Mark 16 - Chishemanituu Utayimuwin: Kaa Uskaach Testament

Jesus kaa wanishkaanaakanuut nipuwinihch uhchi

¹ Iskutak meyaaupayiniyich Jewa iinuuch utayimiheuchiishikaamuwaau anichii iskweuch Mary Magdalene, kaye Mary James ukaawii ekw maak Salome chii nituu utinamuch nanaahkuu e ishinaakuniyikwaauh e wiihchimaakusiyikwaau tuuminikanh chechii tuuminamuwaatwaau Jesus wiiyuuyuu.

² Wiipach maak chiyechishepaayaayich niishtam aniyuu e chiishikaayich aniyuu miin che ati tuushteyich, iskutak piyechi nuukusiyich piisim, anite kaa waatakwaapiskahiikanuyich chii ituhteuch.

³ Aniyuu maak e ati pimuhtetwaau chii itituuch, “Awen che iiche tihtipinamaatahkw aniyuu asinii kaa chipishimaakanuyich anit e pakuneyaayich.”

⁴ Wesh naashch chii misitistiyuu aniyuu asinii. E iitaapitwaau maak anite chekwaayuu shaash kaa iiche tihtipinaakanuyikupanen aniyuu asinii.

⁵ Ekw kaa piihchetwaau aniyuu kaa waatakwaapiskahiikanuyich. Anite maak nihiiwinihch itehche chii waapameuch uschiniichuu e niipuyich e waapaaspisuyich. Nuwach maak chii kushkupayuuch wiyaapamaatwaau.

⁶ Chii itikuuch maak, “Ekaawii sechisikw. Jesus Nazareth kaa uhchiit chipechi naanituweyimaawaau, an kaa chiistaaskuhwaakanuut aashiteyaahtikuhch. Chii wanishkaau wesin, namui ihtaau utah. Kanawaapahtamuwaahkw maa anit kaa pimishimaakanuut.

⁷ Maachiikw maak nituu wiihtamuumaahkw uchischinuhamuwaakanh kaye Peter wiihtamuwaahkw, e niikaanihteyich Jesus Galileehch e ituhteyich. Ekute anite che waapamekw, mwehch aniyuu taan kaa ititaakw.”

⁸ Ekw kaa wiiwiipahiitutwaau anichii iskweuch aniyuu kaa waatakwaapiskahiikanuyich e nanamipayitwaau kaye e sechisitwaau. Namui aweyuu uhchi ayimiheuch kaa ishpish chii kushtaachitwaau.

Jesus kaa nuukushiishtawaat Mary Magdalene

⁹ Iskutak Jesus kaa wanishkaat nipuwinihch uhchi wiipach e chechishepaayaayich aniyuu niishtam e chiishikaayich miin che pimitaushteyich Mary Magdalene niishtam chii nuukushiishtaweu. Eukw uyuu iskweu kaa wiiwiitishihuumaat niishwaashch machiahchaahkwa e chii piihchishkaakuyich.

¹⁰ Mary Magdalene maak chii nituu wiihtamuweu aniyuu aweyuu kaa chii waawiichewaayich Jesus. Chii maamaateumuyuu kaye chii kushikuteheyuu kaa utihtaat.

¹¹ Iskutak maak piyehtawaatwaau uyuu iskweu e itweyich e pimaatisiyich Jesus kaye e chii waapamaayich namui uhchi wii taapwehtaweuch.

Jesus kaa nuukushiishtawaat niishu uchischinuhamuwaakanh

¹² Paatimaa maak Jesus chii nuukushiishtaweu niishu uchischinuhamuwaakanh mekwaach e pimuhteyich wiiwiitamihch aniyuu Jerusalemiyuu. Aahchiiuh chii ishinaakusuu aniyuu kaa nuukushiishtawaat.

¹³ Iskutak kaa chiiwetwaau ekw kaa wiihtamuwaatwaau aniyuu kutak chischinuhamuwaakanh mikw maak namui uhchi wii taapwehtaakuuch.

Jesus kaa nuukushiishtawaat aniyuuh peyakushaap uchischinuhamuwaakanh

¹⁴ Paatimaa maak, Jesus chii nuukushiishtaweu aniyuu peyakushaap mekwaach e maamuumiichisuyich miichisuunaahtikuhch. Chii aanuweyimeu maak aniyuu e aanuwehtamiyich kaye e miskauteheyich, ekaa uhchi wii taapwehtawaayich aniyuu chischinuhamuwaakanh aniyuuh kaa waapamikuyich paatimaa kaa wanishkaanaakanuut.

¹⁵ Ekw kaa itaat, “Maachiikw misiwe e ispichiskamikaach uu aschii che kacheskweyekw e waawiihtamekw uu miywaachimuwin misiwe awen chechii pehtahk.

¹⁶ An awen che taapwehtamukwe neshta siikahaahtuwaakanuute kata pimaachihaakanuu, ekw an awen ekaa che taapwehtamukwe kata nishuuwanaachimaakanuu.

¹⁷ Kaa taapwehtahkwaauh kata miyaakanuuch suuhkaatisiiwiniyuu chechii ihtuutahkwaau nanaahkuu maamishkaach waapahtiiwewinh. Machiahchaahkwa kata wiiwiitishihweuch nitishinihkaasuwiniyuu e aapachihtaatwaau kaye nanaahkuu ayimuwinh kata ishi ayimuuch.

¹⁸ Utinaatwaawenich chinepukw, maak minihkwetwaawenich chekwaayuu e pihchipuweyich namui kata uhchi wiyesh ihtuutaakuuch. Kaa aahkusiitwaau aweyuu kata saamineuch ekw maak che miinuwaatisiyich.”

Jesus kaa uhpiskaat

¹⁹ Paatimaa maak Jesus kaa chiishi ayimihaat uchischinuhamuwaakanh kihchikiishikuhch chii ishi uhpiskaau. Anite Chishemanituu unihiiwiniihch itehche ekute kaa ishi waweyapit.

²⁰ Ekw maak chischinuhamuwaakanich misiwe chii aituhteuch e kacheskwetwaau. Utipeyihchikeuh chii wiichihiikuuch kaye chii waapahtiiweyuu e taapwemakaniyich taan e ishi kacheskwetwaau aniyuu uhchi nanaahkuu maamishkaach waapahtiiwewinh e chii ihtuutahkwaau. Amen.