Mark 9 - Chishemanituu Utayimuwin: Kaa Uskaach Testament

¹ Ekw Jesus uyuu miin kaa ati itaat, “Chiwiihtamaatinaawaau, ihtaauch pasch utah mekwesiinuu awenichii ekaa che uhchi nipitwaau paatish waapahtamuwaatwaawenich Chishemanituu uchisheuchimaawiniyuu e pechi nuukuniyich suuhkaatisiiwinihch.”

Jesus kaa miiskutuunaakusit

² Kutwaashch chiishikaau maak paatimaa ekw Jesus kaa ituhtahaat Peter, James ekw maak John anite e ishpatinaayich wachiyuu mikw wiyawaau chechii ihtaatwaau. Ekut utah kaa kweschinaakusit Jesus uhchishkuu anit e ihtaayitwaauh.

³ Uchekwaanim maak mitun chii waasisiteyuuh, naashch e payehkashch waapaayikwaau. Namui ihtaau utah aschiihch awen chechii ishpish waapaayikwaau chekwaayuu e chishtaapautaat.

⁴ Anichii maak chischinuhamuwaakanich chii uhchi waapameuch Elijah ekw maak Moses e ayimihaayich Jesus.

⁵ Ekw Peter kaa itaat Jesus, “Chischinuhamaachesuu, nuwach miyeyihtaakun utah chechii ihtaawaauhchipane. Pachishtinaanh chechii ushihtaayaahch nishtu tipinuushimunh, paahpeyakw che ayaayekw, chiya, Moses ekw maak Elijah.”

⁶ Eukw uyuu kaa itwet Peter ekaa uhchi chischeyihtahk taan chechii itwet wesh naashch taapwe chii sechisuu. James ekw maak John naashch taapwe chii sechisuuch kaye wiyawaau.

⁷ Chek kaskawanishkwa kaa uhchi ukaashteskaakutwaau. Ekute kaa uhchi pehtawaatwaau aweyuu e itweyich, “Eukw uu niya tipiyeu Nikus kaa saachihak. Nituhtawaahkw.”

⁸ Chii aihtaapuuch tiiwehch anit waaskaa e ihtaatwaau e naanituweyimaatwaau kutak aweyuu e ihtaayikwen anit e ihtaatwaau, namui maak uhchi ihtaayuuh kutak aweyuu mikw Jesus chii ihtaayuuh.

⁹ Aniyuu e ati niihchichiwetwaau aniyuu wachiyuu Jesus chii itashumikuuch, “Ekaawii awen uhchi wiihtamuwaahkw uu kaa ispayihch paatish chii wanishkaate Iinuu Ukusisa nipuwinihch uhchi.”

¹⁰ Chii pishichiheuch maak taan kaa ishi chistahamaakutwaau mikw maak anit wiyawaau chii ayimitutamuch uyuu taan kaa ispayihch e itwetwaau, “Chekwaan uu kaa iinaanuuhch e wanishkaat awen nipuwinihch uhchi.”

¹¹ Ekw kaa itaatwaau Jesus, “Chekwaayuu wehchi itwetwaau anichii wiishuwewiniyuu kaa chiskutamaachetwaau yaaitei niishtam Elijah che takushiniyich.”

¹² Ekw kaa ishi nishkweushihiikutwaau, “Taapwe kiipaa Elijah niishtam kata takushin chechii ayeskuushtaat misiwe chekwaayuu. Chekwaan maak wehchi itashtech Chishemanituu umasinahiikanihch Iinuu Ukusisa mistahii che nanehkaateyimut kaye ekaa che uhchi aapateyimaakanuut.

¹³ Mikw maak, chiwiihtamaatinaawaau, shaash chii takushin Elijah. Mikw maak taan waa ihtuutaakut aweyuuh ekun kaa ihtuutaakut. Wesh ekun kaa itashteyich Chishemanituu umasinahiikaniihch che ihtuutawaawaakupanenich.”

Jesus kaa miinuwaachihaat naapesha machiahchaahkwa e chii piihchishkaakuyich

¹⁴ Iskutak maak miin netawaapamaatwaau aniyuuh kutak chischinuhamuwaakanh, chii waapameuch mihchetu aweyuuh e waaskaakaapuushtaakuyich. Aniyuuh maak wiishuwewiniyuu kaa chiskutamaacheyitwaauh eukunh aniyuuh naashch kaa mistayimihiikuyich.

¹⁵ Anichii maak iinuuch iskutak wiyaapamaatwaau Jesus, naashch taapwe chii kushkupayuuch, kaa chitinawaatwaau chechii waachiyemaatwaau.

¹⁶ Ekw Jesus kaa itaat aniyuuh uchischinuhamuwaakanh, “Chekwaan an naashch kaa mista ayimitutamekw.”

¹⁷ Chii uhchi ayimuu peyakw naapeu anit mekwesiin e mihchetinaanuyich e itwet, “Chischinuhamaachesuu, chichii petwaatin nikus. Namui chii ayimuu wesh machiahchaahkwa piichishkaakuu.

¹⁸ Iskutak miyaasihiikuch uyuu machiahchaahkwa, mitun wesh kata niihchiwepahukuu, kaye kata piishteutaahtam, eyuu maak wesh kata shashewaapiteyuu, kaye mitun kata chiituwaaskupayuu. Anichii maak chichischinuhamuwaakanich nichii kakwechimaauch chechii wiiwiitishihwaatwaau aniyuuh machiahchaahkwa namui maak uhchii ihtuuch.”

¹⁹ Jesus maak chii iteu aniyuuh anit kaa ihtaayitwaauh, “Chiyawaau iinuuch anuhchiish kaa pimaatisiyekw ekaa kaa ayaayekw taapwehtamuwin, taan che ishpish ihtaayaan utah e ihtaayekw yaakw chechii nisituhtamekw. Taan che ishpish ashuwaapamitakuch ekw chechii ayaayekw taapwehtamuwin. Peshuwaahkw an naapesh.”

²⁰ Ekw kaa peshuwaatwaau aniyuu naapesha anit Jesus e ihtaayich. Iskutak an machiahchaahkw wiyaapamaat Jesus tiiwehch chii ihtuutaweu aniyuu naapesha chechii uchipitikuyich, mitun anite aschiihch e chii ishi pahchishiniyich. Ekw kaa kwehkwetipayihut anit an naapesh e piishteutaahtahk.

²¹ Jesus kaa kakwechimaat aniyuuh uhtaawiimaau, “Shaash aa weskach uyuu kaa ishinaakusit.” “Piihiim kaa awaashiyuut shaash ekun kaa ispayit,” chii iteu an uhtaawiimaau.

²² Kaye chii iteu, “Shaash mihchetwaau chii wii nipahiikuu aniyuu machiahchaahkwa ishkutehch maak nipiihch e ishiwepinikut. Chistimaacheyiminaan maa, wiichihiinaan, chechii wii wiichihiiwaahche.”

²³ Chii iteu maak Jesus, “Chekwaan wehchi itweyin chechii wii wiichihiiwaahche. Wesh awen kaa taapwehtahk misiwe taan waa ihtit chika chii ihtuutam.”

²⁴ Tiiwehch kaa uhchi aashihkwet an uhtaawiimaau, “Nitaapwehten mikw maak namui naashch nitayaan taapwehtamuwin. Wiichihiih etituu chechii ayaayaan taapwehtamuwin.”

²⁵ Jesus maak chii waapameu aniyuu iinuuh kaa pechi maausikukaapuwiitwaauh e ati siihchiskaatuyitwaau ekw kaa chistahamuwaat aniyuu machiahchaahkwa e itaat, “Chiya ahchaahkw ekaa kaa pehtaman neshta ekaa kaa nihtaaweyin, maachiih wiiwiih anit uu naapesh e ihtaat uhchi. Ekaawii miin chika uhchi piihchishkuwaau.”

²⁶ Ekw an machiahchaahkw kaa uhchi aashihkwet, kaa ihtuutawaat aniyuu naapesha chechii uchipitikuyich ekw kaa nakataat. An maak naapesh mwehch e nipit ekun kaa ishinaakusit anit e pimishihk. Ekw misiwe awen kaa itwet, “Namui pimaatisiyuu.”

²⁷ Jesus chii utinamuweu utihchiyuu aniyuu naapesha ekw kaa wiichihaat e wanishkaayich. Kaa pishikuut an naapesh.

²⁸ Kaa ati chistuhtet Jesus ekw kaa piihchet waaskaahiikaniyuu. Uchischinuhamuwaakanh maak chii kakwechimikuu mikw wiyawaau e ihtaatwaau, “Chekwaan wehchi ekaa uhchii ihtuutawachihtwaau niyaan machiahchaahkuch chechii wiiwiitwaau anit aniyuu aweyuuh kaa piihchishkuwaatwaau.”

²⁹ Chii ishi nishkweushihiikuuch maak Jesus, “Mikw ayimihaate awen ekut mikw chechii wiiwiiyich uyuu kaa iteyihtaakusiyich machiahchaahkwa. Namui miin ihtakuniyuu taan chechii ihtit awen.”

Miin kaa aayimuutahk Jesus che nipit

³⁰ Jesus ekw maak uchischinuhamuwaakanh chii chistuhteuch anit uhchi ekw mikw kaa shaapuhtaweshkahkwaau Galilee aschiiyuu iskutak anite kaa ihtaatwaau. Jesus maak namui uhchi nitaweyimeu chechii chischeyimikut aweyuu taanite e ihtaat,

³¹ wesh mekwaach chii chiskutamuweu uchischinuhamuwaakanh. Chii iteu, “Naapeuh e ihtaayich kata ishi pachishtinaakanuu Iinuu Ukusisa chechii nipahiikut. Mikw maak nishtu chiishikaau ishpish ekw che wanishkaat nipuwinihch uhchi.”

³² Anichii chischinuhamuwaakanich namui uhchi nisituhtamuch taan e ishi wiihtamaachemakaniyich uyuu kaa itweyich, chii sechisuuch kaye chechii kakwechimaatwaau.

Awen maauch niikaan e iteyihtaakusit

³³ Chii utihtamuch Capernaum, iskutak maak piihtakamihch e ihtaatwaau aniyuu waaskaahiikaniyuu che ihtaatwaau ekw Jesus kaa kakwechimaat uchischinuhamuwaakanh, “Chekwaan an naashch kaa mista ayimitutamekw anite kaa pechi pimuhteyihkw.”

³⁴ Namui uhchi chistuuch, wesh aniyuu mekwaach kaa pimuhtetwaau chii machipayuuch awen anit e tashitwaau maauch che chisteyihtaakusit.

³⁵ Chii waweyapuu Jesus, kaa wiishaamaat aniyuu niishushaap uchischinuhamuwaakanh ekw kaa itaat, “An awen netaweyihtamukwe wiya maauch niikaan chechii iteyihtaakusit, maauch aasuk chipaa ishi pachishtinisuu kaye misiwe aweyuu chipaa miyu atushkuweu.”

³⁶ Ekw kaa utinaat awaasha kaa uhchishkuukaapuuhaat anit mekwesiinuu e ihtaatwaau. Kaa waauchikwenaat ekw kaa itaat uchischinuhamuwaakanh,

³⁷ “Awen e utinaat peyakw awaasha nitishinihkaasuwinihch uhchi, mwehch kaye niya e utinit ekun e ishinaakuniyich. An maak awen kaa utinit namayeu niya kaa utinit, aniyuuh kaa pechi itishahuyich eukw aniyuu wetinaat.”

An awen ekaa kaa nishkuushtaatahk chiwiichihiikunuu

³⁸ John maak chii iteu Jesus, “Chiskutamaachesuu, nichii waapamaanaan naapeu e wiiwiitishihwaat machiahchaahkwa chitishinihkaasuwiniyuu e aapachihtaat, ekw kaa chistahamuwachiht, wesin taapaa ute chiyaanuu e ihtaayihkw ishi wiichihiiweu.”

³⁹ Ekw kaa itikutwaau Jesus, “Ekaawii chistahamuwaahkw, taapaa wesin nika uhchi wii machaayimuumikw ekw awen michihpin chii ihtuutahke maamishkaach ihtuwiniyuu nitishinihkaasuwiniyuu e chii aapachihtaat.

⁴⁰ Wesh an awen ekaa kaa nishkuushtaatahkw chiwiichihiikunuu.

⁴¹ Chihchiwe maak chititinaawaau, an awen che minihiikuwekwe nipiiyuu aniyuu uhchi Christ e wiichewekw, cheshtinaash kata miyaakanuu utipahamaakusiiwin.”

E ihtakuhch nanaahkuu kakwechihiiwewin

⁴² Jesus chii ati iteu, “An awen che ihtuutawaakwe chechii machituutamiyich peyakw uyuuh awaasha kaa taapweyimiyich uste kata miywaayuu chechii maahkupitaakanuyich e mihchaapischisiyich asiniih ukuyaahch ekw maak anite chihchikamiihch chechii pakashtawepinaakanuut.

⁴³ Michihpin maak chitihchii ihtuutaakuyine chechii machituutaman, ekush chimisha an chitihchii.

⁴⁴ Uste kata miywaau chechii piihcheyin pimaatisiiwinihch ekaa ihtakuhch peyakw chitihchii ishpishaat taapishkun chitihchii chechii ayaayin machishkutehch maak che ituhteyin, anite ekaa wiiskaat che aashtuwech an ishkuteu.

⁴⁵ Maak chisit ihtuutaakuyine chechii machituutaman, chimisha an chisit. Uste kata miywaau chechii piihcheyin pimaatisiiwinihch e maaschipayin ishpishaat e ayaayin taapishkun chisit machishkutehch maak che ishiwepinikuyin, anit ekaa wiiskaat che aashtawech ishkuteu,

⁴⁶ anite umanichuushimuwaau ekaa che nipiyich kaye ishkuteu ekaa che aashtuwech.

⁴⁷ Maak chischiishikw ihtuutaakuyine chechii machituutaman, ekush kuikupit an chischiishikw. Uste kata miywaau chechii piihcheyin Chishemanituu uchisheuchimaawinihch mikw e napateyaapiyin ishpish wii taapishkun chechii kanuweyihtaman chischiishikw machishkutehch maak che ituhteyin.

⁴⁸ Wesh ekute ute machishkutehch namui wiiskaat kata uhchi nipiiyuu aniyuuh manichuusha che muukutwaau anichii anite kaa ihtaatwaau. Kaye maak namui wiiskaat kata uhchi aashtuweyuu aniyuu ishkuteyuu che ishkwaasukutwaau.”

⁴⁹ “Misiwe awen ishkuteyuu kata aapataniyuu e wii miyuunaakuhtaakanuyich upimaatisiiwin muyaam taan e itaapatahch siiuhtaakan, miichimihch e ashtaakanuuhch ekaa chechii wiinipayihch an miichim.

⁵⁰ Miywaapatan siiuhtaakan, mikw maak michihpin ekaa shaapispukuhche taan chechii ihtuutaman miin chechii miywaach. Ekw maak chiyawaau anit e ihtaayekw muyaam e chii siiuhiikuyekw chipaa iteyihtaakusinaawaau kaye chipaa chiyaameyihtaakun anit e ihtaayekw.”