Jude 1 - Chishemanituu Utayimuwin: Kaa Uskaach Testament

Waachiyemuwewin

¹ Jude niya, James wiichiinuu. Jesus Christ nitatushkuwaau. Nimasinahamuwaauch anichii kaa tepwaatikutwaau kaye naashch kaa saachihiikutwaau Chishemanituu Uhtaawiimaauh. Miyu kanuweyimikuuch Jesus Christ uchii.

² Kamaa weyuuch chishewaatutaataakw Chishemanituu. Kamaa kaye weyuuch miitaakw chiyaameyihtamuwiniyuu kaye saachihiiwewiniyuu.

Kaa wiyeshihiiwetwaau

³ Niwiichewaakanitikw kaa saachihiitakuch, naashch e chii iteyihtamaan chechii masinahamaatakuch chechii aayimuutamaatakuch an pimaachihiikusiiwin misiwe kaa chischeyihtamuhkw. Chek nichii iteyihten taapwe e nituweyihtaakuhch chechii masinahamaatakuch chechii kaachiichimitakuch. Chiwii siihchimitinaawaau maak suuhk chechii aahchiishtamekw chechii kanuweyihtamekw an peyakwaau kaye chihchiwe kaa ishi miyaakanuutwaau che ishi taapwehtahkwaau kaa taapwehtahkwaau.

⁴ Wesh ihtaauch ekaa mitun Chishemanituuwaatisiitwaau naapeuch chiimuut e chii uhchi ihtaatwaau mekwesiinuu anit e ihtaawekw. Nitamukw ishi chiskutamaacheuch e iteyihtaakuniyich Chishemanituuh ushaweyihchichewiniyuu. Itweuch ekaa wiyesh iteyihtaakuniyich awen aat nitamukw e itaatisiit wesh yaapach chika wepeyihtamaakuu Chishemanituu. Namui uhchi wii nanihiihtaweuch Utipeyihchikeu Jesus aniyuu wechimaamiihkw. Weskach maak anite, Chishemanituu umasinahiikanihch chii niikaan wiihtaakun anit eshkw che waweshihaakanuutwaau uchii.

⁵ Aat maak shaash misiwe e chischeyihtamekw uu che ishi waawiihtamaatakuch, chiwii chischisuumitinaawaau Utipeyihchikeu e chii wiihkuchihaat aniyuuh Israel iinuuh Egypt kaa ishinihkaateyich aschiiyuu uhchi ekw aniyuu ekaa kaa taapwehtamiyich paatimaa chii wanaachiheu.

⁶ Chischisiitutawaahkuch kaye anichii enchilich ekaa uhchi nanaakataweyihtahkwaau taan kaa ishpish miyaakanuutwaau tipeyihchichewiniyuu kaye kaa nakatahkwaau taanit kaa pachishtinaakanuutwaau chechii ihtaatwaau. Mekwaach kaachiche puuchisiyaapiih maahchikwaapihkaasuuch anite nihtaamihch tekash kaa ukaashteyaayich. ekute chepahukuutwaau Chishemanituu paatish utihchipayiyiche aniyuu naashch chesteyihtaakuniyich e chiishikaayich che wiyaaskunaakanuutwaau.

⁷ Chischisiitutawaahkuch kaye anichii iinuuch Sodom kaye Gomorrah ekw maak aniyuuh kutak ihtaawinh waaskaa kaa ihtakuniyikwaauh kaa uhchiitwaau. Mwehch aniyuuh enchilh kaa ihtiyich ekaa uhchi nanihiihtuwaayich Chishemanituu ekun kaa ihtitwaau. Kaye maak misiwe ekaa muyaam iteyihtaakuniyich wiinisuu pimaatisiiwiniyuu chii ihtuutamuch. Tekash chii ishkwaateuh uyuuh ihtaawinh ekw maak niyenehkaateyimuhaakanuutwaau anichii iinuuch anite machi ishkutehch kaachiche kaa ihtakuniyich. Eukw maak wehchi yaakwaamikuyihkw uyuu che ishi waweshihaakanuut awen ekaa mitun kaa wii nanihiihtawaat Chishemanituu.

⁸ Ekun maak mwehch e ihtitwaau uchii naapeuch. Wiinisuu pimaatisiyuuch kaye wiinisuu puwaamuuch. Tekash namui aapateyihtamuch tipeyihchichewiniyuu kaye maamaayeyimeuch aniyuuh kaa chisteyihtaakusiyich ishpimihch kaa ihtaayitwaauh.

⁹ Namui mechim an kaa niikaaneyihtaakusit enchil Michael kaa ishinihkaasut, uhchi iteyihtam wiya chechii suuhcheyimutawaat machimanituu chechii maayeyimaat. Mikw chii iteu, “Utipeyihchikeu chika chistahamaakw.” Eukw uyuu kaa itaat iskutak kaa ayaasutemitutwaauh machimanituuh Moses wiiyuuyuu uhchi.

¹⁰ Uchii maak wii naapeuch, mikw ishi maayeyihtamuch chekwaayuu ekaa nisituhtahkwaau. Mwehch awesiisah mikw waa ihtiyich e ihtiyich ekun e ihtitwaau uchii naapeuch. Namui maamituneyihtamihiikuuch kuiskw e ihtuwaakwenich, eukw maak uyuu wenaachihiikutwaau.

¹¹ Taapwe kata aahkwaach machipayuuch. Mwehch aniyaa Cain kaa ihtiyich ekun e ihtitwaau. Chii pachishteyimisuuch mwehch aniyaa Balaam kaa ishi machituutamiyich chechii ishi machituutahkwaau mikw shuuliyaayuu e wii uhchistamaasutwaau. Kaye mwehch aniyaa Korah kaa ishi suuhcheyimuyich ekun e ishi suuhcheyimutwaau. Ekun maak e ishi wanaatisiitwaau kaye wiyawaau.

¹² Mikw wanaahtaasuuch anit e makushewekw e nuukuhtaayekw e saachihekw Chishemanituu. Namui mitun pimaameyimuuch e mista chiishpuhiisutwaau e wiichimiichisuumitaakuch, mikw wiyawaau e nanaakatuweyimisutwaau. Mwehch kaskawanishkuch e pimaashitwaau ekaa maak mechim nipiyuutwaau ekun e iteyihtaakusitwaau. Mwehch mistikuch ekaa mitun miinishuutwaau aat e takwaatiniyich, mistikuch chichi utapii e chii manishipikuhchipitaakanuutwaau, tekash e nipitwaau, ekun e ishinaakusitwaau.

¹³ Mwehch kiskanich chihchikamiihch mekwaach naashch e mista ayuutihch, ekun e ishi piisteutaamutwaau upimaatisiiwiniwaahch taan e ishi pimaameyihtaakuniyich tipiiwe umachituutamuwinawaauh. Mwehch achahkushach mikw nitamukw kaa ishi papaamipayitwaau ekun e ishinaakusitwaau. Ihtakuniyuu maak anite maauch wekaashteyaayich e ayeskuushtamaakutwaau Chishemanituuh kaachiche che ihtaatwaau.

¹⁴ Enoch, an niishwaashch kaa ihtaat Adam e ihtaayich e chii uhchi aanische pimaatisiit, shaash anite weskach niyaakan chii aayimuumeu uyuuh. Chii iteu, “Iitaapikw maa. Utipeyihchikeu mihchetwaau chishe mitaahtumitanuu upayehchi enchilimh chika pechi wiicheweu

¹⁵ misiwe aweyuuh chechii wiyaaskunaat. Chika takushin chechii nishuuwanaachimaat misiwe umachihtwaauh ekaa kaa Chishemanituuwaatisiyich aniyuuh uhchi e chii ihtuutamiyich misiwe taan e ishi maayaataniyich. Chika wiyaaskuneu kaye uyuuh naapeuh misiwe taan kaa ishi machi aayimuumaayich Chishemanituuh.”

¹⁶ Muush memehch itweuch uchii naapeuch. Muush kutak aweyuuh ataameyimeuch ekaa kekachihkaawaachipayitwaauh. Pisikw ihtuutamuch taan e ishi machi nituweyihtahkwaau chechii ihtitwaau. Naashch taapwe wii nanaapeumuuch. Aayaahch ihtuuch e miyu aayimuumaatwaau aweyuuh mikw e wii mamiyuupayihiisutwaau chechii ihtitwaau aniyuu taan waa ihtitwaau.

Yaakwaamuwewin

¹⁷ Chischisikw mikw, niichishaanitikw, taan kaa ishi niikaan aayimuutamaataakuch Chitipeyihchikeminuu Jesus Christ utapastalimh.

¹⁸ Chichii itikuwaauch, “Utihchipayihkwaawenh maahchishtai e chiishikaakwaauh chika ihtaauch naapeuch e maayeyimitaakuch, mikw taan e ishi nitamukw iteyihtahkwaau chechii ihtitwaau aniyuu ekaa Chishemanituuwaatisiitwaau ekun che ihtitwaau.”

¹⁹ Eukw uchii naapeuch e ihtuutaataakuch chechii papahkaanipayihuwekw. Aniyuu taan e ishi machi nituweyihtahkwaau eukw aniyuu tepeyimikutwaau chechii ishi pimaatisiitwaau. Namui ayaaweuch Kaa payehchisiyich Ahchaahkwa.

²⁰ Chiyawaau maak wii, niichishaanitikw, suuhk etituu wii yaaichikaapuhiisukw e taapwehtamekw an kaa payehchisiimakahch. Ayimihaakw taan e ishi miitaakw maskuusiiwiniyuu Kaa payehchisiit Ahchaahkw.

²¹ Kanuweyimisukw Chishemanituu usaachihiiwewinihch e ashuwaapiyekw Jesus Christ chechii miitaakw kaachiche pimaatisiiwiniyuu aniyuu e shaweyimuwet uhchi.

²² Chishewaatutawaahkuch anichii kaa wii aanuwehtahkwaau.

²³ Wiichihaahkuch kutakach awenich e wiihkuchihekuch ishkutehch uhchi kaye chishewaatutawaahkuch mikw maak yaakwaamiikw ekaa chechii shaakuuchihiikuwekw umachaatisiiwinawaau. Mikw uhkaatamuwaahkw waawaach uchekwaanimuwaauh, wesh ihtakuniyuu e ishi wiinihtaatwaau waawaach aniyuuh uchekwaanimuwaauh taan e ishi wiinisuuwaatisiitwaau.

Maamihchimuweu nikamuwin

²⁴ Ekw maak an kaa peyakut Chishemanituu chipimaachihiiweminuu, an kaa kaschihut chechii kanuweyimitaakw ekaa chechii pahchishinuwekw kaye kaa kaschihut chechii ituhtahiitaakw anite e chisteyihtaakuniyich e ihtaat ekaa chekwaayuu ataameyihtaakusuwekw kaye e miywaatamuwekw,

²⁵ chika miyaakanuu chisteyihtaakusuwiniyuu, chisheuchimaawiniyuu, suuhkaatisiiwiniyuu ekw maak tipeyihchewiniyuu, Chitipeyihchikeminuu Jesus Christ uhchi, kaachiche kaye kaachiche. Amen.