Luke 16 - Chishemanituu Utayimuwin: Kaa Uskaach Testament

Kaa iipwaahkaat uchimaash

¹ Jesus chii wiihtamuweu uchischinuhamuwaakan uyeyuu tipaachimuwin chiskutamaachewiniyuu, e itaat, “Chii ihtaau e miisitisiit naapeu e chii ayaawaat uchimaasha. An maak uchimaash chii nanaakatuweyihtamuweu misiwe taan kaa ishi ayaayich aniyuuh naapeuh. Chii pehtamiyuu maak aniyuu uchimaam nitamukw e chii itaapachihtaawaat ushuuliyaamiyuu.

² Ekw kaa wiishaamikut, kaa itikut, ‘Nipehten e itaachimikuyin nitamukw e itaapachihtaayin nishuuliyaam. Mushe che wiihtaman taan nihaau kaa itaapachihtaayin. Shaash misuwaach namui chika uhchi ayaan an chitaapatisuwin.’

³ An maak uchimaash chii maamituneyihtam, ‘Taan che ihtiyaan maak ekw chechii uhchi pimaachihiisuyaan, e iteyihtahk, shaash nitasaayaaskunikw nuuchimaam. Namui nimiskawiin e muunahiicheyaan chechii itaapatisiyaan kaye nishaakweyimun chechii naanitutamaayaan shuuliyaau.

⁴ Nichischeyihten taan che ihtiyaan chechii uhchi wiichewaakaniyaan. Ekw maak ekaa ayaayaane aapatisuwin wiyawaau che pechi naanaakachihiitwaau.’

⁵ Ekw kaa wiishaamaat tahtu kaa tashiyich aniyuu kaa masinahamuwaayich uchimaam chechii pechi nituwaapamikut. Ekw aniyuu niishtam kaa takushiniyich kaa ishi kakwechimaat, Taan e ishpish masinahamuut nuuchimaam. Ekw kaa itikut,

⁶ ‘Mitaahtumitanuu kaan pimii.’ Ekw an uchimaash kaa itaat, ‘Utin aniyuu chimasinahiikanh, chiipiih, miiskuchishinaha, mikw niyaayinumitanuu itasinaha.’

⁷ Ekw aniyuu kutak naapeu kaa itaat, ‘Taan e ishpish masinahamuut chii nuuchimaam.’ Ekw kaa itikut, ‘Peyakwaau chishemitaahtumitanuu wiihkweyaau pahkweshikanich.’ Ekw kaa itaat, ‘Maauyuu chimasinahiikanh, miiskuchishinaha, mikw yaanaanewaau mitaahtumitanuu itasinaha.’

⁸ Iskutak an uchimaau piyehtahk taan kaa ihtiyich aniyuu uchimaashiim chii maamihchihiikuu, iipwaahkaau e iteyimaat ekaa maak kuiskw uhchi ihtiyich. Wesh anichii ekaa kaa kuiskutaatisiitwaau utah aschiihch naashch taapwe kaschihuuch e wiihkuchihtamaasutwaau chekwaayuu ishpishaat wii anichii kaa kuiskutaatisiitwaau.”

⁹ Ekw Jesus miin kaa ati itaat, “Chiwiihtamaatinaawaau, aapachihtaakw taan e ishi ayaayekw chechii miyutuutamekw ekw maak chechii wiichewaakaniyekw. Iskutak maak puunipimaatisiyekwe ekw maak che piihtakahiikuyekw anite kaachiche che wiichiyekw.

¹⁰ Awen kaa taapweucheyihtaakusit kuiskw chechii ishi naanaakachihtaat e apishaashiyich chekwaayuu chika taapweucheyihtaakusuu chechii miyunaanaakachihtaat e mishaayich chekwaayuu. Ekw maak awen ekaa kuiskw ihtuutahke aniyuu e naanaakachihtaat maauch e apishaashiyich chekwaayuu, namui kuiskw chika chii ihtuutam e naanaakachihtaat chekwaayuu e mishaayich.

¹¹ Ekaa maak taapweucheyimikuyine kuiskw chechii ishi naanaakachihtaayin uu weyuutisiiwin utah aschiihch kaa ihtakuhch, namui chika uhchi taapweucheyimikuun chihchiwe miisitisiiwin chechii naanaakachihtaayin.

¹² Kaye maak ekaa taapweucheyimikuyine kuiskw chechii ihtuutamut kutak awen taan e ishi tipiyeusiit, awen maak che taapweuchiyimisk chechii miisk chekwaayuu chiya chechii tipiiweusiyuut.”

¹³ “Namui awen kata chii atushkuweu niishu uchimaau ekaa naheyimituyich, wesh peyakw aniyuu kata uhkaateu, ekw aniyuu kutak kata saachiheu. Aniyuu peyakw suuhk kata atushkuweu, ekw aniyuu kutak namui kata uhchi naheyimeu chechii atushkuwaat. Namui chika chii atushkuwaawaau Chishemanituu muush e maamituneyihtamuwekwe chechii miisitisiyekw.”

Kutak chekwaayuu kaa ishi wiihtahk Jesus

¹⁴ Iskutak maak Phariseech piyehtahkwaau uyeyuu chii maayeyimeuch Jesus, wesh chii saachihtaauch shuuliyaayuu.

¹⁵ Jesus maak chii iteu, “Chitishinaakuhiisunaawaau muyaam e kuiskutaatisiyekw anite uhchishkuu iinuuch e ihtaatwaau, mikw maak Chishemanituu chischeyihtam taan chihchiwe e iteyihtaakusiyekw. Wesh aniyuuh chekwaayuuh chihchiwe kaa iteyihtamihiikutwaau awenichii Chishemanituu uhkaatam aniyuuh.”

¹⁶ “Eshkw ekaa uhchi takushihk John siikahaahtaacheu mikw aniyuu Moses kaa masinahahk Chishemanituu uwiishuwewiniyuu kaye aniyuu taan kaa ishi wiihtamaatahkwaau aniyehkaa uchischiwehiichesuuch eukun aniyuuh mikw kaa aapatahkwaau e chiskutamaachaanuuhch. Ekw maak kaa ishpish ihtaat John ekw miywaachimuwin kaa waawiihtaakanuuhch Chishemanituu uchisheuchimaawin e aayimuutaakanuyich. Suuhk maak mihchetu awen aayihkam wii piihcheu Chishemanituu uchisheuchimaawiniihch.

¹⁷ Ekaawii iteyihtamukw ekaa shaash nituweyihtaakuhch chechii nanihiihtaakanuyich Chishemanituu uwiishuwewin. Aat aniyuu maauch ekaa iteyihtaakuniyich kaa iteyihtaakanuyich yaapach iteyihtamihiikuu Chishemanituu chechii nanihiihtaakanuyich che ishpish ihtakunikwe uu aschii kaye kihchikiishikw.”

¹⁸ “Muyaam naapeu wepinaat wiichiskweu kutak maak iskweu wiichimaat, pisikwaatisiyuu uyuu e ihtit. Ekw an naapeu che wiichimaakwe aniyuu iskweu e chii wepinikuyich unaapemiyuu, pisikwaatisiyuu kaye wiya.”

Kaa miisitisiit naapeu ekw maak Lazarus

¹⁹ Jesus chii wiihtam chischinuhamaacheu tipaachimuwiniyuu e itwet, “Peyakwaau chii ihtaau e miisitisiit naapeu naashch e shuuliyaaunaakuniyikwaau uchekwaanim, naashch e chii miisitisiyuupimaatisiit.

²⁰ Chii ihtaau miin kutak naapeu Lazarus e chii ishinihkaasut naashch e chistimaatisiit pisikw e paahpakushihtwaat. Umichiiwiniyuu e chii ayaat misiwe e ispichishtit. Wiiwiitamihch maak anit uwaaskahiikanimiihch aniyuu kaa miisitisiyich naapeu ekut kaa pimishihk,

²¹ e pukuseyihtahk chechii uhchi tepimiichisuhiisut taan aniyuuh kaa ishi pinihtawaanuyich. Kaye waawaach atim chii takushiniyuu e pechi naanuuhkwaatamiyich aniyeyuu umichii.

²² An kaa chistimaatisiit naapeu chek chii nipuu, chii pechi utinikuu enchil, anite maak uhpime Abraham e ihtaayich ekute kaa pachishtinikut. Chek kaye an kaa miisitisiit naapeu kaa nipit, chii nahiihkuwaakanuu maak.

²³ Machishkutehch maak e ihtaat naashch e wiisacheyihtamahchihut, chii tastasaapuu, kaa waapamaat Abraham e ayaaunaakusiyich Lazarus e wiichikaapuushtawaayich.

²⁴ Chii ishi tepweu maak, ‘Abraham, nuuhtaawiinaan, pechi chistimaacheyim. Pechi itishahuu maa Lazarus chechii taahkaakaminahk mikuchik nipiiyuu chechii pechi taahtinahk niteyiniyuu, chechii uhchi tahchipayihch. Wesh ninanehkaateyimun utah ishkutehch.’ ”

²⁵ “Ekw Abraham kaa itaat, ‘Chichischisin aa nikus, mekwaach kaa pimaatisiyin anite aschiihch miyu chekwaan chichii ayaan, Lazarus maak namui uhchi miyu ayaau chekwaayuu. Ekw maak anuhchiish miyeyimuu wiya utah, chiya maak chinanehkaateyimun.

²⁶ Kaye maak ihtakun utah chishtauch e ihtaayihkw e aatakaamahchinaanuuhch ekaa mitun chii ishinaakuhch chechii aashuuhtet awen nete ishi e ihtaayin kaye nete uhchi chechii pechi aashuuhtet awen.’

²⁷ Ekw an kaa miisitisiit naapeu chii iteu, ‘Chinitutamaatin maataan, nuuhtaawii Abraham, chechii itishahuut Lazarus anite nuuhtaawii uwaaskaahiikanimiihch,

²⁸ niyaayinuuch niichiinuuch anite chipaa nituu yaakwaamimeu ekaa chechii ishinaakuniyich eshkw chechii ihtaayich utah uyeyuu e ishpish nanehkaateyimunaanuyich.’

²⁹ Ekw an kaa miisitisiit naapeu kaa itikut Abraham, ‘Chiichiinuuch chika chii ayimihtaauch Moses kaye maak aniyuu uchischiwehiichesuuh taan kaa ishi masinahamiyich masinahiikanihch e ishi ayaakwaamimaatwaau aweyuuh. Eukw uyuu chipaa nanihiihtamuch anichii chiichishaanich.’

³⁰ An maak kaa miisitisiit naapeu chii nishkweushiheu e itaat, ‘Namui kata uhchi taapwehtamuch paatishkaan aweyuuh kaau chii wanishkaayichen nipuwinihch uhchi, chechii nituwaapamikutwaau ati chechii uhchi kweskaatisiitwaau.’

³¹ Ekw maak Abraham kaa itaat, ‘Ekaa che uhchi ihtuutamuwaakwenich Moses maak aniyuu uchischiwehiichesuuh taan kaa ishi masinahamiyich namui kata uhchi kakweteyihtamihiikuuch chechii nituhtawaatwaau aweyuu pechi nituwaapamikutwaau aat chii wanishkaayich nipuwinihch uhchi.’ ”