Luke 2 - Chishemanituu Utayimuwin: Kaa Uskaach Testament

Jesus kaa pimaatisiit

¹ Mekwaach maak Caesar Augustus e chii chisheuchimaaut, chii itashuweu misiwe iinuuh anit Rome aschiihch kaa ihtaayich chechii tipachimaakanuyich kaye chechii masinahwaakanuyich.

² Eukw uyuu maauch niishtam kaa tipachimaakanuutwaau uchii iinuuch. Mekwaach maak Quirinius chii uchimaau anite aschiihch Syria kaa ishinihkaateyich.

³ Misiwe maak awenichii chii ituhteuch anite utihtaawiniwaahch taanite kaa pimaatisiyich uniichihiikuwaau kaye maak uwaahkumaakanawaau chechii masinahwaakanuutwaau.

⁴ Joseph maak anite chii uhchi chistuhteu Nazareth kaa ishinihkaateyich ihtaawiniyuu anite Galilee aschiihch kaa ihtakuniyich, Bethlehemihch kaa ituhtet, anite Judea aschiihch. Wesh eukw uyuu ihtaawiniyuu ekute kaa pimaatisiikupanen aniyaa utaanische umushuum chisheuchimaau David kaa ishinihkaasuyich.

⁵ Joseph maak chii wiicheukuu Mary aniyuu che wiichiskweut, chechii masinahwaakanuutwaau. Mekwaach maak chii kanuweyimaausuu Mary.

⁶ Mekwaach maak anit Bethlehemihch e ihtaatwaau shaash chii peshuwaapahtam che waapamaausut Mary.

⁷ Nipeukamikw maak mitun chii saakaschinaanuuyuuh ekw anite uhkaanikamikuhch kaa ihtaatwaau. ekute anite kaa pimaatisiyich aniyuu uniishtamuushaan Mary, e chii naapeshiiwiyich. Kaa wiiskweyechinaat machunishihch ekw kaa pimishimaat anit uhkaanich kaa chii uhchi miichisutwaau.

Enchil kaa nuukushiishtawaat maanishchaanishuiinuuh

⁸ An maak kaa tipiskaach, peshuch anit an ihtaawin, chii ihtaauch maanishchaanishuiinuuch e naanaakachihaatwaau maanishchaanisha.

⁹ Utipeyihchikeu maak utenchilamiyuu chii nuukushiishtaakuuch. Naashch maak chii chihkaashteyuu anit waaskaa e ihtaatwaau, Utipeyihchikeu e ihtaayich e uhchi waashtuweyich. Naashch maak chii sechisuuch.

¹⁰ Ekw kaa itikutwaau aniyuu enchil, “Ekaawii sechisikw. Wesh chiwii wiihtamaatinaawaau miywaachimuwin, misiwe awen pehtahke chechii miyeyihtahk.

¹¹ Anite ihtaawinihch kaa uhchiit aniyaa chisheuchimaau David, chiyawaau chipimaatisiistamaakunaawaau awaash, eukun Utipeyihchikeu Christ.

¹² Chika waapahtenaawaau e taapweyaan mitun, chika miskawaawaau apishtawaash e wiiskweyechinaakanuut machunishihch uhkaanikamikuhch e pimishihk.”

¹³ Sischikuuch maak chii uhchi mihchetuuch kutakach enchilich kihchikiishikuhch e uhchi nuukusitwaau e maamihchimaatwaau Chishemanituu e itwetwaau,

¹⁴ “Chisteyimaahkw Chishemanituu maauch ishpimihch kaa ihtaat. Chika miyaakanuuch chiyaameyihtamuwiniyuu anichii kaa naniheyihtamihaatwaau Chishemanituu utah aschiihch.”

¹⁵ Iskutak maak anichii enchilich kaa uhpiskaatwaau kihchikiishikuhch ishi, anichii maanishchaanishuiinuuch chii itituuch, “Ituhtetaau Bethlehemihch, che waapahtamuhkw taan kaa ispayihch taan kaa ishi pechi wiihtamaatahkw Utipeyihchikeu utenchilam.”

¹⁶ Chii wii chishipayuuch Bethlehemihch e ituhtetwaau, ekut maak kaa miskawaatwaau Mary ekw maak Joseph kaye aniyuu apishtawaasha. An maak apishtawaash chii pimishin anite uhkaanh kaa chii uhchi miichisuyitwaau.

¹⁷ Iskutak maak anichii maanishchaanishuiinuuch wiyaapamaatwaau aniyuu awaasha chii nituu papaamaachimuuch taan kaa ishi pehtawaatwaau enchil e ishi aayimuumaayich aniyuu awaasha.

¹⁸ Misiwe maak awenichii kaa pehtawaatwaau aniyuu maanishchaanishuiinuuh aniyuu kaa itaachimuyich naashch taapwe chii miskaateyihtamihiikuuch.

¹⁹ Mary maak chii kanuweyihtam utehiihch misiwe uyuu chekwaayuu, taan kaa itaachimaakanuyich, eyuu naashch chii maamituneyihtamihiikuu.

²⁰ Ekw maak anichii maanishchaanishuiinuuch chii chiiweuch e chishtaachimaatwaau kaye e maamihchimaatwaau Chishemanituu. Chii maamihchimeuch aniyuu taan kaa ishi pehtahkwaau kaye taan kaa ishi waapahtahkwaau wesh eukun mwehch kaa ispayiyich aniyuu uhchi taan kaa ishi wiihtamaakutwaau aniyuu enchil.

Jesus kaa wiihaakanuut kaye kaa chischinuwaachishwaakanuut

²¹ Iskutak an awaash yaanaaneu chiishikaau kaa ishpish pimaatisiit Chishemanituu e ihtaayich chii ishi chischinuwaachishwaakanuu kaye Jesus chii ishinihkaataakanuu. Eukun kaa ishinihkaatikut enchil eshkw ekaa uhchi ayaaukut ukaawii anite uspayaayihch.

²² Iskutak maak wetihchipayiyich chechii payehchihaakanuyich Jesus uniichihiikw, anite Jerusalemihch chii ituhteuch wesh eukw uyuu kaa ishi wiishtaayich Moses anite ayimihewin wiishuweusinahiikanihch che ihtinaanuyikupane. Kaye chii peshuweuch Jesus anite chisheayimiheukamikuhch, Utipeyihchikeu e ihtaayich chechii ishi chischinuwaachishwaakanuwiyich.

²³ Wesh itashteyuu anite Utipeyihchikeu uwiishuwewinihch, Iskweu uniishtamuushaan naapeshiiwiyichen Chishemanituu e ihtaayich chika ishi pachishtinaakanuu chechii aapachihiikut.

²⁴ Kaye niishu umiimiiu chii nituweyihtaakusuuch uniichihiikumaauch chechii miyaatwaau ayimiheuchimaauh chechii machishtawehamaakutwaau, wesh eukw kaa ishi wiihtaakuniyich anite Utipeyihchikeu uwiishuwewiniihch che ihtiwaakupanenich.

²⁵ Mekwaach maak anit Jerusalemihch chii ihtaau naapeu, Simeon e ishinihkaasut. Chii kuiskupimaatisiyuu kaye chii ayimihewaatisiyuu. Kaye chii peshuweyimeu aniyuu kaa petaachimaakanuyich upimaachihiiweu chechii pimaachihaayich Israel iinuuh. Kaye maak Kaa payehchisiyich Ahchaahkw chii chichishkaakuu.

²⁶ Chii itikuukupane maak kaa payehchisiyich ahchaahkwa ekaa che uhchi nipit paatish chii waapamaate uyeyuu Chishemanituu kaa pechi itishahwaayich, aniyuu kaa wiyaapamaat Utipeyihchikeu, Christ che itapiyich.

²⁷ Kaa payehchisiyich Ahchaahkwa maak chii ati chischinuhtahiikuu Simeon chechii piihchet anite chisheayimiheukamikuhch. Jesus maak uniichihiikw chii peshiikuu anite aniyuu chisheayimiheukamikuyuu. Wesh chii wii ihtuutamuch taan kaa ishi wiishteyich ayimihewin wiishuweusinahiikanihch an chipaa ihtuutaakanuukupane.

²⁸ Simeon maak chii utineu aniyuu awaasha kaa tahkunaat ekw kaa maamihchimaat Chishemanituu, e itwet,

²⁹ “Utipeyihchikeu, chichii ihtuuten taan e itashtech chitayimuwinihch ekw maak pachishtin uu chitaapachihaakan chiyaam chechii ishi nipit.

³⁰ Wesh mitun tipiyeu nischiishikuhch niwaapamaau an kaa pechi itishahamuuyaahch che pimaachihiyimiht,

³¹ an kaa ishi wiyaapamit chechii pimaachihaat misiwe e itiskaanesiyich iinuuh.

³² Wiya eukw waashtewin che kanawaapahtahkwaau iinuuch ekaa Jewa kaa itiskaanesitwaau chechii uhchi chischeyimaatwaau Chishemanituu. Kaye wiya uhchi chechii uhchi chishtaachimaakanuyitwaau Chishemanituu utiiniim Israel.” Eukw uyuu kaa itwet Simeon.

³³ Chii miskaashtamiyuu maak aniyuu uniichihiikw Jesus taan kaa ishi pehtamiyich e ishi aayimuumaakanuut.

³⁴ Ekw an chisheinuu Simeon misiwe kaa shaweyimaat ekw kaa itaat aniyuu Mary, Jesus ukaawiyuu, “Uu awaash chii wiyaapamikuu Chishemanituu, chika ihtuutaweu aniyuu Israel iinuuh chechii pahchishiniyich ekw aniyuuh kaa taapweyimikut kata uhpakaapuuheu. Uu awaash chika waapahtiiweu Chishemanituu upimaachihiikusiiwiniyuu mikw maak mihchetu aweyuu chika nishkuushihtaakuu.

³⁵ Ekut maak che nuukuniyich taan nihaau e ishinaakuniyikwaauh utaapwehtamuwinawaau awenichii. Ekw maak chiya Mary, mistahii chika misimeyihtamihiikuun che ihtuutawaakanuut, muyaam muuhkumaan e tahkamikuyin chitahchaahkuhch chika itamahchihun.”

Anna kaa ishinihkaasut chisheishkwesh kaa uchischiwehiichesuut

³⁶ Chii ihtaau anit ayimiheukamikuhch chisheishkwesh Anna e ishinihkaasut e chii uchischiwehiichesuut. Phanuel chii ishinihkaasuyuuh uhtaawii, Asher kaa itiskaanesiyich ekut kaa uhchiyich. Shaash maak naashch chii chisheishkweshuu Anna. Yaanaanemitanuu neu chii tahtupuneshuu. Mikw niishwaashch pipunh chii wiichimituyichenich uwiichimaakan ekw kaa puunipimaatisiyich. Namui maak miin uhchi unaapemuu.

³⁷ Muush maak chii ihtaau anit chisheayimiheukamikuhch e chiishikaayich kaye e tipiskaayich, e ayimihaat ekaa meshikum miichisut.

³⁸ Mekwaach maak anit e ihtaayich Jesus uniichihiikuyuu chii uhchi piihcheu uu chisheishkwesh. Chii nanaaskumeu Chishemanituu iskutak wiyaapamaat aniyuu awaasha. Ekw kaa aayimuutamuwaat aniyuu awaasha aniyuuh iinuuh anit Jerusalemihch kaa ihtaayitwaauh aniyuu kaa ashuwaapamaayich upimaachihiiweu chechii pimaachihaayich Israel iinuuh.

³⁹ Iskutak maak Jesus uniichihiikw kaa ishi ihtuutahkwaau misiwe kaa ishi wiishtaakanuyich anite Utipeyihchikeu utayimihewin wiishuweusinahiikaniyuu, kaau chii chiiweuch anite kaa uhchiitwaau Nazareth kaa ishinihkaateyich ihtaawiniyuu anite Galilee aschiihch.

⁴⁰ Jesus maak chii ati miyu nihtaauchuu kaye chii mista kachehtaaweyihtam. Naashch maak chii shaweyimikuu Chishemanituu.

Jesus kaa miskaakut uniichihiikw chisheayimiheukamikuhch

⁴¹ Eshikum pipunh Jesus uniichihiikuh chii ituhteyuuh Jerusalemihch iskutak wetihchipayihch miyaaskaacheu makushewin kaa ishinihkaateyich.

⁴² Jesus maak kaa niishushaapuneshit chii wiichihiiweu anite e ituhtaanuyich.

⁴³ Iskutak maak kaa chiishi makushaanuyich kaau chii chiiweuch, mikw maak Jesus ekut kaa ihtaat anit Jerusalemihch ekaa chischeyimikut uniichihiikw.

⁴⁴ Chii iteyimikuu maak e pechi wiichihiiweyich anit aniyuu e maausikuhtaanuyich. Peyakw chiishikaau maak chii ishpish pimuhteuch ekw kaa chihchi naanituwaapamaatwaau aniyuu Jesus anite mekwesiin uwaahkumaakanawaau eyuu uwiichewaakanawaau e ihtaayich.

⁴⁵ Namui maak uhchi miskaweuch, ekw maak kaau kaa ituhtetwaau anite Jerusalemihch kaa nituu naanituweyimaatwaau.

⁴⁶ Nishtu chiishikaau maak kaa ishpish naanituweyimaatwaau ekw kaa miskawaatwaau anite chisheayimiheukamikuhch. Chii wiitapimeyuu kaa chischinuhamaacheyitwaau e nituhtawaat eyuu maak e kakwechimaat chekwaayuuh.

⁴⁷ Misiwe maak aweyuu kaa pehtaakut naashch chii maamishkaateyihtamihiikuyuu ukachehtaaweyihtamuwin kaye aniyuu naashch e kaschihut e ishi nishkweushihtwaat chekwaayuu e kakwechimaakanuut.

⁴⁸ Aniyuuh maak uniichihiikw kaa waapamikut chii kushkupayuu anite e miskaakut. Aniyuu maak ukaawii chii itikuu, “Nikus, chekwaan wehchi naashch aayimeyihtamihiyaahch, pisikw chichii naanituweyimitinaan kuuhtaawii e niishiyaahch.”

⁴⁹ Ekw Jesus kaa itaat, “Chekwaan wehchi naanituweyimiyekw. Namui aa chichischeyihtenaawaau ekut nipaa ihtaan utah Nuuhtaawii wiichihch.”

⁵⁰ Namui maak uhchi nisituhtamiyuu aniyuuh uniichihiikw chekwaayuu wehchi itwet aniyuu.

⁵¹ Ekw kaa wiichewaat e chiiweyich anite Nazareth, chii pishichiheu maak chekwaayuu e itashumikut. Ukaawii maak chii kanuweyihtamiyuu utehiihch misiwe taan kaa ispayiyich.

⁵² Jesus maak chii ati nihtaauchuu eyuu wetaach chii ati kachehtaaweyihtam. Naashch maak chii naheyihtamiyuu Chishemanituu kaye iinuuh, aniyuu taan kaa ishi pimaatisiit.