Luke 13 - Chishemanituu Utayimuwin: Kaa Uskaach Testament

Puunii e machituutaman

¹ An maak mekwaach chii ihtaauch anit iinuuch e chii wiihtamuwaatwaau Jesus taan kaa ihtuutawaakanuyich pasch iinuu Galilee aschiihch kaa uhchiyich. Chisheuchimaaukuuhpaaneu Pilate e ishinihkaasut e chii nipahaayich aniyuu iinuuh mekwaach e chii wii machishtawehamuwaatwaau Chishemanituu anichii iinuuch aniyuu awesiisa kaa nipahaatwaau.

² Ekw Jesus kaa itaat, “Chititeyihtenaawaau aa aniyuu e chii nipahaakanuutwaau e nuukuniyich uste wiyawaau e chii machituutamuwaakupanenich ishpishaat kutakach iinuuch utah Galileehch.

³ Namui, nituhtamukw maa che ititakuch, chiishpin ekaa kweskaatisiyekwe ekun mwehch kaye chiyawaau che ishi nishuuwanaachihiikuyekw.

⁴ Chichischisinaawaau aa yaanaaneushaap iinuuch anite ihtaawinihch Siloam kaa ishinihkaateyich kaa nipitwaau e chii patakahukutwaau kaa ishpaanaayich waaskaahiikaniyuu. Chititeyihtenaawaau aa e chii nuukuniyich wiyawaau uste e chii machaatisiitwaau ishpishaat kutakach awenichii anit Jerusalemihch kaa ihtaatwaau.

⁵ Namui, nituhtamukw maa, chiishpin ekaa kweskaatisiyekwe kaye chiyawaau chika nishuunaatisiinaawaau.”

Mistikw ekaa kaa miinishuut

⁶ Ekw Jesus kaa wiihtamuwaat uyuu chiskutamaacheu tipaachimuwiniyuu. Chii iteu, “Chii ihtaau naapeu e chii ayaawaat misishuuminaahtikw e nihtaauchiyich anite ushuuminaahtikw nihtaauchihchikan aschiihch. Ekw peyakwaau e chiishikaayich chii nitawaaheu che miinishuwiikwen aniyuu mistikw. Namui maak chekwaayuu uhchi miinishuuyuu.

⁷ Ekw kaa itaat aniyuu naapeu kaa naanaakachihtaayich aniyuuh unihtaauchihchikanh, ‘Kanawaapahta maa, meshikum pipun nichii takushin utah, nishtu pipun ishpish, chechii nituu chischeyimak uu misishuuminaahtikw e miinishukwe. Namui maak chekwaan nimisken chechii nihtaauchihch anit, naatwaakahuu ekush, sheshkwaaht kaa chimasut anit aschiihch.’

⁸ Ekw maak an kaa naanaakachihtaat aniyuu nihtaauchihchikanh chii iteu, ‘Ekaawii pitamaa pischeyim, miin peyakw pipun kata ishikaapuu. Nika muunahwaau anite waaskaa, ekw che ashtaayaan anite chekwaan chechii uhchi miyu nihtaauchit.

⁹ Chek maak miinishuute miin pipuniyiche chika miyeyihtenaanuu. Ekaa maak miinishuute, ekush chika naatwaakahwaakanuu.’ ”

Jesus kaa miinuwaachihaat kaa maaschisiyich iskweu e ayimiheuchiishikaayich

¹⁰ Peyakwaau e Jewa ayimiheuchiishikaayich, Jesus chii chiskutamaacheu anite ayimiheukamikuhch.

¹¹ Iskweu maak chii ihtaau anit machiahchaahkwa e chii piihchishkaakut e chii ihtuutaakut yaanaaneushaap pipun chechii ishpish aahkusit e chii maaskaachipiskunet ekaa uhchii kuiskukaapuut.

¹² Iskutak Jesus wiyaapamaat aniyuu iskweu chii wiishaameu ekw kaa itaat, “Iskweu, shaash mitun chimiinuwaachihiikuun taan kaa itaaspineyin.”

¹³ Kaa saaminaat. Tiiwehch maak chii uhchi kuiskukaapuu an iskweu e maamihchimaat Chishemanituu.

¹⁴ Ekw maak an kaa niikaanishkahk aniyuu ayimiheukamikuyuu naashch taapwe chii chishuwaasuu Jesus e chii miinuwaachihaayich aweyuu mekwaach e Jewa ayimiheuchiishikaayich. Ekw kaa itaat aniyuu kutak iinuu anit kaa ihtaayich, “Kutwaashch chiishikaau ihtakun chechii aapatisinaanuuhch, ekut chipaa pechi takushinaawaau mekwaach aniyuu e chiishikaakwaauh chechii miinuwaachihiikuyekw namui wii mekwaach e Jewa ayimiheuchiishikaach.”

¹⁵ Utipeyihchikeu kaa nishkweushihaat aniyuu kaa niikaanishkamiyich aniyuu ayimiheukamikuyuu e itaat, “Chiya kaa ayimihehkaasuyin, aat e Jewa ayimiheuchiishikaach namui aa yaapach chinituu aapihkunaau chituuhkaan maak chimistusim chechii ituhtahiit anite che minihkwet.

¹⁶ Ekw maak uu Jewa iskweu yaanaaneushaap pipun chii ishpish maahkupitikuu machimanituu, namui aa ishinaakuniyuu chechii aapihkunaakanuut aat e Jewa ayimiheuchiishikaayich.”

¹⁷ Ekw maak misiwe aniyuu kaa aanuweyimikut e chii miinuwaachihaat aniyuu iskweu mekwaach e ayimiheuchiishikaayich naashch taapwe chii pimaameyimuyuuh. Ekw anichii kutakach iinuuch chii miyeyihtamuch misiwe aniyuu kaa ishi maamishkaachihtuutamiyich Jesus.

Kaa apishiishit shuumin kaye maak uhpisikan

¹⁸ Ekw Jesus kaa kakwechimaat aniyuu anit kaa ihtaayitwaauh, “Taan e iteyihtaakuniyich Chishemanituu uchisheuchimaawin. Taanite chechii uhchi wiihtamaatakuch taan nihaau e iteyihtaakuniyich.

¹⁹ Mwehch an shuumin kaa apishiishiit mastart kaa ishinihkaataakanuut ekun e ishinaakuhch kihchikiishikw uchimaawin. Eukw uyuuh shuumin wetinaat naapeu e aihwaat anite unihtaauchihchikan aschiihch. Chek nehtaauchiyich, mistikw niyaanikutehch nuwach piikwenihtaauchiyuu anit an shuumin uhchi. Piyeshiishach maak ekute wechistunihkaasutwaau anit e watihkunuyich aniyuu mistikw.”

²⁰ Miin maak chii ishi kakwechimeu, “Taan e iteyihtaakuhch Chishemanituu chisheuchimaawin.

²¹ Muyaam palet uhpisikan ekun e iteyihtaakuhch, chiikuunam iskweu palet uhpisikaniyuu mistahii pahkweshikanihch, misiwe maak uhpiyuuh aniyuuh aaihkunaauh.”

Kaa shaakuwaashich iskwaahtem

²² Jesus chii ati chiskutamaacheu taanite kaa ati wautihtahk e utenaauniyich kaye e ati ihtakuniyikwaauh ihtaawinisha eshkw ekaa uhchi utihtahk Jerusalemiyuu anite kaa wii ituhtet.

²³ Chii kakwechimikuu maak Jesus aweyuu e itikut, “Utipeyihchikeu, mikw aa pasch awenichii chika pimaachihaakanuuch.” Chii iteu maak Jesus,

²⁴ “Mihchetu awenichii chika kuchihtaauch chechii piihchetwaau anite Chishemanituu uchisheuchimaawiniihch, namui maak kata chii ihtuuch. Chiyawaau maak suuhk kuchihtaakw chechii piihcheyekw anite uhchi an kaa shaakuwaach ishkwaahtem.

²⁵ Ekaa maak wehchi piihchewekwe, iskutak chipahwaate ishkwaahtem an kaa tipeyihtahk aniyuu waaskaahiikaniyuu, wiiwiitamihch niipuuyekwe e paahpawahiicheyekw chika itwenaawaau, ‘Utipeyihchikeu, pechi aapahamuunaan.’ Ekw maak che ishi nishkweushihiitaakw, ‘Namui chika uhchi aapahamaatinaawaau wesh namui chichischeyimitinaawaau, namui kaye nichischeyihten taanite wehchiyekw.’

²⁶ Ekw maak che ishi nishkweushihekw, ‘Chichii wiichimiichisuumitinaan, chichii wiichiminihkwemitinaan kaye chichii ihtaan nitihtaawinaahch e chiskutamaacheyin.’

²⁷ Miin maak yaapach chika itikuwaau, ‘Namui nichischeyihten taanite wehchiyekw, iichesikw nete misiwe, chiyawaau kaa machituutamekw.’ ”

²⁸ “Naashch taapwe suuhk chika maatuunaawaau kaye chika mamateyaapitesinaawaau iskutak waapamekwenich Abraham, Isaac, Jacob, kaye misiwe aniyehkaa uchischiwehiichesuuch e ihtaatwaau wiyawaau anite uchisheuchimaawiniihch, chiyawaau maak wiiwiiwepinikuyekwe.

²⁹ Kata takushinuuch awenichii waapanuutaahch, chiiwetinihch, shaawinihch kaye paastachiiwetinihch e uhchiitwaau che pechi miichisutwaau Chishemanituu uchisheuchimaawiniihch.

³⁰ Wesh anichii kaa iteyimaakanuutwaau ekaa chisteyihtaakusitwaau chika chisteyihtaakusuuch anite Chishemanituu uchisheuchimaawiniihch, kaye maak, anichii e chisteyihtaakusitwaau kaa iteyimaakanuutwaau namui chika uhchi chisteyihtaakusuuch anite Chishemanituu uchisheuchimaawiniihch.”

Jesus taan kaa ishpish saachihtaat Jerusalemiyuu

³¹ Aniyuu maak mekwaach chii ihtaauch Phariseech e pechi nituwaapamaatwaau Jesus. Chii iteuch maak, “Maachiih iiches utah ihtaawinihch, aahchiiuh nete ituhte, wesin Chisheuchimaau herod chiwii nipahiikw.”

³² Chii iteu maak Jesus, “Nituu wiihtamuwaahkw an mahcheshuu Herod, niwiiwiitishihwaayuu machiahchaahkwa kaye nimiinuwaachihaayuu iinuuh anuhchiish kaa chiishikaach kaye waapahche ekun che ihtiyaan. Paatish miin ane chiishikaache ekw che chiishihtaayaan.

³³ Yaapach nika ituhten taanite waa ituhteyaan anuhchiish kaa chiishikaach miin waapahche ekw maak usiwaapahche shaash nika ihtaan anite waa ituhteyaan. Wesh misiwe aniyehkaanaanich uchischiwehiichesuuch kaa nipahaakanuutwaau ekute anite Jerusalemihch kaa nishuuwanaachihaakanuutwaau. Eukw maak uu che uhchi ituhteyaan Jerusalemihch.”

³⁴ “Chiyawaau Jerusalemihch kaa ihtaayekw, kaa nipahekuch anichii uchischiwehiichesuuch kaye kaa paahpimusinaatahwekuch aniyuuh Chishemanituu kaa pechi itishahamaataakw, taan tahtwaau kaa wii maausikupititakuch anite ishi e ihtaayaan, muyaam pakahaahkwaan e ihtuutuwaat upakahaahkwaanishimh, shiipaa utatahkunihch e ishi maausikunaat e wii naanaakachihaat. Ekun maak mwehch kaa wii ihtuutaatakuch. Mikw namui kuuhchi pachishtinaawaau uu chechii ihtuutaatakuch.

³⁵ Chika nakatamaakunaawaau chiichiwaauh mitun e nishuunaatahkwaau. Chiwiihtamaatinaawaau namui chika uhchi waapaminaawaau paatish utihchipayihche chechii itweyekw, Shaweyihtaakusuu an kaa pechi itishahwaakanuut chechii ayimishtamuwaat Utipeyihchikeu.”