Mark 8 - Chishemanituu Utayimuwin: Kaa Uskaach Testament

Jesus kaa ashamaat newaau chishemitaahtumitanuu aweyuuh

¹ Namui chineush anite ishi ekw miin mihchetu awenichii kaa pechi nishtawiitwaau. Iskutak maak ekaa e ihtakuniyich chekwaayuu che miichitwaau Jesus chii wiishaameu uchischinuhamuwaakanh ekw kaa itaat,

² “Nichistimaacheyimaauch uchii iinuuch. Shaash nishtu chiishikaauh kaa ishpish ihtaatwaau utah e ihtaauch namui maak shaash ihtakuniyuu chekwaayuu che miichitwaau.

³ Chiiwetishihuukwaawenich ekaa mechim ashamakwaau kata ishinaakuniyuu chechii aakweyihtahkwaau mekwaach e pimuhtetwaau wesh pasch uchii iinuuch mista waahiyuu chii uhtuhteuch.”

⁴ Ekw kaa kakwechimikut uchischinuhamuwaakanh, “Taanite maak chechii uhtinahk awen miichimiyuu utah uu e pakwaatiskamikaach misiwe uchii iinuuch chechii ashamaakanuutwaau.”

⁵ Jesus maak chii iteu, “Taan tahtu aaihkunaauch e ayaawekuch.” “Niishwaashch itashuuch,” chii iteuch.

⁶ Ekw Jesus kaa itashuwaataat aniyuuh iinuuh chechii waweyipihiisuyich anit mushtaskamach. Kaa utinaat aniyuu niishwaashch aaihkunaauh, kaa nanaaskumaat Chishemanituuh, ekw kaa pahkwenaat aniyuu aaihkunaau, kaa maamiyaat uchischinuhamuwaakanh chechii maatinaweyich. Ekun maak kaa ihtitwaau anichii chischinuhamuwaakanich.

⁷ Chii ayaaweuch eyuu namesa e ayaapishiishiyich, namui uhchi mihchetiyuuh. Jesus chii nanaaskumuu e ayaawaatwaau uyuuh namesa ekw kaa itashuwaataat uchischinuhamuwaakanh chechii maatinaweyich kaye uyuuh.

⁸ Misiwe kaa tashitwaau chii miichisuuch kaye chii tepimiichisuuch. Ekw anichii chischinuhamuwaakanich kaa maamuushtinahkwaau aniyuu iskushtawaaniyuu. Niishwaashch maak utipiiwath chii saakashchinihtaauch.

⁹ Wiyesh maak newaau chishemitaahtumitanuu chii itashinaanuuyuu anit.

¹⁰ Ekw Jesus kaa itaat aniyuuh iinuuh misiwe chechii chiiweyich. Ekw kaa ati wiichipuusiimaat uchischinuhamuwaakanh nete Dalmanuthaahch kaa isichimetwaau.

Phariseech kaa kakwechihcheyimutwaau chechii waapahtiyaakanuutwaau maamishkaach ihtuwiniyuu

¹¹ Chii ihtaauch pasch Phariseech e pechi nituwaapamaatwaau Jesus e pechi machihtaakusitwaau. Chii nanaaskuushiheuch e wii naanituu kakwechihaatwaau, ekw kaa itaatwaau chechii waapahtiikutwaau maamishkaach waapahtiiwewiniyuu kihchikiishikuhch e uhchiimakaniyich.

¹² Jesus maak chii yahkataamuu utahchaahkuhch ekw kaa itwet, “Chekwaan wehchi nitaweyihtahkwaau iinuuch anuhchiish kaa chiishikaayich chechii waapahtiyaakanuutwaau maamishkaach waapahtiiwewiniyuu. Kuiskw chiwiihtamaatinaawaau, namui chika uhchi waapahtiikunaawaau maamishkaach waapahtiiwewin chiyawaau iinuuch anuhchiish kaa pimaatisiyekw.”

¹³ Chii nakateu aniyuu Phariseeh ekw kaa puusit miin utihch ekw nete akaamihch aniyuu saakahiikaniyuu kaa isichimet.

Phariseech ekw maak chisheuchimaau Herod uhpisikanimuwaau

¹⁴ Anichii chischinuhamuwaakanich mikw peyakw aaihkunaau chii pechi niimaawaakupanenich e chii wanichischisuwaakupanenich ayuwaak chechii ayaawaatwaau.

¹⁵ Jesus chii ishi yaakwaamimikuuch, “Yaakwaakw, ayaakwaamiishtamuwaahkw uhpisikanimuwaau Phariseech kaye maak Herod uhpisikanim.”

¹⁶ Chii ayimitutamuch aniyuu kaa itikutwaau Jesus e itwetwaau, “Ekaa uhchi peshiimuhkw aaihkunaau eukw wehchi itwet uyuu.”

¹⁷ Jesus maak chii chischeyimeu taan e itweyich ekw kaa kakwechimaat, “Chekwaan wehchi aayimuutamekw an ekaa ayaawekw aaihkunaau. Namui aa eshkw chinisituhtenaawaau. Chimaskuutehenaawaau aa kaye chiyawaau.

¹⁸ Chitayaanaawaau mischiishikw, namui aa maak chiwaapahtenaawaau. Kaye mihtuukaih chitayaanaawaau, namui aa maak chipehtenaawaau. Namui aa chichischisinaawaau

¹⁹ kaa pahkwenakwaau niyaayin aaihkunaauch chechii miichisutwaau anichii iinuuch niyaayinwaau chishemitaahtumitanuu kaa tashitwaau. Taan maak kaa tahtihkwaau utiipiiwath kaa saakashchinihtaayekw iskushtawaan kaa maamuushtinamekw.” “Niishushaap,” chii iteuch.

²⁰ Ekw Jesus kaa itwet, “Iskutak maak kaa papahkwenakwaau anichii niishwaashch aaihkunaauch chechii miichisutwaau anichii newaau chishemitaahtumitanuu iinuuch taan kaa ishpishaach maak iskushtawaan anit.” “Niishwaashch utipiiwath,” chii itweuch.

²¹ Jesus maak chii iteu, “Taanite wehchi ekaa chii nisituhtamekw.”

Jesus kaa miinuwaachihaat naapeuh ekaa waapahtamiyich Bethsaidahch kaa uhchiyich

²² Iskutak wetihtahkwaau Bethsaida chii ihtaauch awenichii e peshuwaatwaau naapeu ekaa waapahtamiyich. Naashch chii nitaweyimeuch Jesus chechii saaminaayich aniyuuh naapeu.

²³ Ekw Jesus kaa utinamuwaat utihchiyuu aniyuuh naapeuh ekw kaa wiiwiihtahaat anit aniyuu ihtaawiniyuu. Iskutak maak kaa sihkwaatamuwaat uschiishikuyuuh chii taahtineu ekw kaa itaat, “Chiwaapahten aa chekwaan.”

²⁴ Chii tastasaapuu an naapeu e itwet, “Ehe, niwaapamaauch awenich, mikw maak mwehch mistikuch e papaamuhtetwaau ekun e ishinuukwaau.”

²⁵ Jesus miin kaa taahtinamuwaat uschiishikuyuuh. Eukw ekw kaa aapahiipayiniyikwaauh mitun e miinawaachihtaakanuyikwaau, misiwe chekwaayuu chii payehkasinam.

²⁶ Ekw Jesus kaa chiiwetishihwaat uyuu e itaat, “Ekaawii ituhte anite ihtaawinihch.”

Peter kaa wiihtahk aweyuu e aawiyich Jesus

²⁷ Ekw Jesus neshta aniyuuh uchischinuhamuwaakanh kaa ituhtetwaau anite aniyuu ihtaawinh peshuch Caesarea Philippi kaa ihtakuniyikwaauh. E ati pimuhtetwaau chii kakwechimeu, “Taan e ishi ayaaweyimitwaau iinuuch.”

²⁸ Chii iteuch maak, “Pasch awenich itweuch John siikahaahtaacheu e aawiyan, ekw kutakach itweuch Elijah e aawiyan, ekw miin kutakach peyakw uchischiwehiichesuu chititeyimikuch.”

²⁹ Ekw Jesus kaa itaat, “Chiyawaau maak wii, awen niya e iteyimiyekw.” Peter chii iteu, “Eukw chiya Christ.”

³⁰ Ekw Jesus kaa itashumaat aniyuuh uchischinuhamuwaakanh ekaa chechii wiihtamuwaayich kutak aweyuu uyuu.

Jesus kaa aayimuutahk che ishi wiisacheyihtahk kaye che nipit

³¹ Ekw Jesus kaa chihchi chischinuhamuwaat uchischinuhamuwaakanh e itaat, “Nituweyihtaakuniyuu Iinuu Ukusisa chechii mista wiisacheyihtamihaakanuyich kaye namui chika uhchi aapateyimikuu aniyuu Jewa iinuuh kaa niikaanishkuwaayich kaye aniyuuh kaa niikaanapiyich ayimiheuchimaauh kaye aniyuuh wiishuwewiniyuu kaa chischinuhamaacheyitwaauh. Kata nipahaakanuu, mikw maak iskutak nishtu chiishikaau utihchipayihche kata wanishkaau nipuwinihch uhchi.”

³² Uyuu maak kaa ishi ayimihaat naashch chii piyekaschihtaakuhtaau chechii nisituhtamiyich. Ekw Peter pahkaan kaa ituhtahaat aniyuu Jesus, kaa chistahamuwaat aniyuu kaa itweyich e itaat, “Ekaawii itweh an kaa itweyin.”

³³ Jesus maak chii kweschikaapuu kaa utaashtamikaapuushtawaat uchischinuhamuwaakanh ekw kaa aanuweyimaat Peter e itaat, “Machimanituu, maachiih iiches nete. An taan e iteyihtamihiikuyin chekwaayuuh taapaa Chishemanituu e ihtaat uhchipayuu naapeu e ihtaat uhchipayuu.”

³⁴ Ekw Jesus kaa wiishaamaat peshuch chechii pechi naachikaapuyich aniyuu anit kaa maausikuyich aweyuuh kaye aniyuuh uchischinuhamuwaakanh ekw kaa itaat, “Awen waa nuushuushkuukwe ekush chipaa pachishtinam aniyuu wiya taan waa ishi naniheyihtamihiisut, chipaa utineu utaashiteyaahtikum ekw maak nipaa pechi nuushuushkaakw.

³⁵ Wesh an awen kaa wii kanuweyihtamaasut upimaatisiiwin kata wanihtaau. An maak awen che pachishtinamukwe misiwe chekwaayuu taan kaa wii ihtuutahk mechim kaye upimaatisiiwin e wii pechi nuushuushkuut kaye maak miywaachimuwiniyuu uhchi eukun uu che miyaakanuut pimaatisiiwiniyuu.

³⁶ Taan maak chechii ishi wiichihiikut awen aat misiwe chekwaayuu chii wiihkuchihtamaasute utah aschiihch taan e ishi nitaweyihtahk che wanihtaakwe maak upimaatisiiwin.

³⁷ Namui mitun ihtakuniyuu chekwaayuu chechii pachishtinahk kaau chechii miyaakanuut upimaatisiiwin.

³⁸ An awen che pimaamishiishtuut neshta che pimaamishiishtamukwe aniyuuh nichiskutamaachewinh anuhchiish uyuu mekwaach e ishpish ekaa kuiskw aihtitwaau awenichii kaye e ishpish machaatisiitwaau, kaye wiya Iinuu Ukusisa kata pimaamishiishtaakuu iskutak takushiniyichen Chishemanituu uchishteyihtaakusiiwiniihch payehchi enchilh e pechi wiicheukut.”