Matthew 12 - Chishemanituu Utayimuwin: Kaa Uskaach Testament

E ayimiheuchiishikaach e aayimuutech

¹ Mekwaach maak e Jewa ayimiheuchiishikaayich Jesus chii wiicheweu uchischinuhamuwaakanh, e ati pimuhtetwaau anite kaa chii nihtaauchiniyikwaau nihtaauchihchikan anit wehchi ushihaakanuut pahkweshikan. Chii siiweyuuh maak aniyuu uchischinuhamuwaakanh, ekw kaa naanaatwaayaaskupitamiyich aniyuu nihtaauchihchikanh e miichiyich.

² Iskutak maak anichii Phariseech wiyaapamaatwaau aniyuu e ihtiyich chii iteuch aniyuu Jesus, “Chekwaan wehchi ihtuutamekw an chekwaan atuch chipaa uhchi ihtuutaakanuu e ayimiheuchiishikaach.”

³ Ekw Jesus kaa itaat aniyuu Phariseeh, “Chichii ayimihtaanaawaache masinahiikanihch kaa tipaachimaakanuut aniyaa chisheuchimaau David, misiwe maak aniyuu kaa wiicheukut iskutak kaa wii miichisutwaau.

⁴ Aniyaa chisheuchimaau David chii piihcheu chisheayimiheukamikuhch ekw kaa muwaat aniyuu kaa payehchisiyich aaihkunaau, ekw kaa ashamaat uwiichewaakanh. Mikw maak ayimiheuchimaauch chii iteyihtaakusuuch chechii muwaawaakupanenich uyuu aaihkunaau, wesh eukun kaa itashteyich ayimihewin wiishuweusinahiikanihch. David maak namui uhchi waweshihaakanuu.

⁵ Kaye chichii ayimihtaanaawaache anite wiishuweusinahiikanihch, anichii ayimiheuchimaauch e aapatisitwaau anite chisheayimiheukamikuhch e ayimiheuchiishikaayich piikunamuch aniyuu wiishuwewiniyuu taan chipaa ishi naanaakachihtaakanuuyuu e ayimiheuchiishikaayich, namui maak chekwaayuu chika chii ishi ataameyihtaakusuuch.

⁶ Chiwiihtamaatinaawaau, ihtaau awen utah uste e ispeyihtaakusit ishpishaat wii taan e ituwaataakanuuhch Jewa chisheayimiheukamikw.

⁷ Wesh itashteu masinahiikanihch Chishemanituu e chii itwet, Chishewaatisiiwin eukw netuweyihtamaan, namui wii e machishtawehamaanuuhch chekwaan. Nisituhtamekw maak uu taan nihaau e itwemakahch, namui chipaa uhchi wiyaaskunaawaauch anichii ekaa kaa machituutahkwaau.

⁸ Wesh Iinuu Ukusisa, mechim e ayimiheuchiishikaayich tipeyihtam.”

Naapeu kaa maaskaniyich utihchiih

⁹ Ekw Jesus kaa chistuhtet anit uhchi, ekw anite ayimiheukamikuhch kaa piihchet.

¹⁰ Chii ihtaau maak anit naapeu utihchii e maaskaniyich. Chii ihtaauch maak pasch anit iinuuch e chiimuut naanaakachihaatwaau aniyuu Jesus e wii naanituu miskahkwaau chekwaayuu chechii uhchi ataameyimaatwaau e machituutamiyich ekw kaa kakwechimaatwaau, “Wanituutaakanuu aa awen e miinuwaachihaakanuut e ayimiheuchiishikaayich.”

¹¹ Ekw Jesus kaa itaat, “Peyakw aahch awen anit e tashiyekw umaanishchaanishimh piihchipayiyich anite e pakuneyaayich namui aa yaapach kata uhchi wii wiihkuchiheu anit aniyuu kaa piihchipayiyich aat e ayimiheuchiishikaayich.

¹² Uste maak naapeu iteyihtaakusuu ishpishaat maanishchaanish. Namui maak wiyeshin e miyu wiichihiit awen e ayimiheuchiishikaayich.”

¹³ Ekw kaa itaat aniyuu naapeu utihchiyuu kaa maaskaniyich, “Tashupayihtaah chitihchii.” Chii tashupayihtaau maak an naapeu aniyuu utihchii, ekw maak kaa miinuwaachihtaakanuyich aniyuu utihchii. Mwehch aniyuu kutachiyuu utihchii kaa ishi miywaayich ekun kaa ishinaakuniyich aniyuu utihchii kaa maaskaniyich.

¹⁴ Ekw kaa chistuhtetwaau anichii Phariseech, kaa ayimitutahkwaau taan chipaa chii ihtuuch chechii nipahaatwaau Jesus.

Aniyuu kaa wiyaapamaat che utaapachihaakanit Chishemanituu

¹⁵ Iskutak maak Jesus piyehtahk taan waa ihtuutuwaakanuut chii chistuhteu, mihchetu maak aweyuu chii nuushuushkaakuu. Chii miinuwaachiheu maak aniyuu misiwe kaa aahkusiyich aweyuuh.

¹⁶ Ekw Jesus kaa itashumaat ekaa chechii wiihtamuwaayich kutak aweyuu taan kaa ihtit.

¹⁷ Aniyuu maak kaa ihtit ekw kaa ispayiyich aniyuu taan kaa itwet Chishemanituu, taan kaa ishi miyaat uchischiwehiichesuuh Isaiah chechii ishi aayimuutamiyich.

¹⁸ Maau nitaapachihaakan kaa wiyeyimak, an kaa saachihak, kaye kaa naniheyihtamihiit. Nika miyaau Nitahchaahkwa ekw maak che wiihtamuwaat misiwe aweyuu nanaahkuu e itiskaanesiyich che wiyaaskunaakanuyich.

¹⁹ Namui chika uhchi naanituu machipayuu kaye namui chika uhchi taachikweu nitaapachihaakan, maak chechii papehtaakuhut anite meskanaahch.

²⁰ Kaye namui chika uhchi pahchishimeu aniyuu chekaat kaa pahchishiniyich kaye chika wiichiheu e siihchimaat ekaa chechii puuniyich aniyuu kaa wii nuuhtipuuniyich. Namui maak chika uhchi puuniyuu paatish misiwe chekwaayuuh chii kuiskunaakuhtaate kaye maak chika tepiheu aniyuuh kaa wii nishkuushtaakut.

²¹ Misiwe maak e itiskaanesiyich iinuuh chika ispeyihtamiyuuh utishinihkaasuwin. Ekun maak uyuu kaa niikaan itwekupane aniyaa uchischiwehiichesuu Isaiah e aayimuumaat Jesus.

Taanite kaa uhtinahk Jesus umaskuusiwin

²² Pasch awenichii chii peshuweuch naapeu anite Jesus e ihtaayich ekaa waapahtamiyich kaye ekaa uhchii ayimiyich, e chii piihchishkaakuyich machiahchaahkwa. Ekw Jesus kaa miinuwaachihaat aniyuu naapeu, kaa uhchi nihtaaweyich kaye kaa uhchi waapahtamiyich.

²³ Anichii maak iinuuch misiwe chii miskaateyihtamuch taan kaa ishi waapamaatwaau Jesus e ihtuutamiyich. Chii iteuch maak, “Maaskuuch taapwe Jesus eukw aniyuu Chishemanituu kaa pechi itishahwaat anite aniyaa chisheuchimaau David e ihtaayich kaa uhchiskaanesit.”

²⁴ Mikw maak iskutak kaa pehtawaatwaau anichii Phariseech aniyuu e itweyich, chii iteuch, “Beelzebul, aniyuu machiahchaahkuch uchimaamuwaauh ekun aniyuu kaa miikut mitewiniyuu chechii wiiwiitishihwaayich machiahchaahkwa.”

²⁵ Jesus maak chii chischeyimeu taan e ishi maamituneyihtamiyich ekw kaa itaat, “Iinuuch utah peyakw ihtaawinihch maasihiitutwaawenich chika wanaachihiituuch. Muyaam taan e ishinaakuhch peyakw utenuu awenichii e machipayitwaau, e pahkaanihiitutwaau, e machipayitwaau namui chika uhchi chihkaawaachipayuuch kaye chika wanaachihiituuch.

²⁶ Anichii maak kaa nuushuushkuwaatwaau machimanituu, maasihiitutwaawenich maak, chika wanaachihtaakanuuyuu machimanituu uchisheuchimaawin.

²⁷ Eukw maak chipaa ispainiyuu taapwe an machiahchaahkw uchimaau Beelzebul kaa ishinihkaataakanuut pechi miit kaschihuwiniyuu chechii aapachihtaauch chechii wiiwiitishihukwaau machiahchaahkuch. Chiyawaau maak niyaanitam chitiiniimuwaauch e wiiwiitishihwaatwaau machiahchaahkw. Aweyuu maak wiyawaau kaa miikutwaau kaschihuwiniyuu aniyuu chechii ihtitwaau. Ekw maak chiyawaau niyaanitam chitiiniimuwaauch chischeyihtamuch e nanatayekw an e itweyekw machimanituu e miiwet kaschihuwiniyuu chechii wiiwiitishihwaakanuyich machiahchaahkwa.

²⁸ Namayeu Beelzebul utahchaahkwa kaa pechi miit kaschihuwiniyuu chechii wiiwiitishihuumach machiahchaahkwa, Chishemanituu Utahchaahkwa eukw kaa pechi miit kaschihuwiniyuu chechii ihtuutamuch uyuu. Ekut maak wehchi waapahtiikuyekw taapwe Chishemanituu uchisheuchimaawin shaash mitun e utihtahukuwekw.”

²⁹ “Namui awen chika chii piihcheweu e suuhtisiyich naapeu wiichiyuu chechii kachemutuwaat taan e ishi tipiyeusiyich paatish niishtam chii maahkupitaate aniyuu naapeu kaa suuhtisiyich, ekw maak yaakw chechii chimutuwaat taan e ishi tipiyeusiyich.”

³⁰ Jesus maak miin chii iteu, “An awen ekaa kaa pechi wiichihiit nishkuushtaakw. Awen ekaa kaa wiichihiit e maamuushtinicheuch aschetishihiicheu ishinaakusuu.

³¹ Eukw maak uu wehchi wiihtamaatakuch, chika chii wepeyihtamuwaakanuu awen mikw taan e ishinaakuniyich machihtwaawiniyuu e ihtuutahk maak e ishi maayeyihchet mikw maak namui katachii wepeyihtamuwaakanuu awen kaa papaashtaamaat Kaa payehchisiyich Ahchaahkwa.

³² Misiwe awen kaa maayeyimaat Iinuu Ukusisa katachii wepeyihtamuwaakanuu. Namui wiiskaat katachii wepeyihtamuwaakanuu awen maayeyimaate Kaa payehchisiyich Ahchaahkwa.”

Mistikw taan e ishi miinishuut

³³ “Aniyuu taan e ishi nihtaauchihtaat miinishah mistikw ekut wehchi nisituunawaakanuut chekw mistikw an. Ekaa maak miyu nihtaauchit mistikw namui miywaauh aniyuuh miinisha.

³⁴ Taanite chechii uhchi itweyekw chekwaan e miyuuhtaakuhch e machaatisiyekw maak mwehch chinepukuch e iteyihtaakusiyekw. Taan e ishi ayimit awen ekut wehchi chischeyihtaakusit taan e ishitehet.

³⁵ Wesh taan e ishi ayaat awen upimaatisiiwinihch chika nuukuniyuu. Wesh e ishi ayimit awen ekut wehchi chischeyihtaakusit taan e ishi tehet.”

³⁶ “Chiwiihtamaatinaawaau, cheshtinaash misiwe taan kaa ishi ayimit awen ekaa aapataniyich chika wiihtamuwaakanuu wiyaaskunicheu chiishikaayiche.

³⁷ An taan e ishi ayimiyekw eukw an che aapatahch wiyaaskunikuyekwe. An taan e ishi ayimiyekw ekut che uhchi chischeyihtaakusiyekw kuiskw kaa ihtuwekwe maak ekaa kuiskw uhchi ihtuwekwe.”

Kaa nituweyihtahkwaau awenichii chechii waapahtiyaakanuutwaau maamishkaach ihtuwiniyuu

³⁸ Pasch maak anichii kaa chiskutamaachetwaau wiishuwewiniyuu kaye pasch anichii Phariseech chii uhchi ayimuuch e itwetwaau, “Chiskutamaachesuu, niwii waapahtenaan maamishkaach chekwaan e ihtuutaman.”

³⁹ Ekw Jesus kaa itaat, “Anuhchiish awenichii kaa pimaatisiitwaau naashch taapwe machaatisiyuuch kaye pisikwaatisiyuuch. Kaa kakwechihchemuyekw chechii waapahtiikuyekw maamishkaach waapahtiiwewin, namui chika uhchi waapahtiikunaawaau. Mikw aniyuuh taan kaa ishi maamishkaach ispayit aniyaa uchischiwehiichesuu Jonah eukw mikw an che waapahtiikuyekw.

⁴⁰ Mwehch Jonah kaa ishpish ihtaat anite mista namesa wataayihch nishtu chiishikaauh kaye nishtu tipiskaau, ekun kaye Iinuu Ukusisa che ishpish chiskahaakanuut anite ishi aschiihch.

⁴¹ Iskutak maak wiyaaskunicheu chiishikaache, aniyehkaanaanich iinuuch anite Ninevehch kaa chii ihtaatwaau chika uhpakaapuuch che itwetwaau chechii waweshihiikuyekw chiyawaau anuhchiish kaa pimaatisiyekw. Wesh ekut kaa uhchi kweskaatisiitwaau iskutak kaa pehtawaatwaau Jonah e kacheskweyich, ihtaau maak awen utah uste e iteyihtaakusit ishpishaat Jonah yaapach maak namui kuuhchi kweskaatisiinaawaau.

⁴² Iskutak maak wiyaaskunicheu chiishikaau utihchipayihche, aniyaa chisheuchimaaskweu shaawinuutaahch kaa tipeyihchichekupane chika uhchi pisikuu che nishuuwanaachimaat aniyuu aweyuuh anuhchiish kaa pimaatisiitwaau. Wesh wiya naashch taapwe waahyuu chii uhtuhteu mikw chechii nituu nituhtamuwaat aniyaa chisheuchimaau Solomon ukachehtaaweyihtamuwiniyuu. Ihtaau maak utah awen uste e iteyihtaakusit ishpishaat Solomon, namui maak aapatihtawaakanuu.”

Kaau kaa takushihk machiahchaahkw anit kaa uhchi wiiwepinaakanuut

⁴³ Ekw Jesus miin kaa ati itwet, “Iskutak e chii wiiwiit machiahchaahkw piihch aweyuu e ihtaayich uhchi anite e paahkwaayich papaa ihtaau e naanituwaahtahk taanite chechii aasteyeskusiit. Ekaa maak meskahk,

⁴⁴ ekw e itisut, ‘Kaau nika naanituwaapamaau an naapeu kaa nakatak.’ An maak naapeu mwehch waaskaahiikan ishinaakusuu. Kiipaa kaau e ishi chiiwet an machiahchaahkw e naanituweyihtahk anit kaa uhchi wiiwiit waaskaahiikaniyuu. Iskutak maak kaa piihchet meskahk aniyuu waaskaahiikaniyuu ekaa ihtaanuyich kaye e chii wepahiikaanuyikupane kaye naashch e payehchinaakuniyich.

⁴⁵ Uyuu maak wiyaapahtahk e ishinaakuniyich ekw chestuhtet, niyaanituweyimaat niishwaashch machiahchaahkwa uste e iteyihtaakusiyich e iteyihtaakusit wiya, chechii wiichimikut anite aniyuu naapeu piihch e ihtaayich. Ekw maak an naapeu etituu chika iteyihtaakuhiikuu aniyuu niishwaashch machiahchaahkwa taan kaa iteyihtaakusit niishtam, mikw e chii peyakushiyich. Ekun maak che ispayitwaau anichii anuhchiish awenichii kaa machaatisiitwaau.”

Jesus ukaawiih ekw maak wiichishaanh

⁴⁶ Eshkw maak mekwaach Jesus chii ayimiheu aniyuu iinuu, kaa uhchi takushiniyich ukaawiih kaye wiichishaanh. Wiiwiitamihch anite chii niipuuyuuh e wii ayimihiikut.

⁴⁷ Ekw peyakw anit aweyuu kaa itikut, “Chikaawii ekw maak chiichishaanich wiiwiitamihch anite niipuuch e wii ayimihiiskwaau.”

⁴⁸ Ekw Jesus kaa itaat, “Awen maak nikaawii kaye awenichii niichishaanich.”

⁴⁹ Ekw kaa atuhwaat aniyuu uchischinuhamuwaakanh ekw kaa itwet, “Maauchii niichishaanich kaye eukuu nikaawii.

⁵⁰ Muyaam nikaawii kaye niichishaanich kaye niichishaaniskwemach nititeyimaauch anichii kaa ihtuutahkwaau Nuuhtaawii kihchikiishikuhch kaa ihtaayich utiteyihtamuwiniyuu.”