Luke 20 - Chishemanituu Utayimuwin: Kaa Uskaach Testament

Taan kaa ishi kakwechimaakanuut Jesus

¹ Peyakwaau Jesus e chischinuhamuwaat aniyuuh iinuuh anite chisheayimiheukamikuhch kaye e waawiihtahk miywaachimuwiniyuu aniyuuh kaa niikaanapiitwaau ayimiheuchimaauh ekw maak aniyuuh kaa chiskutamaacheyitwaauh wiishuwewiniyuu kaye aniyuuh kaa niikaanishkuwaayich iinuuh chii pechi nituwaapamikuu,

² ekw kaa itikut, “Wiihtamuunaan maa, chekwaan wehchi ihtuutaman uu kaa ihtuutaman. Awen kaa itashumisk uu chechii ihtuutaman.”

³ Jesus maak chii nishkweushiheu e itaat, “Chika kakwechimitinaawaau chekwaan. Nishkweushihiikw maak.

⁴ Awen kaa itashumaat John siikahaahtaacheu chechii siikahaahtuwaayich aweyuuh, Chishemanituu aa maak naapeu.”

⁵ Chii machipayuuch maak anit wiyawaau e itwetwaau, “Itweyihkwe, ‘Chishemanituu chii itikuu,’ chika itikunuu, ‘chekwaan maak wehchi ekaa uhchi taapwehtawekw.’

⁶ Maak itweyihkwe, ‘Naapeu kaa itashumikut aniyuu kaa ihtit,’ ekw uchii iinuuch utah kaa ihtaatwaau chika nipahiikunuuch e paahpimusinaatahuutahkwaau. Wesh mitun taapweyimeuch John e chii uchischiwehiichesuyich.”

⁷ Kaa nishkweushihaatwaau Jesus e itwetwaau, “Namui nichischeyimaanaanh aweyuu kaa itashumikut John chechii siikahaahtuwaat aweyuuh.”

⁸ Jesus kaa itaat, “Kaye niya namui chika uhchi wiihtamaatinaawaau awen kaa pechi itashumit uu chechii ihtuutamaan.”

Kaa nihtaauchihchetwaau kaa tipaachimaakanuutwaau

⁹ Jesus kaye chii wiihtamuweu uyuu chiskutamaacheu tipaachimuwiniyuu e itaat, “Naapeu chii ushihtaau shuuminaahtikw nihtaauchihchikan aschiiyuu, ekw pitamaa kaa pachishtishuwaatahk aweyuuh chechii naanaakachihtamaakut. Ekw kaa chistuhtet, waahiyuu e ihtakuniyich aschiiyuu kaa ituhtet. Chii itaapichiyuu maak.

¹⁰ Iskutak maak wetihchipayiyich che maamuushtinikanuuyikwaau aniyuuh miinisha anit mistikuhch kaa nihtaauchihkwaau chii itishahweu peyakw utaapachihaakan chechii nituwaapamaayich aniyuuh kaa naanaakachihtaayitwaau aniyuu utaschii chechii miikut wiya taan chipaa ishi ayaau. Mikw maak anichii kaa naanaakachihtaatwaau aniyuuh nihtaauchihchikanh chii kushiihkaweuch aniyuu aapachihaakanh kaau kaa chiiwetishihwaatwaau e pishikuhteyich.

¹¹ Ekw an kaa tipiyeusiit aniyuu nihtaauchihchikan aschiiyuu miin kutak aapachihaakanh chii itishahweu. Mikw maak anichii kaa naanaakachihtaatwaau aniyuuh nihtaauchihchikanh yaapach chii kushiihkaweuch aniyuu, kaye chii maayeyimeuch ekw kaa chiiwetishihwaatwaau e pishikuhteyich.

¹² Ekw an kaa tipiyeusiit aniyuu nihtaauchihchikan aschiiyuu miin kutak aapachihaakanh kaa itishahwaat. Anichii maak kaa naanaakachihtaatwaau eukw ekw uyuu kaa mishwaakanihkaataatwaau, ekw maak kaa wiiwepinaatwaau.

¹³ Ekw an kaa tipiyeusiit aniyuu nihtaauchihchikan aschiiyuu chii maamituneyihtam taan chipaa chii ihtuu. Chek kaa iteyihtahk, ‘Nika itishahwaau niya tipiiwe nikus kaa saachihak. Chika chisteyimeuch waapamaatwaawenich.’

¹⁴ Eukw maak kaa ihtit. Anichii kaa naanaakachihtaatwaau iskutak wiyaapamaatwaau chii itituuch, ‘Eukw uyuu an kuuchimaaminuu ukusisa. Uyuu nihtaauchihchikan aschiiyuu wiya chika aashuumiyaakanuu. Nipahaataau. Ekw maak uyuu utaschii chiyaanuu che tipiyeusiyuuhkw.’

¹⁵ Ekw maak kaa wiiwiitishinaatwaau anit uhchi shuuminaahtikw nihtaauchihchikan aschiihch kaa nituu nipahaatwaau.” Ekw Jesus kaa kakwechimaat aniyuuh kaa tipaachimushtuwaat, “Taan maak che ihtuutawaat an uchimaau aniyuu kaa naanaakachihtaayich unihtaauchihchikanh.”

¹⁶ “Kiipaa che chiiwet an uchimaau che nipahaat aniyuuh naapeu ekw che miyaat kutak aweyuu chechii naanaakachihtaayich aniyuu nihtaauchihchikanh.” Iskutak maak anichii iinuuch piyehtahkwaau uyuu, chii iteuch, “Kamaa ekaa wiiskaat chii ispayihch uu.”

¹⁷ Chii kanawaapameu maak ekw kaa itaat, “Taan e itwemakahch maak Chishemanituu utayimuwinihch kaa itashtech, Chii aataweyimeuch kaa waaskaahiikanihchetwaau aniyuu asinii chihchiwe e aapatisiyich e chiihcheyaayich.”

¹⁸ Kaa ati itwet miin Jesus, “Awen maak tahkuhchipayite aniyuu asinii chika piikushin, ekw maak an asinii pahchishinite aweyuu e ihtaayich mitun chika piisiskaweu muyaam yekaau che ishinaakusiyich.”

Chipaa chiishiihkawaakanuu aa Chisheuchimaau

¹⁹ Anichii maak kaa chiskutamaachetwaau wiishuwewiniyuu ekw maak anichii kaa niikaanapitwaau ayimiheuchimaauch tiiwehch chii wii maakuneuch Jesus. Wesh chii chischeyimeuch wiyawaau e chii aayimuumikutwaau kaa wiihtamiyich aniyuu chischinuhamaacheu tipaachimuwiniyuu. Mikw maak namui uhchi maakuneuch e chii kushtaatwaau aniyuu iinuuh.

²⁰ Ekw mikw kaa naanaakachihtaatwaau che ishpish miyupayich chechii maakunaatwaau. Chii itishahweuch maak naapeuh anite Jesus e ihtaayich memehch chechii ishi kakwechimaatwaau, e wii naanituu pisiiwiyaatwaau chechii itweyich chekwaayuu chechii uhchi maakunaatwaau. Ekw maak chii maakunaatwaawenich ekw anite chipaa ituhtaheuch Rome chisheuchimaau e ihtaayich, aniyuu chipaa wiyaaskunikuyuu.

²¹ Ekw maak uchii naapeuch kaa kakwechimaatwaau Jesus e itaatwaau, “Chischinuhamaacheu, chichischeyimitinaan chekwaan e itweyin kaye taan e ishi chiskutamaacheyin e taapwemakahch. Kaye chichischeyimitinaan misiwe peyakunihch e iteyimitwaau awenichii, kaye misiwe peyakunihch taapwe e ishi chiskutamuutwaau Chishemanituu utiteyihtamuwiniyuu chechii ishi pimaatisiitwaau.

²² Ekw maak netuweyimitaahch chechii wiihtamuyaahch, itashteu aa wiishuwewinihch Rome chisheuchimaau chechii miyaakanuut aniyuu shuuliyaayuu kaa chiishiihkamiyich aweyuu.”

²³ Jesus maak chii chischeyimeu e wii pishiiwiikut, ekw kaa itaat, “Chekwaan wehchi wii pechi kakwechihiyekw.

²⁴ Pechi waapahtiikw shuuliyaawaapiskw. Awen maak utaashtamuhkw e nuukuniyich anit kaye awen aniyuu utishinihkaasun kaa masinaateyich.” Ekw maak kaa itwetwaau, “Rome chisheuchimaau Caesar aniyuu utaashtamuhkw kaye wiya anit masinaasuu.”

²⁵ Jesus chii iteu, “Miyaahkw chisheuchimaau Caesar taan aniyuu wiya tepiyeusiit, kaye maak miyaahkw Chishemanituu taan aniyuu wiya tepiyeusiit.”

²⁶ Anit maak e waapamikutwaau iinuu, namui uhchii ihtuutaweuch chechii wanipayiyich chekwaayuu e itweyich ati chechii uhchi maakunaatwaau. Naashch chii miskaateyihtamihiikuuch taan kaa ishi nishkweushihiikutwaau, ekw namui miin uhchi chistuuch.

Jesus kaa kakwechimaakanuut e wanishkaanuyich nipuwinihch uhchi

²⁷ Chii pechi naatikuu maak Jesus Sadduceeh. Eukw uchii ekaa uhchi taapwehtahkwaau che wanishkaanaakanuyich eshkw aniyuu kaa nipiitwaau. Ekw maak kaa wii naanituu kachescheyihtahkwaau taan e iteyihtamiyich Jesus uyeyuu,

²⁸ kaa itaatwaau, “Chischinuhamaacheu, Moses chii masinaham uyuu wiishuwewiniyuu kaa itashteyich, ‘Nipite naapeu, e ihtaayich maak wiichiskweu, ekaa maak uhchi ayaawewaakwenich awaasha, an naapeu wiichishaan chipaa wiichimeyuu aniyuuh wiichiskweu. Ekw maak ayaawaayichen awaasha mwehch wiya aniyaa naapeu e utawaashiimit chipaa ishinaakuniyuu.’ ”

²⁹ Ekw miin uyuu kaa ishi wiihtamuwaatwaau Jesus anichii naapeuch, “Peyakwaau e chii ihtaatwaau niishwaashch naapeuch, e chii wiichishaanihtutwaau. Ekw an maauch chesheiniyuut kaa niipuut, chek kaa puunipimaatisiit ekaa uhchi ayaawaat awaasha.

³⁰ Ekw maak an kaa uhchi taahchiskawaat aniyuu ustes eukw an miin kaa wiichimaat aniyaanaa ustes wiichiskwewiyuu. Kaye maak wiya chek chii puunipimaatisiyuu ekaa uhchi ayaawaat awaasha.

³¹ Ekw miin an e uhchi taahchiskawaat kaa wiichimaat aniyaa wiichishaan wiichiskwewiyuu. Kaye maak wiya chek chii puunipimaatisiyuu ekaa uhchi ayaawaat awaasha. Ekun pisikw kaa ispayitwaau uchii niishwaashch wiichishaanimaauch, paatish misiwe niishwaashch e tashitwaau kaa wiichimaatwaau aniyuu peyakw iskweu, namui maak waachipeyakw uhchi ayaaweuch awaasha.

³² Ekw chek an iskweu kaa nipit.

³³ Ekw maak iskutak utihchipayihche chechii wanishkaatwaau anichii kaa nipitwaau, awen che wiichiskweut aniyuu iskweu, wesh misiwe chii unaapemuu aniyuu niishwaashch naapeu.”

³⁴ Ekw Jesus kaa itaat, “Mekwaach anuhchiish e pimaatisiinaanuuhch, naapeu ekw maak iskweu niipuuch maak niipuuhaakanuuch,

³⁵ mikw maak anite niishtamihch iskutak utihchipayihche che wanishkaanaakanuutwaau anichii kaa tepicheyihtaakusitwaau miin chechii pimaatisiitwaau, namui chika uhchi ihtakun e niipuunaanuuhch kaye e niipuuhiiwaanuuhch.

³⁶ Wesh mwehch enchilich chika iteyihtaakusuuch uchii namui wiiskaat chika chii puunipimaatisiyuuch. Chishemanituu utawaashiimitutaakuuch anichii che wanishkaatwaau.

³⁷ Moses chii waapahtiiweu e taapwehtahk miin e pimaatisiyich kaa nipiitwaauh. Wiihtaakun anite Chishemanituu utayimuwinihch Moses kaa waapahtahk muyaam e ishkwaateyich niipisiyaahtikuhch. Ekut waahtaakuhch kaye Moses e chii ishinihkaataat Utipeyihchikeu, Abraham Uchishemanituum, eukun aniyuu yaapach Uchishemanituumiwaau Isaac ekw maak Jacob. Uyuu maak naapeu shaash namui uhchi pimaatisiyuu uyuu mekwaach kaa itwet Moses.

³⁸ Namui Uchishemanituumitutaakuu Chishemanituu aniyuu kaa nipiyich aweyuuh mikw aniyuu kaa pimaatisiyich. Misiwe pimaatisiyuu iteyimeu Chishemanituu aweyuu, aniyuu eshkw kaa pimaatisiyich utah aschiihch kaye aniyuu shaash kaa nipiyich.”

³⁹ Pasch maak anichii kaa chiskutamaachetwaau wiishuwewiniyuu chii itweuch, “Chischinuhamaacheu, miywaau an kaa itweyin.”

⁴⁰ Namui maak miin awen uhchi kuchihtaau chechii kakwechimaat Jesus chekwaayuu.

Aweyuu e ukusiitutaakut Christ, Chishemanituu maak Chisheuchimaau David

⁴¹ Chii itweu maak Jesus, “Chekwaayuu wehchi itwetwaau awenichii aniyuuh Christ che pechi itishahwaat Chishemanituu anite che uhchiskaanesiyich David e ihtaayich.

⁴² David maak uyuu e chii ishi masinahamukupane anite unikamuwinihch, Utipeyihchikeu chii iteu Nitipeyihchikemh, ute pechi apih nihiiwinihch,

⁴³ paatish chii ashpashihiikwaawenich anichii kaa uhkaatiskwaau.

⁴⁴ Mechim David ‘Nitipeyihchikem’ chii ishinihkaateu Utipeyihchikeu. Taanite maak chechii uhchi ukusiitutawaat.”

Yaakwaamiishtuwaahkuch anichii wiishuwewiniyuu kaa chiskutamaachetwaau

⁴⁵ Mekwaach maak e pehtaakut misiwe aniyuu iinuu, Jesus chii iteu aniyuu uchischinuhamuwaakan,

⁴⁶ “Yaakwaamiishtuwaahkuch anichii kaa chiskutamaachetwaau wiishuwewiniyuu wesh nituweyihtamuch chechii chisteyimaakanuutwaau. Miyeyihtamuch e pushchishkahkwaau kaa chinwekaniyikwaau akuhpa, kaye miyeyihtamuch e utinischenaakanuutwaau anite e mihchetinaanuyich. Kaye nituweyihtamuch anite maauch e paihtepitwaau chechii apihaakanuutwaau ayimiheukamikuhch, kaye e makushaanuyich chechii apihaakanuutwaau anite e uchimaaupinaanuyich.

⁴⁷ Utinamuweuch kaye misiwe taan e ishi tipiyeusiyich kaa paahpeyakuyitwaauh iskweuh kaye maak e ayimihaatwaau chineush ayimihaauch, mikw maak ayimihehkaasuch uyuu e ihtitwaau. Eukunich maak uchii ushte che aahkwaateyihtaakuniyich taan che ishi wiyaaskunikutwaau Chishemanituuh.”