Mark 15 - Chishemanituu Utayimuwin: Kaa Uskaach Testament

Jesus kaa uhchishkuukaapuushtawaat Pilate

¹ Wiipach wiyaapaniyich anichii kaa niikaanapitwaau ayimiheuchimaauch chii nishtuuneuch aniyuuh kaa niikaanishkawaayich iinuuh ekw maak aniyuuh wiishuwewiniyuu kaa chiskutamaacheyitwaauh ekw maak misiwe aniyuu kaa maamuupishtamiyich e wiyeyihtaakanuyich chekwaayuu ekw kaa wiyeyihtahkwaau taan che ihtitwaau. Chii maahkupiteuch Jesus ekw anite Pilate e ihtaayich kaa ituhtahaatwaau.

² Ekw Pilate kaa kakwechimaat Jesus, “Ewaa chiya Jewa iinuuch uchisheuchimaamuwaau.” Jesus chii iteu, “Ekun e itweyin.”

³ Mistahii chekwaayuu chii ihtakuniyuu e chii ishi ataameyimaatwaau Jesus anichii kaa niikaanapitwaau ayimiheuchimaauch.

⁴ Ekw Pilate miin kaa kakwechimaat Jesus e itaat, “Namui aa chika uhchi nishkweushihaauch. Nituhtuuch maa e ishi nanaahkuu chekwaayuu ataameyimiskwaau.”

⁵ Yaapach namui uhchi wii chistuu Jesus. Pilate maak nuwach chii miskaateyimeu ekaa chistuyich.

Jesus che nipahaakanuut

⁶ Ekun kaa chii ihtinaanuuhch maan tahtwaau wetihchipayihch anit kaa chii miichinaanuuhch miyaaskaacheu makushaan, Pilate chii pachishtineu peyakw aweyuu chipahutuukamikuhch e ihtaayich mikw taan aniyuuh netaweyimaayich aniyuuh iinuuh chechii pachishtinaakanuyich.

⁷ Anit maak an mekwaach, chipahutuukamikuhch chii ihtaau naapeu Barabbas e ishinihkaasut. Ekute kaa ihtaayich kaye aniyuu aweyuuh kaa wiichihiikut e machipayihkahtuwaat chisheuchimaau anit Jerusalemihch. Chii nipahechenich naapeu mekwaach uyuu kaa ihtitwaau.

⁸ Ekw anichii iinuuch kaa pechi mihchetitwaau chii naateuch Pilate ekw kaa itaatwaau chechii ihtuutamaakutwaau aniyuu kaa chii ihtuutamaakutwaau eshikum pipun iskutak mekushaanuyich miyaaskaacheu makushaaniyuu.

⁹ Ekw kaa itikutwaau Pilate, “Chinitaweyiminaawaau aa chechii pachishtinamaatakuch Jewa iinuuch uchisheuchimaamuwaau.”

¹⁰ Wesh chii chischeyimeu aniyuuh kaa niikaanapiitwaauh ayimiheuchimaauh e uhteyimaayich Jesus wehchi pechi itishahwaayich anite wiya e ihtaat.

¹¹ Ekw uchii kaa niikaanapitwaau ayimiheuchimaauch chii siihchimeuch aniyuuh iinuuh chechii itaayich Pilate, Barabbas teyakuch chechii pachishtinamuwaakanuutwaau.

¹² Ekw Pilate miin kaa kakwechimaat aniyuuh iinuuh, “Taan maak netaweyimiyekw chechii ihtuutuuk an Jewa iinuuch uchisheuchimaamuwaauh kaa ishinihkaatekw.”

¹³ “Chiistaaskuhwaahkw aashiteyaahtikuhch,” chii ishi nishkweushihiikuu.

¹⁴ Ekw Pilate kaa itaat, “Chekwaayuu maak. Taan maak kaa ishi machituutahk.” Ekw aahch kaa aashihkwetwaau anichii iinuuch, “Chiistaaskuhwaahkw aashiteyaahtikuhch,” e ishi tepwetwaau.

¹⁵ Pilate maak chii wii nanihiiweheu aniyuuh iinuuh ekw kaa pachishtinaat aniyuu Barabbas. Iskutak maak kaa chiishi pishishtehwaakanuyich Jesus ekw kaa pachishtinaat aashiteyaahtikuhch chechii nituu chiistaaskuhwaakanuyich.

Shimaakanishach kaa maayeyimaatwaau Jesus

¹⁶ Anichii maak shimaakanishach anite e ihtakuniyich aniyuu chisheuchimaaukamikuyuu ekute kaa ituhtahaatwaau Jesus. Kaa wiishaamaatwaau misiwe aniyuuh kutak shimaakanishah.

¹⁷ Ekw kaa pushchishkamutiyaatwaau akuhpiyuu e mihkwekaniyich kaye chii ushihtaauch chisheuchimaau astutiniyuu e kaasutewaayikwaau niipisiyaahtikw e aapachihtaatwaau. Eukw uyuu kaa pushchashtutinahaatwaau.

¹⁸ Ekw aayaahch kaa ihtuutawaatwaau muyaam e chisteyimaatwaau e ihtuutawaatwaau. Chii maayeyimeuch mwehch e maamihchimaatwaau e itaatwaau, “Eukw chiya Jewa iinuuch uchisheuchimaamuwaauh.”

¹⁹ Ekw kaa utaamistikwaanehwaatwaau mistikw e aapachihtaatwaau. Chii shihkwaateuch kaye chii uchihchiihkunapayihuuch uhchishkuu e ihtaayich muyaam e chisteyimaatwaau e ihtitwaau.

²⁰ Iskutak maak kaa chiishi maayeyimaatwaau ekw kaa manipitamuwaatwaau aniyuu kaa mihkwekaniyich akuhpiyuu kaa chichishkamiyich ekw wiya uchekwaanimiyuuh kaa pushchishkamutiyaatwaau. Ekw kaa wiiwiihtahaatwaau che nituu chistaaskuhwaatwaau aashiteyaahtikuhch.

Jesus kaa chiistaaskuhwaakanuut aashiteyaahtikuhch

²¹ Simon e ishinihkaasut naapeu Cyrenehch e uhchiit nihaau anit chii pechi pimuhteu, wiiwiitamihch anite aniyuu ihtaawiniyuu e uhtuhtet. Eukw uyuu kaa uhtaawiitwaau Alexander ekw maak Rufus. Eukw maak uyuu naapeu anichii shimaakanishach kaa aayihkamihaatwaau chechii pimuhtahaayich Jesus utaashiteyaahtikumiyuu.

²² Golgotha kaa ishinihkaateyich ekute kaa ituhtahaatwaau Jesus. Uu Golgotha kaa iinaanuuhch, anit e ihtakuhch chiipaistikwaan ishi itweshtamuwaataakanuu.

²³ Chii wii miniheuch maak shuuminaapuuyuu myrrh e chii chiikuunikanuyich anit. Mikw maak namui uhchi wii minihkweu Jesus uyuu.

²⁴ Ekw kaa chiistaaskuhwaatwaau aashiteyaahtikuhch. Aniyuuh maak uchekwaanimiyuuh chii mamaatinamaatuuch. Chii chaahkahuutuuch, anit kaa uhchi wiyeyihtahkwaau aweyuu che ayaayich aniyuuh uchekwaanimiyuuh.

²⁵ Peyakushteu chii ispayuu e chechishepaayaayich kaa chiistaaskuhwaatwaau Jesus aashiteyaahtikuhch.

²⁶ Chii masinaateyuu maak anit ishpimiishiish utaashiteyaahtikumihch taan kaa ishi ataameyimaatwaau. Chii itashteyuu, “Jewa iinuuch uchisheuchimaamuwaau.”

²⁷ Kaye maak niishu chimutiska chii chiistaaskuhweuch, peyakw anite Jesus unihiiwiniihch itehche chii akuchinuu ekw an kutak anite unimihchiiwiniihch itehche.

²⁸ Chii tipipayuu maak taan kaa ishi niikaan masinahiikanuuhch anite weskach Jesus e chii aayimuumaakanuut. Itashteu Chishemanituu umasinahiikanihch, Chii asitinaakanuu anite aweyuuh kaa piikunamiyich wiishuwewinh e ihtaayich.

²⁹ Aniyuuh maak aweyuuh kaa pechi pimuhteyich anit e ihtaat chii maayeyimikuu. Chii wewepiskweyuuh, e itweyich, “Taapwe kiipaa. Chiya kaa itweyin chechii wanaachihtaayin chisheayimiheukamikw ekw maak nishtu chiishikaauh ishpish kaau chechii wiikaapuuhtaayin,

³⁰ Wiichihiisu maak, pechi niishaahtawiih an chitaashiteyaahtikum.”

³¹ Ekw kaye wiyawaau anichii kaa niikaanapitwaau ayimiheuchimaauch ekw maak anichii wiishuwewiniyuu kaa chiskutamaachetwaau chii maayeyimeuch anit e ayimihiitutwaau e itwetwaau, “Chii pimaachiheu aweyuu, namui mechin chii pimaachihiisuu wiya.

³² Uu Christ, Israel iinuuch uchisheuchimaamuwaau, chipaa niishaahtawiyuu aniyuu aashiteyaahtikw e kanawaapamuhkw, ekw maak chipaa taapwehtenaanuu.” Anichii maak kutakach kaa chiistaaskuhwaakanuutwaau chii maayeyimeuch kaye wiyawaau Jesus.

Jesus kaa nipit

³³ Kaa aapihtaachiishikaach maak ekut mitun e kaschitipiskaach kaa ishinaakuhch misiwe e ishpishaach anit an aschii. Nishtu tipahiikan ekun kaa ishinaakuhch.

³⁴ Nishtu maak e ispayihch Jesus chii uhchi tepweu e itwet, “Eloi, Eloi, lama sabachthani. Maau e ishi itweshtamuwaataakanuuhch uu, Nichishemanituum, Nichishemanituum, chekwaan wehchi pechi nakasiyin.”

³⁵ Pasch maak anichii kaa naaniipuutwaau anit iskutak piyehtawaatwaau uyuu e itweyich chii itweuch, “Nituhtawaahkw maa, Elijah aniyuu kaa tepwaataat.”

³⁶ Ekw peyakw an chii ispahtaau chechii nituu akuhtataat uhpanishiyuu wiisakaapuuhch, ekw mistikuhch kaa akwaapahkaatahk ekw utiiniihch kaa itinamuwaat chechii shuupihtamiyich. Chii iteu maak, “Ashuwaapitaau, naanaakachihaataau aahch taapwe che pechi niihtinikuukwe Elijah.”

³⁷ Jesus maak chii uhchi pehtaakusuu e chishewet, ekw kaa nipit.

³⁸ Ekw an aakuuyekahiikan anite chisheayimiheukamikuhch kaa ihtakuhch mitun tekash chii tetaau taaschipayuu.

³⁹ An maak shimaakanishuuchimaau kaa uhchishkuukaapuushtawaat Jesus iskutak wiyaapamaat shaash e nipiyich, chii itweu, “eukw uyuu taapwe kaa aawiyich Chishemanituu Ukusisa.”

⁴⁰ Chii ihtaauch kaye iskweuch nete waahiyuushiish e uhchi kanawaapitwaau. Eukw uchii Mary Magdalene, kaye Mary, James kaa awaashiyuut ekw maak Joses ukaawaauh, ekw maak Salome.

⁴¹ Eukw uchii iskweuch kaa nuushuushkuwaatwaau Jesus mekwaach eshkw Galileehch e chii ihtaayich kaye kaa waawiichihaatwaau. Mihchetu kaye kutakach iskweuch chii ihtaauch anit anichii kaa wiichewaatwaau Jesus Jerusalemihch kaa pechi ituhteyich.

Jesus wiiyuu kaa nahiihkaakanuyich

⁴² Shaash chii utaakushiyuu kaa takushihk naapeu Joseph e ishinihkaasut. Arimathea chii ishinihkaateyuu anite kaa uhchiyit. Naashch chii chisteyimikuu wiich uchimaauh kaa maamuupiyich. Kaye maak wiya chii naanituwaapahtamuweu Chishemanituuh uchimaawiniyuu.

⁴³ Aniyuu maak e chiishikaayich ekut kaa chii ayeskuwiihkaakanuuhch miyaaskaacheu makushewin ekw an miin e chiishikaach eukw aniyuu utayimiheuchiishikaamuwaau Jewa iinuuch. Ekw Joseph kaa ati nituwaapamaat Pilate ekaa mitun kushtaachit, kaa kakwechimaat chechii miyaakanuut Jesus wiiyuuyuu.

⁴⁴ Pilate maak chii kushkupayuu e pehtahk shaash e chii nipiyich Jesus. Chii wiishaameu aniyuu shimaakanishuuchimaau ekw kaa kakwechimaat shaash kaa nipiikwen Jesus.

⁴⁵ Iskutak maak waahtamaakut aniyuu shimaakanishuuchimaau shaash e chii nipiyich Jesus, ekw Pilate kaa niskumaat Joseph chechii utinamiyich Jesus wiiyuuyuu.

⁴⁶ Ekw Joseph kaa nituu utinahk e miiwekashiyich machunishiyuu e waapekaniyich ekw kaa nituu niihtinamuwaat Jesus wiiyuuyuu. Ekut anit machunishihch kaa tihtipayetinamuwaat aniyuu wiiyuuyuu ekw chiipaikamikuhch kaa nituu chiskashtaat. Ekw kaa tihtipinaat asinii anite e pakuneyaayich aniyuu chiipaikamikuyuu, ekut kaa chipishimaat.

⁴⁷ Mary Magdalene ekw maak Mary, Joses ukaawii ekut kaa ihtaatwaau, chii waapahtamuweuch taanit kaa pimishimaakanuyich Jesus.