Luke 7 - Chishemanituu Utayimuwin: Kaa Uskaach Testament

Jesus kaa miinuwaachihiimaat nitupayuuchimaau utaapachihaakaniyuu

¹ Iskutak Jesus kaa chiish ayimitutahk uyuuh chekwaayuuh e pehtaakut iinuuh ekw kaa ituhtet anite Capernaum kaa ishinihkaateyich ihtaawiniyuu.

² Chii ihtaau maak anit peyakw nitupayuuchimaau naashch e chii saachihaat utaapachihaakan. Mekwaach maak naashch chii aahkusiyuu aniyuu utaapachihaakan chekaat e puunipimaatisiyich.

³ Ekw maak uu nitupayuuchimaau iskutak kaa pehtahk taan e itaachimaakanuyich Jesus chii itishahweu Jewa iinuuh kaa niikaanishkuwaayich anite Jesus e ihtaayich chechii nitutamuwaayich chechii pechi miinuwaachihaayich aniyuu utaapachihaakan.

⁴ Iskutak maak uchii naapeuch wetihtaatwaau Jesus naashch taapwe suuhk chii aayihkamiheuch chechii ihtuutamiyich uyeyuu e itaatwaau, “Naashch taapwe suuhk pukuseyihtamihiikuu chechii miinuwaachihaakanuyich utaapachihaakan uu nitupayuuchimaau. Tepicheyihtaakusuu maak chechii ihtuutamuwaakanuut uyeyuu,

⁵ wesh saachiheu nitiiniiminaan kaye nichii ushihtwaakunaan ayimiheukamikuyuu.”

⁶ Ekw Jesus kaa wiichewaat. Iskutak maak piyeshuwaapahtamuwaatwaau aniyuu uwaaskaahiikanimiyuu ekw an nitupayuuchimaau kaa itishahwaat uwiichewaakanh Jesus e ihtaayich chechii itaayich, “Utipeyihchikeu, ekaawii aayimihiisuu, wesh namui nitepicheyihtaakusin chechii pechi piihcheyin niwaaskaahiikan,

⁷ kaye maak namui nitepicheyihtaakusin chechii nituu nachishkaataan. Mikw maak tepiyaahch itweyine chechii miinuwaatisiit nitaapachihaakan kata miinuwaatisiyuu.

⁸ Wesh kaye niya ihtaauch nuuchimaamach e pishichihiikwaau kaye maak ihtaauch shimaakanishach e wiishumakwaau. E itak peyakw shimaakanish ‘Anite ituhte,’ tiiwehch ekute anite e ituhtet. Ekw kutak e itak, ‘Aashtam,’ tiiwehch takushinuu. Ekw kaye kutak e itak nitaapachihaakan, ‘Uu maa ihtuutah,’ eukw aniyuu e ihtuutahk.”

⁹ Iskutak Jesus piyehtahk uyuu naashch taapwe chii maamihchihiikuu utaapwehtamuwiniyuu. Ekw kaa kweschikaapuushtawaat aniyuu kaa nuushuushkaakut kaa itaat, “Chititinaawaau, namui waawaach utah Israelihch eshkw nuuhchi waapamaau awen e ishpish suuhchitaapwehtahk.”

¹⁰ Iskutak maak miin kaau kaa chiiwetwaau anichii kaa itishahwaakanuutwaau Jesus e ihtaayich, chii waapameuch aniyuu aapachihaakan kaa aahkusiyich e miyu ayaayich.

Uschiniichuu kaa wanishkaanaakanuut nipuwinihch uhchi

¹¹ Paatimaa maak Jesus chii ituhteu ihtaawinihch Nain e ishinihkaateyich. Mihchetu aweyuuh kaye uchischinuhamuwaakanh chii wiicheukuu.

¹² Iskutak kaa utihtahkwaau anite e uhchi piihtukaanuyich aniyuu ihtaawiniyuu chii nachishkaweuch iinuuh e uhchi pimuhtahaayich e chii puunipimaatisiyich naapeu, che nituu chiskashtaatwaau. Ukaawii maak aniyaa naapeu chii peyakuyuu. Eukw maak aniyuu mikw kaa peyakushiikupanen ukusisa an iskweu. Chii mihchetiyuu maak aweyuu e chii wiicheukut e nituu chiskahaakanuyich aniyaa ukusisa.

¹³ Iskutak maak Utipeyihchikeu wiyaapamaat aniyuu iskweu, naashch chii chistimaacheyimeu ekw kaa itaat, “Ekaawii maatuh.”

¹⁴ Chii naatam aniyuu tehtinikaniyuu kaa taahtinahk ekw maak anichii kaa tahkunihkwaau aniyuu chii chipihchikaapuuch. Ekw Jesus kaa itwet, “Wanishkaa uschiniichuu.”

¹⁵ Ekw an kaa nipit naapeu kaa uhchi asamitapit, kaa uhchi ayimit ekw Jesus kaau kaa miyaat aniyuu iskweu aniyuu ukusisa.

¹⁶ Misiwe maak anit kaa tashitwaau awenichii chii sechisuuch ekw kaa chishtaachimaatwaau Chishemanituu e itwetwaau, “Chichii utihtikunuu e chisteyihtaakusit uchischiwehiichesuu. Kaye maak chii itweuch, Chishemanituu pechi wiichiheu utiiniim.”

¹⁷ Misiwe maak e ispichiskamikaayich Judea aschiiyuu anite maak waaskaa chii pehtaakuniyuu Jesus taan kaa ihtit.

Jesus kaa aayimuumaat John Siikahaahtaacheu

¹⁸ John siikahaahtaacheu uchischinuhamuwaakan chii wiihtamaakuu misiwe chekwaayuu taan kaa ishi ihtuutamiyich Jesus. Ekw John kaa wiishaamaat niishu uchischinuhamuwaakanh.

¹⁹ Kaa itishahwaat uyuu chechii ishi kakwechimaayich Utipeyihchikeu, “Eukw aa chiya Christ an chipaa takushinikupane maak eshkw che ashuwaapamaauchihtipane kutak chechii takushihk.”

²⁰ Ekw maak iskutak wetihtaatwaau Jesus chii iteuch, “John siikahaahtaacheu nipechi itishahukunaan chechii kakwechimitaahch, eukw aa chiya Christ an chipaa pechi itishahwaakanuu maak eshkw che ashuwaapamaauchihtipane chechii takushinit.”

²¹ Mekwaach maak aniyeyuu Jesus chii miinuwaachiheu mihchetu aweyuuh, nanaahkuu e itaaspineyitwaauh, kaye machiahchaahkwa e chii wiiwiitishihwaat kaye e chii ihtuutawaat aniyuuh ekaa kaa waapahtamiyich chechii waapahtamiyich

²² Ekw Jesus e nishkweushihaat chii iteu, “Chiiwekw, che wiihtamuwekw John taan kaa ishi waapahtamekw kaye taan kaa ishi pehtamekw. Wiihtamuwaahkw e waapahtamiitwaauh aniyuu ekaa uhchii waapahtamiyich, e pimuhteyich aniyuu ekaa uhchii pimuhteyitwaauh, kaye maak e payehchisiitwaauh aniyuu kaa ayaayich e maayaataniyich e umichiinaanuyich. Kaye e pehtamiyich aniyuu ekaa uhchii pehtamiyich. Kaye miin kaau e wanishkaayich aniyuu kaa nipiitwaau. Kaye miywaachimuwiniyuu e waawiihtamuwaakanuyich aniyuu kaa chistimaatisiyich.

²³ Shaweyihtaakusuu an awen ekaa che niyehtaaweyimikwe.”

²⁴ Iskutak maak kaa chistuhteyich aniyuu John kaa itishahwaat Jesus e ihtaayich ekw Jesus kaa aayimuumaat John anite e mihchetinaanuyich e itwet, “Awen kaa iteyimekw che waapamekw iskutak kaa nituwaapamekw John nete pakwaatiskamikaahch. Mwehch mashkushii taan e itaashtihch mikw anite e ishiiwech e ishi naweyaashtihch ekun e iteyihtaakusit awen naashch e nihiishaakuuchimaakanuut. Ekun aa kaa iteyimekw John e iteyihtaakusit.

²⁵ Awen maak kaa iteyimekw che waapamekw. Namui naanituu wii awen e miywaashpisut. Wesh anichii kaa miywaashpisutwaau naashch taapwe weyuutisiyuuch, anite maak chisheuchimaau uwaaskaahiikanimiihch ekute e ihtaatwaau.

²⁶ Awen maak uu anite kaa nituwaapamekw. Awen aa e uchischiwehiichesuut. Ehe, chiwiihtamaatinaawaau eukuu uchischiwehiichesuu John, wiya uste iteyihtaakusuu ishpishaat kutak awen kaa uchischiwehiichesuut.

²⁷ Eukuu John kaa aayimuumaakanuut anite Chishemanituu utayimuwinihch kaa itashtech, Nika niikaanitishihwaau awen chechii ayeskuwiihkahk aniyuu meskanaayuu anit che pimuhteut.”

²⁸ Jesus maak chii iteu, “Chiwiihtamaatinaawaau, tahtu uchischiwehiichesuuch kaa pimaatisiitwaau namui uste iteyihtaakusuuch taan e iteyihtaakusiyich John siikahaahtaacheu. Yaapach maak an awen maauch nuuhtaash kaa iteyihtaakusit kihchikiishikw chisheuchimaawinihch uste wiya chisteyihtaakusuu ishpishaat John.”

²⁹ Misiwe maak aweyuu chii nituhtaakuu Jesus mechim aniyuu maauch kaa machaatisiitwaau kaa iteyimaakanuyich, aniyuu kiipaa kaa maamuushtinamiyich chisheuchimaau shuuliyaayuu kaa itaapatisitwaau. Eukunich uchii kaa nanihiihtamuwaakupanenich aniyuuh taan kaa ishi nituweyihtamiyich Chishemanituu, chii siikahaahtaakuwaakupanenich John.

³⁰ Ekw anichii Phariseech kaye anichii kaa chiskutamaachetwaau ayimihewin wiishuwewiniyuu chii aatuweyihtamuweuch aniyuu taan kaa itashumuweyich Chishemanituu. Namui uhchi nituweyihtamuch chechii siikahaahtaakutwaau John.

³¹ Ekw maak Jesus kaa itwet, “Taan e iteyihtaakusitwaau anuhchiish awenichii anuhchiish kaa pimaatisiitwaau.

³² Maau e iteyihtaakusitwaau. Mwehch awaashach anite e metuwetwaau wiiwiitamihch ekaa maak chii nanihiiwehiitutwaau taan waa ishi metuwetwaau. E tepwaatitutwaau, e itwetwaau, ‘E niipuunaanuuhch nichii wii ishi metuwenaan e chistuhcheyaahch e ihtiyaahch, namui maak kuuhchi niiminaawaau, kaye nichii nikamunaan e chistimaastaakuhkwaau nikamuwinh namui maak kuuhchi maatuunaawaau.’

³³ Iskutak maak John siikahaahtaacheu kaa takushihk namui meshikum uhchi miichisuu, namui kaye uhchi minihkweu shuuminaapuuyuu, chichii itaawaau maak machiahchaahkwa e piihchishkaakut.

³⁴ Chii pechi takushinuu Iinuu Ukusisa e miichisut kaye e minihkwet. Chichii itwenaawaau maak, ‘Kanawaapamaahkw maa uu naapeu, nuwach kaa ukaasichimit kaye nuwach wiihchipeu, e uwiichewaakanit umachaatisiyuuh, kaye aniyuuh kaa maamuushtinamiyich Chisheuchimaau shuuliyaayuu kaa itaapatisitwaau.’

³⁵ Anichii kaa taapwehtamuwaatwaau Chishemanituu ukachehtaaweyihtamuwiniyuu kata nuukuhtaauch upimaatisiiwiniwaahch taapwe e cheshtinaateyihtaakuniyich Chishemanituu ukachehtaaweyihtamuwin.”

Jesus kaa tuuminamiyich usith kaa machaatisiyich iskweu

³⁶ Jesus peyakwaau chii wiishaamikuu Pharisee Simon e ishinihkaasuyich chechii wiichimiichisuumaat, ekw maak kaa ituhtet anite uwaaskaahiikanimiihch ekw kaa waweyapit.

³⁷ Anit maak aniyuu utenaayuu chii ihtaau iskweu naashch e machaatisiit. Iskutak maak an iskweu piyehtahk Jesus e chii wiishaamaakanuyich anit aniyuuh Pharisee wiichiihch chechii miichisuyich, chii ituhteu anite, e chii ituhtataat e miywaashiyich puutayuu e asiniiyuuniyich, e wiihchimaakusiyich tuuminikaniyuu e piihchishtiniyich anit.

³⁸ Mekwaach maak Jesus e uhpimeshihk anit e miichisutwaau, an iskweu chii niipuu anite itehche Jesus usitiihch, e maatut. Aniyuu maak e uhchikuwaapit chii nipiyuuhtaaweu Jesus usith. Ekw kaa uchihchiihkunapit ustikwaaniyaapii e aapachihtaat e paahkusitenaat. Kaye maak e uchehtamuwaat kaye e tuuminamuwaat aniyuu e wiihchimaakusiyich tuuminikaniyuu.

³⁹ An maak Pharisee kaa wiishaamaat Jesus, iskutak wiyaapamaat aniyuu iskweu aniyuu e ihtiyich chii iteyimeu, “Chipaa chischeyimeu uyuu iskweu e ishpish machaatisiyich kaa taahtinikut taapwe e uchischiwehiichesuukwe.”

⁴⁰ Jesus kaa ayimihiikut e itikut, “Simon, chiwii ititin chekwaan.” Simon kaa itwet, “Chiskutamaachesuu, pechi wiihtamuu chekwaan an.”

⁴¹ Ekw Jesus kaa tipaachimushtuwaat e itaat, “Chii niishuuch naapeuch e chii masinahamuwaatwaau naapeu shuuliyaayuu. Peyakw an niyaayinwaau mitaahtumitanuu chii masinahamuweu ekw an kutak niyaayinumitanuu.

⁴² Namui maak uhchii taapishtwaakuu taapishkun aniyuu naapeu ekw kaa kaasiisinahamuwaat aniyuu taan chipaa ishpish taapishtwaakuu. Taan maak eukw aniyuuh e niishiyich naapeu uste che saachihiikut.”

⁴³ Simon maak chii iteu, “Kiipaa aniyuu maauch mistahii kaa masinahamaakut eukun aniyuu maauch che saachihiikut.” Jesus kaa itaat, “Ehe, taapwe.”

⁴⁴ Ekw aniyuu iskweu kaa kanawaapamaat Jesus ekw kaa itaat aniyuu Simon, “Chiwaapamaau aa uu iskweu taan e ihtit. Kaa pechi piihcheyaan utah chiichihch namui mechim kuuhchi pechi miin nipii chechii chishtaapautaayaan nisith. Wiya maak chii chishtaapautaau nisith uhchikuwaapuwinihch uhchi, kaye chii paahkuham nisith ustikwaaniyaapii e aapachihtaat.

⁴⁵ Kaa pechi piihcheyaan utah namui kuuhchi pechi uchemin, wiya maak namui eshkw uhchi puuniyuu e uchehtahk nisith kaa ishpish pechi piihcheuch.

⁴⁶ Namui kaye kuuhchi tuumiskunen nistikwaan, wiya maak chii pechi tuuminam nisith e wiihchimaakusiyich tuuminikaniyuu.

⁴⁷ Chiwiihtamaatin, aniyuu naashch e saachihiiwet ekut wehchi nuukuniyich mihchetu machihtwaawinh e chii wepeyihtamuwaakanuut. Awen apishiish kaa wepeyihtamuwaakanuut apishiish saachihiiweu.”

⁴⁸ Ekw Jesus kaa itaat aniyuu iskweu, “Chiwepeyihtamaakuun chimachihtwaawinh.”

⁴⁹ Anichii maak kutakach awenichii anit kaa apitwaau, chii maamituneyihtamuch uyeyuu e ititutwaau, “Chekw naapeu uu waawaach chechii wepeyihtamaachet machihtwaawinh.”

⁵⁰ Jesus maak chii iteu aniyuu iskweu, “Chitaapwehtamuwinh chipimaachihiikun. Maachiih maak chiyaameyihtamuwin che ayaayin.”