Luke 14 - Chishemanituu Utayimuwin: Kaa Uskaach Testament

Jesus kaa miinuwaachihaat kaa aahkusiyich naapeu e ayimiheuchiishikaayich

¹ Peyakwaau maak e Jewa ayimiheuchiishikaayich Jesus chii ituhteu chechii nituu miichisuwaat anite wiichiihch aniyuu peyakw kaa niikaaneyihtaakusiyich Pharisee. Ekw maak chii ihtaauch anit iinuuch naashch e naanaakachihaatwaau Jesus che ihtiyikwen.

² Chii ihtaayuuh anit naapeu e uhchishkuupishtaakut Jesus. An maak naapeu chii ihtakuniyuu e itaaspinet. Uspitunh ekw maak uskaath chii paachipayuuh.

³ Jesus chii kakwechimeu aniyuu Pharisee kaye aniyuu kaa chiskutamaacheyitwaauh ayimihewin wiishuwewiniyuu, “Itashteu aa ayimiheuwiishuweusinahiikanihch e kuiskunaakuhch chechii miinuwaachihiiwaanuuhch e Jewa ayimiheuchiishikaach maak ekaa kuiskunaakuhch.”

⁴ Namui maak uhchi wii chistuuch. Ekw Jesus kaa utinamuwaat utihchiyuu aniyuu naapeu, kaa miinuwaachihaat ekw kaa itaat chechii maachiyich.

⁵ Ekw Jesus kaa itaat aniyuu Pharisee, “Utah e tashiyekw, awen ukusisa maak umistusim, puuhchipayihch anite e waayaayich, pishikw nipiiyuu e ihtakuniyich, namui aa chipaa wiihkuchiheu aat mekwaach Jewa ayimiheuchiishikaayich.”

⁶ Mitun maak chii chiputunehweu uyuu kaa itaat.

Chishemanituu chisteyimeu aniyuu aweyuu kaa tipihteyimitisuyich

⁷ Jesus maak chii waapameu pasch aniyuu aweyuu kaa wiishaamaakanuyich e waweyapiyich taanit anit maauch e uchimaaweyihtaakuniyich ekw kaa wiihtamuwaat uyuu chischinuhamaacheu tipaachimuwiniyuu.

⁸ “Awen wiishaamiske e makushaanuyich muyaam e chii niipuunaanuuhch ekaawii waweyapihiisuu anit e uchimaaupinaanuuhch, wesh chika chii ishinaakun chechii ihtaat anit awen uste e chisteyihtaakusit ishpishaat chii.

⁹ Chika chii pechi nituwaapamukw an awen taapishkun kaa wiishaamitaakw, chechii itisk, ‘Iichepih anit, ekw an uste kaa chisteyihtaakusit che ahaakanuut anit e uchimaaupinaanuyich anit kaa apuut.’ Ekw maak che pimaameyimuyin aahtapiyine.

¹⁰ Uu maak chipaa ishi ihtuuten, awen wiishaamiske e makushet anite nitawiin chipaa uhtapihiisun, ekw maak an awen kaa makushet chika chii itikw, ‘Niwiichewaakan, aashtam utah ekut pechi apih e uchimaaupinaanuuhch.’ Ekw maak misiwe anichii awenichii kaa wiishaamaakanuutwaau che chischeyimiskwaau e chisteyihtaakusiyin.

¹¹ Wesh awen mistahii kaa wii iteyimikusiit Chishemanituu chika tipihteyimuhiikuu. An maak kaa tipihteyimitisut eukw an che chisteyihtaakuhiikut Chishemanituu.”

¹² Ekw Jesus kaa itaat aniyuu naapeu kaa wiishaamikut e makusheyich, “E makusheyin maa, ekaawii mikw chiwiichewaakanich wiishaamach maak chiichiinuuch maak chiwaahkumaakanich maak e miisitisiitwaau awenichii anit peshuch e wiichimatwaau, wesh katachii ishinaakuniyuu kaye chiya eshkw chechii wiishaamiskwaau, chechii ihtuutaaskwaau kaye chiya taan aniyuu kaa ishi ihtuutuutwaau.

¹³ Teyakuch, anichii awenichii kaa chistimaatisiitwaau wiishaamach, kaye anichii kaa maaschinihtaauchitwaau kaye anichii ekaa kaa nihtaauhtetwaau, ekw maak anichii ekaa kaa waapahtahkwaau.

¹⁴ Ekw maak che shaweyimikuyin uchii e chii wiishaamatwaau, wesh taapaa chika chii chiiwe ihtuutaakuuch taan aniyuuh kaa ishi ihtuutuutwaau. Chishemanituu chika tipahamaakw iskutak wanishkaatwaawenich nipuwinihch uhchi anichii kaa kweskaatisiitwaau.”

Chischinuhamaacheu tipaachimuwin chishemakushewin e tipaatutaakanuuhch

¹⁵ Chii ihtaayuuh naapeuh e wiitapimikut Utipeyihchikeu anit miichisunaahtikuhch. Peyakw maak aniyuu naapeuh, iskutak piyehtamiyich aniyuu kaa itwet, chii itikuu, “Nuwach shaweyihtaakusuuch anichii che miichisutwaau anite Chishemanituu uchisheuchimaawiniihch makushaanuuyiche.”

¹⁶ Jesus kaa wiihtamuwaat aniyuu naapeu uyuu chiskutamaacheu tipaachimuwiniyuu, “Peyakwaau naapeu e chii ayeskuushtaat e mishaayich makushaaniyuu, mihchetu aweyuu chii wiishaameu.

¹⁷ Iskutak maak wetihchipayihch che miichisunaanuyich chii itishahweu aniyuu utaapachihaakanh chechii nituu itaayich aniyuu kaa wiishaamaakanuyitwaau, ‘Pechi takushinikw chititikunaawaau, shaash misiwe chekwaan ayeskuushteu.’

¹⁸ Misiwe maak e tashitwaau chii iteuch ekaa chechii takushinitwaau. An naapeu niishtam kaa nituwaapamaakanuut chii itweu, ‘Nimihchiiwesin ekaa chii ituhteyaan wesh nichii utinen nihtaauchihchikan aschii, pitamaa maak nika nituu kanawaapahten.’

¹⁹ An kutak naapeu chii itweu, ‘Nimihchiiwesin ekaa chii ituhteyaan, anuhchiish wesin mitaahtu mistusich kaa chii utaapetwaau nichii utinaauch. Pitamaa maak nika nituu kuchihaauch. Namui maak nitishpishiin chechii ituhteyaan.’

²⁰ Miin kutak naapeu chii iteu, ‘Anuhchiish weshuu nichii niipuun, eukw maak uu wehchi ekaa chii takushiniyaan.’ ”

²¹ “An maak aapachihaakan chii nituu wiihtamuweu uchimaam taan kaa itweyitwaauh uyuuh. Ekw maak an uchimaau kaa wii makushet naashch taapwe chii chishuwaasuu. Kaa itaat aniyuu utaapachihaakan, ‘Chiipiih, maachiih misiwe ituhte utah utenaahch, che peshuutwaau anichii kaa chistimaatisiitwaau, kaa maaschinihtaauchitwaau ekaa kaa waapahtahkwaau kaye anichii ekaa chii aahtinisutwaau.’

²² Wiipach maak chii takushin an aapachihaakan ekw kaa itaat aniyuu uchimaam, ‘Shaash nichii ihtuuten taan kaa ishi nituweyimiyin chechii ihtuutamaan eshkw maak mistahii tawaau etituu kutakach chechii takushinitwaau.’

²³ Kaa itikut uchimaam, ‘Anite ituhte meskanaahch kaye anite nuuhchimiihch che shiihchamitwaau iinuuch chechii takushihkwaau chechii uhchi saakaschinech uu niwaaskaahiikanim.

²⁴ Chiwiihtamaatin, namui waawaach peyakw anichii niishtam kaa wiishaamakwaau kata uhchi kuchishtamuch uyeyuu nimakushaaniyuu.’ ”

Taan nihaau e iteyihtaakuhch e wii nuushuushkuwaakanuut Jesus

²⁵ Chii mihchetiyuu maak aweyuu e papaawiicheukut Jesus, chii kanawaapameu maak ekw kaa itaat,

²⁶ “Awen waa nuushuushkuukwe taan e ishi pimaatisiyaan, niya etituu nika saachihiikw e ishpish saachihaat uhtaawii maak ukaawii, wiichiskweu, utawaashiim maak tipiiwe wiichishaan. Niya uste nika saachihiikw ishpishaat wiya e ishpish saachihtaat tipiiwe upimaatisiiwin. Ekaa maak chii ihtite namui nika chii uchischinuhamuwaakanitutuwaau.

²⁷ Awen ekaa pimuyaate utaashiteyaahtikum e pechi nuushuushkuut namui nika chii uchischinuhamuwaakanitutuwaau.

²⁸ Muyaam e ishinaakusit awen e wii wiyakaapuuhtaat ashuwaapiiukamikuyuu, niishtam kata wiyeyihtam taan wiyesh che ishpish ispayihiikut, kaye maak taapwe tip e ishpish ayaakwe shuuliyaayuu chechii chiishihtaat.

²⁹ Ekaa maak niishtam nituu chischeyihtahke taan che ishpish ispayiyich chika chii ishinaakusuu chechii nuuhtepayit shuuliyaau ekw maak namui chika chii chiishihtaau aniyuu kaa ushihtaat. Waapahtamiyichen maak aweyuuh aniyuu e ispayit chika maayeyimikuu.

³⁰ Chika itikuu, ‘Uu naapeu chii chihchipayihtaau e wiikaapuuhtaat waaskaahiikaniyuu, namui maak chii chiishihtaau.’ ”

³¹ Ekw miin uyuu kaa ati itwet Jesus, “Kaye muyaam e ishinaakusit chisheuchimaau mitaahtwaau chishemitaahtumitanuu e tashiyich ushimaakanishiim, e wii nitupayihkahtawaat maak kutak chisheuchimaau niishtunuu chishemitaahtumitanuu e tashiyich ushimaakanishiimiyuu, pitamaa kata maamituneyihtamihiikuu taapwe chechii ashpashihaakwe.

³² E iteyihtamukwe maak che wanihtaahiikut aniyuu kutak chisheuchimaau kata itishahweu pasch naapeu chechii nituu nachishkawaayich aniyuu chisheuchimaau eshkw e ayaaunaakusiyich ekw che kakwechimaatwaau taanite chechii ihtitwaau ekaa chechii nitupayuuhkahtaatutwaau.

³³ Ekw Jesus miin kaa ati itwet, eukun maak mwehch e ishinaakuniyich awen kaa nituweyihtahk chechii uchischinuhamuwaakanitutuuk, paatish kata pachishteyihtam misiwe chekwaayuu e ishi ayaat.”

E iteyihtaakuhch siiuhtaakan e nanaayuuhch

³⁴ Ekw maak miin Jesus etituu kaa ati chiskutamuwaat uyeyuu tipaachimuwiniyuu uhchi, e itwet, “Miywaau siiuhtaakan. Mikw maak ekaa wiyaahpachispakuhche an siiuhtaakan namui ihtakun taanite chechii ihtuutaakanuuhch siiuhtaakan chechii ispakuhch.

³⁵ Ekw maak namui mitun chika chii wiyeshiitaapatan waawaach kaye anite nihtaauchihchikan aschiihch. Ekush maak nitawaach kata wepinikanuu. Yaakwaau nituhta chechii nisituhtaman taan nihaau waa ishi wiihtamaataan.”