John 7 - Chishemanituu Utayimuwin: Kaa Uskaach Testament

Jesus ekw maak wiichishaanh

¹ Miin paatimaa ekw Jesus kaa ituhtet anite Galilee kaa ishinihkaateyich aschiiyuu, namui wii anite Judea kaa ishinihkaateyich aschiiyuu itehche uhchi wii ituhteu wesh chii chischeyihtam e chii wii nipahiikut aniyuu Jewa iinuuh kaa niikaanishkuwaayich.

² Shaash maak chii peshunaakuniyuu kaa chii makushetwaau Jewa iinuuch. Ekut uyuu mekwaach chii ihtakuniyuu taan kaa chii ihtitwaau maan kaye maahkiihch chii ihtaauch.

³ Ekw Jesus wiichishaanh kaa itikut, “Chistuhte maa, nete Judeahch che ituhteyin, che waapahtahkwaau anichii kaa nuushuushkaaskwaau taan e ishi maamishkaach ihtuut.

⁴ Namui awen kaataau taan chechii ishi ihtuutahk netuweyihtamukwe chechii miyu chischeyimaakanuut. E ihtuutamuwane maak maamishkaach ihtuwin, pachishtinisuu chechii chischeyimakuyin taan chechii ishi ihtuutaman.”

⁵ Wesh wawaach tipiiwe wiichishaanh namui uhchi taapweyimikuu Jesus.

⁶ Ekw Jesus kaa itaat, “Taapaa eshkw utihchipayuu chechii chistuhteyaan, chiyawaau maak mikw waaishpish ituhteyekw chika chii ituhtenaawaau.

⁷ Taapaa ihtakuniyuu chekwaayuu chechii uhchi uhkaatitaakuch awenich utah aschiihch kaa ihtaatwaau ekaa kaa taapweyimaatwaau Chishemanituu, mikw maak nuuhkaatikuch niya wesh niwiihten taan e ishpish machaatisiinaanuuhch.

⁸ Maachiikw chiyawaau ituhtekw nete e makushaanuuhch, taapaa eshkw utihchipayuu niya chechii ituhteyaan anite.”

⁹ Iskutak maak Jesus kaa itwet uyuu ekut yaapach anit Galileehch kaa ihtaat.

Jesus kaa ituhtet anite aniyuu kaa makushaanuyich

¹⁰ Iskutak maak kaa chistuhteyitwaau aniyuu wiichishaanh Jesus anite aniyuu e makushaanuyich e ituhteyitwaauh, kaye wiya chii ituhteu anite ekaa chischeyimakut wesh namui uhchi nitaweyimeu chechii chischeyimakut aweyuu anite e ihtaat.

¹¹ Aniyuuh maak Jewa iinuuh kaa niikaanishkuwaayich chii naanituweyimikuu anite e makushaanuyich. Chii naanituu kakwechischeyimuyuuh taanite e ihtaat.

¹² Mihchetu maak aweyuu chii ayimitutaakuu anit kaa ihtaayich. Pasch e itweyich, “Naashch taapwe miyeyihtaakusuu uu naapeu.” Ekw kutak e itweyich, “Namui miyeyihtaakusuu, wiyeshimeu aweyuuh.”

¹³ Namui maak uhchi chisheweuch e ayimitutawaatwaau Jesus wesh chii kushteuch aniyuu Jewa iinuuh kaa niikaanishkuwaayich.

¹⁴ Shaash maak wiyesh aapihtuu chii ishpish chiishi makushaanuyuu, ekw Jesus kaa ituhtet anite chisheayimiheukamikuhch ekw kaa Chiskutamaachet.

¹⁵ Anichii maak Jewa iinuuh kaa niikaanishkuwaatwaau naashch chii miskaateyihtamihiikuuch e ishpish miyuuhtaakusiyich e Chiskutamaacheyich ekw kaa itwetwaau, “Taanite wehchi naashch mistahii chischeyihtahk masinahiikaniyuu ekaa maak wiiskaat uhchi chiskutamuwaakanuut.”

¹⁶ Jesus kaa nishkweushihaat e itaat, “An kaa ishi chischinuhamaacheyaan namayeu niya an nichischinuhamaachewin, Chishemanituu aniyuu uchischinuhamaachewin, an kaa pechi itishahuut.

¹⁷ An maak awen suuhk wii ihtuutamuwaate Chishemanituu utiteyihtamuwiniyuu, aniyuu taan e ishi chischinuhamaacheuch ekut che uhchi chischeyihtahk Chishemanituuh kaa pechi itashumiikwen aniyuu chechii ishi chiskutamaacheuch maak mikw niya nititeyihtamuwinihch wehchipayiyikwe.

¹⁸ An awen mikw wiya taan e iteyihtahk kaa ishi wiihtahk chekwaayuu, nituweyihtam wiya chechii chisteyimaakanuut. Ekw an awen kaa nituweyihtahk chechii chisteyimaakanuyich aniyuu kaa pechi itishahukut kuiskw ihtuu kaye namui mitun ihtakuniyuu wiyeshihiiwewiniyuu anit e ihtaat.

¹⁹ Namui aa Moses kuuhchi miikuwaau aniyuu wiishuwewiniyuu kaa ayaawekw. Namui maak waachipeyakw anit e tashiyekw chinanihiihtenaawaau an wiishuwewin. Chekwaan maak wehchi wii pechi nipihiyekw.”

²⁰ Ekw anichii iinuuch kaa nishkweushihaatwaau Jesus e itaatwaau, “Machahchaahkw chipiihchishkaakw. Awen maak uu waa nipahiisk.”

²¹ Jesus kaa nishkweushihaat e itaat, “Peyakw maamishkaach ihtuwin nichii ihtuuten, chichii miskaateyihtamihiikunaawaau maak e ayimiheuchiishikaach e chii ihtuutamaan an.

²² Moses chii itashuweche chechii ihtuutaakanuyich aniyuu wiishuwewiniyuu kaa itashteyich chechii chischinuwaachishwaakanuyich naapesha mekwaach e apishiishiyich. Namayeu maak Moses niishtam kaa pachishtinahk aniyuu wiishuwewiniyuu, shaash anite weskach chiwaahkumaakanuuch ekun uyuu wiishuwewiniyuu kaa ayaatwaau. Yaapach maak chichischinuwaachishwaawaauch naapeshach e utihchipayiyich uyuu chechii ihtuutuwaakanuutwaau aat mekwaach e Jewa ayimiheuchiishikaayich.

²³ Aat e Jewa ayimiheuchiishikaach yaapach chichischinuwaachishwaawaauch naapeshach e ishpish wii kanuweyihtamuwekw Moses uwiishuwewin, chekwaan maak wehchi chishuwaasiistuuyekw tekash e chii miinuwaachihiik an naapeu e ayimiheuchiishikaayich.

²⁴ Kuiskw maa maamituneyihtamukw an kaa ihtuutamaan. Ekaawii ataameyimikw chekwaan ekaa niishtam tekash nituu chischeyihtamekw chekwaan wehchii ihtuutamaan an kaa ihtuutamaan,” chii iteu Jesus.

Iinuuch kaa wii chischeyihtahkwaau taapwe Christ e aawiyikwenh Jesus

²⁵ Pasch iinuuch Jerusalemihch kaa uhchiitwaau chii iteuch, “Eukw aa uyuu naapeu kaa wii nipahaatwaau.

²⁶ Kanawaapamaahkw maa. Namui wiyesh itaakanuu anite mekwesiinuu e chischinuhamaachet. Namui kaakaye chischeyimeuch anichii kaa niikaanishkuwaatwaau Jewa iinuuh taapwe e aawiyikwen Christ, aniyuu Chishemanituu kaa pechi itishahwaayich.

²⁷ Iinaanuu maak ekaa che uhchi chischeyimaakanuut taanite che uhchiit Christ takushihke. Uu maak wii naapeu chichischeyimaanuu taanite wehchiit.”

²⁸ Mekwaach Jesus e chiskutamaachet anite chisheayimiheukamikuhch, chii chisheweu e itwet, “Taapwe aa chichischeyiminaawaau awen niya. Taapwe aa chichischeyihtenaawaau taanite wehchiyaan. Namui nuuhchi takushin niya mikw e chii iteyihtamaan chechii takushiniyaan. An muush kuiskw kaa ihtit eukun an kaa pechi itishahuut, namui maak chichischeyimaawaau chiyawaau uu awen.

²⁹ Mikw maak nichischeyimaau niya wesh wiya e ihtaat nuuhchiiwaan kaye wiya nichii pechi itishahuukw.”

³⁰ Ekut kaa wii maakunaatwaau Jesus mikw maak namui uhchi pischeyimeuch, wesh eshkw namui uhchi utihchipayuu anit chipaa maakunaakanuu.

³¹ Mihchetu maak aweyuu chii taapweyimikuu e itweyich, “Mistahii chii ishi maamishkaach ihtuu uu naapeu. Pechi itishahwaate maak Chishemanituu aniyuuh Christ, uste aa kata ishi maamishkaach ihtuutamiyuuh taan e ishi ihtuutamiyich uyuu naapeu.”

Kaa naanaakachihtaatwaau chisheayimiheukamikuyuu kaa itishahwaakanuutwaau chechii nituu maakunaatwaau Jesus

³² Ekw anichii Phariseech kaa pehtawaatwaau aniyuuh iinuuh taan kaa ishi chiimuut aayimuumaayich Jesus. Anichii maak kaa niikaanapitwaau ayimiheuchimaauch kaye anichii Phariseech chii itishahuweuch aniyuuh kaa maakunawesiyich kaa naanaakachihtaayich chisheayimiheukamikuyuu chechii nituu maakunaayich Jesus.

³³ Jesus maak chii iteu, “Eshkw weipishchiish nika ihtaan utah e ihtaayekw. Mikw maak shaash wiipach nika ituhten anite nuuhtaawii e ihtaat, an kaa pechi itishahuut.

³⁴ Chika pechi naanituwaapaminaawaau maak, namui mikw chika uhchi miskunaawaau, wesh anite che ituhteyaan namui chika chii ituhtenaawaau chiyawaau.”

³⁵ Ekw anichii Jewa kaa niikaanishkuwaatwaau kaa kakwechimitutwaau, “Taanite che ituhtet che uhchi ekaa miskuuhk. Maaskuuch kakweteyihtamiiche anite kutak Jewa e ihtaayitwaauh chechii ituhtet chechii chiskutamuwaat aniyuu Greek kaa itiskaanesiitwaauh.

³⁶ Taan e ishi chiisuwemakaniyich aniyuu kaa itwet, chika naanituwaapaminaawaau mikw maak namui chika uhchi miskaaunaawaau. Kaye kaa itwet, namui chika chii ituhtenaawaau anite che ituhteyaan. Taan e ishi chiisuwet aniyuu kaa itwet, ekun kaa ishi ayimihiitutwaau.”

Nipii kaa pimaachihiiwemakahch

³⁷ An maahchishtai e chiishikaach an kaa makushaanuuhch eukw maauch kaa chisteyihtaakuhch. Eukw maak aniyuu e chiishikaayich Jesus kaa pisikuut e chishewet e itwet, “Awen e nuuhteyaapaakwekwe nika pechi nituwaapamukw ekw maak che minihiik.

³⁸ Wesh itashteu Chishemanituu utayimuwinihch, ‘An awen che pechi taapweyimikwe, utehiihch chika uhchichuuniyuu aniyuu nipiiyuu kaa pimaachihiiwemakaniyich.’ ”

³⁹ Eukw uyuu kaa itwet Jesus e aayimuumaat Kaa payehchisiyich Ahchaahkwa, aniyuu misiwe awen kaa taapwehtahk che ayaawaat. Anichii kaa taapwehtahkwaau eshkw namui uhchi miyaakanuuch aniyuuh Kaa payehchisiyich Ahchaahkwa wesh eshkw namui uhchi nituwaapameu Jesus uhtaawiimaauh chechii chisteyihtaakuhaakanuut.

Iinuuch kaa wawaaneyihtahkwaau aweyuuh e aawiyich Jesus

⁴⁰ Pasch maak anichii awenich kaa pehtawaatwaau uyuu e itweyich, chii iteuch, “Eukun uu taapwe uchischiwehiichesuu kaa pechi itishahwaakanuut utah e ihtaayihkw.”

⁴¹ Kutakach maak chii iteuch, “Eukw uu Christ.” Kutakach chii iteuch, “Namiyewiiche uu Christ, wesh namui anite Galileehch chipaa uhchi uhchiyuu an Christ.

⁴² Itashteu Chishemanituu utayimuwinihch, ‘Anite David e ihtaayich chika uhchi aanische pimaatisiyuu an Christ, anite maak Bethlehemihch aniyaanaa David kaa uhchiit ekute chipaa pimaatisiyuu.’ ”

⁴³ Ekw kaa pahkaanipayihutwaau anichii iinuuch aniyuu uhchi ekaa peyakunihch iteyimaatwaau Jesus.

⁴⁴ Pasch awenichii chii wii maakuneuch mikw namui awen uhchi pischeyimeu.

Jewa iinuuh kaa niikaanishkuwaatwaau ekaa kaa wii taapweyimaatwaau Jesus

⁴⁵ Anichii maak kaa maakunawesuutwaau kaau chii nituwaapameuch aniyuu kaa niikaanapitwaau ayimiheuchimaauh kaye aniyuuh Phariseeh. Chii itikuuch maak, “Chekwaan wehchi ekaa uhchi peshuwekw.”

⁴⁶ Ekw anichii kaa maakunawesuutwaau kaa nishkweushihaatwaau aniyuuh e itaatwaau, “Namui nihtaa awen uhchi ishpish miyu chiskutamaacheu e ishpish miyu chiskutamaachet uu naapeu.”

⁴⁷ Ekw anichii Phariseech kaa itwetwaau, “Kaye aa chiyawaau chichii wiyeshihiikuwaau.

⁴⁸ Namui wiiskaat awen e niikaanishkaachet maak anichii Phariseech uhchi taapwehtamuch Jesus e aawiyich Christ. Namui kaye niyaan nitaapwehtenaan.

⁴⁹ Mikw anichii iinuuch ekaa kaa chischeyihtahkwaau Moses uwiishuwewiniyuu eukw uchii waa taapweyimaatwaau Jesus e aawiyich Christ, nishuuwanaachimikuuch maak Chishemanituuh uyuu e ihtitwaau,” chii iteuch anichii Phariseech.

⁵⁰ Peyakw an Pharisee an peyakwaau kaa nituwaapamaakupane Jesus, Nicodemus kaa ishinihkaasut, chii iteu aniyuu wiich Phariseeh,

⁵¹ itashteu chiwiishuwewinuu, “Namui chipaa uhchi wiyaaskunaanuu awen eshkw ekaa mechim uhchi nituhtuuhkw e ayimit kaye eshkw ekaa chischeyimahkw taan kaa ihtit.”

⁵² Chii nishkweushiheuch maak e itaatwaau, “Kaye chiya aa Galilee aschiihch kuuhchiyin. Ayimihtaayine Chishemanituu utayimuwin chika chischeyihten ekaa wiiskaat uhchi uhchiit awen e uchischiwehiichesuut anite Galilee aschiihch.”

⁵³ Ekw misiwe kaa chiiwetwaau.