Mark 2 - Chishemanituu Utayimuwin: Kaa Uskaach Testament

Jesus kaa miinuwaachihaat naapeu ekaa uhchii aahchiyich

¹ Namui mihchetu chiishikaau uhchi miyaaupayuuh ekw Jesus miin kaa piihchet aniyuu ihtaawiniyuu Capernaum kaa ishinihkaateyich. Iskutak maak memuushihaakanuut miin e chii pechi chiiwet ekw kaa mishihteyaachimunaanuyich miin e ihtaat.

² Nuwach maak mihchetu aweyuu chii pechi takushiniyuu, chek namui uhchi tepiskaatuyuuh aniyuu waaskaahiikaniyuu, mechim anite wiiwiitamihch ishkwaahtemihch chechii tawaayich. Chii kacheschimeu maak Jesus aniyuuh kaa takushiniitwaau, Chishemanituuh utayimuwiniyuu e aayimuutamuwaat.

³ Uyuu maak mekwaach, neu naapeuch chii uhchi peshuweuch wiitaapewaau ekaa nisitusiyich utashpishimuwinihch e pimaashkushiniyich.

⁴ Aniyuu maak kaa ishpish chii mihchetinaanuyich namui peshuch uhchii naateuch Jesus. Ekw kaa pakunepitahkwaau anite tahkuhch aniyuu waaskaahiikaniyuu nihaau tipiskuuch anit kaa niipuyich Jesus. Ekute kaa uhchi aashaapihchenaatwaau aniyuu naapeu ashpishimuwinihch e pimishiniyich.

⁵ Jesus maak chii waapahtamuweu uyuuh naapeuh e ishpish taapwehtamiitwaauh ekw kaa itaat aniyuu naapeu ekaa kaa nisitusiyich, “Nikus, chiwepeyihtamaakuun chimachihtwaawinh.”

⁶ Chii ihtaauch anit anichii wiishuwewiniyuu kaa chiskutamaachetwaau, e ishi maamituneyihtahkwaau,

⁷ “Chekwaayuu uyuu wehchi ishi ayimit uu naapeu. Paashtaamuu uyuu kaa itwet. Namui wii naapeu kata chii wepeyihtamaacheu machihtwaawinh, mikw Chishemanituu kata chii wepeyihtamaacheu.”

⁸ Jesus maak tiiwehch chii muushihtaau utahchaahkuhch uyuu e ishi maamituneyihtamiyich ekw kaa itaat, “Chekwaan an wehchi ishi maamituneyihtamekw.

⁹ Taan yaakw wiyehtihch chechii itaakanuut uu naapeu ekaa kaa nisitushiit, ‘Chiwepeyihtamaakuun chimachihtwaawinh,’ maak itaakanuut ‘Wanishkaa, utinh chitashpishimuwin che ati pimuhteyin.’

¹⁰ Chika waapahtiitinaawaau Iinuu Ukusisa taapwe wiya e ayaat tipeyihchichewiniyuu utah aschiihch chechii wepeyihtamaachet machihtwaawinh.” Ekw kaa itaat aniyuu naapeu ekaa kaa nisitusiyich,

¹¹ “Chititin, pisikuuh, utinh chitashpishimuwin, che chiiweyin.”

¹² Tiiwehch maak chii uhchi pishikuu an naapeu mekwesiin anit e mihchetinaanuyich, kaa ati utinahk aniyeyuu utashpishimuwin ekw kaa maachiit. Misiwe maak anichii anit kaa ihtaatwaau chii miskaateyihtamihiikuuch uyuu kaa ispayiyich kaye chii maamihchimeuch Chishemanituu e itwetwaau, namui wiiskaat nuuhchi waapahtenaan uu e ispayihch.

Jesus kaa wiishaamaat Levi chechii nuushuushkaakut

¹³ Jesus maak kaau chii naashipeu aniyuu Galilee saakahiikaniyuu. Chii mihchetiyuu aweyuu e pechi nituwaapamikut ekw kaa chiskutamuwaat.

¹⁴ Aniyuu maak e ati pimuhtet chii utihteu naapeu chisheuchimaau shuuliyaayuu kaa maamuushtinamiyich e itaapatisiyich. Levi chii ishinihkaasuyuuh. Alphaeus chii ishinihkaasuyuuh uhtaawiyuuh. Mekwaach anite umasinahiicheukamikuhch chii apuu uu Levi. Ekw kaa itaat Jesus, “Pechi papaawiicheuh.” Chii pishikuu maak Levi kaa ati wiichewaat Jesus.

¹⁵ Paatimaa maak Jesus ekw maak mihchetu uchischinuhamuwaakanh e chii pechi wiicheukut chii miichisuuch anite Levi wiichiihch. Ekut kaa ihtaayich kaye mihchet aniyuuh chisheuchimaau shuuliyaayuu kaa maamuushtinamiitwaauh kaa itaapatisiyich kaye ekut kaa ihtaayich aniyuuh kutak aweyuuh kaa machaatisiyich.

¹⁶ Ekw anichii wiishuwewiniyuu kaa chiskutamaachetwaau aniyuuh Phariseeh kaa aapachihiikutwaau chii waapameuch Jesus e wiichimiichisuumaayich aniyuuh Chisheuchimaau shuuliyaamiyuu kaa maamuushtinamiitwaauh kaa itaapatisiyich kaye kutak aweyuuh kaa machaatisiyich. Chii kakwechimeuch uchischinuhamuwaakaniyuu e itaatwaau, “Chekwaan wehchi wiichimiichisuumaat uyuuh kaa Iteyihtaakusiitwaauh.”

¹⁷ Jesus maak chii pehtaweu uyuu e itweyich ekw kaa itaat, “Namui nituweyimeuch nituhkuiin anichii awenichii ekaa kaa aahkusitwaau, mikw anichii kaa aahkusitwaau eukunich netuweyimaatwaau nituhkuiin. Namui anichii kaa kuiskutaatisiitwaau wehchi takushiniyaan. Nichii takushin chechii nituumakwaau umachihtwaauch chechii kweskaatisiitwaau.”

E aayimuutech ekaa miichisut awen mikw chechii ayimihaat

¹⁸ Peyakwaau mekwaach John siikahaahtaacheu uchischinuhamuwaakanh ekw maak anichii Phariseech uchischinuhamuwaakanawaauh ekaa miichisutwaau, chii ihtaayuuh aweyuu e ishi kakwechimikut Jesus, “Chekwaan wehchi ekaa miichisuyich John uchischinuhamuwaakan kaye anichii ayimihewin wiishuwewiniyuu kaa chiskutamaachetwaau uchischinuhamuwaakanawaauh. Chiya maak chichischinuhamuwaakanich namui ihtuuch wiyawaau ekaa miichisutwaau.”

¹⁹ Jesus chii ishi nishkweushiheu e itaat, “Mwehch anite mekwaach e niipuunaanuuhch chika chii ihtuuch aa ekaa chechii miichisutwaau anichii kaa wiishaamaakanuutwaau e makushaanuyich. Namui naanituu. Michihpin e ihtaayich anit e ihtaatwaau aniyuu uschinaapewaan namui mechim kata uhchi iteyihtamuch ekaa chechii miichisutwaau.

²⁰ Paatimaa kata utihchipayuu an e chiishikaach che pechi utinaakanuut an uschinaapewaan ekut maak yaakw an e chiishikaach ekaa che uhchi miichisutwaau.

²¹ “Namui awen aapachihtaau machunishiyuu ekaa uhchi uchipayiniyich e wii miishahahk akuhpischiishiyuu. Wesh uyuu miishihiikaachete uchipayiyiche maak etituu kata piikupayuu an akuhp taanita anit kaa piikupayihch.

²² Kaye maak namui awen piihtaapuutaau e ushkaakamiyich shuuminaapuuyuu anite e weskachuuniyikwaauh usikai puutaahch. Wesh uyuu ihtite mitun kata paahkaapayiniyuuh aniyuu usikaipuutaih, ekw maak misiwe che nanaayuuhch an shuuminaapuu kaye aniyuuh usikaipuutaih. Namui maak miin kata chii aapatanh. Namui awen uyuu ihtuu wesh e uskaakamihch shuuminaapuu anite e ushkaakwaau usikaipuutaahch piihtaapuutaakanuu.”

Jesus kaa aayimuutahk e ayimiheuchiishikaayich

²³ Peyakwaau e Jewa ayimiheuchiishikaayich Jesus chii pimuhteu anite pahkweshikaniminaahtikw e nihtaauchihtaakanuyikwaauh. Uchischinuhamuwaakanh chii wiicheukuu. Aniyuu maak e ati pimuhteyitwaau chii nanaatwaanamiyuu anit e wanishkwaaskuniyikwaau uyuu pahkweshikaniminaahtikw.

²⁴ Ekw Phariseech kaa itaatwaau Jesus, “Chekwaan wehchi ihtuutamekw an chekwaan atuch chipaa uhchi ihtuutaakanuu e ayimiheuchiishikaach.”

²⁵ Jesus chii nishkweushiheu e itaat, “Chichii ayimihtaanaawaache masinahiikanihch anit tepaachimaakanuut aniyaa chisheuchimaau David, kaye maak misiwe aniyuuh kaa wiicheukut taan kaa ihtitwaau iskutak kaa wii miichisutwaau.

²⁶ Chii piihcheuch Chishemanituu uwaaskaahiikanimiihch ekw David kaa muwaat aniyuu kaa payehchisiyich aaihkunaau, ekw kaa ashamaat aniyuuh uwiichewaakanh. Mekwaach Abiathar chii chisheayimiheuchimaawiiche uyuu. Mikw maak ayimiheuchimaauch iteyihtaakusuuch chechii muwaawaatwaau uyuu aaihkunaau, wesh ekun e itashtech ayimihewin wiishuweusinahiikanihch.”

²⁷ Ekw uyuu maahchishtai kaa ati itwet Jesus, “Chishemanituu chii ushihtaau e ayimiheuchiishikaayich che wiichihiikuyich naapeu, namui uhchi ushiheu naapeuh mikw ayimiheuchiishikaau wiishuwewinh chechii nanaakatuweyihtamiyich.

²⁸ Iinuu Ukusisa maak, mechim e ayimiheuchiishikaayich tipeyihtam.”