John 5 - Chishemanituu Utayimuwin: Kaa Uskaach Testament

Jesus kaa miinuwaachihaat naapeu ekaa uhchi nisitusiyich

¹ Chii utihchipayuu chek anit kaa chii makushetwaau Jewa iinuuch anite Jerusalemihch, ekute maak anite kaa ituhtet Jesus.

² Anite maak Jerusalemihch chii ihtakun anite e uhchi piihchaanuuhch maanishchaanish ishkwaahtem e ishinihkaatech peshuch maak anit chii ihtakun e pakaashimunaanuuhch, Bethzatha chii ishinihkaateu Hebrew e ishi ayiminaanuuhch. Niyaayin chii tahtinh pwaahch e ihtakuhkwaauh anit.

³ Mihchetu awenich kaa aahkusitwaau ekute anite pwaahchihch kaa pimishihkwaau, anichii ekaa kaa waapahtahkwaau, anichii ekaa chii pimuhtetwaau kaye anichii ekaa kaa nisitusitwaau wiiyuwaahch, e ashuwaapahtahkwaau aniyuu nipiiyuu che ishpish aahtaakamipayiniyich.

⁴ Wesh Chishemanituu chii pechi itishahweu utenchilamh chechii chistikwaakamihamiyich aniyuu nipiiyuu chechii aahtaakamipayiyich. Uyuu maak e ispayiyich aniyuu nipiiyuu, an awen taan mikw e itaaspinekwe niishtam e pakashtuwehtet chii miinuwaachihaakanuu.

⁵ Chii ihtaau maak naapeu nishtumitanuu yaanaaneu pipun e chii ishpish aahkusit.

⁶ Iskutak Jesus wiyaapamaat aniyuu naapeu anit e pimishiniyich, chii chischeyimeu shaash weskach e chii aahkusiyich, ekw kaa kakwechimaat e itaat, “Chiwii miinuwaachihiikusiin aa.”

⁷ Ekw an naapeu kaa aahkusit kaa itwet, “Namui ihtaau awen chechii pechi ituhtahiit anite mekwaach e aahtaakamipayiyich aniyuu nipiiyuu. Mekwaach e ishpishiihkaasuyaan anite e wii ituhteyaan shaash ihtaau maan awen e pechi aakuschiskuut.”

⁸ Ekw Jesus kaa itaat aniyuu naapeu, “Pisikuuh, utinh chitashpishimuwin che pimuhteyin.”

⁹ Tiiwehch maak chii uhchi miinuwaatisiyuu an naapeu. Chii utinam utashpishimuwin ekw kaa chistuhtet. Chii ayimiheuchiishikaau maak uu kaa ispayihch.

¹⁰ Ekw anichii Jewa iinuuh kaa niikaanishkuwaatwaau kaa itaatwaau aniyuu naapeu kaa miinuwaachihaakanuyich, “Ayimiheuchiishikaau anuhchiish namui itashteu niwiishuwewinaahch chechii tahkunaman chitashpishimuwin e ayimiheuchiishikaach.”

¹¹ Ekw an naapeu kaa miinuwaachihaakanuut kaa itwet, “An awen kaa pechi miinuwaachihiit, eukw an kaa pechi iishit, utinh chitashpishimuwin ekw maak pimuhteh.”

¹² Anichii maak Jewa iinuuh kaa niikaanishkuwaatwaau chii kakwechimeuch aniyuuh naapeu e itaatwaau, “Chekw naapeu uu kaa itisk chechii utinamut chitashpishimuwiniyuu ekw maak chechii pimuhteut.”

¹³ Ekw an naapeu namui uhchi chischeyimeu aweyuu aniyuu kaa miinuwaachihiikut wesh shaash chii chistuhteyuuh Jesus wesaa e chii mihchetinaanuyich anit.

¹⁴ Paatimaa maak anite chisheayimiheukamikuhch Jesus chii nachishkaweu aniyuu naapeu kaa miinuwaachihaat ekw kaa itaat, “Nituhtuuh, shaash chimiinuwaatisiin. Ekaawii miin machituut, ekaa netuweyihtamuwane uste e maayaatahch chekwaan chechii ispayin.”

¹⁵ An maak naapeu kaa miinuwaachihaakanuut chii chistuhteu e nituu wiihtamuwaat aniyuu Jewa kaa niikaanishkuwaayich Jesus e chii miinuwaachihiikut.

¹⁶ Anichii maak Jewa iinuuh kaa niikaanishkuwaatwaau ekut kaa uhchi chihchipayitwaau e aanimaatwaau Jesus aniyuu uhchi e chii miinuwaachihaayich aniyuu naapeu e Jewa ayimiheuchiishikaayich.

¹⁷ Ekw kaa itikutwaau Jesus, “Nuuhtaawii muush miyutuutam aat e ayimiheuchiishikaayich, kaye niya maak ekun che wii ihtiyaan.”

¹⁸ Uyuu Jesus kaa itweyich, anichii Jewa iinuuh kaa niikaanishkuwaatwaau chii iteuch, “Niishtam namui uhchi chisteyihtam e Jewa ayimiheuchiishikaayich ekw miin kaa itwet Chishemanituu e Uhtaawiit. Kaye muyaam taan e ishpish chisteyihtaakusiyich Chishemanituu ekun kaa e iteyimisut. Eukw maak uyuu wehchi etituu nituweyimaatwaau chechii nipahaakanuyich.”

Jesus kaa aayimuumaat uhtaawiih

¹⁹ Jesus maak chii iteu, “Kuiskw chiwiihtamaatinaawaau, Ukusisimaau namui mikw wiya chika chii ihtuutam chekwaayuu. Uhtaawiimaauh kanawaapameu chekwaayuu e ihtiyich kaye wiya maak ekun e ati ihtit. Mikw taan e ihtiyich Uhtaawiih ekun e ihtit kaye wiya Ukusisimaau.

²⁰ Wesh Uhtaawiimaau saachiheu Ukusisimaauh kaye waapahtiyeu misiwe taan e ihtit. Chika wiichiheu etituu chechii maamishkaach ihtiyich. Ekw maak che maamishkaateyihtamekw.

²¹ Uhtaawiimaau wanishkaaneu aweyuu nipuwinihch uhchi ekw maak maayaat pimaatisiiwiniyuu, ekun kaye nihaau e ihtit Ukusisimaau, miyeu aweyuu pimaatisiiwiniyuu aniyuu waa miyaat.

²² Uhtaawiimaau namui wiyaaskuneu aweyuu. Wiya tekash chii miyeu Ukusisimaau chechii wiyaaskunicheyich.

²³ Ekw maak misiwe awen che chisteyimaat Ukusisimaau muyaam e ishi chisteyimaat Uhtaawiimaau. An awen ekaa kaa chisteyimaat Ukusisimaau namui chisteyimeu kaye Uhtaawiimaau aniyuu kaa pechi itishahukuyich.”

²⁴ “Kuiskw chiwiihtamaatinaawaau, an awen che pechi nituhtamukwe taan e iteuch kaye taapwehtawaate aniyuu kaa pechi itishahuyich kaachiche kata pimaatisiyuu. Namui kata uhchi wiyaaskunaakanuu wesh nipuwinihch chii uhchi utinaakanuu ekw pimaatisiiwinihch kaa ishi pachishtinaakanuut.

²⁵ Kuiskw chiwiihtamaatinaawaau shaash e utihchipayihch an tipahiikan uu che ispayihch, shaash maak ispayuu, anichii kaa nipitwaau kata pehtamuweuch Chishemanituu Ukusisa upehtaakusuwiniyuu. Anichii maak kaa pehtawaatwaau kata pimaatisiyuuch.

²⁶ Wesh wiya Uhtaawiimaau e ihtaat uhchipayuu pimaatisiiwin, miyeu maak Ukusisimaauh kaye wiya e ihtaayich chechii uhchipayiyich pimaatisiiwiniyuu.

²⁷ Chii miyeu kaye Ukusisimaauh tipeyihchichewiniyuu chechii wiyaaskunicheyich wesh wiya eukw Iinuu Ukusisa.

²⁸ Ekaawii kushkupayikw, wesh shaash peshunaakun misiwe anichii kaa chiskahaakanuutwaau chechii pehtamuwaatwaau Ukusisimaau upehtaakusuwiniyuu,

²⁹ ekw maak che wanishkaatwaau nipuwinihch uhchi. Ekw anichii kaa kuiskutaatisiitwaau kaachiche kata pimaatisiyuuch. Ekw anichii kaa machaatisiitwaau chika wanishkaanaakanuuch nipuwinihch uhchi chechii wiyaaskunaakanuutwaau.

Jesus etituu e ishi aayimuumisut

³⁰ “Niya maak, namui nuuhchi miikuun niya waa ihtiyaan chechii ihtiyaan, Iskutak e wiyaaskunicheyaan taan e itashumit Chishemanituu ekun e ihtiyaan. Kuiskunaakun maak an e wiyaaskunicheyaan wesh taan e itashumit an kaa pechi itishahuut ekun an waa ihtiyaan.”

³¹ “Niya maak mikw tipaachimisuyaan e itweyaan e aawiyaan Christ namui nipaa uhchi taapwehtaakun.

³² Kutak awen ihtaau e pechi tipaachimit e itwet e aawiyuuch Christ, nichischeyihten maak e taapwemakaniyich aniyuu kaa itaachimit.

³³ Chichii itishahwaawaauch awenich anite John e ihtaayich chechii nituchischeyimitwaau taapwe e aawiyuuche Christ. Chii taapweu maak taan kaa ishi tipaachimit John kaa itwet e aawiyuuch aniyuuh kaa pechi itishahwaat Chishemanituu.

³⁴ Namui iteyihtaakun chechii pechi wiihtamuut awen Christ e aawiyaan, wesh nichischeyimisun awen niya. Mikw ekun uu e itweyaan chechii pimaachihuyekw.

³⁵ Mwehch waashtenamaakan e chiihkaashtuwech ekun kaa ishinaakusit John tepaachimit. Chichii naheyihtenaawaau mikw weipishchiish chechii muuchicheyihtamekw anite uwaashtuwewinihch.

³⁶ Chii taapweu John taan kaa itaachimit, mikw maak niya taan e ishi maamishkaach ihtiyaan wetaach chiihkanaakuniyuu nuuhtaawii e chii pechi itishahuut. Wesh Nuuhtaawii nichii miikw suuhkaatisiiwiniyuu chechii maamishkaach ihtuuch chechii uhchi chischeyimakuyaan niya e aawiyaan Christ, wiya Nuuhtaawii e chii pechi itishahut.

³⁷ Uhtaawiimaau an kaa pechi itishahuut kaye wiya nipechi tipaachimikw. Namui maak nihtaa kuuhchi pehtamuwaanaawaau upehtaakusuwin kaye namui nihtaa kuuhchi waapamaawaau.

³⁸ Aniyuu utayimuwin namui chiwii kanuweyihtamuwaanaawaau chitehiiwaahch wesh namui chitaapwehtenaawaau wiya e chii pechi itishahuut.

³⁹ Yaakwaau chinaanituu chischeyihtenaawaau Chishemanituu utayimuwin e iteyihtamekw ekut anit chechii uhchi chischeyihtamekw taanite chechii uhchi ayaayekw kaachiche pimaatisiiwin. Chishemanituu utayimuwinihch ekute tepaachimikuyaan niya e aawiyaan Christ.

⁴⁰ Mikw maak namui chiwii pechi naasinaawaau chechii uhchi ayaayekw pimaatisiiwin.”

⁴¹ “Namui nitihtuuten chekwaan naapeu chechii uhchi pechi chisteyimit.

⁴² Wesh chichischeyimitinaawaau taan e iteyihtaakusiyekw. Namui chisaachihaawaau Chishemanituu anite chitehiiwaahch.

⁴³ Nichii takushin utah aschiihch Nuuhtaawii e chii pechi itishahuut yaapach maak namui chitaapateyiminaawaau. Kutak awen chii takushinit ekaa Chishemanituu uhchi pechi itashuwaat chipaa Nituhtaawawaau wiya.

⁴⁴ Taanite chechii uhchi taapwehtamekw mikw naapeu e wii nanihiiwehekw ekaa wii nanihiiwehekw Chishemanituu.

⁴⁵ Ekaawii iteyihtamukw che mamishimitakuch anite Uhtaawiimaau e ihtaat. Moses eukw che mamishimitaakw aat e iteyihtamekw nimiyuututenaan mikw Moses uwiishuwewin e nanihiihtamuwekw.

⁴⁶ Taapwe kaa taapwehtawekwe Moses kaye niya chipaa pechi taapwehtuunaawaau wesh niya aniyuu kaa pechi tipaachimit kaa masinahiichet.

⁴⁷ Ekw maak ekaa tiyaapwehtamuwekwe aniyuu Moses kaa itisinahiichet, taanite chechii uhchi taapwehtamekw niya nitayimuwin.”