaau kaa iteyimaakanuutwaau namui chika uhchi chisteyihtaakusuuch anite Chishemanituu uchisheuchimaawiniihch kaye mihchetu anichii kaa iteyimaakanuutwaau ekaa chisteyihtaakusitwaau chika chisteyihtaakusuuch anite Chishemanituu uchisheuchimaawaniihch.”