Luke 11 - Chishemanituu Utayimuwin: Kaa Uskaach Testament

Jesus kaa chiskutamaachet taan che ishi ayimihaanuyich

¹ Peyakwaau iskutak Jesus kaa chiish ayimihaat, peyakw aniyuu uchischinuhamuwaakanh chii itikuu, “Utipeyihchikeu, pechi chiskutamuunaan maa kaye niyaan taan che ishi ayimihaayaahch mwehch John kaa ihtuutawaat uchischinuhamuwaakan.”

² Jesus chii iteu, “Maau che ishi ayimihaayekw, ‘Nuuhtaawiinaan, kihchikiishikuhch kaa ihtaayin, nitayimihaanaan chitishinihkaasuwin e payehchisiimakahch chechii chisteyihtaakuhtaakanuuhch. Chuuchimaawin katawii utihchipayuu. Chititeyihtamuwin katawii ihtuutaakanuu utah aschiihch, taapishkuuch kihchikiishikuhch.

³ Miinaan tahtwaau e chiishikaach pahkweshikan che uhchi pimaatisiyaahch.

⁴ Wepeyihtamuunaan nimachihtwaawinaanh, wesh kaye niyaan niwepeyihtamuwaanaan misiwe awen kaa machituutuuyimiht. Ekaawii ituhtahiinaan anite chechii ishi kakwechihiikuyaahch.’ ”

⁵ Ekw Jesus kaa itaat aniyuu uchischinuhamuwaakan, “E chii nituwaapamat aahch chiwiichewaakan e aapihtaatipiskaayich e chii nituu auhaasumat chekwaayuu, ekw maak kaa itat an chiwiichewaakan, ‘Pechi auhiih maa nishtu paletich wesh niwiichewaakan nipechi chiiutamukw

⁶ ekut e ihtaauch che nipaat. Namui nitayaawaan chekwaayuu che ashamak.’

⁷ Ekw maak itisk aahch an chiwiichewaakan kaa nituu pekuhiit, ‘Ekaawii pechi mukushkaachihiih wesh shaash nichii chipahwaau chishtuhkan kaye nitawaashiimach niwiihpemikuch, namui nika chii wanishkaan chechii miitaan.’

⁸ Chiwiihtamaatinaawaau, ekaa wii wanishkaate chechii miisk aniyuu palet aat e chii miyu wiichewaakanitutaask yaapach maak chek chika wanishkaau chechii miisk taan e ishi nituweyihtamuut, ekaa puunihiite e nituweyihtamuut.

⁹ Wesh chititinaawaau, nitutamaakw taan e ishi nituweyihtamekw, chika miikunaawaau maak, naanituweyim Chishemanituu ekw maak che miskawat. Paapaawahiiche chishtuhkan ekw maak che aapahamaakuyin.

¹⁰ Wesh tahtu awen kaa nitutamaat chika miyaakanuu. Kaye tahtu awen kaa naanituweyimaat Chishemanituu chika miskaweu, kaye tahtu awen kaa paapaawahiichet kata aapahamuwaakanuu.”

¹¹ “Chiyawaau uhtaawiimaauch, nituweyihtamaask aahch chikus namesa chipaa chii ihtin aa chechii miyat chinepukw,

¹² maak nituweyihtamaask waawiyuu, chipaa chii ihtin aa chechii miyat manichuusha e pachiskuhuweyich.

¹³ Aat e machaatisiyekw yaapach chichischeyihtenaawaau chechii miyu miyekuch chitawaashiimuwaauch. Etituu maak Kuuhtaawaau kihchikiishikuhch kaa ihtaat chischeyihtam chechii miyu miiwet. Miyeyihtam e miyaat aweyuu Kaa payehchisiyich Ahchaahkwa aniyuu kaa nitutamaakut.”

Taanite kaa uhtinahk Jesus umaskuusiiwin

¹⁴ Chii ihtaau naapeu mitun e chii ihtuutaakut machiahchaahkw ekaa chechii kaschihut e ayimit. Iskutak maak Jesus kaa wiiwiitishihwaat aniyuu machiahchaahkwa, ekw kaa uhchi nihtaawet an naapeu. Ekw anichii iinuuch naashch taapwe chii maamishkaateyihtamihiikuuch uyeyuu.

¹⁵ Ekw pasch chii iteuch, “Aniyuu machiahchaahkw uchimaau Beelzebul ekun aniyuu kaa miikut mitewiniyuu chechii wiiwiitishihwaayich machiahchaahkw.”

¹⁶ Kutakach maak chii wii kakwechiheuch Jesus e wii naanituu chischeyihtamuwaatwaau taanite wehchipayiyich aniyuu umaskuusiiwin. Ekw kaa itaatwaau chechii waapahtiikutwaau maamishkaach waapahtiiwewiniyuu Chishemanituu e ihtaayich e uhchipayiyich.

¹⁷ Jesus maak chii chischeyimeu taan e ishi maamituneyihtamiyich, ekw kaa itaat, “Maasihiitutwaawenich awenichii anite e mishaach aschiihch kaa ihtaatwaau chika wanaachihiituuch. Muyaam taan e ishinaakuhch peyakutenuu awenichii e machipayitwaau namui chika uhchi chihkaawaachipayuuch kaye chika chii wanaachihiituuch.

¹⁸ Anichii maak kaa nuushuushkuwaatwaau machimanituu, maasihiitutwaawenich maak, machimanituu uchisheuchimaawin chika wanaachihtaakanuuyuu. Eukw maak chipaa ispayuu taapwe Beelzebul pechi miit mitewiniyuu chechii aapachihtaauch chechii wiiwiitishihuukwaau machiahchaahkuch.

¹⁹ Taapwe Beelzebul umitewin aapachihtaawaauche e wiiwiitishihukwaau machiahchaahkuch, kaye maak chitiiniimuwaauch e wiiwiitishihwaatwaau machiahchaahkwa, aweyuu maak kaa wiichihiikutwaau wiyawaau uyuu chechii ihtitwaau. Chika chii wiihtamaakuwaauch taapwe e nanatayekw an e itweyekw machimanituu e wiichihaat aweyuu chechii wiiwiitishihwaayich machiahchaahkwa.

²⁰ Wesh namayeu an kaa niikaanishkuwaat machiahchaahkwa maayit chechii wiiwiitishihuukwaau machiahchaahkuch. Chishemanituu eukw kaa pechi miit kaschihuwiniyuu chechii wiiwiitishihuumach machiahchaahkwa. Ekut maak wehchi waapahtiikuyekw taapwe Chishemanituu uchisheuchimaawin shaash mitun e utihtahukuwekw.”

²¹ “E suuhchisiit naapeu misiwe ishi ayeskuushteyikwaawen unitupayuuchekwaanim e naanaakachihtaat wiichi kaye maak misiwe e ishi tipiyeusiit, namui aweyuu katachii pischeyihtamiyuu aniyuuh uchekwaanimh.

²² Utihtikut maak aweyuu uste e suuhchisiyich ishpishaat wii katachii shaakuuchihiikuu. Ekw maak misiwe che utinimiyich aniyuuh unitupayuuchekwaanimh aniyuu kaa wii ishi mamishiitutahk chechii uhchi kanuweyimitisut. Ekw maak misiwe aniyuu taan kaa ishi ayaat, misiwe kata ishi maatinuwepayihtaayuuh.”

²³ Jesus miin chii itweu, “An awen ekaa kaa pechi wiichihiit, ninishkuushitaakw. Awen ekaa kaa wiichihiit e maamuushtinicheuch aschetishihiicheu ishinaakusuu.”

Kaa pechi chiiwet machiahchaahkw

²⁴ Ekw Jesus miin kaa itwet, “Iskutak e chii wiiwiit machahchaahkw piihch aweyuu e ihtaayich uhchi anite e paahkwaayich papaa ihtaau e naanituwaahtahk taanite chechii aasteyeskusiit. Ekaa maak meskahk ekw e itisut, ‘Nika chiiwe naanituwaapamaau an naapeu kaa nakatak. Aniyuu maak naapeu muyaam waaskaahiikan eukw e ishinaakusiyich.’

²⁵ Kiipaa kaau e ishi chiiwet an machiahchaahkw e naanituweyihtahk anit kaa uhchi wiiwiit waaskaahiikaniyuu. Iskutak maak paahchet ekw meskahk naashch e payehchinaakuniyich kaye naashch e miyunaakuniyich.

²⁶ Uyuu maak wiyaapahtahk e ishinaakuniyich ekw chestuhtet, niyaanituweyimaat niishwaashch machiahchaahkwa uste e iteyihtaakusiyich e iteyihtaakusit wiya chechii wiichimikut anit aniyuu naapeu piihch e ihtaayich. Ekw maak an naapeu etituu chika iteyihtaakuhiikuu aniyuu niishwaashch machiahchaahkwa taan kaa iteyihtaakuhiikut niishtam, mikw e chii peyakushiyich.”

Iskweu kaa aayimuumaat Jesus ukaawiyuu

²⁷ Mekwaach uyuu e ayimit Jesus, iskweu anit e ihtaat aniyuu e mihchetinaanuyich chii uhchi tepweu e itwet, “Taapwe shaweyihtaakusuu an iskweu anit e ihtaat kaa uhchi nihtaauchiyin kaye kaa nuushaanihiisk.”

²⁸ Ekw Jesus kaa itaat, “Ehe, taapwe, mikw maak uste shaweyihtaakusuuch anichii kaa pehtahkwaau Chishemanituu utayimuwiniyuu kaye kaa nanihiihtamuwaatwaau.”

Iinuuch kaa nituweyihtahkwaau muush chechii waapahtiyaakanuutwaau maamishkaach chekwaayuuh

²⁹ Ekw maak etituu mihchetu aweyuu kaa pechi nituhtaakut Jesus. Kaa itaat, “Anuhchiish iinuuch kaa pimaatisiitwaau naashch taapwe machaatisiyuuch. Kakwechihcheyimuuch chechii waapahtiyaakanuutwaau maamishkaach waapahtiiwewiniyuu. Namui maak chika uhchi waapahtiyaakanuuch. Mikw aniyuuh taan kaa ishi maamishkaach ispayiyich aniyaa uchischiwehiichesuu Jonah eukw mikw aniyuu che waapahtiyaakanuutwaau.

³⁰ Jonah chii itishahukuu Chishemanituu anite Nineveh kaa ishinihkaateyich ihtaawiniyuu chechii yaakwaamimaat aniyuuh iinuuh anite kaa ihtaayich chechii kweskaatisiyich. Ekun maak mwehch kaye Iinuu Ukusisa wehchi itishahwaakanuut anite anuhchiish kaa pimaatisiitwaau iinuuh e ihtaayich.

³¹ Iskutak maak wiyaaskunicheu chiishikaau utihchipayihche, aniyaa chisheuchimaaskweu shaawinuutaahch kaa tipeyihchichekupane chika uhchi pisikuu che nishuuwanaachimaat aniyuu iinuuh anuhchiish kaa pimaatisiyich. Wesh wiya naashch taapwe waahyuu chii uhtuhteu mikw chechii nituu nituhtamuwaat aniyaa chisheuchimaau Solomon ukachehtaaweyihtamuwiniyuu. Ihtaau maak utah awen uste e iteyihtaakusit ishpishaat Solomon, namui maak aapatihtawaakanuu.

³² Iskutak maak wiyaaskunicheu chiishikaache, aniyehkaanaanich iinuuch anite Ninevehch kaa chii ihtaatwaau chika uhpakaapuuch che itwetwaau chechii waweshihiikuwekw chiyawaau anuhchiish kaa pimaatisiyekw. Wesh ekut kaa uhchi kweskaatisiitwaau iskutak kaa pehtawaatwaau Jonah e kacheskweyich. Ihtaau maak awen utah uste e iteyihtaakusit ishpishaat Jonah.”

Waashtenamaakan

³³ “Namui awen saskaham waashtenamaakaniyuu ekw maak chechii nituu kaataat, maak wiyesh chechii akunahahk. Ashtaau anite taanite misiwe awen e pechi piihchet chechii waapahtahk e waashteyich.

³⁴ Chischiishikw eukw uyuu uwaashtenamaakan chiiyuu. E miywaach chischiishikw tekash waashteu chiiyuuhch mikw maak ekaa miywaache chischiishikw naashch taapwe ukaashteyaau chiiyuuhch.

³⁵ Yaakwaamiih ekaa chechii ihtakuhch chipimaatisiiwinihch wanitipiskusiiwin, anite chipaa ihtakun waashtewin.

³⁶ Awen maak tekash wiyaashtuwekwe ekaa mitun ayaakwe wanitipiskusiiwiniyuu upimaatisiiwinihch, taapwe mitun tekash kata waashtuweu, muyaam kaa chii ishinaakusit awen waashtenamaakaniyuu e chihkaashukut.”

Jesus kaa ishi aanumaat Phariseeh kaye aniyuuh wiishuwewiniyuu kaa chiskutamaacheyitwaau

³⁷ Iskutak kaa chiishi ayimit Jesus, peyakw Pharisee chii wiishaamikuu chechii wiichimiichisuumaat. Ekw Jesus kaa ituhtet anite, kaa nituu wiichimiichisuumaat aniyuu Pharisee.

³⁸ Chii miskaateyihtam an Pharisee ekaa uhchi kaasiitihcheyich Jesus eshkw ekaa miichisuyich. Wesh ekun kaa chii ihtinaanuyich maan.

³⁹ Ekw Jesus kaa itaat, “Chiyawaau Phariseech, naashch yaakwaau e iteyihtamihiikuyekw chiwiyaakanawaau kaye chiminihkwaakanawaau chechii payehkahkwaau. Mikw maak ekun chihchiwe e iteyihtaakusiyekw naashch e machaatisiyekw kaye naashch e machituutamekw.

⁴⁰ Namui aa chinisituhtenaawaau, Chishemanituu kaa ushihtaat miiyuuyuu chii ushihtaau kaye aniyuu piihch taan e ishinaakuniyich.

⁴¹ Kweskaatisiikw, puuniikw an e ihtiyekw mikw chiyawaau e wii ayaayekw chekwaan. Miyaahkuch anichii kaa chistimaatisiitwaau taan e ishi nituweyihtahkwaau. Ekw maak che payehchinaakuhkwaau chipimaatisiiwinawaau.”

⁴² “Chekwaan chika ishi machipayinaawaau chiyawaau Phariseech, naashch yaakwaau chinaanaakachihtaanaawaau e ishi pahkwenamuwekw Chishemanituu taan e ishi nihtaauchihcheyekw nihtaauchihchikanisha. Miywaau kiipaa an e ihtuutamekw. Mikw maak namui miywaau ekaa kuiskw ihtuutawekuch kutakach awenichii kaye ekaa saachihekw Chishemanituu.

⁴³ Chekwaan chika ishi machipayinaawaau chiyawaau Phariseech. Wesh naashch anite e chisteyihtaakuhch Jewa ayimiheukamikuhch ekute waa ahiishuyekw kaye naashch e nituweyihtamekw chechii chisteyimikuyekw e waachiyemikuyekw pepaamuhteyekw anite kaa chii mihchetinaanuuhch e ataawaanuuhch.

⁴⁴ Chekwaan chika ishi machipayinaawaau chiyawaau wiishuwewin kaa chiskutamaacheyekw kaye chiyawaau Phariseech, chiyawaau kaa ayimihehkaasuyekw, wesh ekun e ishinaakusiyekw mwehch iihkuhiiskaan ekaa uhchi chiishaawaachihtaakanuuhch. Iinuuch tahkuskaatamuch ekaa chischeyihtahkwaau chekwaayuu anite nitaamihch kaa ihtakuniyich.”

⁴⁵ Peyakw kaa chiskutamaachet ayimihewin wiishuwewiniyuu chii iteu, “Chiskutamaachesuu, uu e itweyin, chimaayeyiminaan kaye niyaan.”

⁴⁶ Jesus chii iteu, “Chekwaan chika ishi machipayinaawaau chiyawaau wiishuwewin kaa chiskutamaacheyekw, chipukuseyimaawaauch iinuuch chechii nanihiihtahkwaau aniyuu ayimihewin wiishuwewinh chiyawaau kaa ushihtaayekw, naashch kaa aayimihiikutwaau chechii nanihiihtahkwaau. Misimiskaakuuch ekaa maak mechim wii wiichihekuch.

⁴⁷ Chekwaan chika ishi machipayinaawaau. Naashch chichii miyuuhtaanaawaau anit kaa chiskahaakanuutwaau aniyehkaanaanich uchischiwehiichesuuch. Aniyehkaanaanich maak chuuhtaawaauch e chii nipahaatwaau uyuuh.

⁴⁸ Chiwaapahtiiwenaawaau maak e naheyihtamuwekw uyuu e chii ihtitwaau kuuhtaawaauch. Wiyawaau chii nipaheuch uyuuh uchischiwehiichesuuh chiyawaau maak chichii miyunaakuhtaanaawaau anit kaa chiskahaakanuutwaau.

⁴⁹ Eukw maak wehchi itwet kaa kachehtaaweyihtahk Chishemanituu, ‘Nika itishahamuwaauch anichii iinuuch uchischiwehiichesuuh, kaye apastalh. Mikw maak chika nipaheuch pasch, kaye kutak chika nanehkaachiheuch.’ Eukw maak kaa ispayiyich uyuu kaa itwet Chishemanituu.

⁵⁰ Ekw maak anichii iinuuch anuhchiish kaa pimaatisiitwaau, wiyawaau kata wiyaaskunaakanuuch taan kaa ishpish pechi nipahaakanuyich aniyehkaanaanh uchischiwehiichesuuh kaa ishpish ihtakuhch uu aschii,

⁵¹ anite aniyaa uchischiwehiichesuu Abel kaa ishinihkaasut e uhchi chihchipayihch anite maak ishi aniyaa Zechariah taan kaa ishi nipahaakanuut. Piihtakamihch chisheayimiheukamikuhch chii nipahaakanuu Zechariah chishtauch aniyuu pachishtinicheunaapiskuyuu anit maak maauch e payehcheyihtaakuhch chisheayimiheukamikw. Ehe, chihchiwe chititinaawaau, anichii iinuuch kaa pimaatisiitwaau anuhchiish wiyawaau chika aanische maahtakushkaakuuch misiwe aniyuu taan kaa ishi wanituutawaakanuyitwaau.”

⁵² “Chekwaan chika ishi machipayinaawaau chiyawaau kaa chiskutamaacheyekw wiishuwewin. Chinakaahwaawaauch awenichii chechii chischeyimaatwaau kaye chechii taapweyimaatwaau Chishemanituu. Chiyawaau namui chiwii piihchenaawaau Chishemanituu uchisheuchimaawinihch ekw maak chinakaahaawaauch anichii awenichii kaa wii piihchetwaau. Mwehch awen e utinahk aniyuu aapahiikaniyuu ekaa chechii piihcheyich aweyuu anite Chishemanituu e uchimaawiyich eukw e ishinaakusiyekw.”

⁵³ Iskutak maak e ati chistuhtet Jesus anit, ekw anichii kaa chiskutamaachetwaau wiishuwewiniyuu ekw maak anichii Phariseech chii chishuwaahiikuuch. Naashch maak suuhk yaapach chii kakwechimeuch kutak chekwaayuu

⁵⁴ e wii naanituu kuchihaatwaau chekwaayuu chechii wanitweyich chechii uhchi mamishimaatwaau.