Luke 23 - Chishemanituu Utayimuwin: Kaa Uskaach Testament

Taan kaa ishi kakwechimikut Jesus Pilate

¹ Misiwe maak maamuu e tashitwaau chii ituhtaheuch Jesus anite Rome chisheuchimaau e ihtaayich, Pilate kaa ishinihkaasuyich.

² Ekw nitamukw kaa ishi mamishimaatwaau e itwetwaau, “Uu maa naapeu nimiskawaanaan e machikacheschimaat nitiiniiminaanh, e chistahamuwaat chechii chiishiihkawaayich chisheuchimaau shuuliyaayuu kaye e wiihtamuwaat wiya e aawit Christ, chisheuchimaau e itahiisut.”

³ Pilate maak chii kakwechimeu e itaat, “Chiya aa Jewa iinuuch uchisheuchimaamuwaau.” Jesus maak chii nishkweushiheu e itaat, “Ekun e itweyin.”

⁴ Ekw Pilate kaa itaat aniyuuh kaa niikaanapitwaau ayimiheuchimaauh kaye aniyuuh iinuuh anit kaa maausikuyich, “Namui mitun nimiskamuwaan machihtwaawiniyuu chechii ayaat uu naapeu.”

⁵ Ekut etituu suuhk kaa wii taapwetwaau e itwetwaau, “Uu naapeu machipayihtaasuu taan e ishi chiskutamaachet misiwe e ishpishaayich Judea aschiiyuu. Galileehch chii uhchi chihchipayihtaau e chiskutamaachet ute maak chii ishi chiskutamaacheu Jerusalemihch.”

Jesus kaa ituhtahaakanuut Herode ihtaayich

⁶ Iskutak maak kaa pehtahk aniyeyuu Pilate, chii kakwechimeu, “Galileehch aa uhchiyuu uu naapeu.”

⁷ Iskutak maak chescheyihtahk Pilate Galileehch e uhchiikupanen Jesus ekw kaa itishahwaat Herod e ihtaayich wesh Galilee aschiihch chii chisheuchimaawiyuuh. Mekwaach maak anit Jerusalemihch chii ihtaau Herod.

⁸ Iskutak maak Herod wiyaapamaat Jesus naashch taapwe chii sichiyesuu wesh chii pehtam nanaahkuu e ishi tipaachimaakanuyich kaye shaash naashch taapwe weskach chiwii waapamekupane. Chii pukuseyihtam kaye chechii waapamaat Jesus e ihtuutamiyich maamishkaach chekwaayuuh.

⁹ Iskutak piyesuwaakanuyich Jesus, Herod chineush memehch chii ishi kakwechimeu. Namui maak wiyesh uhchi ishi nishkweushihiikuu.

¹⁰ Anichii maak kaa niikaanapitwaau ayimiheuchimaauch kaye anichii kaa chiskutamaachetwaau wiishuwewiniyuu chii niipuuch anite suuhk e ayimitwaau nanaahkuu chekwaayuuh e ishi mamishimaatwaau Jesus.

¹¹ Ekw maak Herod kaye ushimaakanshiimh chii wiyaahuuch Jesus e maayeyimaatwaau kaye aayaahch e ihtuutawaatwaau e pushchishkamutiyaatwaau akuhpiyuu e miywaashiyich. Ekw maak Herod kaau kaa chiiwetishihwaat Jesus, Pilate e ihtaayich.

¹² Ekut maak anit iskunaak kaa uhchi wiichewaakanitutaatutwaau Herod ekw maak Pilate wesh anite utaahch chii uhkaatituuch.

Jesus kaa wiyaaskunaakanuut

¹³ Pilate chii nishtuuneu aniyuuh kaa niikaanapitwaau ayimiheuchimaauh, Jewa iinuuh kaa niikaanishkuwaayich kaye aniyuuh iinuuh anit kaa ihtaayich chechii ayimihaat.

¹⁴ Ekw kaa itaat, “Chichii peshuwaawaau uu naapeu utah e ihtaayaan e Itekw e chii machikacheschimaat iinuuh e itaat chechii nishkuushtuwaayich chisheuchimaau. Nichii nituu chischeyimaau utah uhchishkuu e ihtaayekw namui maak nimiskamuwaan taan kaa ishi machituutamukwe.

¹⁵ Herod kaye namui uhchi miskamuweu kaa machituutamiikwen, wesh miin kaau chii pechi chiiwetishiheu. Uu naapeu namui chekwaayuu uhchi machituutam chechii uhchi iteyihtaakuniyich chechii nipahaakanuut.

¹⁶ Ekw maak nika itashuwaataau chechii papasistehwaakanuut ekw maak che pachishtinak,” ekun kaa itwet Pilate.

¹⁷ Eshikum pipun maak iskutak wetihchipayihch miyaaskaacheu makushewin kaa ishinihkaatech, Pilate chipaa pachishtinekupane peyakw aweyuu e chii chipahwaakanuyich.

¹⁸ Ekw anichii iinuuch kaa ishi maamuu tepwetwaau, “Nipahaahkw Jesus. Barabbas eukw pachishtinaahkw.”

¹⁹ Uu maak naapeu Barabbas chii chipahwaakanuukupane wesh chii chihchipayihtaakupane e machipayihkahtuwaakanuyich chisheuchimaau anit Jerusalemihch. Eyuu maak chii nipahekupane aweyuu.

²⁰ Pilate maak chii wii pachishtineu aniyuu Jesus ekw miin kaa kakwechimaat aniyuuh iinuuh chechii pachishtinaat Jesus.

²¹ Ekw maak kaa ishi aashihkwetepwetwaau, “Chiistaaskuhwaahkw, chiistaaskuhwaahkw.”

²² Eukw ekw nishtwaau Pilate kaa itaat, “Chekw machituutamuwiniyuu maak kaa ihtuutahk uu naapeu aniyuu che uhchi nipahaakanuukupane. Nika itashuwaataau chechii papasistehwaakanuut ekw che pachishtinak.”

²³ Ekw anichii iinuuch yaapach kaa ishi tepwetwaau naashch suuhk e nituweyimaatwaau Jesus chechii chiistaaskuhwaakanuyich. Chii shaakuuchipitamuch maak.

²⁴ Ekw Pilate nitawaach kaa itwet chechii ihtuutaakanuyich uyuu kaa ishi nituweyihtamiyich.

²⁵ Kaa pachishtinaat aniyuu naapeu Barabbas kaa ishinihkaasuyich an kaa chihchipayihtaakupane e machipayihkahtuwaakanuyich chisheuchimaauh kaye e chii nipahiiweyikupanen. Ekw anichii iinuuch kaa pachishtinamuwaakanuutwaau chechii ihtuutuwaatwaau Jesus taan kaa wii ihtuutuwaatwaau.

Jesus kaa chiistaaskuhwaakanuut

²⁶ Mekwaach maak e ati pimuhtahaatwaau Jesus anite che chiistaaskuhwaakanuyich, chii nachishkaweuch naapeu Simon e ishinihkaasuyich, Cyrene ihtaawinihch e uhchiyich, mekwaach utenaahch e wii pechi ituhteyich. Chii maakuneuch maak kaa miyaatwaau aniyuu aashiteyaahtikw chechii wanikaatihwaayich, ekw kaa ati nuushuushkuwaayich Jesus.

²⁷ Mihchetu maak aweyuu chii nuushuushkaakuu Jesus kaye iskweuh chii maatutaakuu kaye chii muushkuwaatikuu.

²⁸ Ekw Jesus kaa kweschikaapuushtawaat aniyuu iskweuh kaa itaat, “Chiyawaau iskweutikw Jerusalemihch kaa uhchiyekw, ekaawii muushkuwaasikw, chiyawaau muushkuwaatisikw, kaye chitawaashiimuwaauch muushkuwaataahkuch.

²⁹ Wesh eshkw etituu chika aayiman ekut maak che iinaanuuhch, ‘Shaweyihtaakusuuch anichii iskweuch ekaa nihtaa uhchi ayaawaatwaau awaasha, anichii ekaa nihtaa uhchi nuushaanihaausutwaau.’

³⁰ Che ishpish aayimihch maak uu che nanehkaateyimunaanuuhch chika nituweyihtamuch awenichii teyakuch chechii pachishtahukutwaau wachiih maak chechii akunahukutwaau wachiisha ishpish wii chechii wawiisacheyihtahkwaau.

³¹ Wesh uu e ishpish ihtakuhch nanehkaateyimuwin mekwaach e chikaskaahtikuut mistikw taan che ishpish ihtakuhch nanehkaateyimuwin paahkuhtakuute.” Ekun kaa itaat Jesus aniyuuh iskweuh kaa muushkuwaatikut.

³² Chii niishuuch maak chimutiskach kaye wiyawaau e ituhtahaakanuutwaau anite che asichinipahaakanuutwaau Jesus nipahaakanuyichen.

³³ Iskutak maak wetihtahkwaau aniyuu wachiishiyuu, Ushtikwaanikan kaa ishinihkaateyich, ekut kaa chiistaaskuhwaatwaau Jesus aashiteyaahtikuhch. Ekw aniyuuh niishu chimutiska patutesiish anit, iituu e ihtaat chii akuchiniyuu.

³⁴ Ekw Jesus kaa itwet, “Nuuhtaa, wepeyihtamuuch, wesh namui chischeyihtamuch taan e ihtitwaau.” Ekw anichii shimaakanishach kaa chaahkahuututwaau, ekut kaa uhchi wiyeyihtahkwaau aweyuu che ayaayich aniyuuh uchekwaanimiyuuh.

³⁵ Chii naaniipuuch anite awenichii e kanawaapitwaau e maayeyimikuyich aniyuu Jewa iinuuh kaa niikaanishkuwaayich e itweyich, “Chii wiichiheu kutak aweyuuh, kata wiichihiisuu maak taapwe Christ e aawiikwe, aniyuu Chishemanituu kaa wiyaapamaat.”

³⁶ Shimaakanishach kaye chii maayeyimeuch Jesus, ekw kaa naataatwaau peshuch kaa wii minihaatwaau e wiishikaakamiyich shuuminaapuuyuu.

³⁷ Chii iteuch kaye, “Wiichihiisuu maak taapwe e aawane Jewa uchisheuchimaamuwaau.”

³⁸ Chii chikamuhtaakanuyikupane maak masinahiikanishiyuu utaashiteyaahtikumihch anit ishpimiishiish Jesus ustikwaanihch e itashteyich, “Eukw uyuu Jewa iinuuch uchisheuchimaamuwaau.”

³⁹ Peyakw an chimutisk anit kaa chiistaaskuhwaakanuut kaye wiya chii maayeyimeu Jesus e itaat, “Namayeu aa maak chiya Christ. Wiichihiisuu, kaye maak niyaan, wiichihiinaan.”

⁴⁰ An maak kutak chimutisk kaa nishkweushihaat aniyuu wiichichimutiska e itaat, “Namui aa chikushtaau Chishemanituu. Chichii ishi wiyaaskunikunaanuu taapishkuuch wiya e ishi wiyaaskunaakanuut.

⁴¹ Chiyaanuu maak ishinaakun chechii chiistaaskuhukuyihkw taan kaa ishi machituutamuhkw. Uu maak naapeu namui uhchi machituutam.”

⁴² An maak chimutisk chii iteu aniyuu Jesus, “Chischisiitutuuh iskutak takushiniyine e chisheuchimaawiyin.”

⁴³ Jesus kaa itaat, “Chihchiwe chititin, anuhchiish chika ihtaanaanuu Paradise, anite e miyeyihtaakuhch e ihtaanuuhch.”

Jesus kaa nipit

⁴⁴ Wiyesh maak e aapihtaachiishikaach ekw kaa tipischipayihch kaa ati ukaashteyaach misiwe e ishpishaat an aschii. Paatishkaan nishtu kaa ispayihch ekw miin kaa ati waasheyaach.

⁴⁵ Anite maak chisheayimiheukamikuhch kaa akutech aakuuyekahiikan tekash chii taaschipayuu.

⁴⁶ Jesus maak chii ishi tepweu, “Nuuhtaawii, chiya e ihtaayin nipachishteyimaau nitahchaahkw chechii kanuweyimat.” Iskutak maak uyeyuu kaa itwet ekw kaa nipit.

⁴⁷ An maak shimaakanishuuchimaau iskutak kaa waapahtahk taan kaa ispayiyich, chii chishtaachimeu Chishemanituu kaye chii itweu, “Cheshtinaash taapwe chii kuiskutaatisiiche uu naapeu.”

⁴⁸ Iskutak maak anichii iinuuch kaa pechi kanawaapitwaau kaa waapahtahkwaau taan kaa ispayiyich, chii chiiweuch e utataamaaschikanehusutwaau e waapahtiiwetwaau e ishpish misimeyihtahkwaau.

⁴⁹ Misiwe maak anichii iinuuch kaa miyu chischeyimaatwaau Jesus kaye anichii iskweuch kaa papaawiichewaakupunenich Jesus Galileehch uhchi, waahyuushiish anite chii niipuuch e kanawaapitwaau.

Jesus kaa chiskahaakanuut

⁵⁰ Chii ihtaau maak anit naapeu Joseph e ishinihkaasut Judea aschiihch, Arimathea e ishinihkaateyich Jewa ihtaawiniyuu e chii uhchiit. Chii kuiskupimaatisiikupane kaye naashch chii miyeyihtaakusikupane uu naapeu,

⁵¹ kaye wiya chii ashuwaapahtamukupane Chishemanituu uchisheuchimaawiniyuu chechii utihchipayiyich kaye chii wiichihiiweu Jewa iinuu e niikaanishkuwaakanuyich. Namui maak uhchi naheyihtamukupane taan kaa ishi wiyeyihtamiyich che ihtuutawaayich Jesus kaye namui uhchi niskumuu chechii ihtuutawaakanuyich aniyuu taan kaa ihtuutawaakanuyich.

⁵² Chii nituwaapameu Pilate kaa nitutamuwaat Jesus wiiyuuyuu.

⁵³ Ekw maak kaa niihtinahk aniyuu miiyuuyuu aashiteyaahtikuhch uhchi, kaa piskweyetinahk machunishihch kaye kaa nituu chiskashtaat anite e chii waatikwaapiskahiikanuyich. Namui maak wiiskaat uhchi aapataniyuu aniyuu kaa waatikwaapiskahiikanuyich anite kaa ashtaawaat Jesus wiiyuuyuu.

⁵⁴ Eukw uu e chiishikaach kaa chii ayeskuwiihkaakanuuhch miyaaskaacheu makushewin kaye maak shaash chii peshunaakun che Jewa ayimiheuchiishikaach.

⁵⁵ Anichii maak iskweuch Galileehch kaa uhchi wiichewaatwaau Jesus chii wiicheweuch aniyuuh Joseph. Chii waapahtamuch maak aniyuu chiipaikamikuyuu kaye taan kaa itashtaakanuyich Jesus wiiyuu anite.

⁵⁶ Ekw maak kaa chiiwetwaau kaa nituu ayeskuushtaatwaau aniyuu kaa wiihchimaakusiyikwaau mashkushuu kaye tuuminikan aniyuuh che aapachihtaatwaau e miyuhkahkwaau aniyuu miiyuuyuu. Aniyuu maak Jewa utayimiheuchiishikaamiyuu chii aasteyeskusiyuuch wesh ekun kaa ishi itashuwaataakanuutwaau Chishemanituu ukacheskwewinihch che ihtiwaakupanenich.