Mark 1 - Chishemanituu Utayimuwin: Kaa Uskaach Testament

John siikahaahtaacheu kaa ishi kacheskwet

¹ Ekut utah chehchipayihch miywaachimuwin e aayimuumaakanuut Jesus Christ Chishemanituu Ukusisa.

² Chii masinahamukupane aniyaanaa Isaiah kaa ishinihkaasut uchischiwehiichesuu uyuu e chii itweyikupanenh Chishemanituu, Niniikaanitishihwaau nitayimistamaachesiim, che niikaan ihtuutawaat aweyuu aschiihch kaa ihtaayich chechii ayeskuwiishtaaskwaau.

³ An awen che pechi niikaanitishihuuk anite pakwaatiskamikaahch kata papaa tepweu e itwet, “Ayeskawiihkamuwaahkw Utipeyihchikeu umeskanaam anit che pimuhtet, kuiskumuhtaawaahkw.”

⁴ Eukw maak uu John siikahaahtaacheu kaa aayimuumaakanuut. Anite maak pakwaatiskamikaahch chii papaa ihtaau e siikahaahtuwaat aweyuu kaye e kacheschimaat. Chii kacheschimeu aweyuuh chechii kweskaatisiyich kaye chechii siikahaahtuwaakanuutwaau ekw maak Chishemanituu che wepeyihtamaakutwaau umachihtwaawinawaau.

⁵ Mihchetu aweyuu kaa ihtaayich anite Judea aschiihch kaye Jerusalem kaa ishinihkaateyich ihtaawiniyuu chii pechi nituu nituhtaakuu. Mushe chii wiihtamuch taan kaa ishi machituutamuwaakupanenich ekw maak kaa siikahaahtaakutwaau John anite Jordan siipiihch.

⁶ Kaa mista piskwaakuniyich awesiisa upiiweyuuh chii uhchi ushihtaakanuuyuuh John uchekwaanimh, kaye muushuyaaniyaapii chii iteyihtaakuniyuu aniyuu chekwaayuu kaa upahkuhtehunit kaye kwaashkwaashkuhchishiisha ekw maak shuukaayuu aamuuwachistunihch kaa ihtakuniyich eukw uyuu kaa umiichimit.

⁷ Eukw maak uyuu kaa ishi kacheschimaat aweyuu, “Kata takushin awen uste e chisteyihtaakusit ishpishaat niya, namui mechim nitepicheyihtaakusin niya chechii nawepayihuyaan chechii aapihkunamuch umaschisiniyaapiih.

⁸ Nipii nitaapachihtaan e siikahaahtaatakuch wiya maak Kaa payehchisiyich Ahchaahkwa chika siikahaahtaakuwaau.”

Jesus kaa siikahaahtuwaakanuut

⁹ Jesus maak chii takushin Jordan siipiihch anite e uhtuhtet Nazareth kaa ishinihkaateyich ihtaawiniyuu anite Galilee aschiihch kaa ihtakuniyich. Chii siikahaahtaakuu maak John anite Jordan siipiihch.

¹⁰ Iskutak maak kepaat Jesus tiiwehch chii waapahtam kihchikiishikuyuu e uhchi aapahiipayihch kaye Kaa payehchisiyich Ahchaahkwa e pechi aashiitutaakut muyaam umiimiiu kaa ishinaakusit e ishinaakusiyich.

¹¹ Kihchikiishikuhch maak chii uhchi pehtaakusuu awen e itwet, “Eukw chiya Nikus naashch kaa saachihiitaan. Naashch taapwe chinaheyihtamihiyin.”

Jesus kaa kakwechihiikut machimanituuh

¹² Tiiwehch maak pakwaatiskamikaahch chii itishahuukuu Jesus Kaa payehchisiyich Ahchaahkwa.

¹³ Ekute kaa ihtaat nemitanuu chiishikaauh e kakwechihiikut machimanituu. Chii ihtaayuuh e kushtaatikusiitwaau awesiisa anite mikw maak enchil chii pechi wiichihiikuu.

Aniyuuh niishtam naapeuh Jesus kaa wiyaapamaat che uchischinuhamuwaakanit

¹⁴ Paatimaa maak mekwaach John siikahaahtaacheu chipahutuukamikuhch kaa ihtaat Jesus chii ituhteu anite Galileehch. Ekute anite kaa kacheskwet e waawiihtahk Chishemanituu umiywaachimuwiniyuu.

¹⁵ Chii papaa iteu, “Ekw wetihchipayihch an e chiishikaach e peshunaakuniyich Chishemanituu uchisheuchimaawin. Kweskaatisiikw, nakatamukw chimachihtwaawinawaauh, taapwehtamukw miywaachimuwin.”

¹⁶ E ati pimuhtet maak Jesus anite yaayeu Galilee saakahiikanihch chii waapameu nuutamesesuuh Simon ekw maak aniyuu wiichiiniyuu Andrew. Mekwaach chii nuutameseyuu ahiipii e aapachihaayich.

¹⁷ Jesus chii iteu uyuu naapeu, “Aashtamukw pechi nuushuushkuukw. Chika ihtuutaatinaawaau iinuuch chechii pitahuyaayekw muyaam e ishi pitahuyaayekw namesach.”

¹⁸ Tiiwehch maak chii nakateuch utahiipiiwaauh ekw kaa ati wiichewaatwaau Jesus.

¹⁹ Aniyuu maak e ati pimuhtetwaau Jesus chii waapameu James ekw maak wiichiiniyuu John, aniyuuh Zebedee ukusisiyuuh, mekwaach utuutiihch e ihtaayich e miishahwaayich utahiipiyuuh.

²⁰ Tiiwehch chii tepwaateu wiyaapamaat. Ekute maak anite utihch kaa uhchiskataatwaau uhtaawaau kaye aniyuu utaapachihaakanawaau ekw kaa papaa wiichewaatwaau Jesus.

Naapeu kaa piihchishkaakut machiahchaahkwa

²¹ Anite Capernaum kaa ishinihkaateyich ihtaawiniyuu ekute kaa ituhtetwaau, iskutak maak miin e Jewa ayimiheuchiishikaayich Jesus chii piihcheu anite ayimiheukamikuhch ekw kaa chiskutamaachet.

²² Chii maamishkaateyihtamihiikuuch maak aniyuu taan kaa ishi chiskutamaacheyich, wesh awen naashch kaa uchimaaweyihtaakusit chii itihtaakusuu. Namui uhchi itihtaakusiyuuh wii aniyuu wiishuwewiniyuu kaa chiskutamaacheyitwaauh.

²³ Sischikuuch maak chii uhchi piihcheu anit Jewa ayimiheukamikuhch naapeu machiahchaahkwa e piichishkaakut e tepwet.

²⁴ Chii iteu, “Ekaawii wiyesh ihtuutuunaan, chiya Jesus Nazareth kaa uhchiyin. Chichii pechi takushin aa chechii wanaachihiyaahch. Chichischeyimitin awen chiya, eukw chiya kaa payehchisiit Chishemanituu kaa pechi itishahwaat.”

²⁵ Jesus maak chii nishkuushtuweu e itaat, “Awash ekaa chistuh. Maachiih pechi wiiwiih anit uhchi an naapeu e ihtaat.”

²⁶ An maak machiahchaahkw chii ihtuutuweu aniyuu naapeu chechii mista uchipitikuyich kaye chii mista aashihkweyuu ekw kaa nakataat.

²⁷ Misiwe maak awen chii miskaateyihtamihiikuu uyuu kaa ispayiyich ekw kaa ititutwaau, “Chekwaan maak miin uu. Uschi chiskutamaachewin aa. E ayaat uu naapeu tipeyihchichewiniyuu waawaach machiahchaahkwa chechii pishichihiikut e wiishumaat.”

²⁸ Ekut maak kaa ati mishihtepayihch e ishi aayimuumaakanuut Jesus misiwe anite Galilee aschiihch itehche.

Mihchetu aweyuuh kaa miinuwaachihaat Jesus

²⁹ Tiiwehch maak chii wiiwiyuu aniyuu Jewa ayimiheukamikuyuu ekw anite Simon ekw maak Andrew e ihtaayich kaa ituhtet. James ekw maak John chii wiicheukuu.

³⁰ Aniyuu maak mekaach Simon usikusa chii aahkusiyuu e chii chishiteunikusiyich. Tiiwehch maak chii wiihtamuwaakanuu uyuu Jesus iskutak tekushihk.

³¹ Kaa nituwaapamaat uyuu iskweu kaa utinamuwaat utihchiyuu, ekw kaa wiichihaat e wanishkaayich. Chii nakatikuu maak an iskweu aniyuu kaa chishiteunikusiit. Kaa pisikuut ekw kaa ati aapatisit e mamiyuutuutuwaat.

³² An wetaakushich iskutak pehchishimut piisim, chii petuwaakanuu Jesus kaa aahkusiitwaau aweyuu kaye aniyuu machiahchaahkwa kaa piihchishkaakuyich.

³³ Misiwe awenichii anit ihtaawinihch kaa ihtaatwaau chii pechi maausikuwiyuuch anit wiiwiitamihch aniyuu waaskaahiikaniyuu.

³⁴ Mihchetu maak uyuu kaa aahkusiitwaau chii miinuwaachiheu Jesus, misiwe nanaahkuu kaa itaaspineyitwaauh kaye chii wiiwiitishihweu machiahchaahkwa. Namui uhchi pachishtineu uyuu machiahchaahkwa chechii nishkweushihiikut, wesh chii chischeyimikuu.

Jesus kaa kacheskwet Galileehch

³⁵ Wiipach maak chiyechishepaayaach chii wanishkaau ekw anite ekaa ihtaanuyich kaa ituhtet, ekute anite kaa ayimihaat.

³⁶ Simon ekw maak uwiichewaakanh chii nituu naanituwaapameuch Jesus.

³⁷ Iskutak maak kaa miskuwaatwaau chii iteuch, “Misiwe awen chinaanituweyimukw.”

³⁸ Chii itikuuch maak, “Kutak kaye ihtaawinh piihchetaau chechii kacheskweyaan anite wesh ekun wehchii pechi takushiniyaan.”

³⁹ Ekw maak misiwe kaa papaa ituhtet aniyuu Galilee aschiiyuu e kacheskwet Jewa ayimiheukamikuhch. Kaye chii wiiwiitishihweu nanaahkuu machiahchaahkwa mihchetu aweyuuh kaa piihchishkuwaayich.

Jesus kaa miinuwaachihaat naapeu kaa umichiiwaaspineyich

⁴⁰ Chii pechi naatikuu Jesus naapeu e maayaataniyich umichiiwaaspinewiniyuu e ayaayich. Chii uchihchiihkunipayihuyuu anit e ihtaat ekw kaa nitutamaakut chechii miinuwaachihaat. Chii itikuu, “Wii pechi wiichihiine chika chii ihtuuten chechii payehtisiyaan.”

⁴¹ Jesus maak naashch chii chistimaacheyimeu ekw kaa tashupayihtaat uspitun kaa taahtinaat e itaat, “Chiwii wiichihiitin, payehchisiih maak.”

⁴² Tiiwehch maak chii uhchi miyuunaakusuu an naapeu e chii miinuwaachihaakanuut aniyuu taan kaa itaaspinet.

⁴³ Ekw Jesus kaa itaat aniyuu naapeu suuhk e ayimihaat,

⁴⁴ “Nituhtuu maa che ititaan, ekaawii awen chika uhchi wiihtamuwaau taan kaa ispayin. Tiiwehch nituwaapam ayimiheuchimaau tekash che nituu chischeyimisk. Ekw che pachishtinaman an chipaa pachishtinen aniyaa Moses kaa itashuwet chipaa pachishtinikanuuyuu. Ekut che uhchi waapahtiiweyin taapwe ekw e payehtisiyin.” Ekw kaa chihchitishahwaat uyuuh naapeu.

⁴⁵ Kaa chistuhtet uu naapeu. Mikw maak yaapach chii waawiihtamuweu misiwe aweyuu. Uyuu maak e chii ihtit namui mechim uhchii piihcheyuu Jesus ihtaawinihch ekaa muushihaakanuyich. Ekw anite wiiwiitamihch aniyuu ihtaawiniyuu ekute mikw kaa ihtaat Jesus anite ekaa ihtaanuyich. Yaapach maak chii pechi nituwaapamikuu aweyuu nanaahkuu e uhtuhteyitwaau.