Mark 12 - Chishemanituu Utayimuwin: Kaa Uskaach Testament

Shuuminaahtikw nihtaauchihchikan aschiiyuu kaa naanaakachihtaatwaau kaa tipaachimaakanuutwaau

¹ Jesus etituu chii ati ayimiheu aniyuuh niikaan ayimiheuchimaauh kaye masinahiichesuuh e wiihtamuwaat uyuu tipaachimuwin chiskutamaachewiniyuu. Chii iteu, “Chii ihtaau naapeu shuuminaahtikw e chii nihtaauchihaat anite nihtaauchihchikan aschiihch. Chii chipaham maak misiwe waaskaa aniyuu unihtaauchihchikan aschii. Kaye chii muunaauhkaham taanite che pichishchishkaakanuyikwaau aniyuu miinisha. Chii ushihtaau kaye chiimuushaapiiukamikuyuu anite che uhchi naanaakachihtaakanuyikwaau aniyuu unihtaauchihchikanh. Iskutak maak kaa chiishkwaa aihtit chii naanituwaapameu aweyuu chechii naanaakachihtaayich uyuu utaschii ekw kaa chistuhtet, waahiyuu e ihtakuniyich aschiiyuu kaa ituhtet.

² Iskutak maak wetihchipayiyich che maamuushtinikanuuyikwaau aniyuuh miinisha anit mistikuhch kaa nihtaauchiniikwaau chii itishahweu peyakw utaapachihaakan chechii nituwaapamaayich aniyuuh kaa naanaakachihtaayitwaau aniyuu utaschii chechii miikut wiya taan chipaa ishi ayaau.

³ Anichii maak kaa naanaakachihtaatwaau aniyuu aschiiyuu pishkunuu chii maakuneuch uyuu aapachihaakan ekw kaa kusiihkawaatwaau, kaa ati chihchitishahwaatwaau ekaa chekwaayuu miyaatwaau.

⁴ Ekw an uchimaau miin kutak aapachihaakan kaa itishahwaat anite. Ekw kaa mishwaakanihkaataakanuyich uyuuh naapeu ustikwaaniihch e chii wiyeshitutawaakanuyich, kaye maak chii maayeyimaakanuuyuu.

⁵ Miin kutak aapachihaakan kaa itishahwaat anite an uchimaau eukun uyuu kaa nipahaakanuyich. Ekun kaa ihtuutawaatwaau misiwe aniyuuh kaa itishahwaakanuyich anite e ihtaatwaau, pasch chii kusiihkaweuch ekw pasch kaa nipahaatwaau.

⁶ Chek mikw peyakw naapeu kaa ihtaayich anit e ihtaat an uchimaau, eukw uyuu tipiyeu ukusisa. Eukw uyuuh kaa itishahwaat chek e iteyihtahk, ‘Chika chisteyimeuch uyuu nikusa.’

⁷ Mikw maak anichii kaa naanaakachihtaatwaau aniyuu nihtaauchihchikan aschiiyuu chii itituuch, ‘Eukuu che aashuu miyaakanuut eshkw uyuu aschiiyuu, aashtamukw, nipahaataau chiyaanuu miiskuuch che aashuu miikuyihkw uu aschii.’

⁸ Chii maakuneuch aniyuu naapeu ekw kaa nipahaatwaau, kaa wiiwepinaatwaau anit nihtaauchihchikan aschiihch.”

⁹ “Taan maak che ihtit an kaa tipiyeusiit uyuu nihtaauchihchikan aschiiyuu. Kata nituwaapameu aniyuuh kaa naanaakachihtaayich uyuu utaschii ekw che nipahaat. Kutak aweyuuh che miyaat uyuu utaschii che naanaakachihtaayich.

¹⁰ Namui aa kuuhchi ayimihtaanaawaau anit Chishemanituu utayimuwinihch kaa itashtech, Chii aataweyimeuch kaa waaskaahiikanihchetwaau aniyuu asinii chihchiwe e aapatisiyich e chiihcheyaayich.

¹¹ Eukw uyuu Utipeyihchikeu utaihtuwin, nuwach miskaasinaakuniyuu e kanawaapahtaakanuyich.”

¹² Aniyuu maak aweyuu kaa ayimihaat Jesus chii wii maakunikuu wesh chii chischeyimikuu wiyawaau e wii kaahchitahukutwaau wehchi wiihtamiyich uyuu tipaachimuwiniyuu. Mikw maak chii kushteuch aniyuuh iinuuh anit kaa ihtaayich wesh chii mihchetiyuu. Ekw nitawaach kaa chistuhtetwaau.

E chiishiihkaasuunaanuuhch

¹³ Chii itishahwaakanuuch pasch Phariseech kaye pasch anichii Herod kaa nuushunehwaatwaau anite Jesus e ihtaayich chechii naanituu pisiiwiyaatwaau ekaa muyaam chechii itweyich chekwaayuu. Nanaahkuu chekwaayuu chii ishi kakwechimeuch.

¹⁴ Chii pechi nituwaapameuch maak ekw kaa itaatwaau, “Chischinuhamaachesuu, chichischeyimitinaan muush e taapweyin taan e itweyin. Namui wiyesiin awen an kaa ayimihiit wesh misiwe awen peyakunihch chit iteyimaau. Namui chikanawaapahtamuwaan taan e ishi chisteyihtaakusit awen. Kuiskw kaye chichiskutamuwaauch awenichii taan e ishi nitaweyimikutwaau Chishemanituu chechii ishi pimaatisiitwaau. Itashteu aa wiishuwewinihch Rome chisheuchimaau chechii miyaakanuut aniyuu shuuliyaayuu kaa chiishiihkaasuyich aweyuu.”

¹⁵ Nipaa chiishiihkenaan aa maak namui. Jesus maak chii chischeyimeu e wii pisiiwiikut uyuu e ishi kakwechimikut ekw kaa itaat, “Chekwaan wehchi wii pechi kakwechihiyekw. Peshuwaahkw maa shuuliyaawaapiskush, che kanawaapamak.”

¹⁶ Kaa miyaatwaau peyakw. Ekw kaa itaat, “Awen maak utaashtamuhkw e nuukuniyich utah kaye awen uyuu utishinihkaasun kaa masinaateyich.” Chii iteuch, “Chisheuchimaau Caesar aniyuu utaashtamuhkw kaye wiya anit masinaasuu.”

¹⁷ Jesus chii iteu, “Miyaahkw chisheuchimaau Caesar taan aniyuuh wiya tepiyeusiit, kaye maak miyaahkw Chishemanituu taan aniyuu wiya tepiyeusiit.” Nuwach maak chii maamishkaashtuweuch uyuu kaa ishi ayimihiikutwaau.

Jesus kaa aayimuutahk wanishkaanuyiche nipuwinihch uhchi

¹⁸ Sadduceech kaye chii pechi nituwaapamikuu Jesus. Eukw uchii ekaa uhchi taapwehtahkwaau che wanishkaanaakanuyich eshkw aweyuuh kaa nipiitwaau. Chii kakwechimeuch Jesus e itaatwaau,

¹⁹ “Chischinuhamaachesuu, Moses chii masinaham taan che ishi naanaakachihtaayihkw. Chii iteu anit, ‘Nipite naapeu e chii maak wiichiskweut ekaa maak uhchi utawaashiimuwaakwenich, aniyuu kaa uhchi taahchiskaakut wiichiinuu eukun aniyuu chipaa wiichimeyuu aniyuu wiichiskweu. Ekw maak chipaa ayaaweuch awaasha aniyaa ustesa an naapeu chechii uhpinihtaauchishtamuwaat.’

²⁰ Niishwaashch maak chii itashuuch naapeuch e chii wiichishaanihtutwaau. An ustesimaau chii niipuu. Paatimaa maak chii nipuu. Namui uhchi ayaaweuch awaasha aniyuu wiichiskweu.

²¹ Ekw aniyuu wiichishaan kaa uhchi taahchiskaakut kaa wiichimaayich aniyuu wiichiskweu. Kaye wiya maak uu naapeu chek chii puunipimaatisiyuu. Namui uhchi ayaaweuch awaasha kaye wiyawaau. Ekun mwehch kaa ispayit kaye an kutak wiichishaanimaau.

²² Chek misiwe anichii niishwaashch wiichishaanimaauch kaa wiichimaatwaau aniyuu iskweu. Misiwe e chii nipitwaau ekaa uhchi ayaawaatwaau awaasha. Chek maak chii puunipimaatisiyuu kaye wiya an iskweu.

²³ Taaniyuuh maak aniyuu che wiichiskweututaakut uu iskweu iskutak wanishkaanaakanuyichen aweyuuh kaa nipiitwaau. Wesh misiwe anichii niishwaashch naapeuch chii wiichimeuch uyuu iskweuh.”

²⁴ Ekw Jesus kaa itaat, “Namui chichischeyihtenaawaau taan e itashteyich Chishemanituu utayimuwin kaye namui chichischeyihtamuwaanaawaau Chishemanituu umaskuusiiwin uu kaa ishi kakwechimiyekw.

²⁵ Wesh uhpiskaatwaawenich anichii kaa nipitwaau, taapaa kata uhchi niipuuch kaye namui kata uhchi niipuuhaakanuuch, wesh aniyuu e iteyihtaakusiyich enchilh kihchikiishikuhch kaa ihtaayitwaauh ekun mwehch che iteyihtaakusitwaau.

²⁶ An maak netuu chischeyihtamuwekwe che uhpiskaawaakwenich kaa nipitwaau, namui aa kuuhchi ayimihtaawaanaawaau Moses taan kaa itisinahahk umasinahiikanihch, anit kaa tipaatutahk e niipiskuupaayich kaa uhchi ayimihiikut Chishemanituu, e chii itikuukupane, ‘Eukw niya uchishemanituumiwaau, Abraham, Isaac ekw maak Jacob.’

²⁷ Namui Uchishemanituumitutaakuu Chishemanituu aniyuu kaa nipiyich mikw aniyuu kaa pimaatisiyich uchishemanituumitutaakuu. Taapwe chiwanipayinaawaau chiyawaau taan e ishi taapwehtamekw.”

Maauch niikaan kaa iteyihtaakuhch kacheskwewin

²⁸ Peyakw maak naapeu wiishuwewiniyuu kaa chiskutamaachet chii pechi naachikaapuu, e chii pehtawaat aniyuu kaa ayimihiituyich. Chii pehtaweu maak Jesus taan kaa ishi kuiskw nishkweushihaayich aniyuuh Sadduceeh. Ekw kaa kakwechimaat, “Chekw kacheskwewin maauch niikaan e iteyihtaakuhch.”

²⁹ Jesus chii iteu, “Wiihtaakun Chishemanituu umasinahiikanihch an maauch niikaan e iteyihtaakuhch kacheskwewin. Itashteu, Nituhtamukw, chiyawaau Israel utiiniimh, Utipeyihchikeu Chichishemanituuminuu, eukuu mikw e peyakushit e Utipeyihchikeut.

³⁰ Saachihii Utipeyihchikeu Chichishemanituum, misiwe chitehiihch, kaye misiwe chitahchaahkuhch kaye misiwe chimituneyihchikanihch kaye maak misiwe chimaskuusiiwinihch.”

³¹ Chii ati iteu miin Jesus, “An miin kutach kacheskwewin chihchiwe e iteyihtaakuhch eukuu kaa itashtech, Saachihiich kutakach awenichii mwehch chii e ishpish saachihiisuyin. E tahtihkwaau kacheskwewinh eukw uyuu niishu kacheskwewinh maauch e iteyihtaakuhkwaauh.”

³² Chii itikuu aniyuu wiishuwewiniyuu kaa chiskutamaacheyitwaauh, “Chischinuhamaachesuu, chitaapwen. Chitaapwen e itweyin mikw e peyakushit Chishemanituu, namui ihtaau kutak.

³³ Kaye chitaapwen e itweyin. Chechii saachihaakanuut Chishemanituu misiwe mitehiihch, kaye misiwe mituneyihchikanihch, kaye misiwe ahchaahkuwinihch kaye misiwe maskuusiiwinihch. Kaye maak chechii saachihaat awen kutak aweyuuh muyaam wiya e ishpish saachihiisut. Uyuu chechii ishpish saachihiiwet awen etituu iteyihtaakuniyuu ishpishaat wii e machishtewehamuwaakanuut Chishemanituu miiwewinh maak awesiisa e chii nipahaakanuyich chechii machishtewehamuwaakanuut.”

³⁴ Jesus maak piyehtawaat uyuu e ishi kachehtaaweyihtamuuhtaakusiyich chii iteu, “Namui chiwaahyuwaapahtamuwaan Chishemanituu uchisheuchimaawin.” Namui maak uhchi ihtaau awen e tepeyimut etituu chechii ishi kakwechimaat chekwaayuu.

Aweyuuh weukusiitutaakut Christ

³⁵ Mekwaach Jesus e chiskutamaachet anite chisheayimiheukamikuhch chii kakwechimeu aniyuuh anit kaa ihtaayich, “Taanite chechii uhchi itwetwaau anichii wiishuwewiniyuu kaa chiskutamaachetwaau David e ihtaayich che uhchi aanische pimaatisiyich Christ.

³⁶ Kaa payehchisiyich Ahchaahkw chii ihtuutaakuu aniyaa David chechii itwet, Utipeyihchikeu chii iteu Nitipeyihchikemh, ute pechi apih nihiiwinihch paatish chii ashpashihiikwaawenich anichii kaa uhkaatiskwaau.

³⁷ Mechim David Nitipeyihchikem e chii ishinihkaataat Utipeyihchikeu. Taanite maak chechii uhchi ukusiitutawaat.” Aniyuu maak aweyuu kaa mista mihchetiyich kaa nituhtaakut Jesus nuwach chii miyuuhtaakuu.

Yaakwaamiishtuwaahkuch anichii ayimihewin wiishuwewiniyuu kaa chiskutamaachetwaau

³⁸ Mekwaach maak miin e chiskutamuwaat chii iteu, “Yaakwaamiishtuwaahkuch anichii wiishuwewiniyuu kaa chiskutamaachetwaau, wesh nituweyihtamuch chechii chisteyimaakanuutwaau. Miyeyihtamuch e pushchishkahkwaau kaa chinwekaniyikwaau akuhpa, kaye miyeyihtamuch e utinischenaakanuutwaau anite e mihchetinaanuyich.

³⁹ Kaye nituweyihtamuch anite maauch e paihtepitwaau chechii apihaakanuutwaau ayimiheukamikuhch, kaye e makushaanuyich chechii apihaakanuutwaau anite e uchimaaupinaanuyich.

⁴⁰ Utinamuweuch kaye misiwe taan e ishi tipiyeusiyich kaa paahpeyakuyich iskweuh kaye maak e ayimihaatwaau chineush ayimihaauch, ayimihehkaasuch maak mikw uyuu e ihtitwaau. Eukunich maak uchii ushte che aahkwaateyihtaakuniyich taan che ishi wiyaaskunikutwaau Chishemanituuh.”

Kaa peyakut iskweu upachishtinichewin

⁴¹ Jesus maak tipiskuuch anit kaa chii pachishtinikaanuyich ekut kaa apit. Chii mihchetinaanuuyuu anit e pachishtinikaanuyich. Chii kanawaapameu maak aweyuu e pechi pachishtinicheyich. Mihchetu aniyuuh kaa miisitisiyich aweyuuh mistahii chii pachishtinicheyuuh.

⁴² Chek chii uhchi takushin e peyakut iskweu, e chistimaatisiit, niishu e wiipaapischisiyich shuuliyaawaapiskusha chii pachishtinicheu. Uyuuh taapishkun shuuliyaawaapiskusha kaa pachishtinichet mikw peyakw sumaachiish chii iteyihtaakusiyuuh.

⁴³ Ekw Jesus kaa ayimihaat uchischinuhamuwaakanh. Chii iteu maak, “Chihchiwe chititinaawaau, kaa ishpish pachishtinichet an kaa peyakut iskweu kaa chistimaatisiit etituu wiya mishaayuu upachishtinichewin ishpish anichii kutakach kaa pachishtinichetwaau.

⁴⁴ Wesh anichii kutakach kaa pachishtinihkwaau ayuupayuuch aniyuu shuuliyaayuu kaa pachishtinihkwaau, uu maak kaa peyakut iskweu, aat e manesiit chii pachishtinam misiwe aniyuu ushuuliyaam aniyuu chipaa uhchi pimaachihiisuu.”