Luke 9 - Chishemanituu Utayimuwin: Kaa Uskaach Testament

Jesus kaa chihchitishahwaat kaa niishushaapuyich uchischinuhamuwaakanh

¹ Jesus chii maausikw wiishaameu kaa niishushaapuyich uchischinuhamuwaakanh. Kaa miyaat suuhkaatisiiwiniyuu kaye tipeyihchichewiniyuu chechii wiiwiitishihwaayich machiahchaahkwa kaye chechii miinuwaachihaayich nanaahkuu e itaaspineyitwaauh aweyuu.

² Ekw kaa chihchitishahwaat chechii nituu kakacheskweyich Chishemanituu uchisheuchimaawiniyuu e waawiihtamiyich eyuu chechii miinuwaachihaayich aweyuuh kaa aahkusiyich.

³ Chii itashumeu maak, “Uu che chistuhteyekw ekaawii chika uhchi ayaanaawaau chekwaan. Ekaawii ayaakw siskahuun, niimuutaan, miichim, shuuliyaau mechim kaye ayuwaak chichekwaanimuwaauh e chichishkamekw.

⁴ Kaye an waaskaahiikan taanite che piihtakahiikuwekwe, ekut anit che ihtaayekw paatishkaan nakatamekwe an ihtaawin.

⁵ Utihtamekwe maak ihtaawin ekaa wii piihtakahiikuyekwe, nakatamukw an ihtaawin. Che pahpuusiteshimuyekw, e nuukuhtaayekw e yaakwaamimekuch ekaa uhchi utinahkwaau miywaachimuwiniyuu.”

⁶ Ekw anichii chischinuhamuwaakanich kaa chistuhtetwaau anite nanaahkuu ihtaawinihch kaa ituhtetwaau e waawiihtahkwaau miywaachimuwiniyuu kaye e miinuwaachihaatwaau kaa aahkusiyich.

Herod taan kaa ishi wawaaneyihtahk

⁷ Iskutak maak chisheuchimaau Herod piyehtahk taan e ihtiyich Jesus, naashch taapwe chii wawaaneyihtamihiikuu wesh chii ihtaauch iinuuch e papaamaachimutwaau e itwetwaau, John siikahaahtaacheu uu, miin kaau pimaatisiyuu.

⁸ Chii ihtaauch miin kutakach e itwetwaau, “Eukw uu Elijah, miin kaau pimaatisiyuu.” Yaapach maak miin chii ihtaauch kutakach awenichii e itwetwaau, “Eukw uu peyakw weskach uchischiwehiichesuu miin kaau pimaatisiyuu.”

⁹ Herod maak chii itweu, “Awen uu kaa ishi maamishkaach itaachimaakanuut. Namui wii naanituu John, nicheshtinaahun e chii chimistikwaanehwaakanuut wiya John.” Ekw naashch kaa wii waapamaat aniyuuh Jesus.

Jesus kaa ashamaat niyaayinwaau chishemitaahtumitanuu iinuuh

¹⁰ Iskutak tekushihkwaau anichii chischinuhamuwaakanich kaa chihchitishahwaakanuutwaau ekw kaa wiihtamuwaatwaau Jesus taan kaa ihtitwaau kaa ispihtanihutwaau. Ekw kaa nakataatwaau aniyuu kaa mihchetiyich iinuuh, tipaan kaa ituhtetwaau e wiichewaatwaau Jesus anite Bethsaidahch e ituhteyich.

¹¹ Iskutak maak mihchetu awenichii kaa pehtahkwaau e chii chistuhteyich ekw kaa nuusuupaistuwaatwaau. Jesus maak chii miyeyihtam e takushiniitwaauh. Chii waawiihtamuweu Chishemanituu uchisheuchimaawiniyuu e iteyihtaakuniyich kaye chii miinuwaachiheu aniyuuh aweyuuh kaa nituweyihtamiitwaau chechii miinuwaachihaakanuyich.

¹² Shaash maak chii ati utaakushiyuu ekw anichii niishushaap chischinuhamuwaakanich kaa itaatwaau Jesus, “Chihchitishahuuch maa ekw anichii iinuuch che nituu naanituweyihtahkwaau chekwaayuu che miichitwaau kaye taanite che miyeyimutwaau che tipiskaayich. Taapaa ihtakun chekwaan utah wii.”

¹³ Ekw Jesus kaa itaat, “Chiyawaau miyaahkuch chekwaayuu che miichitwaau.” Chischinuhamuwaakanich maak chii iteuch, “Mikw niyaayin aaihkunaauch niishu maak namesach ekun e ishpish ihtakuhch chekwaan. Mikw kiipaa niyaan nituu utinamaahche miichim chechii tepahukutwaau uchii e tashitwaau awenichii.”

¹⁴ Wiyesh niyaayinwaau chishemitaahtumitanuu chii tashiichenich naapeuch anit e itashinaanuuhch. Jesus kaa itaat aniyuu chischinuhamuwaakanh, “Itaahkuch anichii iinuuch, naaniyaayinumitanuu chechii tahtupitwaau peyakw aniyuu e minepitwaau.”

¹⁵ Chischinuhamuwaakanich maak chii ihtuutamuch aniyuu kaa itashumaakanuutwaau ekw misiwe awen kaa waweyapit.

¹⁶ Ekw Jesus kaa utinaat aniyuu niyaayin aaihkunaauh kaye aniyuu niishu namesa, ishpimihch kaa iitaapit e nanaaskumaat Chishemanituu. Kaa papahkwenaat aniyuuh aaihkunaauh ekw kaa miyaat aniyuu uchischinuhamuwaakanh chechii maatinamuwaayich aniyuu iinuuh.

¹⁷ Misiwe maak awen chii miichisuu kaye chii tepimiichisuu, ekw aniyuuh uchischinuhamuwaakanh kaa maamuushtinamiyich aniyuu iskushtawaaniyuu. Niishushaap maak utipiiwath chii saakashchinihtaauch.

Peter kaa nisituunawaat Jesus e aawiyich Christ

¹⁸ Peyakwaau, Jesus chii ayimihaau mikw e peyakushit, uchischinuhamuwaakanh maak peschiish chii ihtaayuuh ekw kaa nituu kakwechimaat e itaat, “Awen niya e iteyimitwaau awenichii.”

¹⁹ Kaa itikut, “Kutakach awenichii John siikahaahtaacheu chititeyimikuch ekw kutakach aniyaanaa peyakw uchischiwehiichesuu Elijah kaa ishinihkaasut chititeyimikuch, ekw miin kutakach e ihtaatwaau weskach uchischiwehiichesuu miin kaau e pimaatisiit e iteyimiskwaau.”

²⁰ Ekw Jesus miin kaa kakwechimaat, “Chiyawaau maak wii, awen niya e iteyimiyekw.” Peter chii ishi nishkweushiheu, “Christ chii, eukw chiya Chishemanituu kaa itwet che pechi itishahwaat.”

Jesus kaa aayimuutahk che ishi wiisacheyihtahk kaye che nipit

²¹ Ekw Jesus kaa itashumaat uchischinuhamuwaakanh ekaa chechii wiihtamuwaayich kutak aweyuu aniyuu.

²² Ekw kaa itaat, “Iinuu Ukusisa iteyihtaakuniyuu chechii mistawaawiisacheyihtamiyich kaye chechii aatuweyimikuyich aniyuuh kaa niikaanapiitwaauh ayimiheuchimaauh, kaye aniyuuh kaa niikaanishkuwaayich iinuuh, kaye maak aniyuuh kaa chiskutamaacheyitwaauh wiishuwewiniyuu. Kata nipahaakanuu kaye, mikw maak nishtu chiishikaau ishpish kaau kata pimaatisiyuu.”

E nuushuushkuwaakanuut Jesus

²³ Ekw misiwe kaa itaat, “Awen waa nuushuushkuukwe ekush chipaa pachishtinam aniyuu wii taan waa ishi naniheyihtamihiisut, eshikum chiishikaauh chipaa utineu utaashiteyaahtikum ekw maak nipaa pechi nuushuushkaakw.

²⁴ Wesh awen kaa wii kanuweyihtamaasut upimaatisiiwin kata wanihtaau. An maak awen kaa wii pachishtinahk misiwe chekwaayuu taan kaa wii ihtuutahk mechim kaye upimaatisiiwin e wii pechi nuushuushkuut eukun an che miyaakanuut pimaatisiiwiniyuu.

²⁵ Ekw maak an awen kaa wii kanuweyihtahk upimaatisiiwin, nipite maak taanite chechii uhchi wiichihiikut aat chii wiihkuchihtamaasute misiwe chekwaayuu utah aschiihch wiya taan kaa ishi nituweyihtahk chechii ishi ayaat.

²⁶ Awen maak pimaameyimute niya uhchi kaye nitayimuwiniyuu uhchi eukuu che pimaameyimuhaat Iinuu Ukusisa iskutak miin takushiniyichen uchisteyihtaakusuwiniihch. Ekut che chischeyihtahkwaau awenichii e ishpish chisteyihtaakusiyich Iinuu Ukusisa wesh kata waapahtiiweuch Uhtaawiimaau ekw maak kaa payehchisiitwaau enchilich e ishpish chisteyihtaakusiyich.

²⁷ Chihchiwe chititinaawaau, taapwe e ihtaatwaau utah awenichii che waapahtahkwaau Chishemanituu uchisheuchimaawiniyuu mekwaach eshkw e pimaatisiitwaau utah aschiihch.”

Jesus kaa kweschinaakusit

²⁸ Wiyesh yaanaaneu chiishikaau Jesus uyeyuu kaa ishpish ayimitutahk chii chistuhtaheu Peter, John ekw maak James e chii wiichewaat wachiihch anite chechii nituu ayimihaatwaau.

²⁹ Mekwaach maak aniyuu e aayimihaat utaashtamuhkw chii kweschinaakuniyuu kaye uchekwaanim naashch taapwe chii piyekasch waapaayuuh mitun e chii waasikushteyikwaau.

³⁰ Sischikuuch maak chii uhchi niishiyuu naapeu e ayimihiikut Jesus. Eukunich aniyehkaanaanich Moses ekw maak Elijah.

³¹ Ekw kaa aayimuutamuwaatwaau Jesus shaash e peshunaakuniyich che nipit anite Jerusalemihch, aniyuu Chishemanituu kaa ishi wiishtaayich che ispayiyich. Naashch maak e miywaashteyich kihchikiishikw waashtewiniyuu chii waashteyuu anit waaskaa e ihtaatwaau.

³² Peter ekw maak anichii kutakach awenichii Jesus kaa chii wiichewaatwaau chii kuuhkushiwaakupanenich. Chii pekupayuuch iskutak maak wespaaweyihtahkwaau chii waapahtamuch waashtewiniyuu waaskaa Jesus e ihtaayich kaye chii waapameuch aniyuu niishu naapeu e wiichikaapuushtaakuyich.

³³ Iskutak maak anichii naapeuch waa nakataatwaau Jesus, Peter chii iteu, “Chischinuhamaachesuu nuwach miyeyihtaakun utah chechii ihtaawaauhchipane. Pachishtinaanh maa chechii ushihtaayaahch nishtu tipinuushimunh, paahpeyakw che ayaayekw, chiya, Moses ekw maak Elijah.” Peter maak namui tekash uhchi nisituhtam chekwaayuu wehchi itwet uyeyuu.

³⁴ Mekwaach maak eshkw e ayimit, kaskawanishkwa chii uhchi nuukusiyuu mitun tekash e ukaashteshkaakutwaau. Anichii maak chischinuhamuwaakanich naashch taapwe chii sechisuuch iskutak mitun e akunahukutwaau aniyuu kaskawanishkwa.

³⁵ Anit maak kaskawanishkuhch chii uhchi pehtamuch pehtaakusuwiniyuu, aweyuu e itweyich, “Eukw uu Nikus kaa saachihahk. Nituhtawaahkw.”

³⁶ Iskutak maak kaa chiish ayimit an awen, chii waapameuch Jesus e peyakukaapuyich. Ekw anichii chischinuhamuwaakanich namui uhchi papaamaachimuuch uyeyuu taan kaa ishi waapahtahkwaau e ispayiyich mekwaach anit.

Jesus kaa miinuwaachihaat naapesha machiahchaahkwa e chii piihchishkaakuyich

³⁷ Miin maak wiyaapaniyich chii niihchichuweuch aniyuu wachiyuu, chii mihchetiyuu maak aweyuu e pechi nachihiikut Jesus.

³⁸ Anit maak mekwesiinuu e mihchetinaanuuhch chii tepweu peyakw naapeu e itaat aniyuu Jesus, “Chischinuhamaachesuu, chipukuseyimitin chechii wiichihiit nikus, wesh eukw mikw uu e peyakushit nitawaashiim.

³⁹ Maashihiikuu niyaanikutehch machiahchaahkwa e ihtuutaakut sischikuuch chechii nuuhtaakusit. Ekw maak kaye e uchipitikut maan mitun wesh kata piishteutaahtam. Naashch nanehkaateyihtamihiikuu uyuu machiahchaahkwa ekaa maak wii nakatikut.

⁴⁰ Aat maak nichii kakwechimaauch chichischinuhamuwaakanich chechii wiiwiitishihwaatwaau uyuu machiahchaahkwa, namui maak uhchii ihtuutamuch.”

⁴¹ Jesus maak chii iteu aniyuu iinuu anit kaa ihtaayich, “Chiyawaau anuhchiish kaa pimaatisiyekw ekaa kaa ayaayekw taapwehtamuwin kaye ekaa kaa kweskaatisiyekw, namui kaye kuiskw chit ishi pimaatisiinaawaau. Taan che ishpish ihtaayaan utah e ihtaayekw yaakw chechii nisituhtamekw. Taan che ishpish ashuwaapamitakuch ekw chechii ayaayekw taapwehtamuwin. Peshuwaahkw an naapesh.”

⁴² Mekwaach maak e pechi naataat aniyuu Jesus an naapesh, machiahchaahkwa mitun chii kawepinikuu ekw kaa ihtuutaakut chechii uchipitikut. Jesus maak chii chistahamuweu aniyuu machiahchaahkwa kaa itaat chechii nakataayich aniyuu naapesha. Ekut maak kaa ati miinuwaatisiit an naapesh. Ekw Jesus kaa chiiwemiyaat aniyuu naapeu aniyeyuu ukusiyuu.

⁴³ Misiwe maak anichii iinuuch chii maamishkaateyihtamihiikuuch Chishemanituu usuuhkaatisiiwiniyuu. Mekwaach maak e maamishkaateyihtamihiikutwaau taan kaa ishi ihtuutamiyich Jesus, Jesus chii ayimiheu uchischinuhamuwaakanh e itaat,

Jesus miin kaa aayimuutahk che nipahaakanuut

⁴⁴ “Chischisikw yaaitei taan che ititakuch. Chika pachishtinaakanuuch iinuuch chechii ihtuutawaatwaau taan waa ihtuutuwaatwaau Iinuu Ukusisaan.”

⁴⁵ Ekw anichii chischinuhamuwaakanich namui uhchi nisituhtamuch. Namui uhchi chischeyihtamuch taan kaa wii ishi wiihtamaakutwaau Jesus, wesh eshkw namui uhchi miyaakanuuch chechii nisituhtahkwaau. Chii sechisuuch maak chechii kakwechihcheyimutwaau chekwaayuu uyuu kaa itweyich.

An awen maauch che chisteyihtaakusit anit e tashiyekw

⁴⁶ Chischinuhamuwaakanich maak chii machipayuuch e aashitemitutwaau awen anit e tashitwaau maauch che chesteyihtaakusit.

⁴⁷ Jesus maak chii chischeyimeu taan e ishi maamituneyihtamiitwaau, ekw kaa utinaat awaasha e apishiishiyich ekw kaa niipuuhaat anit uhpime e ihtaat. Kaa itaat aniyuuh uchischinuhamuwaakanh,

⁴⁸ “Awen e utinaat peyakw uyuu awaasha nitishinihkaasuwinihch uhchi, mwehch kaye niya e utinit ekun e ishinaakuniyich. An maak awen kaa utinit namayeu niya kaa utinit, aniyuuh kaa pechi itishahuyich eukw aniyuu wetinaat. Wesh an awen maauch nuuhtaash kaa iteyihtaakusit anit e tashiyekw eukun an maauch chesteyihtaakusit.”

An awen ekaa kaa nishkuushtaakuyihkw chiwiichihiikunuu

⁴⁹ Ekw John kaa itaat, “Chiskutamaachesuu, nichii waapamaanaan naapeu e wiiwiitishihwaat machiahchaahkwa chitishinihkaasuwiniyuu e aapachihtaat, ekw kaa chistahamuwachiht, wesin taapaa ute chiyaanuu e ihtaayihkw ishi wiichihiiweu.”

⁵⁰ Jesus kaa itaat, “Ekaawii chistahamuwaahkw. Wesh an awen ekaa kaa nishkuushtaakuyihkw chiwiichihiikunuu.”

Jesus kaa ituhtet Jerusalemihch

⁵¹ Wetaach maak chii ati peshunaakuniyuu Jesus kihchikiishikuhch che ishi utinaakanuut ekw naashch kaa iteyihtamihiikut yaaitei chechii ituhtet Jerusalemihch. Ekw maak kaa chistuhtet.

⁵² Mekwaach maak aniyuu e ati pimuhtet chii niikaanitishihweu aweyuuh anite aniyuu ihtaawiniyuu Samaritan iinuuh kaa ihtaayitwaauh, chechii nituu ayeskuushtaayich taanite chechii ihtaakupane aniyuu che tipiskaayich.

⁵³ Mikw maak aniyuuh iinuuh anit kaa ihtaayitwaauh namui uhchi wii piihtakahiikuu wesh chii chischeyimikuu Jerusalemihch e wii ituhtet.

⁵⁴ Iskutak maak anichii chischinuhamuwaakanich James ekw maak John kaa pehtahkwaau uyuu chii iteuch aniyuu Jesus, “Tipeyihchikeu, chinituweyiminaan aa chechii nituweyihtamaahch ishkuteu kihchikiishikuhch chechii uhchipayihch chechii wanaachihiikutwaau anichii iinuuch muyaam aniyaa Elijah kaa ihtuutahk.”

⁵⁵ Jesus maak chii kweschikaapuushtaweu kaa chistahamuwaat uyuu e ishi ayimiyich. Chii iteu, “Uu e iteyihtamekw namui Chishemanituu e ihtaat uhchipayuu,

⁵⁶ wesh Iinuu Ukusisa namui uhchi takushin chechii nishuuwanaachihtaawaat aweyuu upimaatisiiwiniyuu, chii takushin chechii pimaachihiiwet.” Ekw anite kutachiyuu ihtaawiniyuu kaa ituhtetwaau.

Taan e iteyihtaakuhch e nuushuushkuwaakanuut Jesus

⁵⁷ Mekwaach maak aniyuu e pimuhtetwaau chii nachishkaakuuch naapeu. Ekw an naapeu kaa itaat aniyuu Jesus, “Chika papaawiicheutin taanite che ituhtewane.”

⁵⁸ Ekw Jesus kaa itaat, “Mahcheshuuch ihtakuniyuu uwaatakuwaauh, piyeshiishach kaye ihtakuniyuu uwachishtunawaauh, mikw maak Iinuu Ukusisa, namui ayaayuuh taanit chechii waweyishiniyiyich chechii ayuwepiyich.”

⁵⁹ Ekw Jesus kaa itaat kutak naapeu, “Pechi wiicheuh.” Ekw an naapeu kaa itaat Jesus, “Utipeyihchikeu, pachishtinh pitamaa chechii nahiihkuuk nuuhtaawii puunipimaatisiite ekw maak yaakw che wiicheutaan.”

⁶⁰ Ekw Jesus kaa itikut, “Anichii mwehch kaa nipitwaau kaa iteyihtaakusitwaau iinuuch ekush kata nahiihkuweuch aniyuu utiiniimuwaau kaa nipiyich. Chiya maak, maachiih che papaamaachimuut Chishemanituu chisheuchimaawin.”

⁶¹ Miin kutak naapeu chii iteu aniyuu Jesus, “Utipeyihchikeu, chika papaawiicheutin, mikw maak niishtam nika chiiwen ekw che nituu waachiyemakwaau niichihiikuch kaye niichishaanich.”

⁶² Ekw Jesus kaa itaat, “Awen shaash e chihchipayihtaat e atushkuwaat Chishemanituu, muush maak e chiiwemaamituneyihtahk weskach utitaatisiiwin namui tepicheyihtaakusuu chechii atushchehkahtamuwaat Chishemanituu uchisheuchimaawiniyuu.”