Mark 13 - Chishemanituu Utayimuwin: Kaa Uskaach Testament

Jesus kaa aayimuutahk che wanaachihtaakanuyich chisheayimiheukamikuyuu

¹ Jesus maak e ati wiiwiit aniyuu chisheayimiheukamikuyuu, peyakw uchischinuhamuwaakan chii itikuu, “Chischinuhamaachesuu, Iitaapih maa. Nuwach miyuushuuch uchii asiniich utah waaskaahiikanihch kaa chikamutwaau kaye maak uyuuh waaskaahiikanh nuwach miywaashuuh.”

² Chii iteu maak Jesus, “Chiwaapahtenaawaau aa uyuuh waaskaahiikanh kaa maamishaakwaau. Namui waawaach peyakw asinii chika uhchi aakwiihtuupuu kutak asinii taan aniyuu kaa itahaakanuut. Misiwe asiniich kaa ishi aapachihaakanuutwaau kaa ushihtaakanuuhkwaau uyuu waaskahiikan chika niihchiwepinaakanuuch.”

Taan che ishi aayimuhunaanuuhch kaye che ishi nanehkaateyimunaanuuhch

³ Mekwaach maak e apit anite Olives wachiihch tipiskuuch anit aniyuu chisheayimiheukamikuyuu kaa ihtakuniyich, chii naatikuu Peter, James, John ekw maak Andrew chechii kakwechimikut mekwaach mikw wiyawaau e ihtaatwaau.

⁴ Chii itikuu, “Wiihtamuunaan maa taaishpish che ispayihch uu. Chekwaan che ispayihch chechii uhchi chischeyihtaakuhch e utihchipayihch ekw che ispayihkwaau uyuuh chekwaayuuh.”

⁵ Jesus maak chii iteu, “Yaakwaamiikw ekaa awen chechii wiyeshimitaakw.

⁶ Wesh chika mihchetuuch awenichii e takushihkwaau nitishinihkaasuwiniyuu e aapachihtaatwaau e itwetwaau, ‘Eukw niya Christ.’ Mihchetu maak aweyuu chika wiyeshimeuch.

⁷ Ekaawii kaye chika uhchi mukushkaateyihtamihiikunaawaau pehtamekwe e matwe nitupayinaanuuhch peshuch anite e ihtaayekw kaye pehtamekwe e tipaatutaakanuuhch e nanitupayinaanuuhch anite waahiyuu. Eukw wesuu niishtam netaweyihtaakuhch chechii ispayihch, mikw maak namui eshkw kata uhchi iskwaapayuu.

⁸ Peyakunihch kaa itiskaanesitwaau awenichii kata maasihiituuch aniyuuh kutak aweyuuh aahchiiuh kaa itiskaanesiyich. Kaye anichii kaa uchimaautwaau kata nitupayihkahtaweuch aniyuu kutak kaa uchimaawiyich. Kaye maak nanaahkuu anite wiyesh kata kuihkun. Kaye kata ihtakun e kauhkataanuuhch. Uu maak nanaahkuu che ispayihch, eukuu picheyik e chihchipayihch nanehkaateyimuwin, mwehch iskweu e chihchi muushihut che aahkusit.”

⁹ “Yaakwaamiikw wesh chika ihtaauch anichii che maakunitaakuch ekw anite kaa niikaanishkaacheyich e ihtaayich che ituhtahiitaakuch chechii wiyaaskunikuyekw. Kaye maak anite ayimiheukamikuhch ekute che papasistehukuyekw. Chika ituhtahiikunaawaau peshuch kaye chisheuchimaauch e ihtaatwaau chechii wiyaaskunitaakuch an uhchi e nuushuushkuyekw. Chika nitaweyihtaakusinaawaau kuiskw chechii ishi aayimuumiyekw.

¹⁰ Eshkw maak ekaa ispayekwe uu, niishtam chipaa kacheschimaakanuuch misiwe e itiskaanesitwaau awenichii e waawiihtamuwaakanuutwaau miywaachimuwiniyuu.

¹¹ Iskutak maak maakunikuyekwe ekw maak ituhtahiikuyekwe anite che wiyaaskunikuyekw ekaawii niyaakan chika uhchi aayimeyihtamihiikunawaau taan che itweyekw, mikw taan che ishi miikuwekwe che itweyekw mekwaach anit ihtaayekwe ekun an itwekw. Wesh taapaa chiyawaau chika uhchi ayiminaawaau anit mekwaach ayimiyekwe, Kaa payehchisiyich Ahchaahkw eukw che ayimit.

¹² Maau kaye che ispayihch. Wiichishaanimaau kata wiyeshipachishtineu tipiiwe wiichishaan chechii nipahaakanuyich. Uhtaawiimaau kaye ekun che ihtuutawaat utawaashiim. Awaashach kaye kata chishuwaahiikuuch uniichihiikuwaauh ekw che ihtuutawaatwaau chechii nipahaakanuyich.

¹³ Misiwe awen chika uhkaatikuwaau e nuushuushkuwiyekw. Mikw maak an awen che yaaichikaapuukwe che ishpish pimaatisiikwe eukuu che pimaachihaakanuut.”

An maauch kaa uhkaateyihtaakusit kaa aayimuumaakanuut

¹⁴ “Iskutak maak waapamekwe an awen maauch kaa uhkaateyihtaakusit e niipuut anite atuch chipaa uhchi niipuu” (an awen kaa ayimihtaat uyuu kata wii nisituhtam), “ekush pachishtinaahkuch anichii Judeahch kaa ihtaatwaau anite e wachuuniyich chechii itishimutwaau. Eukun uyuuh aniyaa uchischiwehiichesuu Daniel kaa aayimuumaat.

¹⁵ Kaye an awen tahkuhch wiichihch kaa ihtaat ekaawii pachishtinaahkw chechii piihchet uwaaskaahiikanim chechii nitawaahtahk chekwaayuu.

¹⁶ Kaye an awen nihtaauchihchikan aschiihch kaa ihtaat ekaawii pachishtinaahkw chechii chiiwet utakuhp e wii nituwaahtahk.

¹⁷ Taapwe kata aayimihuch anichii mekwaach kaa kanuweyimaasutwaau kaye anichii kaa nuushaanihaausutwaau aniyuuh e chiishikaayikwaauh.

¹⁸ Ayimihaakw ekaa e mekwaapipuhch chechii ispayihch uu.

¹⁹ Wesh uyuu e chiishikaakwaauh utihchipayihkwaawen nuwach kata ihtakun e nanehkaateyimutwaau awenichii. Kaa ishpish ihtakuhch uu aschii, Chishemanituu kaa ushihtaat, namui wiiskaat uhchi iteyihtaakun taan che iteyihtaakuhch uu nanehkaateyimuwin. Kaye maak namui miin wiiskaat kata uhchi ihtakun uu e iteyihtaakuhch nanehkaateyimuwin iskutak chii miyaaupayihche.

²⁰ Ekaa uhchi nakaahamukupane Chishemanituu etituu chineush chechii ihtakuniyich nanehkaateyimuwiniyuu namui chipaa uhchi ihtaau awen e pimaatisiit.”

²¹ “Ekw maak ititaakwe awen, ‘Iitaapikw maa, eukw wesh uu Christ,’ maak itikuyekwe, ‘Mwaana Christ,’ ekaawii chika uhchi taapwehtenaawaau.

²² Kata ihtaauch awenichii e wiyeshihiiwetwaau e itwetwaau Niya Christ. Kata ihtaauch kaye machi uchischiwehiichesuuch. Eukunich maak uchii nanaahkuu maamishkaach waapahtiiwewinh che waapahtiiwetwaau kaye kata ihtuutamuch e maamishkaateyihtaakuniyikwaauh chekwaayuuh. Ekut maak che uhchi wiyeshihaatwaau aweyuu nitamukw chechii ishi taapwehtamiyich. Aniyuuh maak Chishemanituu kaa wiyaapamaayich aweyuuh eukunh aniyuuh che wii wiyeshihaatwaau.

²³ Yaakwaamiikw maak. Shaash niyaakan chichii wiihtamaatinaawaau che ispayihkwaau uyuu chekwaayuu.”

Miin takushihke Jesus

²⁴ “Iskutak miyaaupayihche e nanehkaateyimunaanuuhch, Wetaach namui kata uhchi ishpish chihkaasuweu piisim kaye tipischipiisim namui kata uhchi washtuweu.

²⁵ Achahkushach chiishikuhch kata uhchi paahpahchishinuuch kaye misiwe taan e ishi ihtakuhch ishpimihch kata nanamipayuu.

²⁶ Ekw maak che waapamaakanuut Iinuu Ukusisa e pechi asiit kaskawanishkuhch, mitun e nuukuniyich usuuhkaatisiiwin kaye uchisteyihtaakusuwin.

²⁷ Ekw che itishahwaat enchilh chechii nituu maamuunaayich aniyuu aweyuuh kaa wiyeyimaat anite neweyich e uhchiiweyich e uhchiyich. Tekash e iskwaayaayich aschiiyuu anite maak ishi tekash e iskwaayaayich kihchikiishikuyuu kata uhtineyuu.”

Jesus misishuuminaahtikw kaa aapachihaat e chiskutamaachet

²⁸ “Ihtakun chekwaan chechii chiskutamaasuyekw misishuuminaahtikw e kanawaapamekw. Iskutak e ati uschinihtaauchiniyikwaau uwatihkun kaye maak e ati niipiisiyuut, chichischeyihtenaawaau shaash wiipach che niipihch.

²⁹ Uyuuh maak chekwaayuuh kaa aayimuutamaatakuch che ispayihkwaau iskutak ispayihkwaawen ekut che uhchi chischeyihtamekw shaash e peshunaakuniyich Iinuu Ukusisa che takushinit, muyaam shaash ishkwaahtemihch e pechi niipuut e ishinaakusit.

³⁰ Kuiskw chiwiihtamaatinaawaau, anichii kaa pimaatisiitwaau anuhchiish namui kata uhchi mehchi nipuuch eshkw ekaa tipipayihche misiwe taan chipaa ispayuu.

³¹ Kihchikiishikw neshta aschii kata iskwaapayuu mikw maak nitayimuwin namui wiiskaat kata uhchi iskwaapayuu.”

Che wii ayeskuyihkw

³² “Mikw maak namui awen chischeyihtam aniyuu e chiishikaayich maak aniyuu tipahiikaniyuu che ispayiyikwaau uyuuh chekwaayuuh. Namui mechim enchilich chischeyihtamuch, mechin Ukusisimaau, mikw Uhtaawiimaau chischeyihtam.

³³ Yaakwaamiikw, muush pechi ayeskuwiishtuukw. Wesh taapaa chichischeyihtenaawaau taaishpish che ispayihch uu.

³⁴ Ekun mwehch e ishinaakuhch naapeu waahiyuu e wii ispayit. Iskutak che nakatahk wiich utaapachihaakanh miyeu che uchimaawiyich mekwaach ekaa ihtaate. Misiwe paahpeyakw wiihtamuweu che itaapatisiyich. Kaye aniyuuh kaa kanuushkuwaahtaweyich itashumeu yaakwaau chechii naanaakachihtaayich ishkwaahtemiyuu.

³⁵ Yaakwaamiikw wesh taapaa chichischeyihtenaawaau taaishpish che takushinit kuuchimaamuwaau kaa naanaakachihtaawekw wiichi, e utaakushiyich che takushinikwe, maak aapihtaatipiskaayiche maak petaapaniiche, maak paatish e waapaniich che takushinikwe.

³⁶ Yaakwaamiikw maak, yaakwaah cheskaakuyekwe e nipaayekw sischikuuch takushihke.

³⁷ Uu che ititakuch, nititaauch kaye kutakach awenich, Ayeskuwiishtuukw.”