Luke 1 - Chishemanituu Utayimuwin: Kaa Uskaach Testament

E chihchipayihtaakanuuhch

¹ Chiya Theophilus, chika aayimuutamaatin an miywaachimuwin taan kaa ishi pimaatisiit Jesus mekwaach utah aschiihch mekwesiin e ihtaayaahch kaa ihtaat. Mihchetu awenichii chii kuchihtaauch chechii masinahahkwaau aniyuu taan kaa ishi pimaatisiyich Jesus.

² Eukw uyuu kaa ishi wiihtamaakuyaahch anichii awenichii niishtam kaa waapamaatwaau kaye kaa pehtawaatwaau Jesus. Eukunich anichii kaa wiihtahkwaau miywaachimuwiniyuu.

³ Ekw maak naashch yaakwaau kaa nituu kachescheyihtamaan uyuu misiwe chekwaayuu taan nihaau kaa ati ispayihkwaau ushkach chehchipayihkwaau. Ekw maak kaa iteyihtamihiikuyaan che miywaakupane kaye niya chechii masinahamuwaapaane e wiihtamaataan misiwe taan nihaau kaa ati ispayihch ekw maak chechii itishahamaataan nimasinahiikan, chiya Theophilus maauch chesteyihtaakusiyin.

⁴ Uu maak nitihtuuten chechii chischeyihtaman e taapwemakahch taan kaa ishi chiskutamaakuyin anite utaahch.

Iskutak John siikahaahtaacheu che pimaatisiit

⁵ Mekwaach Herod kaa chisheuchimaaut anite Judea aschiihch, chii ihtaau Jewa ayimiheuchimaau Zechariah e chii ishinihkaasut. Aniyaa Abijah kaa ishinihkaasuyich ayimiheuchimaau e ihtaayich ekute kaa uhchiyit Zechariah. Chii pechi maamiiskuchishkaatuuch ayimiheuchimaauch anichii Abijah e ihtaayich kaa uhchiitwaau. Wiichiskweu maak Elizabeth chii ishinihkaasuyuuh. Uu maak Elizabeth anite Aaron kaa ishinihkaasuyich ayimiheuchimaauh e ihtaayich chii uhchi aanische pimaatisiikupane.

⁶ Zechariah ekw maak Elizabeth chii kuiskutaatisiyuuch. Tekash chii nanihiihtamuweuch Utipeyihchikeu ukacheskwewiniyuuh kaye utitishuwewiniyuuh. Kaye naashch chii naheyihtamiheuch Chishemanituu aniyuu taan kaa ishi pimaatisiitwaau.

⁷ Namui maak uhchi ayaaweuch awaasha wesh Elizabeth namui uhchii ayaaweu awaasha, kaye maak shaash taapishkun chii chisheiniyuuch.

⁸ Anichii maak ayimiheuchimaauch maamiiskuch chii aapatisuuch anite chisheayimiheukamikuhch. Peyakwaau maak mekwaach anit e chii utihchipayiyich wiya Zechariah kweschiipan chechii aapatisit anite chisheayimiheukamikuhch.

⁹ Chii wiyaapamaakanuu chechii saskahahk kaa wiihchimaasteyikwaau chekwaayuu anit kaa chii machishtawehamaanuyich, wesh eukun kaa chii ishi naanaakachihtaatwaau ayimiheuchimaauch. Ekw maak kaa piihchet anite Utipeyihchikeu uchisheayimiheukamikuwiihch chechii saskahahk kaa wiihchimaasteyikwaau.

¹⁰ Mekwaach maak anite chisheayimiheukamikuhch e ihtaat Zechariah, wiiwiitamihch anite chii ihtaauch anichii iinuuch e maamuu ayimihaatwaau.

¹¹ Zechariah maak chii nuukushiishtaakuu Utipeyihchikeuh utenchilamiyuuh, anite nihiiwinihch anit aniyuu pachishtinicheunaapiskuhch taanite kaa chii ishkwaasiikanuyich kaa wiihchimaakusiyich ekut kaa niipuyich.

¹² Iskutak maak Zechariah wiyaapamaat aniyuu enchil chii kushkupayuu kaye naashch chii sechisuu.

¹³ Ekw kaa itikut aniyuu enchil, “Ekaawii sechisi, Zechariah, wesh chichii pehtaakw Chishemanituu taan kaa ishi nitutamuut. Chiichiskweu Elizabeth chika ayaaweu awaasha, chika naapeshiiwiyuu. John maak chika ishinihkaataau an awaash.

¹⁴ Naashch maak chika miyeyihtenaawaau kaye naashch chika sichiyeyihtenaawaau. Mihchetu kaye awenichii chika miywaatamuch iskutak pimaatisiyichen.

¹⁵ Utipeyihchikeu chii wiyaapamikuu an awaash wesh chisteyihtaakuniyuu taan waa itaapachihiikut. Namui nihtaa kata uhchi minihkweu shuuminaapuuyuu kaye ishkutewaapuuyuu. Wesh Kaa payehchisiyich Ahchaahkwa tekash chika pimipayihiikuu aat eshkw mekwaach ukaawii kanuweyimikute uspayaayihch.

¹⁶ Mihchetu maak Israel iinuu chika ihtuutaweu chechii kweskaatisiyich, kaau chechii nanihiihtawaayich Utipeyihchikeu, Uchishemanituumiyuuh.

¹⁷ John maak chika niikaanitishihwaakanuu chechii wiichihaat Chishemanituuh utiiniimiyuu chechii ayeskuwiyich takushiniyichen Utipeyihchikeuh. Chika ayaaweu aniyuu ahchaahkwa kaa pimipayihiikuyich aniyaanaah Elijah kaa ishinihkaasuyich Chishemanituuh kaa chii ayimishtamuwaayich kaye aniyuu suuhkaatisiiwiniyuu taan kaa ishi ayaayich ekun kaye wiya che ishi ayaat. Chika ihtuutaweu uhtaawiimaau kaa machipayihkahtaatuyitwaau utawaashiimiyuuh miin kaau chechii saachihiituyich. Kaye aniyuu ekaa kaa kuiskutaatisiyich chika ihtuutaweu chechii ishi kachehtaaweyihtamiyich taapishkuuch aniyuu kaa kuiskutaatisiyich. Eukw uyuu che aihtit John chechii ayeskuwiihaat aweyuu chechii nachihaayich Utipeyihchikeu.” Eukw maak uyeyuu kaa ishi wiihtamaakut Zechariah aniyuuh enchil.

¹⁸ Zechariah maak chii iteu aniyuu enchil, “Taanite maak chechii uhchi cheshtinaahuyaan e taapwemakahch uu kaa ishi wiihtamuyin, shaash maak e chisheiniyuyaan kaye maak niichiskweu shaash e chisheishkweshiyuut.”

¹⁹ Ekw aniyuu enchil kaa nishkweushihiikut, e itikut, “Eukw niya Gabriel, uhchishkuu Chishemanituu e ihtaat niniipuun e atushkuuk. Nichii pechi itishahuukw chechii wiihtamaataan uu miywaachimuwin.

²⁰ Ekw maak nituhta, namui chika chii ayimin paatish chii ispayihche taan kaa ishi wiihtamaataan. Eukw uu che ispayin ekaa uhchi taapwehtawiyin taan kaa ishi wiihtamaataan.”

²¹ Anichii maak iinuuch chii ashuwaapameuch Zechariah che ishpish pechi wiiwiyich. Ekw kaa maamituneyihtamihiikutwaau chekwaayuu wehchi naashch chineush ihtaayich anite piihtakamihch.

²² Iskutak maak piyechi wiiwiit Zechariah namui uhchii ayimuu. Ekw anichii iinuuch kaa chischeyihtahkwaau waapahtiiwewiniyuu e chii waapahtiyaakanuyich piihtakamihch anite chisheayimiheukamikuhch. Mikw chii ishinitihchepayihuu Zechariah chekwaayuu e wii itwet ekaa muhch uhchii ayimit.

²³ Iskutak maak kaa chiishi aapatisit Zechariah anite chisheayimiheukamikuhch ekw kaa chiiwet.

²⁴ Wiipach maak taapwe chii kanuweyimaausuyuu aniyuu wiichiskweu Elizabeth. Niyaayinuu piisim maak chii kaashuushtaweyuu iinuu.

²⁵ Ekw Elizabeth kaa itwet, “Nichii pimaameyimun ekaa uhchii ayaawak awaash, mikw maak nichii ihtuutamaakw Utipeyihchikeu chechii ayaaumach awaasha, ekw maak namui nika uhchi pimaameyimun.”

Mary kaa nuukushiishtaakut enchil

²⁶ Iskutak maak kutwaashch piisim kaa ishpish kanuweyimaausut Elizabeth, Chishemanituu chii itishahweu aniyuu enchil Gabriel kaa ishinihkaasuyich anite Galilee aschiihch, anite Nazareth kaa ishinihkaateyich ihtaawiniyuu.

²⁷ An enchil chii itishahwaakanuu chechii nituwaapamaat ushchiniichiskweu Mary e ishinihkaasuyich. Mary maak chipaa niipuu aniyuu Joseph kaa ishinihkaasuyich naapeu chechii wiichimaat. Uu maak Joseph, chii aanische umushuumuu aniyaa chisheuchimaau David kaa ishinihkaasuyich.

²⁸ Chii nituwaapamikuu maak Mary aniyuu enchil ekw kaa itikut, “Chiyaameyihta, wesh Utipeyihchikeu chiwiicheukw. Chishemanituu mistahii chiwii shaweyimukw.”

²⁹ Mary maak chii sechisuu kaye chii miskaateyihtamihiikuu uyuu taan kaa itaakanuut kaye chii maamituneyihtamihiikuu aniyuu taan kaa wiishi wiihtamaakut aniyuuh enchil.

³⁰ Chii itikuu aniyuu enchil, “Ekaawii sechisi Mary, wesh Chishemanituu nuwach chishaweyimukw.

³¹ Chika kanuweyimaausun, naapesh chika ayaawaau. Jesus chika ishinihkaataau.

³² Naashch taapwe kata chisteyihtaakusuu. Chishemanituu maauch kaa ispeyihtaakusit Ukusisa ekun che ishinihkaataakanuut. Wesh Utipeyihchikeu Chishemanituuh chika chisheuchimaauhiikuu anite Israel aschiihch mwehch kaa ishi chisheuchimaauhaakanuyich aniyaanaa utaanische umushuum David kaa ishinihkaasuyich.

³³ Kaachiche chika ayaau tipeyihchichewiniyuu Israel iinuu chechii chisheuchimaaututawaat. Ekw maak aniyuu e tipeyihchichet namui wiiskaat kata uhchi iskwaapayiniyuu.”

³⁴ Ekw Mary kaa itaat aniyuu enchil, “Taanite chechii uhchi ispayihch uu, ekaa maak wiiskaat uhchi pischeyimit naapeu.”

³⁵ Ekw kaa itikut aniyuu enchil, “Kaa payehchisiit Ahchaahkw chika utihtikw, Chishemanituu maauch e ispeyihtaakusit, usuuhkaatiisiiwinihch ekut che uhchi kanuweyimaausuyin. Eukw maak che uhchi ishinihkaataakanuut an awaash che pimaatisiit kaa payehchisiit kaye Chishemanituu Ukusisa chika ishinihkaataakanuu.

³⁶ Eyuu maak chii itikuu Mary aniyuu enchil. Waawaach chiwaahkumaakan Elizabeth, kaa itaakanuut namui chika chii ayaaweu awaasha, shaash nikutwaashch piisim kanuweyimaausuu, aat maak shaash e chisheiniyuut.

³⁷ Namui ihtakuniyuu chekwaayuu Chishemanituu ekaa chechii ihtuutahk.”

³⁸ Ekw Mary kaa itaat aniyuu enchil, “Shaash nika ayeskuwiyin taan che itaapachihiit Utipeyihchikeu. Kata wii ispayuu an kaa itweyin.” Ekw maak kaa nakatikut aniyuu enchil.

Mary kaa chiiutamaat uwaahkumaakan Elizabeth

³⁹ Paatimaa maak, Mary chii ituhteu e wii chishipayit anite aniyuu ihtaawiniyuu anite e waawaakataauhkaayich Judea aschiihch kaa ihtakuniyich.

⁴⁰ Zechariah wiichiihch chii piihcheu ekw kaa waachiyemaat aniyuu Elizabeth.

⁴¹ Iskutak maak Elizabeth kaa waachiyemikut Mary chii muushiheu e uhchi yaayaahchiyich utawaashiim. Ekw Elizabeth kaa saakaschineshkaakut Kaa payehchisiyich Ahchaahkwa.

⁴² Kaa itaat aniyuu Mary e chishewet, “Chii maauch chishaweyimukw Chishemanituu e tashitwaau iskweuch, kaye naashch taapwe shaweyihtaakusuu an awaash che ayaawat.

⁴³ Nimiskaateyihten maak chekwaan niya wehchi pechi chiiutamiyich Nitipeyihchikem ukaawii.

⁴⁴ Iskutak kaa pechi waachiyemiyin an nitawaashiim chii uhchi aayaahchiyuu e miyeyihtahk.

⁴⁵ Taan chit ishpish shaweyihtaakusinaache wesh mitun chichii taapwehtamuwaan taan kaa ishi wiihtamaask Utipeyihchikeu utenchilam che ispayiyich.”

Mary kaa maamihchimaat Chishemanituu

⁴⁶ Ekw Mary kaa itwet, “Nimaamihchimaau Utipeyihchikeu nitahchaahkuhch,

⁴⁷ Kaye naashch taapwe nisichiyesin e maamituneyihtamihiikuuch aniyuuh taan kaa ishi ihtuutamuut Chishemanituu nipimaachihiiwem.

⁴⁸ Wesh chii naanaakatuwaapahtamuweu utaapachihaakaniskwem utipihteyihtaakusiiwiniyuu. Taan che ishpish aanische pimaatisiiwaakwenich iinuuch anite ishi niishtamihch chika aayimuutamuch taan kaa ishpish shaweyimikuuch.

⁴⁹ Wesh Chishemanituu kaa suuhkaatisiit maamishkaach nichii ishi miyutuutamaakw kaye maak chisteyihtaakuniyuu utishinihkaasuwin.

⁵⁰ Muush shaweyimeu aniyuu aweyuu kaa nanahchiishtaakut, ekun muush kaa pechi ihtit kaye maak ekun muush che ihtit.

⁵¹ Chii waapahtiiweu taan e ishpish suuhkaatisiit. Kaye chii aschetishihweu aniyuuh aweyuu naashch kaa chihkaateyimishuyich ekw maak namui uhchii ihtuutamiyuuh aniyuuh chekwaayuuh kaa iteyihtamihiikuyich chechii ihtuutamiyich.

⁵² Utapuwiniihch chii uhchi niihtineu aniyuu naashch kaa uchimaaweyihtaakusiyich chisheuchimaau ekw kaa chisteyihtaakuhaat aniyuu kaa tipihteyihtaakusiyich.

⁵³ Chii weyuuch miyeu taan e ishi nituweyihtamiyich aniyuu kaa chistimaatisiyich ekw aniyuuh kaa miisitisiyich chii iichetishahweu ekaa chekwaayuu ayaayich.

⁵⁴ Chii wiichiheu Israel iinuuh, muush e chii chischisit taan e ishi chistimaacheyimaat.

⁵⁵ Chii chischisuu taan che ishi kaachiche chistimaacheyimaat Abraham kaye aanische utawaashiimiyuu.”

⁵⁶ Eukw maak uyuu misiwe kaa itwet Mary. Ekw maak ekut kaa ihtaat anit Elizabeth wiichiihch. Nishtu piisim chii wiichimeu, ekw kaa chiiwet.

Kaa pimaatisiit John siikahaahtaacheu

⁵⁷ Chek chii utihchipayuu Elizabeth che pimaatisiyich aniyuu utawaashiim, chii naapeshiiwiyuu maak.

⁵⁸ Iskutak maak piyehtamiyich uwaahkumaakan kaye misiwe iinuu anit peshuch kaa ihtaayich, naashch taapwe chii miyeyihtamiyuu e chii pehtahkwaau taan kaa ishi miyutuutamaakut Utipeyihchikeu.

⁵⁹ Iskutak maak yaanaaneu chiishikaau kaa ishpish pimaatisiit an awaash misiwe uwaahkumaakanawaau kaye uwiichewaakanawaau chii pechi takushiniyuu chechii ihtuutawaawaakupanenich taan kaa chii ihtuutawaatwaau Jewa iinuuch utawaashiimuwaau e naapeshiiwiyich, chii chischinuwaachishuweuch. Uwaahkumaakanawaau maak, Zechariah chii wii ishinihkaateuch uyuu awaasha chechii wiichishuumaayich uhtaawiyuu.

⁶⁰ Ukaawii maak chii itweyuuh, “Namui, John chika ishinihkaasuu.”

⁶¹ Ekw maak kaa itaatwaau, “Namui ihtaauch chiwaahkumaakanuwaauch John e ishinihkaasutwaau chechii wiichisuumaat an chitawaashiimuwaau, wesh chipaa wiichishuumeu uwaahkumaakan, ekun kaa chii ihtinaanuuhch.”

⁶² Ekw maak kaa ishinitihchepayihuutwaau aniyuu uhtaawiyuu e ihtaayich e kakwechimaatwaau taan che ishinihkaasukupane uu awaash.

⁶³ Zechariah chii ishinitihchepayihuu e nituweyihtahk chekwaayuu anit chechii masinahiichet. “John kata ishinihkaasuu” chii itasinahiicheu. Misiwe maak chii kushkupayuuch uyuu kaa itashtaayich.

⁶⁴ Aniyuu maak mekwaach tiiwehch chii uhchi miyupayiyuu miin chechii ayimit Zechariah ekw kaa maamihchimaat Chishemanituu.

⁶⁵ Ekw anichii peshuch anit kaa ihtaatwaau kaye anichii iinuuch waaskaa anit Judea kaa ihtaatwaau naashch taapwe chii sechisuuch iskutak kaa pehtahkwaau taan kaa ispayikupane.

⁶⁶ Misiwe maak tahtu awenichii kaa pehtahkwaau naashch chii maamituneyihtamuch e iteyihtahkwaau, e ishi maa kata iteyihtaakusuu uu awaash. Wesh mitun chii chischeyihtaakun shaash Utipeyihchikeu e wiishuwaatikut uu awaash.

Chishemanituu kaa ishi miikut che ishi ayimit Zechariah

⁶⁷ Zechariah maak chii saakaschineshkaakuu Kaa payehchisiyich Ahchaahkwa. Eukw maak uyuu Chishemanituu kaa miikut chechii itwet,

⁶⁸ “Kata maamihchimaakanuu Utipeyihchikeu, Israel iinuuch Uchishemanituumiwaau, wesh chii pechi taakushin chechii pechi naatamuwaat utiiniim, kaye chechii pechi pimaachihaat.

⁶⁹ Chishemanituu chii pechi itishahweu e suuhcheyihtaakusiyich upimaachihiiweu aniyaa utaapachihaakan David e ihtaayich e uhchiyich.

⁷⁰ Pechi weskach anite kaa payehchisiitwaau uchischiwehiichesuuch chii itweuch

⁷¹ e cheshtinaateyihtaakuniyich taapwe upimaachihiiweu che naatamaatahkw uhkaatikuyihkwe kaye wiyesh wii ihtuutaakuyihkwe.

⁷² Wesh Chishemanituu chii iteu aniyaanaa chiwaahkumaakanuuh anite weskach kaa pimaatisiyich che chistimaacheyimaat kaye ekaa che uhchi wanchischisiitutahk upayehchi niskumuwin.

⁷³ Chishemanituu chii iteu aniyaanaa chiwaahkumaakanuuh Abraham cheshtinaash che ihtuutahk aniyuu taan kaa itwet che ihtuutamaatahkw,

⁷⁴ chechii wiihkuchihiitahk anite uhchi kaa uhkaatitahkwaau e ihtaatwaau.

⁷⁵ Ekw maak namui chika uhchi kushtaachinaanuu chechii atushkuuhkw Chishemanituu che ishpish pimaatisiihkw, kuiskutaatisiihkwe kaye nanihiihtuuhkwe.”

⁷⁶ Ekw Zechariah kaa itaat aniyuu ukusisa taan kaa ishi nituweyimikut Chishemanituu chechii itwet, “Ekw maak chii nitawaashiim maauch kaa ispeyihtaakusit Chishemanituu uchischiwehiichesiimh chika ishinihkaatikuun. Chika meskanaahkuwaau Utipeyihchikeu e ishi ayeskuwiihkamut anit che pimuhtet.

⁷⁷ Chika wiihtamuwaayuu utiiniim chechii pimaachihaakanuyitwaau e wii wepeyihtamuwaakanuutwaau umachihtwaawinawaau.

⁷⁸ Wesh Chichishemanituuminuu chistimaacheyimuweu kaye saachihiiweu chechii petwaatahkw pimaachihiikusiiwiniyuu, muyaam piisim e chihkaashtuwet e chechishepaayaayich.

⁷⁹ Ekw maak waashtewin kata uhchi chihkaashteu kihchikiishikuhch anite ishi wanitipiskusiiwinihch kaa ihtaatwaau kaye anichii kaa sechiskaakutwaau nipuwiniyuu. Eukw an waashtewin che chischinuhtahiikuyihkw chiyaameyihtamuwinihch chechii ishi pimaatisiihkw.” Eukw maak uyuu misiwe Zechariah kaa itwet.

⁸⁰ Uu maak awaash John chii ati suuhchinihtaauchuu wiiyuuhch kaye utahchaahkuhch. Ekw maak iskutak kaa chiishi nihtaauchit ekw muush pahkaan kaa wiichit, paatish wetihchipayiyich che kacheschimaat Israel iinuu. Anite maak chii papaa ihtaau pakwaatiskamikaahch anite ekaa nihtaauchiniyich chekwaayuu.