Luke 8 - Chishemanituu Utayimuwin: Kaa Uskaach Testament

Anichii iskweuch Jesus kaa chii papaawiichewaatwaau

¹ Iskutak maak kaa chiishipayiyich uyuu ekw Jesus kaa papaaituhtet anite nanaahkuu ihtaawinihch e waawiihtahk miywaachimuwiniyuu e tipaatutahk Chishemanituu uchisheuchimaawiniyuu che utihchipayiyich. Chii wiicheukuu aniyuuh niishushaap uchischinuhamuwaakanh.

² Iskweuch kaye chii papaawiicheweuch, anichii machiahchaahkwa kaa wiiwiitishihwaakanuyich anit e ihtaatwaau uhchi. Kaye anichii e chii miinuwaachihaakanuutwaau nanaahkuu itaaspinewinh. Eukuu peyakw Mary Magdalene, an iskweu niishwaashch machiahchaahkwa kaa wiiwiitishihwaakanuyich anit uhchi e ihtaat.

³ Kaye Joanna chii wiichihiiweu. Uu iskweu Chuza chii ishinihkaasuyuuh unaapem, chii uchimaau aapatisiyuu, chisheuchimaau Herod chii atushkuweyuu. Kaye maak Susanna chii wiichihiiweu. Mihchetu maak miin kutakach iskweuch chii wiicheweuch Jesus. Tipiiwe maak ushuuliyaamuwaau chii aapachihtaauch uchii iskweuch e wiichihaatwaau Jesus kaye aniyuu uchischinuhamuwaakaniyuuh.

Naapeu kaa nihtaauchihchet

⁴ Ekw Jesus kaa wiihtamaachet chischinuhamaacheu tipaachimuwiniyuu. Mihchetu maak aweyuu nanaahkuu ihtaawinihch e chii uhtuhteyich chii pechi nishtawiyuuh chechii nituhtaakut. Eukw maak uyuu kaa ishi wiihtamuwaat.

⁵ “Peyakwaau chii ihtaau nihtaauchihchesuu e nituu asihchewepinahk shuuminh. Pasch maak anite meskanaahch chii paahpahchishiniyuu e ati taahtahkushkaataakanuyikwaau kaye piyeshiisha e ati miichiyich aniyuu shuumin kaa usewepinahk.

⁶ Ekw pasch kaa pahchihtihkwaau anite e asiniiyuuhch. Iskutak maak naanaache kaa nihtaauchihkwaau chek chii ati paasteuh wesh namui miihkwaach uhchi nipiiuskamikaau anit kaa pahchihtihkwaau.

⁷ Ekw aniyuu shuumin kaa paahpahchishtihkwaauh anite kaa kaasutewaaskuhkwaau niipisiyaahtikw e ihtakuniyikwaauh, ekute anite chek kaa ati asich nihtaauchihkwaau. Chek maak namui uhchi miyu nihtaauchinh aniyuu kaa nihtaauchihtaakanuuhkwaau e chii chipishkaatuumakahkwaau aniyuu kaa kaawaaskuhkwaauh niipisiyaahtikw.

⁸ Pasch anite e miyuskamikaayich ekute kaa pahchihtiniyikwaau, uyuu maak naashch chii miyu nihtaauchiniyuuh, ekw maak mistahii miichim kaa nihtaauchiniyich anit shuuminihch uhchi, taan aniyuuh kaa wii ishpish nihtaauchihtaat. An awen kaa uhtaaukaaut e nahiihtahk maak, yaakwaau kata wii nituhtam.”

E itaapatahkwaau tipaachimuwin chiskutamaachewin

⁹ Ekw Jesus uchischinuhamuwaakanh kaa kakwechimaatwaau taan e ishi wiihtamaachemakaniyich uyuu tipaachimuwiniyuu.

¹⁰ Ekw kaa itaat, “Chichii miikunaawaau chiyawaau chechii chischeyihtamekw an chekwaan kutakach awenich ekaa maayaakanuutwaau chechii chischeyihtahkwaau, eukuu chechii chischeyihtamuwekw Chishemanituu uchisheuchimaawin. Uchii awenichii, tipaachimuwin chiskutamaachewiniyuu aapataniyuu e aayimuutamuwaakanuutwaau Chishemanituu uchisheuchimaawiniyuu. Aat e waapahtahkwaau namui chii nisituunamuch, kaye e pehtahkwaau namui chii nisituhtamuch.”

E ishi wiihtamaachemakahch uu tipaachimuwin

¹¹ “Chika wiihtamaatinaawaau taan e ishi wiihtamaachemakahch uu tipaachimuwin kaa wiihtamaatakuch. Muyaam Chishemanituu utayimuwin eukun e iteyihtaakusit an shuumin.

¹² An shuumin anite yaaiskanuu kaa pahchishihk mwehch eukw e ishinaakusitwaau anichii kaa pehtahkwaau Chishemanituu utayimuwiniyuu. Machimanituu tekushiniyich meskamakutwaau aniyuu Chishemanituu utayimuwiniyuu taan aniyuuh kaa ishi pehtahkwaau e iteyimikutwaau ekaa chechii taapwehtahkwaau kaye ekaa chechii pimaachihutwaau.

¹³ Ekw an shuumin anite e asiniyuuniyich kaa pahchishihk mwehch eukw e ishinaakusitwaau awenichii kaa pehtahkwaau Chishemanituu utayimuwiniyuu e taapwehtahkwaau kaye maak naashch e miyeyihtamihiikutwaau. Muyaam maak an nihtaauchihchikanh ekaa yaaich nihtaauchiniyikwaau utipiih eukw e ishinaakusitwaau anichii aat weipishchiish kaa taapwehtahkwaau. Iskutak kakwechihiiwewiniyuu nechiskahkwaau ekut shaash pehchishihkwaau.

¹⁴ Ekw maak an kutak shuumin kaa pahchishihk anite e kaasutewaayikwaau mashkushiih e ihtakuniyikwaauh mwehch eukw e ishinaakusitwaau awenichii kaa nituhtamuwaatwaau Chishemanituu utayimuwiniyuu. Mikw maak aniyuu utaapwehtamuwinawaau chek wanaachihtaakanuuyuu wesaa e aayimeyihtamihiikutwaau e ispayiyich upimaatisiiwiniwaahch kaye miisitisiiwiniyuu e maamituneyihtamihiikutwaau, kaye maak mikw aschiiyuu chekwaayuuh e maamituneyihtamihiikutwaau chechii uhchi miyeyihtahkwaau. Ekw maak namui chii ishi nihtaauchuuch taan aniyuuh chipaa ishi nihtaauchuuch.

¹⁵ An maak shuumin kaa miyu nihtaauchit e miyuskamikaayich aschiihch mwehch eukw e ishinaakusitwaau anichii awenichii kaa nituhtahkwaau Chishemanituu utayimuwiniyuu. Nanihiihtamuch, kaye kanuweyihtamuch. Kanawaach taapwehtamuch e siipiiwesiitwaau ekw maak chek e miyu miinishuutwaau upimaatisiiwiniwaahch.”

Waashtewin tipaachimuwin

¹⁶ “Namui awen akunaham waashtenamaakaniyuu e chii saskahahk maak shiipaa nipewinihch chechii ashtaat. Wehpemashtaau aniyuu waashtenamaakaniyuu ekw maak misiwe awen e pechi piihchet waapahtahtam aniyuu e waashteyich.

¹⁷ Misiwe chekwaan ekaa kaa nuukuhtaakanuuhch kata nuukuhtaakanuu, ekw an kaa akunahiikanuuhch kata musheshteu. Aniyuuh chekwaayuuh eshkw ekaa uhchi chischeyihtaakanuuhkwaau eshkw kata chischeyihtaakanuuh.

¹⁸ Yaakwaamiih maak taan e ishi nituhtaman, wesh an awen yaakwaau kaa nituhtahk etituu chika nisituhtam. Ekw an awen ekaa yaakwaau kaa nituhtahk chika wanichischisuu yaapach taan aniyuuh kaa iteyihtahk e nisituhtahk.”

Jesus uwaahkumaakan

¹⁹ Peyakwaau Jesus ukaawii kaye maak wiichiinuu chii wii waapamikuu, namui maak uhchii naatikuu, wesaa e chii mihchetinaanuyich anit.

²⁰ Chek maak kaa itikut aweyuu Jesus, “Chikaawii kaye chiichiinuuch wiiwiitamihch anite niipuuch e wii waapamiskwaau.”

²¹ Jesus maak chii iteu, “Muyaam nikaawii kaye niichiinuuch nititeyimaauch anichii kaa nituhtahkwaau Chishemanituu utayimuwiniyuu kaye maak kaa ihtuutamuwaatwaau.”

Jesus kaa chistahamuwaat yuutinisuuh kaye kiskanh

²² Peyakwaau Jesus chii iteu uchischinuhamuwaakanh, “Nete maa ishi aashuuhahtaau akaamihch.” Ekw kaa mushaauhahkwaau.

²³ Naanaache maak kaa muushaaweyaasitwaau ekw kaa nipaat Jesus. Chek sischikuuch kaa chiishtiniyich anit saakahiikanihch. E maamisichihtiyich kiskanh chii puusipahiituyuu utuutuwaahch. Chek nuwach kaa kushtaatikuniyich anit e ihtaatwaau.

²⁴ Chek anichii chischinuhamuwaakanich kaa pekunaatwaau Jesus e itaatwaau, “Chischinuhamaachesuu, chischinuhamaachesuu, chika nishtaapaawenaanuu.” Jesus maak chii wanishkaau, kaa itwet aniyuu e yuutiniyich chechii puunipayiyich kaye aniyuu kiskanh kaa itaat, “Chiyaamisiikw.” Tiiwehch maak chii ywaashtiniyuu.

²⁵ Ekw kaa itaat aniyuu uchischinuhamuwaakanh, “Taanite chitaapwehtamuwinawaau.” Chii kushtaachuuch maak eyuu chii miskaateyihtamuch e itwetwaau, “Awen uu waawaach yuutinisuu kaye kaskanh e pishichihiikut e chistahamuwaat.”

Jesus kaa miinuwaachihaat naapeu kaa piihchishkaakuyich machiahchaahkwa

²⁶ Jesus ekw maak uchischinuhamuwaakanh chii aashuuhamuch anite ishi Gerasene iinuuh utaschiihch, Gerasene kaa ishinihkaateyich. Kwestehchekaam Galilee aschiihch ihtakun uu aschii.

²⁷ Iskutak maak kaa kapaat Jesus chii nachishkaweu naapeu anite utenaahch e uhchiyich, e piihchishkaakuyich machiahchaahkwa. Shaash maak weskach anite namui uhchi chichishkam uchekwaanimh uu naapeu. Namui waaskaahiikanihch uhchi ihtaau mikw anite chiipaischiihch muush chii ihtaau.

²⁸ Uu maak naapeu iskutak wiyaapamaat aniyuu Jesus, chii ayaashihkweu kaa ati pahchishihk uhchishkuu anit e ihtaayich. Ekw kaa tepwet e itwet, “Jesus, chii kaa Ukusiitutaask Chishemanituu maauch kaa ispeyihtaakusit, taan waa ishiihkuyin. Ekaawii pechi nanehkaateyimuhiih chiwii ititin.”

²⁹ Eukw uyuu kaa ishi tepwet uu naapeu wesh Jesus chii itwekupane aniyuu machiahchaahkwa chechii wiiwiyich anite uhchi aniyuu naapeu e ihtaayich. Uu maak naapeu mihchetwaau chii tipeyimikuukupane aniyuu machiahchaahkwa. Muush maak chii naanaakachihaakanuu an naapeu. Aat maak kaye e maahkupiteyikwaau usith eyuu utihchii yaapach chii pischipitam maan aniyuu e chii mamechimaapiskahiikanuyikwaau upuuschiweyaapiyuu. Chii ihtuutaakuu maak aniyuu machiahchaahkwa chechii ituhtet anite pakwaatiskamikaahch.

³⁰ Jesus maak chii kakwechimeu, “Taan e ishinihkaasuyin.” Kaa itikut, “Kaa mihchetitwaau.” Wesh chii mihchetiyuu machiahchaahkwa e piihchishkaakut an naapeu.

³¹ Ekw maak kaa kakwechimaatwaau Jesus ekaa chechii itishahukutwaau anite machishkutehch.

³² Chii ihtaauch maak kuuhkuushach e miichisutwaau anite e piskutauhkaayich. Anichii maak machiahchaahkuch chii kakwechimeuch Jesus chechii itishahukutwaau anite chechii piihchishkuwaatwaau aniyuuh kuuhkuusha. Eukun maak kaa ishi ihtuutawaat Jesus.

³³ Anichii maak machiahchaahkuch, iskutak kaa wiiwiiskuwaatwaau aniyuu naapeu ekw aniyuu kuuhkuushah kaa aashuupiihchishkuwaatwaau. Ekw anichii kuuhkuushach kaa yaamitaauhchipahiitutwaau anite ishi saakahiikanihch, kaa nishtaapaawetwaau.

³⁴ Iskutak maak anichii kaa naanaakachihaatwaau kuuhkuusha kaa waapahtahkwaau taan kaa ispayiyich chii ushimuuch, kaa nituu wiihtahkwaau anite ihtaawinihch kaye anite waaskaa wiiwiitamihch aniyuu ihtaawiniyuu.

³⁵ Chii takushinuuch maak iinuuch e chii pechi nituu waapahtahkwaau taan kaa ispayiyich. Iskutak wetihtaatwaau Jesus chii waapameuch aniyuu naapeu kaa piihchishkaakuyich machiahchaahkwa e apiyich peshuch anit Jesus usitiihch. Chii waaspisukupane eyuu maak chii chiyaameyihtaakusuu. Chii kushtaatuuch maak wiyaapamaatwaau uyuu naapeu.

³⁶ Anichii maak kaa waapahtahkwaau taan kaa ispayiyich chii tipaachimushtuweuch iinuu e takushiniitwaau taanite kaa uhchi miinuwaatisiyich uyuu naapeu machiahchaahkwa kaa chii piihchishkaakuyich.

³⁷ Anichii maak iinuuch anite Gerasenehch kaa uhchiitwaau chii sechisuuch uyeyuu uhchi kaa ispayiyich ekw kaa kakwechimaatwaau Jesus chechii nakatikutwaau. Ekw Jesus kaa puusit utuutuwaau ekw kaa che chiiwehut.

³⁸ An maak naapeu kaa chii piihchishkaakut machiahchaahkwa naashch chii wii wiichewekupane Jesus. Jesus maak chii chihchitishahweu e chii itaat,

³⁹ “Maachiih, chiiwe. Che nuukuhtaayin taan kaa ishi ihtuutamaask Chishemanituu.” Eukw maak kaa ihtit an naapeu. Misiwe anit ihtaawinihch chii papaamaachimuu taan kaa ihtuutamaakut Jesus.

Jairus utaanisa kaye an iskweu Jesus utakuhpiyuu kaa taahtinamuwaat

⁴⁰ Iskutak miin kaau kaa mishikaat Jesus anite kwestehchekaam saakahiikanihch chii miyeyihtamiyuu mihchetu aweyuu, wesh misiwe chii ashuwaapamikuu.

⁴¹ Ekw kaa takushihk naapeu Jairus e ishinihkaasut, e uchimaahkahtahk Jewa ayimiheukamikuyuu, kaa pechi uchihchiihkunipayihut peshuch Jesus usitiihch naashch e nituweyimaat chechii takushiniyich anite wiichihch,

⁴² wesh aniyuu kaa peyakushiyich utaanisa kaa niishushaapuneshiyich, chekaat chii puunipimaatisiyuu. Mekwaach maak aniyuu e ati pimuhtet Jesus mihchetu aweyuu chii siihchiskaakuu.

⁴³ Chii ihtaau maak kaye anit iskweu niishushaapunh e chii wanihtaat umihkw. Misiwe chekwaayuu taan kaa ishi ayaat chii miyekupane nituhkuiin e chiishiihkawaat chechii wiichihiikut, namui maak waach peyakw uhchii wiichihiikuu.

⁴⁴ Uspiskuniihch kaa uhchi pechi naataat Jesus, kaa taahtinamuwaat anit e waniskwekaniyich aniyuu utakuhpiyuu. Tiiwehch maak chii chipihtaashikuuniyuu umihkw.

⁴⁵ Ekw Jesus kaa itwet, awen kaa pechi taahtinit. Namui maak awen uhchi chistuu ekw Peter kaa itaat, chischinuhamaachesuu, mihchetuuch awenichii e siihchiskaashkwaau. Yaapach maak e itweyin awen kaa pechi taahtinit.

⁴⁶ Jesus maak chii itweu, “Nichischeyihten awen e chii pechi taahtinit. Wesh nichii muushihtaan maskuusiiwin e wiiwiipayihch utah e ihtaayaan.”

⁴⁷ Iskutak maak kaa chischeyihtahk an iskweu e chischeyimaakanuut taan kaa ihtit ekw kaa pechi ituhtet anite niikaanaanihch. Kaa ati uchihchiihkunipayihut uhchishkuu anta Jesus e ihtaayich e nanamipayit e ishpish sechisit. Ekut maak anit uhchishkuu misiwe aweyuu e ihtaayich kaa wiihtahk chekwaayuu wehchii taahtinaat eyuu maak tiiwehch e chii miinuwaachihaakanuut.

⁴⁸ Ekw Jesus kaa itaat aniyuu iskweu, “Iskweu, chitaapwehtamuwin chimiinuwaachihiikuun. Maachiih chiyaameyihtamuwinihch ishi.”

⁴⁹ Mekwaach maak e ayimit Jesus, chii takushinuu naapeu Jairus e ihtaayich e uhtuhtet chechii pechi itaat aniyuu Jairus, “Shaash namui pimaatisiyuu chitaanis. Ekaawii maak ekush utamihii chischinuhamaachesuu.”

⁵⁰ Iskutak maak piyehtahk uyuu Jesus chii iteu aniyuu Jairus, “Ekaawii aayimeyihta. Mikw taapwehta, wesh chika miyu pimaatisiyuu chitaanis.”

⁵¹ Ekw kaa ituhtetwaau Jairus uwaaskaahiikanimiihch. Iskutak kaa utihtahkwaau aniyuu waaskaahiikaniyuu, namui kutak aweyuu uhchi pachishtineu Jesus chechii wiicheukut e piihchet, mikw Peter, John, James ekw maak aniyuu uniichihiikw an ishkwesh.

⁵² Misiwe awenichii anit kaa ihtaatwaau chii maatuuch e mihtaahtaatwaau aniyuu ishkwesha. Ekw Jesus kaa itikutwaau, “Ekaamaa maatukw. Taapaa wesin nipuu, mikw nipaau.”

⁵³ Ekw kaa ushinawaatwaau wesh chii chischeyimeuch taapwe e nipiyich aniyuu ishkwesha.

⁵⁴ Kaa piihchetwaau Jesus anite waaskaahiikanihch, kaa nituwaapamaat aniyuu ishkwesha, kaa utinamuwaat utihchiyuu e itaat, “Ishkwesh wanishkaa.”

⁵⁵ Ekw maak kaau kaa piihchishkaakut utahchaahkwa an ishkwesh, kaa uhchi wanishkaapahtaat. Ekw Jesus kaa itashuwet chechii ashamaakanuyich.

⁵⁶ Aniyuu maak uniichihiikuyuu naashch chii kushkupayuu. Ekw kaa itikutwaau Jesus ekaa chechii wiihtamuwaatwaau aweyuu taan kaa ispayiyich.