Mark 14 - Chishemanituu Utayimuwin: Kaa Uskaach Testament

Jesus kaa wii wiyeshituutuwaakanuut

¹ Niishu chiishikaau chii ishpishinaakun che miichinaanuuhch an makushaan Miyaaskaacheu makushaan kaa ishinihkaataakanuuhch kaye che chihchipayihch aaihkunaau ekaa uhpisut kaa chii muwaakanuut. Anichii maak kaa niikaanapitwaau ayimiheuchimaauch kaye maak anichii wiishuwewiniyuu kaa chiskutamaachetwaau chii wii naanituu miskamuch taanite chechii uhchi chiimuut maakunaatwaau Jesus chechii nipahaatwaau.

² Chii itituuch, “Namui wii mekwaach makushaanuuhche chika chii maakunaanuu, chika machipayihkahtaakunuuch anichii iinuuch chishuwaahiihkwaawenich.”

Kaa niikaan tuumiskunaakanuut Jesus

³ Bethanyihch mekwaach kaa ihtaat Jesus, anite Simon wiichiihch ekute kaa ihtaat. Uyuu naapeu Simon kaa umichiiwaaspinet chii ishinihkaataakanuuyuu. Miichisuunaahtikuhch chii apuuch e miichisutwaau kaa uhchi piihcheyich iskweu e pechi tahkunamiyich naashch e miywaashiyich puutayuu e asiniiyuuniyich. E mista shuuliyaauniyich tuuminikaniyuu e wiihchimaakusiyich chii piihchishtiniyuu anit. Chii mushtaakamiyuu maak uyuu tuuminikaniyuu, nard chii ishinihkaateyuu. Chii piikunam anit e ustikwaanuuniyich aniyuu puutaayuu ekw kaa kutapinahk aniyuu tuuminikaniyuu Jesus ustikwaaniihch.

⁴ Pasch anichii awenichii anit kaa ihtaatwaau chii chishuwaahiikuuch uyuu e ihtiyich ekw kaa ititutwaau, “Chekwaayuu wehchi nanaayuuhtaat uyuu kaa wiihchimaakusiyich tuuminikaniyuu.

⁵ Chii ataawet awen uyuu tuuminikaniyuu uste nishtwaau mitaahtumitanuu shuuliyaawaapiskwa chipaa miyaakanuu. An maak shuuliyaau kaa chistimaatisiitwaau awenichii chipaa chii miyaakanuuch.” Ekw kaa aanuweyimaatwaau aniyuu iskweu.

⁶ Jesus maak chii iteu, “Ekaawii pischeyimaahkw. Chekwaan wehchi aayimeyihtamihekw. Mista miywaashiyuu aniyuu e chii ihtuutuut.

⁷ Muush ihtaauch kaa chistimaatisiitwaau utah e ihtaayekw, chika chii miyutuutawaawaauch taanite mikw che nihiipayikwe chechii miyutuutamuwekuch, niya maak namui muush nika uhchi ihtaan utah e ihtaayekw.

⁸ Uu iskweu chii ihtuutam wiya taan kaa wii ihtit. Niyaakan chii tuuminam niyuuyuu e ayeskuwiihkahk che chiskashtaakanuyich.

⁹ Chihchiwe chititinaawaau, taanite mikw che kacheskwaanuukwe e waawiihtaakanuuhch miywaachimuwin misiwe e ispichiskamikaach uu aschii kata wiihtaakanuuyuu uyuu taan kaa ihtit e chischisiitutuwaakanuut uu iskweu.”

Judas kaa niskumut chechii wiyeshipachishtinaat Jesus

¹⁰ Peyakw an kaa niishushaapuutwaau chischinuhamuwaakanich Judas Iscariot kaa ishinihkaasut, chii nituwaapameu kaa niikaanapiitwaauh ayimiheuchimaauh chechii wiihtamuwaat wiya chechii ihtuutahk chechii wiyeshipachishtinaat Jesus ekw maak chechii maakunaakanuyich.

¹¹ Uchii maak niikaan ayimiheuchimaauch chii sichiyehiikuuch piyehtawaatwaau uyuu e itweyich ekw kaa itaatwaau shuuliyaayuu che kaaniyuuhaatwaau chechii ihtuutamiyikwenh uyuu. Ekw Judas kaa naanaakachihtaat taanit che nihiipayiyikwe chechii wiyeshipachishtinaat Jesus.

Kaa ayeskuushtaakanuuhch miyaaskaacheu makushaan

¹² An maak niishtam e chiishikaach anit aniyuuh e pimichiishikaakwaau ekaa uhpisut aaihkunaau kaa chii muwaakanuut, iskutak maak kaa nipahaakanuut maanishchaanish e chischisiitutaakanuuhch anite utaahch an miyaaskaacheu chiishikaau Jesus chii itikuu uchischinuhamuwaakanh, “Taanite netaweyimiyaahch chechii nituu ayeskuushtamaataahch miyaaskaacheu makushaan chechii miichiyin.”

¹³ Ekw niishu uchischinuhamuwaakanh kaa chihchitishahwaat Jesus e itaat, “Maachiikw nete an mistautenaau. Ekute che nachishkawekw naapeu nipiiyuu e pimuhtataat. Eukuu che nuushuushkuwekw.

¹⁴ Aniyuu waaskaahiikaniyuu che piihchet che kakwechimekw an tepiyeusiit aniyuu waaskaahiikaniyuu, ‘Itweu nichischinuhamaachesiiminaan, Taanite e ihtakuhch an e pischisaach anite nipaa wiichimakushemaauch nichischinuhamuwaakanich miyaaskaacheu makushaaniyuu.’

¹⁵ Ekw che waapahtiitaakw anite ishpimiihtakuhch e mishaayich e pischisaayich tekash e ishi ayeskuushteyich, shaash misiwe chekwaayuu e ihtakuniyich anite che ishi nitaweyihtaakuniyich. Ekute maak ute che ayeskuushtaayekw uu makushaan.”

¹⁶ Ekw kaa chistuhtetwaau anichii chischinuhamuwaakanich anite aniyuu mista utenaayuu kaa ituhtetwaau. Nihaau maak taan kaa ishi wiihtamaakutwaau ekun kaa ispayiyich. Ekw kaa ayeskuushtaatwaau aniyuu miyaaskaacheu makushaaniyuu.

¹⁷ Iskutak maak wetaakusiyich Jesus chii takushin anite e wiicheukut aniyuu niishushaap uchischinuhamuwaakanh.

¹⁸ Mekwaach maak e miichisutwaau Jesus chii itweu, “Chihchiwe chititinaawaau, peyakw utah e tashiyekw nika wiyeshipachishtinikw, ekut utah niyaanitam waachimiichisuumit an awen.”

¹⁹ Ekw misiwe anichii chischinuhamuwaakanich chii misimeyihtamihiikuuch uyuu kaa itweyich ekw paahpeyakw kaa kakwechimaatwaau, “Niya aa an awen.”

²⁰ Jesus kaa itaat, “Ekut e ihtaat an awen utah uu e niishushaapuyekw. Eukuu kaa akuhchimaat utaaihkunaam anit aniyuu wiyaakaniyuu kaa akuhchimach niya nitaaihkunaam.

²¹ Kata nipahaakanuu Iinuu Ukusisa aniyuu taan kaa ishi pechi masinahiikanuyich masinahiikanihch anite utaahch. Mikw maak taapwe kata aahkwaach machipayuu an awen che wiyeshipachishtinaat Iinuu Ukusisa. Uste chipaa miywaayikupane an awen ekaa mechim uhchi pimaatisiikupane.”

Jesus maahchishtai kaa wiich miichisuumaat uchischinuhamuwaakanh

²² Aniyuu maak e miichisutwaau, Jesus chii utineu aaihkunaau ekw kaa nanaaskumaat Chishemanituu. Iskutak kaa nanaaskumut ekw kaa papahkwenaat aniyuuh aaihkunaau, ekw kaa maamiyaat misiwe paahpeyakw e tashiyich e itaat, “Utinaahkw uu, muwaahkw, eukuu niyuu.”

²³ Ekw aniyuu minihkwaakaniyuu kaa utinahk, chii nanaaskumeu Chishemanituu, ekw kaa miyaat aniyuu uchischinuhamuwaakan. Misiwe maak e tashiyich chii minihkweyuuh.

²⁴ Kaa itaat, “Eukuu nimihkw, an che shiikanikaatech mihchetu awen uhchi. Uu nimihkw ekut che uhchi yaaitashtech uschi niskumuwin.

²⁵ Chihchiwe chititinaawaau, namui miin nika uhchi minihkwen shuuminaapuu paatish e uskaakamihch shuuminaapuu minihkweyaane anite Chishemanituu uchisheuchimaawinihch.”

²⁶ Iskutak maak kaa nikamutwaau ayimiheu nikamuwiniyuu ekw anite aniyuu wachiyuu Olives kaa ishinihkaateyich kaa ituhtetwaau.

Jesus kaa niikaan wiihtahk che itweyich Peter ekaa chischeyimikut

²⁷ Ekw Jesus kaa itaat aniyuu uchischinuhamuwaakanh, “Uu anuhchiish che tipiskaach misiwe e tashiyekw chika nakasinaawaau, an uhchi taan che ihtuutaakuyaan, wesh itashteyuu anite Chishemanituu utayimuwinihch, Nika niihtahwaau an maanishchaanishuiinuu, ekw anichii maanishchaanishach che ascheyaamuhchaanuuhch.

²⁸ Iskutak maak chii wanishkaanikuyaane nipuwinihch uhchi anite Galileehch nika ituhten. Ekute anite che ashuwaapamitakuch.”

²⁹ Peter maak chii nishkweushiheu e itaat, “Namui wiiskaat chika uhchi nakatitin niya aat misiwe awen nakatiske.”

³⁰ Ekw Jesus kaa itaat, “Chihchiwe chititin, eshkw ekaa mechim niishwaau chistute naape pakahaahkwaan che utaakushich shaash nishtwaau chika itwen ekaa chischeyimiyin.”

³¹ Peter naashch chii wii taapweu e itaat, “Namui wiiskaat nika uhchi itwen ekaa chischeyimitaan, aat ishinaakuhche che nipiyaan nipahiikawiyine.” Ekun kaa itwetwaau kaye anichii kutakach chischinuhamuwaakanich.

Jesus kaa ayimihaat Gethsemanehch

³² Gethsemane kaa ishinihkaateyich nihtaauchihchikan aschiiyuu ekute kaa ituhtetwaau Jesus ekw maak uchischinuhamuwaakanh. Ekw Jesus kaa itaat aniyuuh uchischinuhamuwaakanh, “Ekut utah apikw. Nika nituu ayimihaan.”

³³ Ekw kaa chistuhtahaat Peter, James ekw maak John. Naashch maak chii misimiskaakuu misimeyihtamuwiniyuu kaye naashch chii kushikumahchihuu.

³⁴ Ekw kaa itaat, “Naashch taapwe misimeyihtam nitahchaahkw. Ekut utah ihtaakw mikw maak ekaawii wii kauhkusikw e ashuwaapiyekw.”

³⁵ Nete maak ustesiish chii ituhteu Jesus, anite aschiihch kaa ishi pahchishimipayihut. Ekw kaa ayimihaat e nitutamaat chechii nihiipayiniyich ekush ekaa chechii nachishkahk taan chipaa ishi nachishkam mekwaach aniyuu tipahiikaniyuu.

³⁶ Chii itweu, “Nuuhtaawii, namui ihtakun chekwaan ekaa chechii ihtuutaman chiya. Iichenamuu maa uu taan nipaa ishi wiisacheyihten. Mikw maak chiya chititeyihtamuwin chika ihtuutaakanuu, namui niya nititeyihtamuwin.”

³⁷ Iskutak kaa chiishi ayimihaat kaau chii naateu aniyuuh kaa nishtiyich uchischinuhamuwaakanh, misiwe maak chii nipaayuuh. Chii iteu aniyuuh Peter, “Simon, chinipaan aa. Namui aa mechim kuuhchii ihtin peyakw tipahiikan ekaa chechii nipaayin.”

³⁸ Ekw kaa itaat aniyuuh e nishtiyich, “Yaakwaamiikw kaye ayimihaakw ekaa chechii shaakuuchihiikuyekw kakwechihiiwewin. Wesh chitahchaahkuwaahch naashch taapwe kuiskw chiwii ihtinaawaau mikw maak chiyaasiwaahch namui mitun chisaapisiinaawaau.”

³⁹ Ekw miin kaa nakataat Jesus aniyuu uchischinuhamuwaakanh. Kaa ayimihaat miin Chishemanituu, ekun yaapach kaa ishi ayimihaat aniyuu niishtam taan kaa ishi ayimihaat.

⁴⁰ Miin maak niyaataat uchischinuhamuwaakanh chekwaayuu miin kaa kauhkushiikupanenh. Wesh shaash namui miihkwaach uhchii tuuhkaapiyuuh kaa ishpish chii wii nipaayich. Ekw maak namui uhchi chischeyihtamuch taan che itaatwaau Jesus.

⁴¹ Ekw chek nishtwaau kaa naataat ekw kaa itaat, “Eshkw aa chinipaanaawaau. Eshkw aa chitaasteyeskusinaawaau. Ekun ekw, shaash utihchipayuu an tipahiikan. Iitaapikw maa, shaash wiyeshipachishtinaakanuu Iinuu Ukusisa anite umachihtwaauh e ihtaayich.

⁴² Wanishkaakw. Maachiitaau. Kanawaapamaahkw maa an che wiyeshipachishtinit shaash peshunaakusuu.”

Jesus kaa maakunaakanuut

⁴³ Eshkw maak mekwaach e ayimit Jesus chii uhchi takushiniyuuh peyakw aniyuu kaa niishushaapuyich uchischinuhamuwaakan Judas Iscariot kaa ishinihkaasuyich. Chii pechi wiicheukuyuu mihchetu aweyuuh e chii pechi itishahukutwaau kaa niikaanapiitwaau ayimiheuchimaau kaye wiishuwewiniyuu kaa chiskutamaacheyitwaauh kaye aniyuuh iinuuh kaa niikaanishkuwaayitwaauh. Chii pechi tahkunamuch maak nitupayuuhkumaan kaye utaamihiikanaahtikw.

⁴⁴ An che wiyeshipachishtinaat Jesus chii niikaan wiihtamuwekupane aniyuuh kaa wiicheukut taan che ihtit. Chii itweche, “An che uchemak naapeu eukun an naapeu netaweyimekw. Eukun an che maakunekw che chistuhtahekw.”

⁴⁵ Iskutak maak tekushinit Judas tiiwehch chii naateu Jesus ekw kaa itaat, “Chischinuhamaachesuu.” Ekw kaa uchemaat.

⁴⁶ Ekw kaa maakunaatwaau Jesus suuhk e maamaahchikunaatwaau.

⁴⁷ Peyakw maak awen anit e niipuut e kanawaapit chii uhchi kuikupitam umisimuuhkumaan ekw kaa chimishamuwaat uhtaukaayuu aniyuuh chisheayimiheuchimaauh utaapachihaakaniyuu.

⁴⁸ Jesus kaa uhchi ayimit e itaat aniyuuh kaa pechi nituwaapamikut, “Chekwaan wehchi pechi nituwaapamiyekw muuhkumaanh kaye utaamihiikanaahtikw e pechi tahkunamekw. Ekun e ihtuutawaakanuut chimutisk e wii kaahchitinaakanuut.

⁴⁹ Meshikum chiishikaau nichii ihtaan anite mekwesiin e ihtaayekw e chiskutamaacheyaan anite chisheayimiheukamikuhch, namui maak kuuhchi pischeyiminaawaau. Mikw maak iteyihtaakun taan e itashtech Chishemanituu utayimuwinihch che tipipayihch.”

⁵⁰ Ekw misiwe uchischinuhamuwaakanh kaa nakatikut e ushimuyich.

⁵¹ Chii ihtaau naapesh e uschiniichuuch e nuushuushkuwaat Jesus. Chii tihtihpayehchishkam e papachekaniyich machunishiyuu e mishaamiskahk. Ekw pasch naapeu anit kaa ihtaayich kaa maakunikut,

⁵² mikw maak chii tichischipayihuu ekw kaa ushimut an naapesh e ati musheshkatepahtaat e chii manipitaakanuyich aniyuu kaa tihtipayehchishkahk machunishiyuu.

Jesus kaa uhchishkuukaapuushtawaat chisheayimiheuchimaauh

⁵³ Ekw anite chisheayimiheuchimaauh e ihtaayich kaa ituhtahaatwaau Jesus. Ekute maak kaa nishtawiiwaakupanenich kaa niikaanapitwaau ayimiheuchimaauch kaye anichii kaa niikaanishkawaatwaau iinuuh kaye maak anichii wiishuwewiniyuu kaa chiskutamaachetwaau.

⁵⁴ Peter maak waahiyuushiish anite chii pechi nuushuushkaacheu. Kaa ati ituhtet anite chisheayimiheuchimaau uwaaskaahiikanimiyuu e ihtakuniyich. Ekut anit wiiwiitamihch kaa ihtaat. Chii waapameu aapachihaakanh iiniskuteyuu e waaskaapishtamiitwaau e ausuyitwaau. Eukun aniyuu kaa naataat kaa ati wiitapimaat.

⁵⁵ Anichii maak kaa niikaaneyihtaakusitwaau ayimiheuchimaauch nesht misiwe aniyuuh kaa maamuupishtahkwaau e wiyeyihtaakanuyich chekwaayuu chii wii naanituu miskamuch chekwaayuu chechii ishi ataameyimaatwaau Jesus ekw maak chechii itashuwetwaau chechii nipahaakanuyich. Mikw maak namui uhchi miskamuweuch chekwaayuu chechii ishi ataameyihtaakusiyich.

⁵⁶ Mihchetu awenichii chii ihtaauch chekwaayuu e ishi mamishimaatwaau Jesus mikw maak namui uhchi chihkaawaastaakuniyuu aniyuu taan kaa ishi waawiihtahkwaau.

⁵⁷ Ekw pasch naapeuch kaa uhchi pasikuutwaau ekw uyuu kaa ishi wiihtahkwaau e nanatayitwaau e itwetwaau,

⁵⁸ “Nichii pehtawaanaan e itwet, ‘Nika wanaachihtaan uu chisheayimiheukamikw naapeu kaa ushihtaat, nishtu chiishikaauh maak ishpish miin kutach nika wiikaapuuhtaan ekaa naapeu uhchi ushihtaat.’ ”

⁵⁹ Namui mechim kaye wiyawaau uchii naapeuch uhchi taapwehtaakuniyuu taan kaa ishi wiihtahkwaau wesaa nanaahkuu e chii itihtaakuniyikwaauh utipaachimuwinawaauh.

⁶⁰ Ekw an chisheayimiheuchimaau kaa uhchi pisikuut misiwe kaa uhchiskaapuushtawaat aniyuuh anit kaa ihtaayitwaauh ekw kaa kakwechimaat Jesus, “Namui aa ihtakun chekwaan e wii itweyin aniyuu taan e itaachimiskwaau uchii.”

⁶¹ Namui uhchi chistuu Jesus, namui chekwaayuu uhchi iteu. Miin kaa kakwechimikut aniyuu chisheayimiheuchimaau, “Ewaa chiya Christ, Chishemanituu kaa shaweyihtaakusit Ukusisa.”

⁶² Jesus chii iteu, “Ehe, eukw niya. Chika waapamaawaau Iinuu Ukusisa e apit anite Kaa Suuhkaatisiyich unihiiwiniihch itehche e ihtaayich. Kaye chika waapamaawaau pechi takushinite kihchikiishikw kaskawanishkuhch e uhchi nuukusit.”

⁶³ Ekw an chisheayimiheuchimaau, iskutak piyehtawaat uyuu e itweyich chii piikupitam uchekwaanim e itwet, “Namui chinitaweyimaanuuch kutakach awenichii chechii pechi wiihtahkwaau taan kaa ihtiyich maak taan kaa itweyich.

⁶⁴ Chipehtawaawaau taan e ishi maayeyimaat Chishemanituuh. Taan maak waa ihtuutawekw.” Misiwe maak e tashitwaau chii iteuch e ishinaakuniyich chechii nipahaakanuyich.

⁶⁵ Pasch maak chii shihkwaateuch kaye chii akunaahkwehweuch ekw kaa wautaamuhkwehwaatwaau e itaatwaau, “Awen kaa utaamuhuusk chititeyihten.” Mechim aniyuuh kaa maakunawesiyich kaa naanaakachihtaayich aniyuu waaskaahiikaniyuu chii utataamuhukuu aniyuu e ati chistuhtahiikut.

Peter kaa itwet ekaa chischeyimaat Jesus

⁶⁶ Eshkw anite wiiwiitamihch chii ihtaau Peter kaa uhchi pimuhteyich peyakw aniyuuh chisheayimiheuchimaau ukuuhpaaneskwemiyuu.

⁶⁷ Uu kuuhpaaneskweu iskutak wiyaapamaat Peter e ausuyich, kuiskw chii kanawaapameu ekw kaa itaat, “Chiya kaye chichii papaawiichewaau Jesus, Nazareth kaa uhchiit.”

⁶⁸ Peter maak chii nanatayuu, chii iteu, “Namui nichischeyihten kaye namui ninisituhten chekwaan uu kaa aayimuutaman.” Ekw kaa pisikuut ekw anite e ishkwaahtemuuniyich aniyuu waaskaahiikaniyuu kaa ituhtet. Kaa uhchi chistuyich naapepakahaahkwaan.

⁶⁹ Kaa waapamaat an kuuhpaaneskweu anite e niipuyich Peter ekw kaa itaat aniyuuh aweyuuh anite kaa naaniipuuyitwaau, “Eukun an peyakw.”

⁷⁰ Mikw maak Peter miin chii aanuwehtam uyuu kaa itweyich. Paatimaa miin chii itikuu anit kaa naaniipuuyitwaau, “Namui chika chii itwen ekaa uhchi papaawiichewat wesh chinisituhtaakusin Galileehch e uhchiyin.”

⁷¹ Ekw kaa itwet Peter, “Ekush nika waweshihiikw Chishemanituu nenatayiwaane, kaye naashch chii wii taapweu e itwet, namui nichischeyimaau uu naapeu kaa aayimuumekw.”

⁷² Sischikuuch maak miin chii uhchi chistuu naapepakahaahkwaan ekw Peter kaa uhchi chischisit kaa itikut Jesus, “Eshkw ekaa mechim niishwaau chistute naape pakahaahkwaan nishtwaau chika itwen ekaa chischeyimiyin.” Ekut anit kaa uhchi mista maatut Peter e chischisit uyuu.