Luke 17 - Chishemanituu Utayimuwin: Kaa Uskaach Testament

Jesus kaa ayimitutahk wanituutamuwiniyuu

¹ Jesus chii iteu uchischinuhamuwaakan, “Muush taapwe chika ihtakuniyuu chekwaayuu che ihtuutaakutwaau iinuuch chechii machituutahkwaau. Mikw maak kata aahkwaachipayuuch anichii kaa ihtuutawaatwaau aweyuu chechii machituutamiyich.

² Uste chipaa miywaayuu an awen chechii punasinaapaataakanuut anite chihchikamiihch, kaa ihtuutawaakwe chechii machituutamiyich aweyuu muyaam aniyuu ekaa naashch kaa suuhchikaapuyich taapwehtamuwinihch, mikw maak eshkw etituu kata aahkwaachipayuu taan che ishi waweshihaakanuut.

³ Yaakwaamiikw ekaa chechii ihtuutawekw awen chechii machituutahk. Chiichishaan wanituutaaske wiihtamuu taan e ishi wanituutaask. Mihchiiwesite maak, che wepeyihtamuut.

⁴ Aat maak niishwaashwaau machituutaaske peyakw chiishikaau, ekw maak tahtwaau pechi nituwaapamiske e itisk, ‘Nimihchiiwesin taan kaa ishi machituutaataan,’ yaapach wepeyihtamuu.”

Jesus kaa ayimitutamuwaat uchischinuhamuwaakanh utaapwehtamuwiniyuu

⁵ Jesus uchischinuhamuwaakanh chii itikuu, “Utipeyihchikeu, ihtuut maa nitaapwehtamuwinaan etituu chechii suuhcheyihtaakuhch.”

⁶ Ekw Utipeyihchikeu kaa itaat, “Aat naashch apishaashiche chitaapwehtamuwinawaau taapishkuuch maauch kaa aapishiishit shuumin kaa ispichishtit ishpishaache, mistikw chika chii itaau, ‘Wiihkuhuuh anit kaa nihtaauchiyin ekw anite che ishi wepinisuyin chihchikamiihch,’ chika pishichihiikw.”

⁷ Jesus miin kaa ati itwet, “Mwehch aahch anite aapachihaakan e nihtaauchihchet maak maanishchaanisha naanaakachihaat, iskutak maak chii chiiwete e chiish aapatisit chika itikuu aa uchimaam, ‘Aashtam, pechi piihche, pechi miichisuu.’

⁸ Namui, chika itikuu, ‘Pechi wiishtuu ekw maak chiishkwaa miichisuyaane, ekw chiya che miichisuyin.’

⁹ Namui chika uhchi nanaaskumeu aniyuu utaapachihaakanh e chii ihtuutamiyich taan aniyuu kaa wii itaapachihaat.

¹⁰ Chiyawaau maak iskutak kaa chiishihtaayekw misiwe chekwaan kaa itashumikuyekw chechii ihtuutamekw, chipaa itwenaawaau, ‘Wesh mikw aapachihaakanich niyaan. Nichii ihtuutenaan taan an kaa itashumikuyaahch che ihtuutamaahch.’ ”

Jesus kaa nachishkawaat mitaahtu naapeuh e umichiyich

¹¹ Mekwaach Jesus kaa ituhtet anite Jerusalemihch chii pimuhteu anit e uhchi taahchiskaatuumakahkwaau Samaria aschii kaye maak Galilee aschii.

¹² Mwehch maak e ati utihtahk ihtaawiniyuu mitaahtu naapeu chii nachihiikuu naashch e maayaatiniyich umichiiwaaspinewiniyuu e ayaayich.

¹³ Ekaa maak uhchii peshuchikaapuushtaakut. Ekw kaa tepwaataatwaau Jesus e itwetwaau, “Chiskutamaachesuu, pechi chistimaacheyiminaan uu e ishinaakusiyaahch.”

¹⁴ Jesus maak iskutak wiyaapamaat chii iteu, “Maachiikw, nituwaapamaahkw ayimiheuchimaau, chechii chischeyimitaakw taapwe e miinuwaatisiyekw.” Mekwaach maak e ishpishipayitwaau e nituwaapamaatwaau ayimiheuchimaau, chii miinuwaatisiyuuch.

¹⁵ Iskutak maak an peyakw naapeu chescheyihtahk e chii miinuwaachihaakanuut, chii chiiweu kaa nituwaapamaat Jesus, e chishewet e maamihchimaat Chishemanituu.

¹⁶ Iskutak maak tekushihk chii uchihchiihkunapayihuu uhchishkuu Jesus e ihtaayich e nanaaskumaat. Uu maak naapeu Samaria aschiihch chii uhchiyuu.

¹⁷ Jesus maak chii iteu, “Chii mitaahtashuuch anichii kaa miinuwaachihaakanuutwaau. Taanite niyehkaanaanich peyakushteu.

¹⁸ Mikw uu peyakw naapeu ekaa Jewa itiskaanesit e pechi nanaaskumaat Chishemanituu.”

¹⁹ Ekw Jesus kaa itaat aniyuu naapeu, “Pisikuuh, ekw maak che chiiweyin, wesh chitaapwehtamuwin chimiinuwaachihiikuun.”

Jesus kaa aayimuutahk che utihchipayiyich Chishemanituu chisheuchimaawin

²⁰ Peyakwaau Phariseech chii kakwechimeuch Jesus e itaatwaau, “Taaishpish che nuukuniyich Chishemanituu uchisheuchimaawin.” Ekw Jesus kaa itaat, “Chishemanituu uchisheuchimaawin namui mushe nuukuniyuu.

²¹ Namui awen chika chii itweu, Pechi kanawaapahta maa. Maaute Chishemanituu uchisheuchimaawin e ihtakuniyich. Wesh Chishemanituu uchisheuchimaawin shaash ihtakuniyuu utah mekwesiinuu e ihtaayekw.”

²² Ekw maak kaa itaat uchischinuhamuwaakan, “Eshkw anite niishtamihch kata utihchipayuu naashch che iteyihtamihiikuyekw miin kaau chechii waapamekw Iinuu Ukusisa, namui maak chika chii waapamaawaau anit an mekwaach wii waapamekwe.

²³ Chika ihtaauch maak awenichii che ititaakuch, ‘Maaut e ihtaat Iinuu Ukusisaan,’ maak, ‘Mwaanaa nete e ihtaat Iinuu Ukusisaan.’ Mikw maak ekaawii chika uhchi naanituwaapaminaawaau anite.

²⁴ Wesh Iinuu Ukusisa an chiishikaache kaau che takushiniyich taapishkuuch e waashtepayihch kaa chii ishinaakuhch misiwe kaa chii waashtuwech chiishikw, ekun mwehch che ishinaakuhch.

²⁵ Mikw maak eshkw ekaa utihchipayihche uu anichii awenichii mekwaach anuhchiish kaa pimaatisiitwaau naashch nika wiisacheyihtamihiikuuch kaye nika aatuweyimikuch.

²⁶ Mwehch maak taan kaa iteyihtaakuniyich anit mekwaach kaa pimaatisiit aniyaa Noah, ekun che iteyihtaakuhch miin takushihke Iinuu Ukusisa.

²⁷ Mikw waa ihtitwaau chii ihtuuch aniyehkaa iinuuch, chii miichisuuch, chii minihkweuch, chii niipuuch piihiim kaa utihchipayihch che piihchet Noah uchiimaan. Ekw kaa aschiputech aschii, misiwe kaa nishuunaatisiitwaau e tashitwaau anichii iinuuch.

²⁸ Ekun maak taapishkuuch kaa iteyihtaakuniyich kaye eshkw aniyaa Lot e chii pimaatisiit. Misiwe awenichii mikw waa ihtitwaau chii ihtuuch. E miichisutwaau, e minihkwetwaau, e utinaasutwaau, e ataawetwaau, e nihtaauchihchetwaau, eyuu e maanuchetwaau.

²⁹ Aniyeyuu e chiishikaayich che nakatahk Lot aniyeyuu utenaayuu Sodom kaa ishinihkaateyich, chii chimuunipahchishtin ishkuteu kaye e ishkuteutwaau asiniich chii paahpahchishinuuch. Ekw maak misiwe awenichii anit aniyuu utenaayuu kaa ihtaatwaau chii nishuuwanaachihiikuuch uyeyuu kaa ispayich.”

³⁰ Ekw Jesus kaa itwet, “Ekun taapishkuuch che itaatisiinaanuuhch an e chiishikaach pechi nuukusite Iinuu Ukusisaan.”

³¹ “Uu maak e chiishikaach utihchipayihche an awen wiiwiitamihch kaa ihtaat ekaawii kata uhchi piihcheu wiichihch, maak awen anite nuuhchimiihch kaa ihtaat ekaawii chika uhchi chiiweu chechii nituu maamuushtinahk uchekwaanim.

³² Chischisih maak taan kaa ispayiyich Lot uwiichimaakan, e chii chiiweyaapisaapiyich, ekut kaa ati wanaatisiyich.

³³ Awen e wii kanuweyihtahk upimaatisiiwin chika wanihtaau. An maak awen kaa pachishteyihtahk upimaatisiiwin eukun an che kanuweyihtaakanuyich upimaatisiiwin.

³⁴ Chiwiihtamaatinaawaau taan che ispayihch miin takushinite Iinuu Ukusisaan. An tipiskaache takushiniyaane kata niishwaapihcheshinuuch awenichii nipewinihch. Peyakw maak Chishemanituu chika utinikuu ekw an kutak che nakataakanuut.

³⁵ Kaye chika niishuuch iskweuch e piminawetwaau. Peyakw an chika utinaakanuu ekw an kutak che nakataakanuut.

³⁶ Kaye maak niishu naapeuch chika ihtaauch nuuhchimiihch. Peyakw an chika utinaakanuu ekw an kutak che nakataakanuut.”

³⁷ Jesus uchischinuhamuwaakanh chii kakwechimikuu e itikut, “Utipeyihchikeu, taanite uu che ispayihch.” Chii iteu maak Jesus, “Mitun chika chischeyihtenaawaau ispayihche uu. Mwehch anite e nuukusitwaau michisuuch e mihchetitwaau chischeyihtaakuniyuu e ihtakuniyich chekwaayuu e nipiimakaniyich anite.”