Luke 10 - Chishemanituu Utayimuwin: Kaa Uskaach Testament

Jesus kaa chihchitishahwaat niishwaashumitanuu niishu uchischinuhamuwaakanh

¹ Iskutak kaa chiishipayihch an taan kaa ispayihch Utipeyihchikeu chii wiyaapameu niishwaashumitanuu niishu kutak aweyuu che uchischinuhamuwaakanit ekw kaa niikaanitishihwaat e naaniishuhteyitwaau. Chii iteu misiwe ihtaawinihch chechii ituhteyich misiwe taanite che aituhtekupane, kaye misiwe taanite e ati ihtaayitwaauh aweyuuh.

² Chii iteu maak, “Mihchen nihtaauchihchikanh shaash e ishinaakuhkwaauh chechii maamuushtinikanuuhkwaauh mikw maak namui mihchetuuch kaa aapatisitwaau chechii maamuushtinahkwaau. Chipaa ayimihaawaau Utipeyihchikeu, an kaa tipiyeusiit misiwe chekwaayuu e nihtaauchiniyich, chechii itishahwaat mihchetu aweyuu che maamuushtinamiyich aniyuu nihtaauchihchikanh.

³ Maachiikw maak, chititishahutinaawaau anite muyaam maanishchaanishach e itishahwaakanuutwaau mekwesiin mahiihkanh e ihtaayich.

⁴ Ekaawii ayaakw shuuliyaawat, kaye miiwat maak maschisin kaye ekaawii chipihchikaapuukw chechii ayimihekw awen mekwaach e pimuhteyekw.

⁵ “Taanite an che piihtakahiikuwekwe waaskahiikan niishtam chika itaawaauch anichii anit kaa ihtaatwaau che wii ihtakuhch chiyaameyihtamuwin anit.

⁶ Ekw maak anichii anit kaa ihtaatwaau meyeyihtamuwaakwenich chiyaameyihtamuwiniyuu kata ayaauch. Ekw maak ekaa meyeyihtamuwaakwenich chiyaameyihtamuwiniyuu namui kata uhchi ayaauch.

⁷ Ekut maak che ihtaayekw anit an waaskaahiikan kaa ihtaatwaau anichii e wii ayaatwaau chiyaameyihtamuwiniyuu. Ekut che miichisuyekw kaye che minihkweyekw taan che ishi miikuyekw, wesh awen kaa aapatisit taapwe iteyihtaakusuu chechii tipahamuwaakanuut. Ekaawii aashuupiihchekw waaskahiikan, ekut mikw anit ihtaakw taanit kaa piihtakahiikuyekw.”

⁸ “Kaye maak utihtamekwe ihtaawin e piihtakahiikuyekw, ekut anit ihtaakw. Miichikw taan e ishi wiishtwaakuyekw.

⁹ Kaye miinuwaachihaahkuch anichii kaa aahkusitwaau kaye maak che itekuch anit aniyuu ihtaawiniyuu kaa ihtaatwaau, ‘Naashch taapwe chipeshuwaapamikuwaanaawaau Chishemanituu uchisheuchimaawin.’

¹⁰ Ekw maak utihtamekwe ihtaawin ekaa nituweyimikuyekw chechii ihtaayekw che ishi ayaakwaamimekuch anichii iinuuch e itekuch,

¹¹ ‘Tekash nikaasiihtitaanaan nisitinaanh taan kaa ishpish papaamuhteyaahch utah chitihtaawiniwaahch. Eukw uu e nuukuhtaayaahch e chii aatuweyihtamuwekw Chishemanituu uchisheuchimaawin. Mikw maak chiwii wiihtamaatinaan cheshtinaash chechii nisituhtamekw e chii peshunaakuniyich Chishemanituu uchisheuchimaawin anit e ihtaayekw.’ ”

¹² Ekw Jesus miin kaa itaat aniyuu uchischinuhamuwaakan, “Chiwiihtamaatinaawaau iskutak utihchipayihche wiyaaskunicheu chiishikaau uchii iinuuch ekaa kaa yaapatihtaataakuch etituu kata iteyihtaakuniyuu weshkach taan kaa ishi waweshihaakanuutwaau wiyawaau aniyehkaanaanich naasch e chii machaatisiitwaau iinuuch Sodom kaa ishinihkaateyich ihtaawiniyuu kaa ihtaatwaau. Chii wanaachihtaau Chishemanituu aniyeneyuu ihtaawiniyuu.”

Aniyuu ihtaawin kaa ihtaatwaau iinuuch ekaa kaa wii taapwehtahkwaau miywaachimuwiniyuu

¹³ Ekw Jesus kaa itwet, “Chiyawaau kaa ihtaayekw anit ihtaawinihch Chorazin kaa ishinihkaatech nuwach chika machipayinaawaau, kaye anite Bethsaidahch kaa ihtaatwaau eukun mwehch che ispayitwaau. Wesh aniyuuh maamishkaach chekwaayuu kaa ihtuutamaakuyekw chii ihtuutaakanuwaakupanenh anite weshkach Tyre kaye Sidon kaa ishinihkaatekwaauh ihtaawinh shaash weshkach chipaa kweskaatisiyuuch wiyawaau anichii iinuuch. Ekw maak e nuukuhtaatwaau e ishpish mihchiiwesitwaau umachihtwaawinawaauh chipaa piskweyekapuuch e kaawekaniyikwaau machunisha, anite maak ishkwaaschisehch chipaa apuuch.

¹⁴ Iskutak utihchipayihche wiyaaskunicheu chiishikaau, Chishemanituu chika waweshiheu aniyuu Tyrehch kaye Sidonihch kaa chii ihtaayich. Etituu maak chiyawaau chika waweshihiikunaawaau.

¹⁵ Ekw maak chiyawaau anit Capernaumihch kaa ihtaayekw naashch taapwe chiwii aspeyimunaawaau anite kihchikiishikuhch chechii ishi utinikuyekw. Namui maak, machishkutehch ekute che ishi wepinikuyekw.”

¹⁶ Ekw Jesus kaa itaat uchischinuhamuwaakan, “Awen kaa nituhtaataakw muyaam niya e pechi nituhtuut ekun e ishinaakusit. Awen maak kaa aatuweyimitaakw muyaam niya e aatuweyimit ekun e ishinaakusit. Ekw awen kaa aatuweyimit muyaam e aatuweyimaat Chishemanituu, aniyuu kaa pechi itishahuyich, ekun e ishinaakusit.”

¹⁷ Iskutak maak kaau tekushihkwaau anichii niishwaashumitanuu niishu chischinuhamuwaakanich naashch taapwe chii miyeyihtamuch e itwetwaau, “Utipeyihchikeu, waawaach machiahchaahkuch e nanihiihtuuyimihtwaau taan e itashumachihtwaau, chitishinihkaasun e aapachihtaayaahch.”

¹⁸ Ekw Jesus kaa itaat, “Nichii waapamaau machimanituu e uhchi pahchishihk kihchikiishikuhch, muyaam taapwe e waashtepayihch ekun kaa ishinaakusit.

¹⁹ Nituhtamukw maak, chichii miitinaawaau tipeyihchichewin chechii shaakuuchihekw machimanituu, kaye chechii taahtahkushkaatekuch kaa pihchipuwetwaau misichinepukuch, kaye maak kaa pihchipuwetwaau mistahiipihchesuuch. Namui ihtakun chekwaan chechii aahkuhiikuyekw.

²⁰ Ekaawii miyeyihtamukw mikw e chii shaakuuchihekuch machiahchaahkuch, uste miyeyihtamukw chitishinihkaasuwinaawaauh e masinaatekwaau kihchikiishikuhch.”

Chekwaayuu wehchii miyeyihtahk Jesus

²¹ Ekut maak Jesus naashch taapwe kaa muuchicheyihtamiskaakut Kaa payehchisiyich Ahchaahkwa. Chii itweu maak, “Nuuhtaa, chiya kaa tipeyihtaman kihchikiishikw kaye aschii chinanaaskumitin, wesh chinakaahamuwaauch anichii kaa kachehtaaweyihtahkwaau ekaa chechii nisituhtamuwaakupanenich uyuuh chekwaayuu. Ekw anichii ekaa naashch kaa kachehtaaweyihtahkwaau chichii ihtuutawaauch wiyawaau chechii nisituhtahkwaau. Ehe, Nuuhtaa eukun uu kaa ishi naheyihtamihiikuyin chechii ihtuutaman.”

²² Ekw Jesus iskutak kaa chiishi ayimihaat kaa itaat aniyuu anit kaa ihtaayitwaauh, “Nuuhtaawii misiwe chekwaayuu nichii miikw chechii naanaakatuweyihtamaan. Wesh namui awen chischeyimeu aweyuu Ukusisimaau, mikw Uhtaawiimaau chischeyimeu. Kaye maak namui awen chischeyimeu aweyuu Uhtaawiimaau, mikw Ukusisimaau, kaye mikw wiya Ukusisimaau chika wiyaapameu aweyuuh aniyuuh chechii chischeyimaayich Uhtaawiimaau.”

²³ Ekw kaa ayimihaat mikw aniyuuh uchischinuhamuwaakanh, kaa itaat, “Taapwe chishaweyihtaakusinaawaau chiyawaau taan e ishi waapahtamekw anuhchiish.

²⁴ Wesh chiwiihtamaatinaawaau, chii mihchetuuch uchischiwehiichesuuch kaye chisheuchimaauch e chii pukuseyihtahkwaau chechii waapahtahkwaau taan kaa ishi waapahtamekw. Namui maak uhchi waapahtamuch. Chii wii pehtamuch taan kaa ishi pehtamekw, namui maak uhchi pehtamuch.”

Naapeu kaa wiichihaat naapeu e chii mishwaakanihkaataakanuyich

²⁵ Peyakwaau maak naapeu kaa chiskutamaachet ayimihewin wiishuwewiniyuu e itaapatisit chii naateu Jesus e wii kakwechihaat, e itaat, “Taanite che ihtiyaan chechii uhchi ayaayaan kaachiche pimaatisiiwin.”

²⁶ Jesus chii itikuu, “Taan maak e ishi nisituhtaman an ayimihewin wiishuweusinahiikan e ayimihtaayin. Taan e itashtech maak.”

²⁷ Ekw an naapeu chii iteu, “Saachihii Utipeyihchikeu Chichishemanituum, misiwe chitehiihch, kaye misiwe chitahchaahkuhch kaye misiwe chimaskuusiiwinihch kaye misiwe chimituneyihchikanihch kaye maak saachihiich kutakach awenichii mwehch chii e ishpish saachihiisuyin.”

²⁸ Jesus maak chii itikuu, “Chitaapwen an kaa itweyin. Misiwe an ihtuutamane chika ayaan kaachiche pimaatisiiwin.”

²⁹ Naashch maak muyaam e miyutuutahk chii wii itihtaakuhiisuu e ishi kakwechimaat Jesus e itaat, “Awen an niichiinuu nipaa saachihaau muyaam niya e ishpish saachihiisuyaan.”

³⁰ Jesus maak chii nituweyimeu chechii nisituhtamiyich ekw kaa wiihtamuwaat tipaachimuwiniyuu. “Peyakwaau naapeu Jerusalemihch e uhchiit anite Jerichohch chii wii ituhteu. Mekwaach maak aniyuu e pimuhtet chii naachikwaashkuhtutaakuu chimutiska ekw kaa maasihiikut, kaa utinamiyich misiwe uchekwaanim. Chii nakatikuu maak anit meskanaahch e mishwaakanuut.

³¹ Ekw Jewa ayimiheuchimaau chii pechi pimuhteu aniyuu meskanaayuu, iskutak maak wiyaapamaat aniyuu naapeu namui uhchi wii wiichiheu ekw anite kwestehcheskanuu kaa pimuhtet mikw e chii ishi miyaaskawaat.

³² Chek miin kutak naapeu chii pechi pimuhteu, Levi iinuu e itiskaanesit. Chii waapameu kaye wiya aniyuu naapeu kaa mishwaakanihkaataakanuyich kaye wiya maak namui uhchi wii wiichiheu ekw mikw kaa ishi miyaaskawaat nete kwestehcheskanuu e pimuhtet.

³³ Miin kutak naapeu, Samaria aschiihch e uhchiit chii utihteu aniyuu naapeu, ekw naashch kaa chistimaacheyimaat.

³⁴ Kaa naataat ekw kaa nituhkuhaat e kutapinamuwaat tuuminikaniyuu e nituhkuiinuuniyich kaye maak shuuminaapuuyuu taanite anit kaa mishwaakanihkaataakanuyich kaye chii wiiskweyaapihkaatamuweu. Ekw kaa tehtahaat anit utuuhkaan uspiskuniihch, kaa ituhtahaat anite nipeukamikw kaa ihtakuniyikwaauh ekute maak kaa naanaakachihaat.

³⁵ Miin chiyechishepaayaayich, kaa miyaat shuuliyaayuu aniyuu kaa naanaakachihtaayich aniyuu nipeukamikuyuu, ekw kaa itaat, ‘Naanaakachihii uu naapeu. Chika tipahamaatin taan an che ishpish masinahamaataan iskutak miin pimuhteyaane utah.’ ”

³⁶ Eukw uyuu tipaachimuwiniyuu kaa wiihtamuwaat Jesus aniyuu wiyaaskunichesuu. Ekw kaa itaat, “Taan an eukw anichii e nishtitwaau naapeuch muyaam wiichishaan kaa ihtuutawaat aniyuu naapeu kaa miswaakanihkaataakanuyich.”

³⁷ Ekw an wiyaaskunichesuu kaa itwet, “An kiipaa naapeu kaa wiichihaat kaa nuukuhtaat e chistimaacheyimaat.” Jesus kaa itaat, “Maachiih maak, ekun maak uu mwehch che ihtuutaman kaye chiya.”

Jesus kaa ihtaat anite Martha ekw maak Mary wiichiihch

³⁸ Jesus ekw maak uchischinuhamuwaakan mekwaach e pimuhtetwaau chii utihtamuch ihtaawiniyuu. Chii ihtaau maak anit iskweu Martha e ishinihkaasut, eukw maak aniyuu kaa piihtakahiikutwaau.

³⁹ Martha maak chii ihtaayuuh wiichishaaniskwem, Mary e ishinihkaasuyich. Chii waweyapiyuu maak anite Jesus usitiihch e nituhtawaat e ayimiyich.

⁴⁰ Martha maak naashch taapwe chii utameyihtamihiikuu e mistatuschet, ekw kaa naachikaapuushtawaat Jesus ekw kaa itaat, “Utipeyihchikeu, namui aa wiyesh chititeyimaau uu niichishaan, niya mikw e iteyimit chechii aapatisuuch. Ishi maa chechii pechi wiichihiit.”

⁴¹ Utipeyihchikeu chii itikuu, “Martha, Martha naashch e mukushkaateyihtamihiikuyin mihchetu chekwaayuu.

⁴² Peyakw wesin chekwaan naashch nituweyihtaakun, Mary maak shaash chii wiyaapahtamaasuu aniyuu chekwaayuu uste e miywaashiyich e nituweyihtaakuniyich. Namui maak aweyuu chika chii miskamikuu aniyuu.”