Luke 18 - Chishemanituu Utayimuwin: Kaa Uskaach Testament

Kaa tipaachimaakanuut kaa peyakut iskweu kaye Mmaak wiyaaskunichesuu

¹ Jesus chii wiihtamuweu uchischinuhamuwaakan uyuu chischinuhamaacheu tipaachimuwiniyuu chechii uhchi chischeyihtamiyich muush chechii ayimihaayich, kaye ekaa chechii saskachiyich.

² Chii iteu, “Chii ihtaau wiyaaskunichesuu ihtaawinihch ekaa uhchi nanihchiishtuwaat Chishemanituu kaye ekaa uhchi aapateyimaat iinuuh.

³ Anit maak an ihtaawin chii ihtaau e peyakut iskweu. Muush maak chii nituwaapameu aniyuu wiyaaskunichesuu e itaat, ‘Chinitutamaatin chechii wiichihiyin kuiskw chechii ishi wiyaaskunaakanuut an kaa pechi wanituutaut.’

⁴ Chineush maak an wiyaaskunichesuu namui uhchi wii naatamuweu aniyuu iskweu. Ekw chek kaa ishi maamituneyihtahk, ‘Namui nanihchiishtuwaau Chishemanituu kaye namui nitaapateyimaauch iinuuch.

⁵ Uu maak kaa peyakut iskweu shaash nisaskachihiikw kaa ishpish muush pechi mukushkaachihiit, e nituweyihtahk chechii wiichihiik. Nitawaach kiipaa puut nika wiichihaau, ekaa etituu chechii saskachihiit.’ ”

⁶ Ekw Utipeyihchikeu uyeyuu miin kaa itwet, “Kanawaapahtamukw maa. Chek chii wiichiheu an machiwiyaaskunichesuu aniyuu kaa peyakuyich iskweu, wesh namui uhchi puunihiikuu e nitutamaakut chechii wiichihaat.

⁷ Namui aa maak etituu Chishemanituu suuhk kata wiichiheu aniyuu utiiniim kanawaach kaa ayimihaayich e chiishikaayich kaye e tipiskaayich e nitutamaakut chechii naatamuwaat. Taapaa kata uhchi pwaashtawiyuu chechii naatamuwaat.

⁸ Chiwiihtamaatinaawaau, cheshtinaateyihtaakuniyuu wiipach che naatamuwaat. Ekw maak, Iinuu Ukusisa kata miskaweu kaakaye aweyuuh e taapweyimikut iskutak miin takushinite utah aschiihch.”

Pharisee ekw maak an naapeu maauch kaa machaatisiit kaa iteyimikut iinuuh

⁹ Jesus miin kaa ishi wiihtamuwaat uyuu chischinuhamaacheu tipaachimuwiniyuu aniyuuh kaa maamishiitutaasuyich nikuiskutaatisiinaan e iteyimisuyich mikw maak kaa macheyimaayich kutak aweyuu. Eukw uyuuh Jesus kaa itaat,

¹⁰ “Peyakwaau niishu naapeuch chii piihcheuch chisheayimiheukamikuhch chechii nituu ayimihaatwaau. Pharisee an peyakw. Ekw an kutak kaa maamuushtinahk chisheuchimaau shuuliyaayuu chii itaapatisuu. Uchii uyuu kaa itaapatisitwaau eukunich maauch kaa machaatisiitwaau chii iteyimikuuch aweyuu.

¹¹ Ekw an Pharisee chii peyakukaapuu e ishi ayimihaat, ‘Chishemanituu, chinanaaskumitin ekaa ishinaakusiyaan kutakach e ishinaakusitwaau awenichii kaye ekaa mistamaauchihtamaasuyaan shuuliyaau kaye ekaa nitamukw ihtuutuukwaau awenichii kaye ekaa pisikwaatisiyaan. Chinanaaskumitin ekaa ishinaakusiyaan taan e ishinaakusit anaah kaa maamuushtinahk chisheuchimaau shuuliyaayuu kaa itaapatisit.

¹² Niya maak eshikum tuushteu, niishu chiishikaau namui nimiichisun kaye nipachishtinichen peyakwaapishch eshikum mitaahtwaapisch e ayaayaan.’ Eukw uyuu kaa ishi ayimihaat wiya an Pharisee.

¹³ Ekw maak an naapeu kaa maamuushtinahk chisheuchimaau shuuliyaayuu kaa itaapatisit, iskutak e ayimihaat waahyuusiis anit chii uhchikaapuu taanit kaa niipuyich aniyuu Pharisee namui kaye mechim uhchi tastasaapuu kihchikiishikuhch wesh chii kushikuteheu. Chii itweu, ‘Chishemanituu pechi chistimaacheyim e machituutamaan. Ekw Jesus miin kaa ati itwet iskutak kaa chiishi tipaachimut.’

¹⁴ Chiwiihtamaatinaawaau maak, uu naapeu chii chiiweu taapwe e kuiskunaakusit Chishemanituu e kanawaapamikut. Namui wii an Pharisee. An awen mistahii kaa iteyimisut kata tipihteyihtaakuhiikuu Chishemanituu ekw an kaa tipihteyimitisut awen eukw che chisteyihtaakuhaakanuut.”

Jesus kaa petawaakanuut awaasha

¹⁵ Chii petaweuch maak awenichii Jesus kaa apishiishiitwaau utawaashiimuwaau, e chii nituweyimaatwaau chechii saaminaayich. Ekw anichii chischinuhamuwaakanich iskutak wiyaapamaatwaau uyuu e ihtiyich chii chistahamuweuch.

¹⁶ Jesus chii wiishaameu awaasha e itwet, “Pachishtinaahkuch awaashach chechii pechi naasitwaau, ekaawii uhchi chistahamuwaahkuch, wesh uyuu kaa iteyihtaakusitwaau awenich Chishemanituu uchisheuchimaawiniihch ishi tipeyihtaakusuuch.

¹⁷ Taapwe chiwiihtamaatinaawaau, mwehch e ishi taapwehtahk awaash taan e ishi wiihtamuwaakanuut eukun kaye chiyawaau chipaa ishi taapwehtenaawaau taan e ishi wiihtamaakuyekw Chishemanituu chisheuchimaawin ekw maak chechii piihcheyekw anite.”

Kaa miisitisiit naapeu

¹⁸ Ekw peyakwaau Jewa iinuuch uchimaamuwaauh chii ishi kakwechimeu aniyuu Jesus, “Chiskutamaachesuu, kaa miyuhtwaayin taan che ihtiyaan chechii uhchi ayaayaan kaachiche pimaatisiiwin.”

¹⁹ Jesus maak chii iteu, “Chekwaan wehchi ishinihkaasiyin kaa miyuhtwaat. Namui awen ihtaau tekash chechii miyuhtwaat, mikw Chishemanituu.

²⁰ Chichischeyihten uyuuh kacheskwewinh, Ekaawii nipahii awen, ekaawii piikun wiichihtuwin, ekaawii chimuth, ekaawii nitamukw ishi ataameyim awen, chisteyim kuuhtaawii kaye chikaawii.”

²¹ Ekw an naapeu kaa itwet, “Kaa pechi awaashiyuuyaan shaash nichii nanihiihten uyuuh kacheskwewinh.”

²² Iskutak maak Jesus piyehtawaat uyuu e itweyich chii iteu, “Eshkw maak peyakw chekwaan miin nituweyihtaakun chechii ihtuutaman. Ataawe misiwe taan e ishi ayaayin, ekw an shuuliyaau kaa chistimaatisiitwaau che miitwaau. Ekw maak che ayaayin miisitisiiwin kihchikiishikuhch kaa ihtakuhch. Chii ihtuutamane maak uu ekw maak che pechi nuushuushkuwiyin.”

²³ Iskutak maak piyehtahk an naapeu uyeyuu, naashch taapwe chii macheyihtam wesh naashch taapwe chii miisitisiyuu.

²⁴ Iskutak maak Jesus wiyaapahtamuwaat taan e ishpish macheyihtamuunaakusiyich chii iteu, “Nuwach aayiman awen e miisitisiit chechii piihchet Chishemanituu uchisheuchimaawiniihch.

²⁵ Etituu aayimaniyuu awen kaa miisitisiit chechii piihchet Chishemanituu uchisheuchimaawiniihch ishpishaat an awesiis kaa mista piskwaakunet chechii shaapushkahk shaapunikaniyuu anite pekuneyaapiskaayich.”

²⁶ Anichii maak iinuuch kaa pehtawaatwaau Jesus, chii kakwechimeuch, “Awen maak ekw chechii pimaachihut.”

²⁷ Jesus maak chii iteu, “Taan aniyuuh ekaa chii ihtuutahk iinuu kata chii ihtuutam wiya Chishemanituu.”

²⁸ Ekw Peter kaa itwet, “Kanawaapahta maa. Shaash misiwe nichii nakatenaan niichinaanh chechii nuushuushkaataahch.”

²⁹ “Ehe, taapwe,” chii iteu Jesus, “Misiwe awen kaa nakatahk wiichi kaye kaa nakataat wiichiskweu kaye wiichishaan kaye uniichihiikw kaye utawaashiim, Chishemanituu uchisheuchimaawiniyuu uhchi chika cheshtinaateyihtenaawaau,

³⁰ etituu che miyaakanuut ishpishaat aniyuu kaa ishi nakatahk anuhchiish mekwaach e pimaatisiit, kaye kaachiche pimaatisiiwiniyuu che ayaat anite niishtamihch.”

Jesus kaa aayimuutahk taan che ishi nipit

³¹ Ekw Jesus kaa chistuhtahaat aniyuu kaa niishushaapuyich uchischinuhamuwaakan taanite pahkaan chechii ihtaawaakupanenich, ekw kaa itaat, “Jerusalemihch chika ituhtenaanuu. ekute anite misiwe che tipipayihch an kaa ishi aayimaakanuut che ispayit Iinuu Ukusisa aniyuu taan kaa ishi masinahamuwaakupanenich aniyehkaanaanich uchischiwehiichesuuch.

³² Chika pachishtinamuwaakanuuch anichii iinuuch ekaa Jewa kaa itiskaanesitwaau, chechii maayeyimaatwaau kaye chechii wiyaahuwaachetwaau nitamukw e ishi chiishuwaataatwaau kaye chechii shihkwaataatwaau.

³³ Kaye chechii pishishtehwaatwaau, kaye che nipahaatwaau. Mikw maak chii nishtuchiishikaayiche miin kaau chika wanishkaau.”

³⁴ Chischinuhamuwaakanich maak namui waach peyakw uhchii nisituhtamuch aniyuu taan kaa ishi ayimitutamiyich.

Naapeu ekaa kaa waapahtahk Jerichohch kaa uhchiit

³⁵ Iskutak maak e ati peshuwaapahtahkwaau aniyuu ihtaawiniyuu Jericho kaa ishinihkaateyich naapeu ekaa waapahtahk anite yaaiskanuu chii apuu e nitutamaat shuuliyaayuu.

³⁶ Iskutak maak piyehtawaat e pimimiyaashkaakut mihchetu aweyuu chii kakwechimeu taan e ihtinaanuyich.

³⁷ “Jesus, Nazareth kaa uhchiit mekwaach pimuhteu,” chii itaakanuu.

³⁸ Ekw kaa tepwet e itwet, “Jesus, David kaa ukusiitutaask, pechi chistimaacheyim.”

³⁹ Anichii maak iinuuch kaa niikaanihtetwaau chii chistahamuweuch e itaatwaau, “Ekaa maa chistuh.” Aahch maak etituu suuhk chii tepweu e itwet, “David weukusiitutaask, pechi chistimaacheyim.”

⁴⁰ Jesus chii chipihchikaapuu kaa itashuwet chechii petawaakanuut aniyuu ekaa kaa waapahtamiyich naapeu. Iskutak maak an naapeu ekaa kaa waapahtahk e ati peshuwaapamaat Jesus, chii kakwechimikuu,

⁴¹ “Taan e ishi nituweyihtaman chechii ihtuutamaataan.” An naapeu chii iteu, “Utipeyihchikeu, ihtuutuuh chechii waapahtamaan.”

⁴² Jesus maak chii iteu, “Waapahtah, chitaapwehtamuwin chimiinuwaachihiikuun.”

⁴³ Tiiwehch maak mitun chii waapahtam, kaa ati nuushuushkuwaat Jesus e maamihchimaat Chishemanituu. Iskutak maak misiwe awen wiyaapahtahk uyuu e ispayiyich, kaye wiyawaau chii maamihchimeuch Chishemanituu.